Wanpela Gutpela Mak Bilong Putim Long Nupela Sevis Yia
1 Yumi mas putim ol mak bilong winim sapos yumi laik kamap strong long ol samting bilong spirit. Yu bin putim wanem ol mak yu laik winim long nupela sevis yia? Wanpela gutpela mak em long mekim wok painia haptaim long wanpela o sampela mun. Bilong mekim dispela gutpela wok yu mas stretim gut ol samting pastaim, olsem na nau em i gutpela taim long yu kirap tingting long mekim olsem. Bilong wanem i gutpela long putim wok painia haptaim olsem mak yu laik winim?
2 As na Yumi Mekim Wok Painia Haptaim: Taim yumi mekim wok painia haptaim, dispela i opim rot long yumi ken amamasim Papa bilong yumi long heven “moa moa yet” taim yumi lusim bikpela hap taim moa long autim tok. (1 Te. 4:1) Taim yumi skelim olgeta samting Jehova i bin mekim bilong helpim yumi, dispela i kirapim bel bilong yumi na yumi laik tokim ol arapela long em. (Sng. 34:1, 2) Jehova i save lukim na pilim pasin bilong yumi long daunim sampela laik bilong yumi yet bilong mekim bikpela wok moa bilong autim tok. (Hi. 6:10) Yumi save olsem Jehova i belgut long wok yumi mekim na dispela i mekim yumi amamas.—1 Sto. 29:9.
3 Sapos yu mekim wanpela wok planti taim, bai yu pilim olsem i no hatwok moa long mekim na bai yu amamas long mekim. Taim yu lusim bikpela hap taim moa long autim tok, dispela bai mekim na yu no pret long autim tok long ol haus. Pasin bilong yu long kirapim tok na yusim Baibel bai kamap gutpela moa. Taim yu toktok planti taim wantaim ol man long bilip bilong yu, bilip bilong yu bai kamap strong. Planti bratasista em ol i no gat wanpela Baibel stadi, ol i kirapim wanpela Baibel stadi taim ol i mekim wok painia haptaim.
4 Taim yu insait long wok painia haptaim, dispela inap helpim yu na yu no mekim nating ol wok Kristen. Wanpela brata em pastaim em i bin mekim wok painia oltaim, em i luksave olsem em i lusim bikpela hap taim long wok mani, olsem na em i mekim wok painia haptaim long wanpela mun. Em i tok: “Mi kirap nogut olsem insait long dispela mun mi kisim bikpela strong long ol samting bilong spirit! Mi stretim rot long mekim wok painia haptaim i go yet, na bihain mi kirap mekim wok painia oltaim gen.”
5 Winim Ol Samting i Laik Pasim Yu: Ating sampela ol i no insait long wok painia haptaim, long wanem, ol i pilim olsem ol i no gat gutpela save long autim tok. Sapos yu gat kain tingting olsem, Jehova inap helpim yu olsem em i bin helpim Jeremaia. (Jer. 1:6-10) Maski ‘maus bilong Moses i hevi tumas, na em i no inap toktok gut,’ Jehova i mekim wok long em bilong inapim laik bilong Em. (Kis. 4:10-12) Sapos yu pilim olsem yu no inap mekim wok painia haptaim, askim Jehova long givim strong long yu.
6 Olsem wanem? Yu gat tupela tingting long mekim wok painia haptaim, long wanem, yu gat sik o yu bisi tumas? Sapos yu gat sik, yu ken mekim wok inap long skel bilong strong bilong yu na dispela inap opim rot long yu mekim wok painia haptaim. Sapos yu bisi, ating yu ken makim ol samting i no bikpela samting tumas long mekim long narapela mun. Sampela i save wok mani fultaim, ol i kisim wanpela o tupela de malolo bambai ol i gat sampela hap taim moa bilong autim tok.—Kl. 4:5.
7 Rot Bilong Mekim: Beten long Jehova na kamapim laik bilong yu long mekim wok painia. Askim Jehova long blesim ol samting yu mekim bilong mekim bikpela wok moa bilong autim tok. (Ro. 12:11, 12) Em inap helpim yu long bihainim gutpela tingting taim yu stretim sediul bilong yu. (Jem. 1:5) Sapos yu no gat strongpela laik tumas long mekim wok autim tok, askim Jehova long helpim yu long kisim amamas long mekim dispela wok.—Lu. 10:1, 17.
8 Toktok wantaim famili bilong yu long laik bilong yu long mekim wok painia haptaim. (Snd. 15:22) Ating wanpela insait long famili i ken mekim wok painia haptaim na ol arapela long famili i ken helpim em. Toktok wantaim ol arapela insait long kongrigesen long laik bilong yu long mekim wok painia, moa yet wantaim ol bratasista i gat wankain sindaun olsem yu. Dispela inap kirapim planti long mekim wok painia.
9 Taim yu skelim ol mun bilong nupela sevis yia, yu ting yu inap mekim wok painia haptaim long wanem mun? Sapos yu save mekim wok mani fultaim o yu save go long skul, ating yu ken skelim ol mun i gat holide long en o ol mun i gat 5-pela Sarere o Sande. Olsem, Septemba, Disemba, Mas, na Ogas ol i gat 5-pela wiken. Mun Me i gat 5-pela Sarere, na Jun i gat 5-pela Sande. Sapos yu gat sik, skelim ol mun bilong taim bilong san. Ating yu ken tingting long mekim wok painia long mun em wasman sekit i kam lukim kongrigesen bilong yu. Long dispela taim, yu inap long insait long namba wan hap bilong miting em bai mekim wantaim ol painia oltaim. Memorial bai kamap long Mas 22 long neks yia, olsem na mun Mas, Epril, na Me ol i gutpela taim bilong mekim wok painia haptaim. Taim yu makim pinis wanem ol mun yu laik mekim wok painia haptaim long en, orait kirap wokim wanpela sediul em bai helpim yu long winim ol aua bilong yu.
10 Maski sapos yu no inap mekim wok painia haptaim long dispela nupela sevis yia, yu inap givim bel moa yet long autim tok. Wok yet long mekim olgeta samting yu inap mekim long wok autim tok, na yu ken bilip tru olsem Jehova i amamas long pasin bilong yu long givim bel olgeta long mekim wok bilong em. (Ga. 6:4) Yu ken helpim na strongim ol bratasista husat i mekim wok painia haptaim. Ating yu ken makim wanpela de moa namel long wik bilong wok wantaim ol.
11 Lain bilong Jehova i save olsem taim i sot pinis. I gat wanpela wok ol i mas mekim, em wok bilong autim gutnius. Laip bilong ol man inap lus, na i gat sotpela taim tasol i stap. (1 Ko. 7:29-31) Pasin bilong laikim tru God na ol narapela bai kirapim yumi long mekim olgeta samting yumi inap mekim long wok autim tok. Sapos yumi wok strong na stretim gut ol samting, yumi inap mekim wok painia haptaim long wanpela mun long nupela sevis yia—em wanpela gutpela mak tru bilong winim!
[Askim Bilong Stadi]
1. Yumi inap putim wanem mak long nupela sevis yia?
2. I gat wanem as na yumi inap putim wok painia haptaim olsem mak yumi laik winim?
3, 4. Wok painia haptaim inap helpim yu olsem wanem?
5. Olsem wanem yu inap daunim dispela tingting olsem yu no inap mekim wok painia haptaim?
6. Olsem wanem yu inap mekim wok painia haptaim maski yu gat sik o yu bisi?
7. Bilong wanem i gutpela long beten long Jehova na kamapim laik bilong yu long mekim wok painia haptaim?
8. Taim yu bihainim tok bilong Sindaun 15:22, olsem wanem dispela inap helpim yu long mekim wok painia?
9. Yu inap makim wanem ol mun bilong mekim wok painia haptaim?
10. Yu ken mekim wanem sapos yu no inap mekim wok painia haptaim?
11. Bilong wanem yumi mas wok strong long autim tok?