“Wok Strong Long Mekim Wok Bilong Bikpela”

¹ Yumi wetim planti samting i kamap long mun Epril na Me! Long Epril 14 bai yumi mekim Memorial bilong tingim i dai bilong Krais. Kirapim planti man long kam long dispela bikpela bung: ol wanwok, ol wanblut i no bilip, ol wanskul, ol man i laik harim tok, na ol Baibel-stadi. Wokim lista bilong ol man yu laik singautim ol long kam long Memorial—nogut yu abrusim sampela.

² Long wik bihain long Memorial bai yumi kirapim olgeta man i bin kam long Memorial long kam harim wanpela bikpela pablik-tok i kamap long Epril 23, nem bilong en, “Klostu Nau Ol Lotu Giaman Bai Pinis.” Planti nupela man bai harim dispela strongpela tok, na mipela laik bai ol i mas save olsem ol i mas bung wantaim kongrigesen long olgeta taim​—⁠i no long taim bilong ol bikpela bung tasol.

³ Kingdom Nius: Long miting long Epril 23, bai ol i kamapim Kingdom Nius No. 34 i gat 4-pela pes na i kamapim ol tok i stret long taim bilong yumi. Bai yumi tilim dispela nius long planti hap, i go inap Me 14. Tru tumas, long taim bilong Memorial bai yumi “wok strong long mekim wok bilong Bikpela.”​—⁠1 Ko 15:⁠58.

⁴ Bai mipela salim planti Kingdom Nius i go long olgeta wan wan kongrigesen. Yupela i mas lukautim gut ol bokis i gat Kingdom Nius long en na no ken opim; larim i stap inap long miting i pinis long Epril 23 na nau kongrigesen na ol narapela man i ken kisim. Long Epril 23, taim miting bilong kongrigesen i pinis o program bilong kibung sekit o bikpela de kibung i pinis, olgeta man i kam bung bai kisim wanpela bilong dispela Kingdom Nius bambai ol i ken save long ol tok bilong en na redi long tilim.

⁵ Ol Elda Bai Mekim Planti Wok: Long kirap bilong dispela mun, lain elda i mas bung na toktok wantaim long ol samting bilong dispela bikpela wok. Olgeta kongrigesen i mas wok long inapim olgeta hap teritori bilong ol. Taim dispela wok i no pinis yet, wok strong long inapim olgeta hap teritori yupela i no bin autim tok long en insait long 6-pela mun i go pinis. Dispela wok em i bikpela samting, olsem na sapos yu inap, makim bikpela hap taim bilong mekim wok autim tok. Ating planti pablisa bai mekim wok painia haptaim. Na ating planti Baibel-stadi bai kamap pablisa i no baptais yet na helpim yumi long mekim dispela wok. Bai yumi kisim bikpela amamas taim yumi wok wantaim long mekim wok bilong Bikpela!

⁶ Ol brata bilong lukautim Buk-Stadi i mas stretim rot bambai grup i ken autim tok long Sarere na Sande. Ol i mas kirapim olgeta long ol i ken insait tru long dispela wok. Na tu, ol i mas makim wanpela o tupela apinun namel long wik bilong grup i ken autim tok. Taim skul i pinis long apinun, ating sampela bai bung bilong helpim ol skulmanki i laik mekim sampela wok moa.

⁷ Bilong helpim ol pablisa na painia, no ken putim ol bung bilong autim tok bihaintaim tumas long moningtaim. Ol bung i mas sotpela tasol. Long olgeta wan wan bung, stori long wanpela pasin bilong tilim Kingdom Nius i no hatwok tumas long mekim. Long ol bung i kamap long belo bek, toktok long wanpela o tupela pasin bilong mekim gobek long ol man i bin kisim Kingdom Nius. Ating bai sampela pablisa i gat laik long tilim dispela nius long moningtaim na long belo bek tu. Olsem na wasman bilong wok autim tok i mas stretim rot na bai oltaim i gat sampela hap teritori grup i ken autim tok long en. Raitim long notbuk nem na atres bilong ol man i laik harim tok. Raitim ol bikpela samting yupela i bin toktok long en. Dispela bai helpim yu taim yu mekim gobek insait long dispela wik o mun.

⁸ Sapos kongrigesen i helpim narapela kongrigesen long wokim teritori bilong ol, hap pepa ol i raitim nem na atres bilong ol man i laik harim tok, givim long kongrigesen i lukautim dispela teritori.

⁹ Yupela ol papamama, olsem wanem? Ol pikinini bilong yupela i wok long kamap pablisa i no baptais yet? Mipela kisim save olsem, long sampela kongrigesen i gat ol pikinini i bihainim gutpela pasin na inap sampela yia ol i bin autim tok wantaim papamama bilong ol i dediket pinis na ol i mekim gut dispela wok, tasol ol i no pablisa yet. Papamama i mas tingting gut, ol pikinini bilong ol inapim mak bilong kamap pablisa o nogat. Tupela elda i ken toktok wantaim het bilong famili na bai ol i ken save, pikinini inap kamap pablisa i no baptais yet o nogat.​—⁠om p. 99-100.

¹⁰ Olsem wanem? I gat sampela pablisa long teritori bilong kongrigesen ol i no mekim wok moa bilong litimapim nem bilong Jehova olsem ofa ol i givim long em? (Hi 13:15) Ating sampela bilong ol i bihainim yet ol stretpela lo bilong Baibel, tasol bel hevi na pasin bilong tingting planti long ol samting i bin daunim ol. Sapos long gutpela pasin pren wanpela elda i go lukim ol, ating dispela inap kirapim ol long bung gen wantaim kongrigesen, na bihain, long taim stret, ol i ken kirap gen long autim tok.

¹¹ Ol Manmeri i Winim Mak Ol i Ken Insait Long Dispela Wok na Amamas: Olsem wanem? Sampela bilong yupela ol pikinini na yangpela i hatwok long go long ol haus na autim tok? Olsem wanem long yupela ol nupela i no bin autim tok planti taim? Sapos yu insait long dispela wok bilong tilim Kingdom Nius, bai yu kisim bikpela amamas! Rot bilong mekim, em olsem: Redim wanpela tok i no hatwok tumas long mekim.

Yu ken mekim tok olsem:

◼ “Long dispela mun, long 232 kantri long olgeta hap, mipela mekim wok bilong tilim wanpela nius i gat ol bikpela tok long en. Ol tok bilong en i bikpela samting, long wanem, em i kamapim sampela as na yumi ken bilip olsem i gat rot bilong stretim ol hevi i painim yumi ol man long nau. Mipela laik bai yu kisim dispela nius.”

O yu ken tok olsem:

◼ “Long dispela mun, inap olsem 5 milion volantia i wok long tilim wanpela nius i gat ol bikpela tok long en, na ol i tilim long planti tok ples. Ol i wokim dispela nius bilong helpim ol man i laik bai ol hevi bilong nau i ken pinis. Em hia, nius bilong yu.”

Dispela em wanpela tok i no hatwok tumas long mekim:

◼ “Mipela wok long kirapim olgeta man long kaunim ol bikpela tok i stap long dispela nius, nem bilong en [kaunim nem bilong Kingdom Nius]. Lukim ol tok i stap hia long pes 2 i stori long ol bikpela hevi, olsem . . . [kaunim wanpela tok long Kingdom Nius]. Mipela save bai yu amamas long kaunim ol narapela tok i stap long dispela nius em i stret long taim bilong yumi. Em hia, nius bilong yu.”

¹² Tingim gut olgeta wan wan man i kisim dispela Kingdom Nius. Tok isi isi na tok klia; no ken tok hariap. Yumi mas wokim olgeta hap bilong teritori bilong yumi na givim wanpela Kingdom Nius long olgeta man i laik kaunim. Sapos i no gat man i stap, raitim gut long notbuk bambai yu ken go bek long narapela taim i stret na tilim Kingdom Nius long man bilong haus. Taim yu sanap long rot na autim tok, givim long man i laik kaunim. No ken tilim nating nating olsem em wanpela tanget samting. Gutpela sapos yu go bungim ol man i wokabaut long rot na stori liklik long olsem wanem ol tok bilong dispela nius em i bikpela samting. Mekim wok long Kingdom Nius long kain kain taim na ples, olsem taim yu raun long PMV o balus samting, o taim yu malolo long belo na yu autim tok long ol wanwok. Ol man i sik na no inap lusim haus, ol i ken tilim long dokta o nes, na long ol man i kam long haus bilong baim ol samting i go long ol man, na long ol narapela man i kam lukim ol.

¹³ Long taim bilong tilim dispela Kingdom Nius, bai yu mekim hamas gobek? Ating planti, long wanem, yumi mas go bek lukim olgeta man i laikim dispela Kingdom Nius. Taim yu bungim man long namba wan taim, tilim Kingdom Nius tasol. Taim yu mekim gobek, orait nau yu ken stori liklik long olsem wanem ol tok bilong Kingdom Nius i stret long taim bilong yumi. Putim gut yau taim man bilong haus i kamapim tingting bilong em long ol samting em i bin kaunim. Ol tok em i kamapim bai helpim yu long save long wanem ol tok i gutpela long kamapim long ol nupela magasin, na ol samting yu ken stori long en long narapela taim bihain. Sapos man i amamas long harim tok, wok long kirapim Baibel-stadi.​—⁠1 Ko 3:​6, 7.

14 ‘Hatwok Yupela i Mekim Bai i No Inap Lus Nating’: Olsem wanem? Dispela wok bai kamapim gutpela kaikai? Pol i tokim ol Korin: “Hatwok yupela i save mekim long Bikpela, em bai i no inap lus nating.” (1 Ko 15:58) Long ol yia i go pinis, God i bin blesim wok bilong tilim Kingdom Nius. Tupela marit i bin kisim ol samting bilong ol i go long wanpela nupela haus, na insait long bokis bilong tebol ol i painim wanpela Kingdom Nius bilong bipo. No gat narapela samting i stap long haus—dispela nius tasol. Taim ol i kaunim pinis, ol i bungim ol Witnes na tokim ol, ol i laik stadi long Baibel. Ol i kirap long kam long olgeta miting na bihain ol i tok ol i laik kisim baptais. Ating Kingdom Nius yu lusim long man, em tu inap kamapim wankain samting!​—⁠Lukim Kirap! (tok Inglis), Novemba 8, 1976, pes 15.

¹⁵ Yumi gat bikpela wok bilong mekim. Mipela laik bai olgeta wan wan kongrigesen inapim pinis olgeta hap bilong teritori bilong ol taim Me 14 i kirap pinis. Sapos kongrigesen i no mekim pinis, ol i ken skruim taim bilong tilim Kingdom Nius i go inap long pinis bilong mun. Mipela salim 250 Kingdom Nius i go long olgeta wan wan painia oltaim na painia haptaim. Olgeta wan wan pablisa bai kisim 50. Sapos ol painia na pablisa i no inap tilim olgeta skel bilong ol, gutpela sapos ol i givim ol nius ol i no inap tilim i go bek long kongrigesen bambai ol narapela i ken mekim wok long ol. Sapos yumi olgeta i wok gut wantaim long dispela samting, dispela bai helpim planti man long kisim dispela nius. Sapos teritori bilong kongrigesen i bikpela tumas na namel long mun Me kongrigesen i no wokim pinis teritori bilong ol na sampela nius i stap yet, ol i ken singautim sampela kongrigesen klostu long helpim ol. Long sampela narapela kongrigesen, sapos sampela pablisa i mekim wok painia haptaim o lusim sampela aua moa long autim tok, ating dispela bai helpim kongrigesen long inapim teritori bilong ol.

¹⁶ Bilong inapim wok bilong yumi, yumi mas givim bel olgeta long Jehova. (Kl 3:23) Ol man inap stap laip o kisim bagarap. Ol man i mas save long insait bilong ol samting i kamap long nau. Taim i sot pinis. Ol i mas save, ol man i no inap stretim ol hevi. God tasol inap mekim. Sapos man i laik bai God i ken mekim gut long em, kwiktaim em i mas lusim pasin bilong holim tupela tingting​—⁠em i mas kirap tasol na mekim wok i stret wantaim laik bilong God.

¹⁷ Taim dispela bikpela wok i pinis long Me 14, bai yumi slek long mekim wok? Nogat! Bai yumi wok strong yet long mekim wok, olsem Pol i tokim yumi pinis.