‘Wok Strong Long Mekim Ol Gutpela Wok’ Long Epril!

¹ Long yia i go pinis, yumi tilim planti milion Kingdom Nius Namba 34 long olgeta hap bilong graun​—⁠em bikpela wok tru yumi mekim. Ol painia wantaim ol pablisa i bin wok strong long mekim olsem. Yu tu yu bin insait long dispela wok? Sapos olsem, ating yu bin amamas tru long mekim. Ating nau yu laik save, Long dispela yia, bai yumi mekim wanem ‘gutpela wok’?​—Ta 2:​14.

² Long mun Epril na Me, bai yumi tilim Kirap! bilong Epril 8, 1996, i stori long “Taim i No Gat Pait Moa.” Ating planti man bai laikim dispela tok, olsem na yumi mas wok strong long tilim dispela magasin long planti man. Dispela Kirap! i gat bikpela tok long en, olsem na long Epril na Me yumi mas tilim dispela magasin inap long olgeta long kongrigesen i pinis.

³ Mak Yumi Laik Winim​—⁠Olgeta Pablisa i Mas Insait Long Dispela Wok: Long mun Epril, i gutpela sapos olgeta wan wan pablisa long dispela kantri i ken insait long wok autim tok. Nau tasol yumi mekim Memorial bilong tingim i dai bilong Krais, olsem na ating yumi laik autim tok na “givim biknem long God” olsem ofa bilong kamapim bel bilong yumi, yumi pilim tru ol gutpela pasin bilong God.​—Hi 13:15.

⁴ Yumi mas save husat husat long kongrigesen yumi mas helpim ol, na bai olgeta long kongrigesen i ken insait tru long wok autim tok long mun Epril. (Ro 15:⁠1) Ol brata i lukautim Buk-Stadi ol i mas save long sindaun bilong ol brata na sista long grup bilong ol na bai ol inap stretim rot bilong helpim ol, sapos i gat wok long mekim. Olsem wanem? I no gat PMV samting na sampela i hatwok long kam long grup? Husat i gat ka na i ken helpim ol? Sampela i man bilong sem o pret liklik? I gat sampela pablisa i save gut long mekim wok autim tok na ol i ken wok wantaim ol? Olsem wanem long ol man i sik o i no inap lusim haus? Ol inap autim tok long telefon, raitim pas, o kain samting olsem?

⁵ Sampela i bin lusim wok autim tok na ol brata i bin wok long strongim ol​—⁠kain man olsem ating yumi inap kirapim ol long insait gen long wok autim tok. Ating dispela bikpela wok bilong tilim Kirap! inap kirapim ol olsem.

⁶ Lainim Ol Pikinini na Ol i Ken Insait Long Dispela Wok: Inap sampela yia planti pikinini bilong ol Witnes Bilong Jehova ol i bin autim tok wantaim papamama bilong ol, tasol ol i no pablisa yet. Olsem wanem? Nau em i taim bilong ol i ken kamap pablisa i no baptais yet? Bel bilong ol i kirapim ol na ol i redi long insait tru long wok bilong i go long ol haus na autim tok? Long taim bilong famili-stadi, papa i mas tingim krismas na save bilong ol pikinini em ol i winim mak, na helpim ol long redim sampela tok ol i ken mekim. Ol pikinini i gat bikpela krismas liklik ol i ken tingim wanpela askim ol i ken kamapim bilong kirapim tingting bilong man bilong haus na wanpela hap long magasin i bekim dispela askim. Ol liklik pikinini i ken mekim liklik tok tasol. Ol i ken tok olsem, “long dispela mun, long olgeta hap, mipela i mekim wok bilong tilim dispela nius i gat bikpela tok long en,” na ol i ken kirapim man bilong haus long kaunim. Buk Toktok Gut inap givim sampela gutpela tingting long yu. Taim famili i redim tok ol i laik mekim, ol i mas redim sampela tok bilong bekim ol tok ol man i save kamapim bilong pasim tok bilong yumi. Taim yupela i sindaun kaikai na long ol narapela taim tu, kirapim famili long stori long ol samting i bin painim ol taim ol i autim tok.

⁷ Ol Baibel-Stadi i Winim Mak Ol i Kirap Mekim Wankain Wok Olsem Jisas i Bin Mekim: Jisas i no lainim ol man long ol tok bilong Baibel na em tasol, nogat. Em i go wantaim ol na lainim ol long pasin bilong autim tok. (Lu 8:1; 10:​1-​11) Olsem wanem long nau? Ating yumi inap kirapim planti Baibel-stadi long inapim mak bilong kamap pablisa i no baptais yet, na long mun Epril ol i ken autim tok.

⁸ Sapos yu gat wanpela Baibel-stadi, tingim ol dispela askim: Sumatin i wok long kamap strong inap long krismas na save bilong em? Em i kirap pinis long tokim ol narapela long bilip bilong em? Em i wok long kisim pasin bilong “nupela man”? (Kl 3:​10) Em inapim mak bilong kamap pablisa i no baptais yet, olsem pes 97 i go 99 bilong buk Lo i kolim? Sapos yu ting em inapim mak, gutpela sapos yu toktok wantaim em long dispela samting. Sapos em i laik autim tok, pastaim wasman siaman i mas stretim rot bilong tupela elda i ken toktok wantaim em. Tasol sapos i olsem wanpela samting i pasim rot na em i no autim tok, orait, wanpela elda i ken go wantaim yu long dispela Baibel-stadi na kirapim em long kamapim tingting tru bilong em long tok i tru. Taim sumatin i kamapim pinis tingting bilong em, ating elda i ken kamapim sampela gutpela tok bilong helpim em, na sampela tok bilong Baibel tu.

⁹ Stretim Gut Ol Wok na Bai Yu “Gat Taim” Bilong Mekim Wok Painia Haptaim: Long olgeta yia long taim bilong Memorial, planti tausen brata sista i tingim i dai bilong Jisas na dispela i kirapim ol long stretim gut ol wok na bai ol i “gat taim” bilong mekim wok painia haptaim. (Ef 5:​15-​17) Tru, yumi mas lusim sampela samting yumi laik mekim, tasol yumi bai kisim planti blesing. Long taim i no gat skul, sampela yangpela i save mekim wok painia haptaim. Sampela manmeri i wok mani long olgeta de ol i save autim tok long apinun na long Sarere Sande bambai ol i ken mekim dispela wok. Long dispela rot, famili wantaim i bin mekim wok painia haptaim! Long sampela kongrigesen, klostu olgeta elda na wokman wantaim meri bilong ol i bin mekim wok painia haptaim. Dispela i save kirapim sampela narapela long kongrigesen long mekim dispela wok, olsem na long mun Epril, planti long kongrigesen i save mekim wok painia haptaim.

¹⁰ Maski yu inap mekim wok painia haptaim o nogat, gutpela sapos yu painim rot bilong mekim bikpela wok moa long mun Epril. Tingim wanpela samting yu laik mekim na putim olsem mak yu laik winim; ating em samting yu mas wok strong liklik long mekim tasol em samting yu inap winim. Sapos yu laik ‘givim olgeta samting bilong yu na laip bilong yu tu’ long mekim wok bilong Jehova inap long skel bilong yu, Jehova bai blesim dispela wok.​—2 Ko 12:⁠15.

¹¹ Ol Bung Bilong i Go Autim Tok: Stretim rot bambai grup i ken bung long olgeta de na tilim dispela Kirap! No ken putim ol bung bilong i go autim tok bihaintaim tumas long moningtaim. Na tu, makim sampela apinun namel long wik bilong grup i ken autim tok. Planti pablisa bai autim tok long Sarere Sande, olsem na kongrigesen i mas putim sampela bung bilong autim tok long Sarere, long moningtaim na long belo bek, inap long wok bilong tilim dispela Kirap! i pinis.

¹² Ol brata i lukautim bung bilong i go autim tok i mas stretim rot na bai oltaim i gat sampela hap teritori grup i ken autim tok long en. Sapos i gat sampela hap teritori em longtaim pinis grup i no bin wok long en, orait, autim tok long dispela teritori pastaim.

¹³ Bai Yu Tilim Hamas Magasin? Em samting bilong olgeta wan wan. Bilong helpim yu long skelim hamas magasin yu inap tilim, tingim wanem kain teritori yu bai autim tok long en, krismas bilong yu, yu save sik o nogat, hamas aua yu inap autim tok, na ol narapela samting tu. Tasol tingim dispela tok long Wastaua bilong Janueri 1, 1994: “Pablisa i ken tingting long tilim 10-pela magasin long olgeta mun, na ol painia i ken tingting long tilim 90 magasin long olgeta mun.” Olsem wanem? Dispela tok i stret long yu?

¹⁴ Ol Elda​—⁠Stretim Gut Rot: Stretim rot bilong tilim dispela Kirap! long olgeta hap teritori bilong kongrigesen. Tingting long autim tok long ol stua na ofis insait long teritori bilong kongrigesen. Ol brata sista i mekim dispela wok ol i mas redi gut pastaim na bilas gut. I no olsem ol i mas mekim bikpela tok. Taim yu bungim bisnisman, yu ken tokim em, planti taim yu no bungim ol bisnisman long haus bilong ol, olsem na yu kam long ples wok bilong em bilong soim wanpela stori long em yu ting em bai laikim. Orait nau yu ken stori liklik long wanpela tok long magasin. Ol brata i mas stretim gut wok bilong tilim dispela Kirap! long rot. Bilong mekim gut dispela wok, yu yet yu mas kirap na go klostu long ol man na toktok wantaim ol​—⁠nogut yu sanap tasol na wetim man i kam long yu. Taim yu autim tok long rot, yu stap long ai bilong planti manmeri, olsem na gutpela sapos yu pasim klos i stret. Ating i gat sampela narapela hap long teritori yu ken tilim dispela Kirap! long en, olsem ples balus, haus sik, maket, ples bilong putim ka. Lain elda i ken stretim rot bilong autim tok long ol dispela hap.

¹⁵ Jehova em i man bilong wok; em i no save les. (Jo 5:​17) Em i wokim heven na graun, na ol diwai na ol animal tu, na em i wok i go inap long taim em i wokim man. Yumi gat laip na yumi stap, long wanem, God i amamas long mekim wok. Yumi laik “bihainim ol pasin” bilong God na yumi laikim em tumas, na dispela i mas kirapim yumi long ‘wok strong long mekim ol gutpela wok.’ (Ef 5:1; Ta 2:​14) Jehova em inap tru long yumi givim bel olgeta long mekim wok bilong em, em wok bilong autim tok, na yumi laik bai dispela wok i ken kamapim gutpela kaikai, olsem na yumi mas i gat laik long mekim gut dispela wok. Tasol maski yumi mekim bikpela wok o liklik wok, Jehova i save tingim ol wok yumi mekim, na wok bilong yumi i no inap lus nating. (1 Ko 15:58) Yumi pilim tru dispela samting, olsem na long mun Epril, gutpela sapos yumi wok strong na bilip olsem Jehova bai orait long yumi na blesim yumi na ol wok yumi mekim bai kamap gutpela tasol!