Inap Yumi Mekim Bikpela Wok Moa Long Epril 2000 Winim Olgeta Mun Bipo?
1 Long Trinde apinun, Epril 19, bai i gat wanpela bikpela bung tru bilong dispela yia bilong wok. Long dispela de, taim san i wok long i go daun long olgeta hap, olgeta kongrigesen na grup bilong ol Witnes Bilong Jehova bai mekim Memorial bilong tingim indai bilong Krais. Maski yumi stap long wanem wanem hap, de bilong tingim ofa bilong Krais Jisas em i wanpela bikpela de tru bilong dispela yia. Mipela i makim det bilong Memorial long mun Epril long kalenda bilong ol Witnes Bilong Jehova bilong yia 2000.
2 Mun Epril olgeta i opim rot long yumi ken kamapim klia olsem yumi pilim tru pasin sori Jehova i bin mekim taim em i givim Pikinini man bilong em olsem ofa. Yumi ken mekim olsem wanem? Aposel Pol i tok: “Krais i bin givim bel bilong en long mipela, na dispela i save kirapim mipela long wok, long wanem, mipela i save pinis olsem, wanpela man i bin kisim ples bilong yumi olgeta na i dai, na long dispela rot yumi olgeta i dai pinis. Dispela man i mekim olsem bilong helpim yumi ol man i stap laip, bai yumi no ken tingting moa long yumi yet na wokabaut. Nogat. Yumi ken tingting long dispela man i kisim ples bilong yumi na i dai pinis, na i kirap bek tu. Yumi ken tingting long em na wokabaut.” (2 Ko 5:14, 15) Em nau, long mun Epril yumi ken kamapim klia olsem yumi no tingim yumi yet na wokabaut, nogat; tasol yumi tingim dispela man i bin dai bilong helpim yumi. Olsem na long mun Epril yumi ken mekim bikpela wok moa winim olgeta narapela mun bipo olsem ol wokman bilong autim tok bilong Kingdom!
3 Putim Aplikesen Bilong Mekim Wok Painia Haptaim Long Epril: Aposel Pol i soim gutpela piksa long yumi taim em i tok: “Tasol mi no ting laip bilong mi em i namba wan samting. Mi no strong tumas long holimpas laip bilong mi. Nogat. Mi laik bihainim dispela rot mi wokabaut long en na pinisim dispela wok mi bin kisim long Bikpela Jisas. Dispela wok em bilong autim tok long gutnius bilong marimari bilong God.” (Ap 20:24) Yumi gat dispela wankain gutpela wok bilong autim gut tok long God Jehova. Bilong mekim olsem, yumi laik planti ol i mekim wok painia haptaim long mun Epril, winim olgeta narapela mun bipo!
4 I gat 5-pela Sarere Sande long mun Epril 2000, olsem na em i wanpela gutpela mun tru bilong planti ol i ken insait long wok painia. Long Epril 1993, namba bilong lain i mekim wok painia haptaim i go bikpela, winim olgeta narapela mun bipo, dispela 286 brata sista i bin mekim wok painia ol i olsem 9 pesen bilong lain pablisa olgeta. Sikspela yia bihain, namba bilong ol pablisa i bin putim ripot long Epril 1999, em i go bikpela winim 11 pesen. Dispela i makim olsem yumi inap winim namba bilong dispela lain i bin mekim wok painia haptaim long Epril 1993. Na tu, ol i daunim aua ol painia haptaim i mas winim, olsem na dispela i opim rot long planti moa long kongrigesen inap mekim dispela wok. Olgeta wan wan pablisa i baptais pinis, ol i mas beten na skelim, ol inap mekim wok painia haptaim long Epril o nogat.
5 Long kalenda bilong yia 2000 long hap bilong mun Epril yu ken wokim nau wanpela sedyul bilong yu bilong mekim wok. Makim wanem ol de yu inap mekim wok autim tok long en, na bungim olgeta aua em yu ting yu inap mekim wok autim tok long dispela mun. Bungim ol aua yu inap lusim bilong autim tok long ol haus na long kain kain taim na ples. Olsem wanem? Taim yu bungim olgeta aua wantaim, namba i klostu liklik long 50 aua em ol painia haptaim i mas winim? Sapos yu no inapim ol aua ol painia haptaim i mas kisim, yu ting yu inap mekim sampela senis long sedyul bilong yu bambai yu ken lusim taim bilong mekim wok painia haptaim? Bilong inapim 50 aua long mun Epril, yu mas lusim 1 aua na 40 minit tasol long olgeta wan wan de.
6 Nau ol i daunim tu ol aua ol painia oltaim i mas winim, olsem na yu bin tingting long mekim wok painia? Epril em i gutpela mun tru bilong kirap mekim dispela wok! Sapos yu gat tupela tingting long yu inap winim 70 aua em ol painia oltaim i mas winim o nogat, gutpela sapos yu mekim wok painia haptaim long Epril na putim 70 aua olsem mak bilong yu. Taim yu save olsem yu inap mekim dispela wok, ating dispela bai kirapim yu long kamap wanpela painia oltaim hariap.—Lukim buk Lo, pes 113, 114.
7 Givim Bel Long Autim Gutnius Olsem Wanpela Pablisa: Yumi olgeta, ol pablisa na ol painia, yumi laikim tru God na ol narapela man, na dispela i save kirapim yumi long givim bel tru long mekim wok bilong Jehova inap long skel bilong yumi. (Lu 10:27) Long dispela rot yumi kamapim klia olsem long “olgeta taim yumi save mekim hatwok tru.” Yumi mekim olsem, long wanem, “God bilong i stap oltaim, em i man bilong kisim bek olgeta manmeri, na em i kisim bek tru yumi manmeri i bilip long em.” (1 Ti 4:10) Long dispela as, yumi laik bai olgeta pablisa i givim bel long mekim wok bilong Kingdom long mun Epril.
8 Yumi no ken lusim tingting long tok Jisas i bin mekim, olsem: “Planti kaikai tumas i mau pinis long gaden, tasol i no gat planti wokman i stap bilong kisim. Olsem na yupela i mas beten long Papa bilong gaden, bai em i salim ol wokman i go bungim kaikai bilong en.” Bihain long Jisas i mekim dispela tok, wantu tasol em i salim 12-pela aposel bilong em i go autim tok. (Mt 9: 37, 38; 10:1, 5, 7) Inap wanpela yia bihain, taim em skulim pinis 12-pela aposel long mekim wok autim tok, Jisas i ‘makim 70 man moa, na em i salim ol i go,’ na em i givim wankain tok long ol, olsem: “Planti kaikai tumas i mau pinis long gaden, . . . Olsem na yupela i mas beten long Papa bilong gaden, bai em i ken salim ol wokman i go bungim kaikai bilong en.” (Lu 10:1, 2) Buk Aposel i stori olsem Jehova i bin harim ol dispela beten bilong ol. Long Pentikos bilong yia 33, namba bilong ol disaipel i go bikpela inap long 120. Na bihain, namba i go bikpela inap long 3,000 na bihain 5,000. (Ap 1:15; 2:41; 4:4) Na bihain long dispela “planti manmeri moa i kamap disaipel.” (Ap 6:7) Olsem tasol long taim bilong yumi, yumi mas wok long askim Bikman long salim yet planti wokman moa bilong autim tok bilong Kingdom! Bilong mekim ol samting i stret wantaim beten bilong yumi, olgeta wan wan pablisa long kongrigesen i mas makim taim bilong insait long wok autim tok long olgeta mun.
9 Plis lukluk gut long mun Epril long kalenda bilong 2000. Namba wan na namba tu de bilong mun em Sarere na Sande, olsem na yu ting yu inap stretim rot bilong autim tok long dispela Sarere Sande bilong kirapim hariap wok bilong mun Epril? Yu inap insait long olgeta “De Magasin” wantaim Buk-Stadi grup bilong yu long dispela mun? Yu inap lusim wanpela aua o sampela aua moa long mekim wok autim tok long olgeta wan wan Sande? Yu inap stretim rot bilong mekim wok autim tok long apinun? Yu no ken lusim tingting long autim tok long kain kain taim na ples taim rot i op, olsem long ples wok, long skul, o taim yu mekim sampela narapela wok bilong olgeta de. Makim ol de yu inap mekim wok autim tok long en, na mekim wok long kalenda bilong raitim ol aua na ol samting yu tilim long dispela mun.
10 Mun Epril em i gutpela mun bilong lain i winim pinis ol mak na ol elda i orait long ol i ken kirap mekim wok olsem pablisa i no baptais yet. Sapos yu stadi long Baibel wantaim wanpela man, dispela man i kamap strong inap long em i ken toktok wantaim wasman siaman bambai ol i ken skelim em inap kamap pablisa i no baptais yet o nogat? (Long ol hap i no gat elda long en, ating wasman sekit tasol i ken mekim ol askim wantaim man i laik kamap pablisa i no baptais yet.) Sapos yu gat ol pikinini i no baptais yet, yu bin toktok wantaim ol elda o wasman sekit long ol pikinini i stap olsem wanem long ol samting bilong spirit? Ating nau em i gutpela taim bilong ol i ken kirap autim tok, a?—Lukim buk Lo, p. 97-100.
11 Taim yumi mekim bikpela wok moa long Epril 2000 winim olgeta mun bipo, yumi olgeta i mas insait long wok autim tok, na putim ripot long pinis bilong mun. (Skelim wantaim Mak 6:30.) Taim ol nupela pablisa i no baptais yet i autim tok long namba wan taim, yupela i mas kirapim ol long putim ripot hariap. Taim yumi mekim wok bilong yumi wan wan, yumi ken helpim ripot bilong mun Epril long kamap gutpela, na tu, wok autim tok bai litimapim tru nem bilong Jehova.
12 Kisim Ol Narapela i Kam Long Memorial: Bai yumi amamas tru sapos namba bilong ol manmeri i kam long Memorial long yia 2000 em i winim namba bilong 1999, a? Yes! Dispela bai makim olsem planti manmeri moa i kam bung wantaim, bilong kamapim klia olsem ol i pilim tru bikpela pasin sori God Jehova na Kais Jisas i bin mekim bilong helpim yumi! (Jo 3:16; 15:13) Stretim ol samting bambai i no gat wanpela samting i pasim yu na famili bilong yu long kam long Memorial.
13 Nau em taim bilong singautim ol narapela long kam long Memorial. Wokim lista bilong olgeta manmeri em yu laik bai ol i kam. Raitim nem bilong ol man i bin stadi long bipo, na ol man i stadi long nau, na olgeta gobek bilong yu. Yu ken raitim tu nem bilong ol man yu save long ol long ples wok, long skul, na long hap yu sindaun long en, na tu, ol man yu save mekim wok bisnis wantaim ol. Yu no ken lusim tingting long raitim nem bilong ol wantok na ol narapela man. Taim yu wokim lista pinis, kirap long singautim olgeta wan wan long kam. Tokim ol klia long ples na taim stret bilong Memorial. Taim Epril 19 i wok long kam klostu, go lukim ol o ringim ol bilong kirapim ol long tingim Memorial. Tokim ol olsem ol i ken kam wantaim yu long Memorial long dispela nait.
14 Olsem Sosaiti i bin toksave long bipo, lain elda bai wok strong long kirapim olgeta pablisa i no autim tok moa, long kam long Memorial. (Mt 18:12-14) Ol elda i ken ritim gen pas bilong Sosaiti bilong Februeri 2, 1999. Kuskus bilong kongrigesen i mas wokim lista bilong olgeta pablisa i no autim tok moa, na wasman bilong wok autim tok i ken makim ol elda long i go lukim ol na singautim ol long i kam long Memorial. (Long ol hap i no gat elda long en, wasman sekit bai helpim ol pablisa i no autim tok moa.) Taim ol elda i go lukim ol hariap bilong strongim ol, ating ol inap helpim ol dispela pablisa long autim tok gen, na ol inap kirap autim tok long mun Epril. Taim ol i autim tok wantaim wanpela strongpela pablisa, dispela bai strongim ol.
15 Kirapim Olgeta Long Autim Tok Long Epril! Bilong bikpela wok autim tok inap kamap long Epril 2000, winim olgeta narapela mun, ol elda na ol wokman na ol papa bilong famili ol i mas stretim gut ol wok bilong ol. Ol elda bai wok strong long stretim gut olgeta samting na long go pas long mekim wok. (Hi 13:7) Stretim gut ol bung bilong wok autim tok long ol de namel long wik na long Sarere Sande. Na tu, ating ol i ken mekim ol bung bilong wok autim tok long apinun olsem 5 klok samting. Putim long notisbot wanpela sedyul i kamapim olgeta wok samting yupela bai mekim long Epril. Makim wanpela brata long lukautim olgeta wan wan bung bilong wok autim tok. Stretim gut ol teritori bambai i gat inap teritori bilong olgeta wan wan grup i ken mekim wok long en.
16 Long Epril, bai yumi tilim Wastaua na Kirap! Bilong kirapim ol Baibel-stadi, yumi mas tilim buklet Yumi Mas Mekim Wanem? long ol man i laik harim tok. Olsem na yumi mas i gat planti magasin na buklet bilong mekim wok long en.
17 Long pinis bilong mun, ol wasman bilong Buk-Stadi na helpim bilong ol i mas kirapim olgeta long grup bilong ol long putim ripot hariap taim mun i pinis. Ating ol i ken mekim olsem long Sande Epril 30. Orait, taim ol i bungim ol ripot na sapos ol i luksave olsem sampela pablisa i no bin putim yet ripot bilong ol, orait long gutpela pasin ol i ken tokim ol dispela pablisa long putim ripot paslain long Me 6. Long dispela de ol i mas salim ripot i go long brens-ofis. Kuskus inap askim ol wasman bilong Buk-Stadi long helpim em long bungim ol ripot ol i no bin kisim yet.
18 Taim bilong Memorial em wanpela bikpela de tru bilong ol manmeri bilong God. Em taim bilong yumi olgeta i mas mekim bikpela wok long wok bilong Jehova. Sapos olgeta i givim bel long autim gutnius, na sapos ol brata sista em ol inap mekim wok painia haptaim ol i mekim olsem, na sapos yumi givim bel long kisim ol narapela i kam wantaim yumi long Memorial bilong tingim indai bilong Jisas, orait bai yumi mekim bikpela wok tru. Yumi ken beten strong bambai Jehova i ken blesim wok bilong yumi taim yumi wok strong long mekim bikpela wok moa long Epril 2000, winim olgeta narapela mun bipo, bilong litimapim nem bilong God!—Hi 13:15.
[Blok long pes 3]
286 Painia Haptaim
Long Epril 1993 namba bilong ol painia haptaim i bin i go antap, winim olgeta taim bipo.
[Blok long pes 4]
3,575 Pablisa
Long Ogas 1998 namba bilong ol pablisa i bin i go antap, winim olgeta taim bipo.
[Blok long pes 5]
15,973 Manmeri i Kam Long Memorial
Long 1999 namba bilong ol man i kam long Memorial i go antap, winim olgeta taim bipo.