Tokaut Long Ol Gutpela Pasin Bilong Jehova
1 “Yu gat olgeta strong na pawa. Yu gat biknem, na yu stap antap tru. Yu nambawan olgeta. Long wanem, olgeta samting i stap long heven na graun i bilong yu tasol.” (1 Sto. 29:11) Pasin bilong yumi long laikim tru na amamas long Jehova i save mekim wanem long yumi? Em i kirapim yumi long ‘tokaut long olgeta gutpela pasin em i bin mekim. Em i bin singautim yumi long lusim tudak na em i bringim yumi i kam insait long lait bilong em, em lait i gutpela moa yet.’ (1 Pi. 2:9) Yumi no inap lusim pasin bilong tokim ol narapela long gutpela God bilong yumi! Yumi gat gutpela rot tru bilong tokaut long ol gutpela pasin bilong Jehova long mun Mas, Epril, na Me.
2 Spesel Wok Bilong Toksave Long Memorial: Long Mande, Epril 2, bai yumi kamapim klia ol gutpela pasin bilong Jehova long rot bilong mekim Kaikai Bilong Bikpela. Kirap long Mas 17 i go inap long Epril 2, long olgeta hap bilong graun bai yumi tilim wanpela spesel pepa bilong singautim ol man long dispela bikpela bung. Gutpela sapos yumi olgeta i givim bel long mekim dispela wok. Dispela em i gutpela taim tru long ol nupela i ken kirap autim gutnius olsem ol pablisa, sapos ol i winim mak. Sapos yu gat ol Baibel sumatin o pikinini husat i winim mak, orait go toktok wantaim ol elda.
3 Dispela wok bai i wankain olsem wok yumi bin mekim paslain long “De Bilong Kisim Bek Yumi i Klostu!” Kibung Distrik. Ol bai i salim planti bilong ol dispela pepa long olgeta kongrigesen na bai olgeta pablisa i ken kisim 50 na olgeta painia i ken kisim 150. Taim yu tilim pepa, mekim sotpela tok tasol, olsem: “Dispela em pepa bilong singautim yu long wanpela bikpela bung i save kamap long olgeta yia. Mipela bai amamas tru long lukim yu. Pepa hia i stori moa long dispela bung.” Sapos man bilong haus i gat sampela askim, lusim haptaim bilong bekim ol askim. Yu ken kisim helpim long mekim olsem, long apendiks i stori long Kaikai Bilong Bikpela long buk Baibel i Tok, kirap long pes 206. Long ol wiken, bai yumi tilim ol nius wantaim dispela spesel pepa. Raitim nem na atres bilong ol man i laik harim tok, na makim taim bilong go bek lukim ol.
4 Sapos inap, yumi mas givim stret dispela spesel pepa long olgeta man bilong haus. Olsem na raitim atres bilong ol haus i no gat man long en na stretim rot bilong go bek long narapela taim. Ol kongrigesen i gat planti bilong ol dispela pepa, ol i ken lusim ol pepa long ol haus i no gat man long laspela wik paslain long Memorial, no ken mekim olsem paslain long dispela taim. Givim wanpela pepa long ol gobek, Baibel sumatin, wanblut, wanwok, neiba, na ol narapela man yu save long ol.
5 Wok Painia Haptaim: Olsem wanem? Yu inap tokaut moa long ol gutpela pasin bilong Jehova long rot bilong mekim wok painia haptaim long mun Mas, Epril, na Me? Bilong mekim olsem, ating yu mas senisim sampela samting long sediul bilong yu. (Ef. 5:15-17) Yu ken bilip tru olsem pasin bilong wok strong long mekim bikpela wok moa bilong Jehova bai kamapim amamas na yu bai kisim blesing bilong Jehova. (Snd. 10:22) Taim bilong Memorial i wok long i kam klostu, olsem na nau em i taim bilong kirap tingim ol samting yumi laik mekim.—Snd. 21:5.
6 Wanpela sista i gat 90 krismas i mekim wok painia haptaim long las yia. Em i tok: “Maski mi laikim tru wok gaden na mi laik kirap planim ol samting, mi luksave olsem mi mas putim ol bikpela samting i go pas. Mi laik putim wok bilong Kingdom i go pas, olsem na mi mekim wok painia haptaim long Mas.” Yu ting gutpela samting i kamap long wok bilong em? Em i tok: “Mi pilim olsem mi pas gut moa wantaim kongrigesen, na mi go klostu moa long Jehova.” Olsem wanem? Yumi inap skelim wanem samting i bikpela samting long yumi na mekim ol wankain senis olsem dispela sista, sapos i gat wok long mekim olsem?
7 Ating i no hatwok tumas long winim 50 aua bilong mekim wok painia haptaim. Beten na skelim ol wok bilong yu bilong wan wan de, wokim wanpela sediul, na raitim long sediul bilong yu bilong mekim ol wok bilong Kingdom. Yu save long sindaun bilong yu. Sapos yu save sik planti o yu no gat strong, ating yu inap mekim wok autim tok inap tupela aua samting long olgeta de. Sapos yu wok fultaim o go long skul, ating yu inap mekim wok painia haptaim long rot bilong autim tok long apinun o long wiken.
8 Planti famili i bin mekim wok painia haptaim. Insait long sampela yia i go pinis, tupela marit i bin tingting planti long putim aplikesen, long wanem, ol i ting sindaun bilong ol i pasim ol long mekim wok painia haptaim. Ol i mekim wanem? Ol i tok: “Mipela i beten askim Jehova long helpim mipela long mekim samting em mipela i bin i gat laik long mekim inap longpela taim pinis.” Ol i stretim gut ol samting na ol i winim dispela mak. Ol i tok moa: “Dispela wok i gutpela samting tru. Planti gutpela samting i painim mitupela. Mipela i laik tokim ol narapela olsem, traim long mekim. Sapos mipela inap mekim, ating yu tu inap mekim.”
9 Long neks famili stadi bilong yupela, gutpela sapos yupela i toktok long olsem wanem olgeta inap mekim bikpela wok moa insait long ol mun i kamap bihain. Maski famili olgeta i no inap mekim wok painia haptaim, ating wanpela inap mekim na ol narapela long famili i ken helpim na wok gut wantaim em. Sapos nogat, ating famili bilong yu i ken putim mak long lusim sampela aua moa long wok autim tok insait long ol dispela spesel mun.
10 Narapela i Helpim Narapela: Pasin bilong amamas long mekim wok i save kirapim ol narapela. Toktok wantaim ol narapela long laik bilong yu long mekim wok painia haptaim. Dispela inap kirapim ol long putim aplikesen. Na tu, ol bratasista i bin mekim wok painia long bipo, ol inap givim gutpela tok i helpim yu long stretim ol wok bilong yu na wokim wanpela sediul bambai yu inap winim mak bilong yu. (Snd. 15:22) Sapos yu inap mekim wok painia haptaim, gutpela sapos yu singautim narapela pablisa, ating wanpela i gat wankain sindaun olsem yu, na yutupela wantaim i ken mekim dispela gutpela wok.
11 Planti elda i stretim rot bilong ol i ken insait long dispela spesel wok. (Hi. 13:7) Dispela i save strongim tru kongrigesen! Na tu, ol elda i kamapim pasin bilong amamas long mekim wok taim ol i toktok wantaim ol narapela. Sampela gutpela tok bilong strongim bel o helpim narapela inap kirapim sampela long mekim wok painia haptaim. Wasman autim tok bai stretim rot bilong mekim sampela bung moa bilong autim tok na bai olgeta i ken autim tok wantaim grup, olsem bihain long wok na skul. Ol brata i mas mekim toksave planti taim long ol dispela bung. Wasman autim tok bai stretim tu ol samting na bai i gat planti teritori na ol buk na nius.
12 Maski yu no inap mekim wok painia haptaim, yu ken strongim bel bilong ol lain i mekim dispela wok, na yu ken beten askim Jehova long helpim ol. (Snd. 25:11; Kl. 4:12) Ating yu inap stretim rot bilong autim tok wantaim ol namel long wik o autim tok wantaim ol inap sampela aua moa.
13 Mipela i Laikim 425 Painia Haptaim Long Epril: Long Epril 2000, em namba wan taim inap 404 i bin mekim wok painia haptaim long Papua Niugini. Olsem na yumi ken putim mak long kisim 425 painia haptaim long dispela Epril. Yumi inap winim dispela mak sapos long olgeta 7-pela 7-pela pablisa long olgeta kongrigesen, wanpela i mekim wok painia haptaim. Long sampela kongrigesen bai i gat planti pablisa moa husat inap mekim wok painia haptaim. Planti kongrigesen inap winim dispela mak. Tingim bikpela amamas dispela bai kamapim long kongrigesen bilong yupela na ol gutpela samting bai kamap long wok autim tok long teritori bilong yupela!
14 Bilong wanem Epril em i gutpela mun bilong mekim wok painia haptaim? Memorial bai kamap long kirap bilong mun, na dispela bai opim rot long yumi ken go bek lukim ol man i bin kam long Memorial. Bai yumi tilim ol nius, na yumi tingting strong long tilim buk Baibel i Tok long ol gobek na kirapim ol Baibel stadi. Olsem na wok painia haptaim long Epril bai opim planti rot bilong kirapim ol Baibel stadi. Na tu, mun Epril i gat 5-pela Sande na pablik holide, olsem na em bai isi moa long ol bratasista i mekim wok mani na ol yangpela i skul long ol i ken insait long dispela wok.
15 Taim olgeta wan wan Memorial i kam na i go pinis, dispela i bringim yumi i go klostu moa long pinis bilong pasin nogut bilong dispela graun. I no gat bikpela haptaim moa bilong tokim ol narapela man long gutpela God bilong yumi. (1 Ko. 7:29) Nogut taim bilong Memorial i pinis, na yumi no bin mekim wok long ol rot i bin op long litimapim nem bilong Papa bilong yumi long heven. Gutpela sapos yumi stretim rot nau long mekim olgeta samting yumi inap mekim long Mas, Epril, na Me, bilong tokaut long ol gutpela pasin bilong Jehova!
[Askim Bilong Stadi]
1. Wanem samting i kirapim yumi long tokaut long ol gutpela pasin bilong Jehova?
2. Wanem spesel wok bai kamap bilong toksave long Memorial? Husat inap insait long dispela wok?
3. Yumi ken tok wanem bilong singautim ol man long Memorial?
4. Olsem wanem bai yumi tilim dispela spesel pepa bilong Memorial?
5. Bilong wanem yumi mas kirap nau long tingting long mekim wok painia haptaim?
6. Stori bilong wanpela sista i gat 90 krismas na i mekim wok painia haptaim long las yia, i ken lainim yumi long wanem samting?
7. Yu ting i hatwok long mekim wok painia haptaim?
8. Olsem wanem tupela marit inap mekim wok painia haptaim?
9. Yupela i ken mekim wanem long neks famili stadi bilong yupela bilong redi long ol spesel mun i kamap bihain?
10. Bilong wanem yumi mas toktok wantaim ol narapela long laik bilong yumi long mekim wok painia haptaim long taim bilong Memorial?
11. Ol elda i ken mekim wanem bilong kirapim ol bratasista long mekim wok painia haptaim long ol mun i kam bihain?
12. Yu ken mekim wanem sapos yu no inap mekim wok painia haptaim?
13. Yumi laik winim wanem mak hia long Papua Niugini? Kongrigesen bilong yu inap mekim wanem bilong winim dispela mak?
14. Bilong wanem Epril em i gutpela mun bilong mekim wok painia haptaim?
15. Taim dispela Memorial i wok long i kam klostu, bilong wanem yumi mas ting olsem taim i sot pinis?
[Blok long pes 4]
Yumi Inap Kisim 425 Painia Haptaim Long Epril?
◼ Skelim wanem samting i bikpela samting long yu
◼ Toktok wantaim famili long ol mak yupela i laik winim
◼ Toktok wantaim ol narapela long ol samting yu laik mekim