Autim Tok na Mekim Gut Dispela Wok
1 Jisas i stap olsem wanpela lida na em i bin redim ol disaipel bilong em long mekim bikpela wok bilong autim tok. (Ais. 55:4; Lu. 10:1-12; Ap. 1:8) Aposel Pita i stori long wok Jisas i bin tokim ol long mekim na em i tok: “Em i tokim mipela long autim tok long ol manmeri na tokaut klia olsem, ‘God i bin makim dispela man tasol bai em i stap man bilong harim kot bilong ol man i stap laip na bilong ol man i dai pinis.’ ” (Ap. 10:42) Yumi mas mekim wanem bilong mekim gut dispela wok?
2 Yumi inap lainim planti samting long stori bilong aposel Pol. Taim em i bung wantaim ol hetman bilong kongrigesen long Efesus, em i tokim ol gen: “Mi no surik long autim olkain gutpela tok inap long helpim yupela. Na long ol bung bilong ol manmeri na long olgeta haus bilong yupela tu, mi bin skulim yupela. Em yupela i save. Oltaim mi bin autim tok strong long ol Juda na long ol Grik, long yumi mas tanim bel i go long God, na yumi mas bilip long Bikpela bilong yumi Jisas.” Maski ol hevi i painim em, Pol i bin wok strong long autim gutnius long planti man. Em i no laik autim ol bikpela tok i tru tasol long ol man, nogat, em i strong long “autim olgeta tingting bilong God.” Bilong mekim olsem, em i amamas long wok strong na lusim sampela samting bilong em yet. Em i tok moa: “Mi no ting laip bilong mi em i namba wan samting. Mi no strong tumas long holimpas laip bilong mi. Nogat. Mi laik bihainim dispela rot mi wokabaut long en na pinisim dispela wok mi bin kisim long Bikpela Jisas. Dispela wok em bilong autim tok long gutnius bilong marimari bilong God.”—Ap. 20:20, 21, 24, 27.
3 Olsem wanem yumi inap bihainim pasin bilong Pol long nau? (1 Ko. 11:1) Yumi inap bihainim pasin bilong em taim yumi wok strong long painim ol man i gat gutpela bel maski yumi yet i karim hevi, na yumi wok strong long autim gutnius long ol man bilong kain kain lain na tok ples, na yumi givim bel long kirapim laik bilong ol man i amamas long harim tok. (Mt. 10:12, 13) Bilong mekim olsem yumi mas lusim taim na strong bilong yumi, na yumi mas laikim tru ol man.
4 Yu Inap Mekim Wok Painia Haptaim? Mas na Epril i gutpela taim long autim gutnius long planti man long rot bilong wok painia haptaim. Las yia planti tru i bin taitim bun na mekim wok painia haptaim na dispela i gutpela samting tru bilong strongim bel bilong yumi!
5 Wanpela meri i gat 80 krismas na em i gat planti sik long skin, em i pilim tru gutpela tok em oganaisesen bilong Jehova i givim bilong strongim man. Em i tok: “Dispela tok i kirapim laik mi bin i gat inap longtaim pinis, na mi pilim olsem mi mas mekim wok painia haptaim wanpela taim moa.” Em i pasim tok long mekim long mun Mas. Em i tok: “Pastaim mi bin sindaun na skelim ol samting mi bai mekim. Mi toktok long dispela samting wantaim pikinini meri bilong mi, long wanem, em i mas helpim mi. Mi kirap nogut taim em tu i kisim wanpela aplikesen bilong em yet.” Long mun Mas, dispela lapun sista i lusim 52 aua long wok autim tok. “Planti taim mi beten long Jehova i mas strongim mi taim mi pilim olsem strong bilong mi i laik pinis. Long pinis bilong mun, mi amamas tru na bel i stap isi, na planti taim mi tok tenkyu long Jehova long em i bin helpim mi. Mi laik mekim gen wok painia haptaim.” Amamas em i bin kisim long wok painia haptaim inap kirapim ol narapela em ol i gat laik tru long mekim wok painia haptaim maski ol i gat ol bikpela sik samting.
6 Wanpela brata em wantu tasol ol i bin pinisim em long wok, em i kirap yusim dispela taim long mekim wok painia haptaim. Long mun em i mekim wok painia haptaim long en, em i kirap givim bel moa yet long autim tok, na long pinis bilong mun, em i kirapim pinis wanpela nupela Baibel-stadi. Taim em i tingim gen wok em i bin mekim, em i tok: “Em i gutpela mun tru!” Em i amamas tru long Jehova i stiaim na helpim em! Yes, Jehova i bin mekim gut tru long em, long wanem, em i bin mekim bikpela wok moa long autim tok, na Jehova bai mekim olsem long yu tu.—Mal. 3:10.
7 Planti pablisa i hatwok long mekim wok painia haptaim. Tasol maski ol i mas wok skin na mekim wok bilong lukautim famili, na karim ol hevi long sindaun bilong ol yet, planti ol i bin mekim wok painia haptaim. Bilong autim tok long ol man yumi mas lusim bikpela hap taim na strong bilong yumi, tasol ol gutpela blesing yumi kisim i winim tru ol samting yumi lusim.—Snd. 10:22.
8 Mas na Epril i gutpela taim tru bilong mekim wok painia haptaim. I gat 5-pela Sarere Sande long mun Mas. Wok bilong autim tok long ol dispela 5-pela wiken na long ol apinun inap opim rot long ol man i mekim wok mani fultaim long mekim wok painia haptaim. Na tu, i gat pablik-holide long mun Epril, olsem na yu inap autim tok long ol dispela taim. Ating sampela bai i gat ol holide bilong skul o wok, na dispela inap opim rot long ol i ken inapim 50 aua. Olsem wanem? Bilong inapim 50 aua long autim tok long Mas o Epril, yu inap bihainim wanpela sediul mipela i kamapim wantaim dispela stori? Toktok wantaim ol narapela long sediul yu laik bihainim; dispela inap kirapim sampela long wok wantaim yu long autim tok. Sapos yu no inap long mekim wok painia haptaim, putim wanpela mak yu laik winim long ol dispela mun, na wok wantaim ol pablisa i mekim wok painia haptaim. Stretim ol samting nau bilong mekim bikpela wok moa bilong autim tok long Mas na Epril.
9 Kamapim Olsem Yu Pilim Tru Memorial: Long olgeta yia long ol wik paslain na bihain long Memorial, pasin bilong tenkyu tru long pe bilong baim bek man i save kirapim planti tausen manmeri long lusim sampela wok samting bilong ol yet na mekim painia haptaim. (Ef. 5:15, 16) Long Papua New Guinea long yia i go pinis, inap 348 i mekim wok painia haptaim long Mas, na 203 long Epril. Averes bilong dispela tupela mun em 276. Dispela namba i winim tru averes bilong ol painia haptaim long ol wan wan mun paslain long Mas, em inap olsem 58. Long dispela yia long taim bilong Memorial, rot i op gen long kamapim olsem yumi tenkyu tru long ofa bilong Krais bilong baim bek man, na yumi ken mekim olsem taim yumi mekim bikpela wok moa bilong autim tok.
10 Taim Epril 16 i wok long i kam klostu, tingim olsem wanem Memorial i bikpela samting long yu yet. Tingting long ol samting i kamap long dispela taim ol man i kilim i dai Krais, na ol samting em i bin tingting planti long en na ol samting em i bin pilim long bel. Tingim tu gutpela amamas Jisas bai kisim, na olsem wanem dispela i helpim em long karim hevi. Tingting long wok em i mekim nau olsem Het bilong kongrigesen, em i bosim wok bilong autim tok na kamapim ol disaipel. (1 Ko. 11:3; Hi. 12:2; KTH 14:14-16) Kamapim olsem yu pilim tru ol samting Krais i bin mekim, na yu ken mekim bikpela wok moa bilong autim tok inap long skel bilong sindaun bilong yu.
11 Kirapim Ol Narapela Long Autim Tok: Taim ol elda na ol kongrigesen sevent i insait long wok painia haptaim, ol inap tru long strongim ol narapela. Taim ol i wok wantaim ol pablisa long autim tok na go lukim ol brata long haus, rot i op long ol inap helpim ol narapela long insait long dispela bikpela wok. I gutpela yumi olgeta i beten long dispela samting, na long dispela rot yumi strongim ol wok yumi mekim bilong autim tok long olgeta man.
12 Olgeta elda na kongrigesen sevent bai bihainim ol samting em kongrigesen i stretim bilong mekim bikpela wok moa long Mas na Epril. Tasol wasman autim tok i gat bikpela wok bilong stretim ol samting bilong wok autim tok. Em i mas makim ol ples, de, na taim bilong mekim ol bung bilong autim tok i stret long planti pablisa i ken bung long en, na kamapim toksave long dispela samting long ol Miting Bilong Wok. Em i ken stretim rot bilong mekim 2-pela o 3-pela bung samting long wan wan de, na bai olgeta long kongrigesen i gat rot bilong insait long ol narapela narapela hap wok bilong autim tok. Ating em i ken stretim ol bung bilong autim tok long ol bisnis teritori, long rot, long ol haus, o long mekim ol gobek. Na tu, em i mas stretim rot bambai kongrigesen i ken i gat ol buk na nius na ol teritori inap long mekim wok long en long ol dispela tupela mun.
13 Samting bilong tilim long mun Mas em buk Save, na mak bilong winim em long kirapim Baibel-stadi. Ol gutpela tok yu ken mekim bilong tilim buk Save i stap long pepa yumi kisim wantaim Wok Kingdom bilong Janueri 2002. Samting bilong tilim long Epril em Wastaua na Kirap! Traim long mekim wok long ol tok i stap long hap “Ol Tok Yu Ken Mekim Bilong Tilim Ol Nius.” Olgeta i mas lusim taim long redi gut na bai yumi inap autim gut ol tok.
14 Yumi amamas tru long mekim wok na stap aninit long wok bos bilong Het bilong kongrigesen, em Krais Jisas, na yumi gat gutpela wok tru bilong autim gutnius long ol narapela! Taim mun Mas na Epril i kam klostu, yumi laik wok strong gen long mekim bikpela wok tru winim olgeta mun bipo, na yumi ken mekim olsem taim yumi bihainim tok bilong Krais na autim tok long olgeta man.
[Blok long pes 4]
Ol Narapela Narapela Sediul Bilong Mekim Wok Painia Haptaim Long Mas na Epril 2003
De Aua
Mande 1 2 — — 2 —
Tunde 1 — 3 — — —
Trinde 1 2 — 5 — —
Fonde 1 — 3 — — —
Fraide 1 2 — — — —
Sarere 5 4 3 5 6 7
Sande 2 2 3 2 2 3
Mas 56 56 54 55 50 50
Epril 50 50 51 53 — —
Olsem wanem? Wanpela bilong ol dispela sediul bai i stret long yu?