‘Man i Sanap Strong na Karim Hevi i Ken Amamas’
1 Olgeta Kristen i save karim ol hevi. (2 Ti. 3:12) Sampela hevi i save painim yumi, em sik, hevi bilong mani, ol traim, o ol man i mekim nogut long yumi. Ol hevi em Satan i as bilong en, ol i bilong mekim na yumi no strong tumas moa long mekim wok Kristen bilong yumi, o bilong pasim yumi long lotuim God. (Jop 1:9-11) Olsem wanem pasin bilong sanap strong na karim hevi inap mekim yumi amamas?—2 Pi. 2:9.
2 Redi Long Ol Hevi: Jehova i givim yumi tok i tru bilong Baibel, na long Baibel i gat stori bilong i stap bilong Jisas na ol tok em i bin skulim ol man long en. Taim yumi harim na bihainim ol tok bilong Jisas, dispela bai helpim yumi long redi long ol hevi. (Lu. 6:47-49) Yumi kisim strong tu long ol brata Kristen bilong yumi, ol miting bilong kongrigesen, na ol buk na nius bilong Baibel em wokboi i gat gutpela tingting i kamapim. Planti taim yumi mekim wok long presen em God i bin givim yumi, em beten.—Mt. 6:13.
3 Jehova i bin givim gutpela samting yumi ken bilip na wet long en. Taim yumi strongim bilip bilong yumi long ol tok promis bilong Jehova, bilip bilong yumi bai stap olsem “anka bilong laip bilong yumi.” (Hi. 6:19) Long taim bilong ol man i bin raitim Baibel, ol sip i save kisim anka i go wantaim ol, maski em i gutpela taim. Sapos bikpela win na ren i kamap wantu tasol, ol inap tromoi anka i go daun long solwara na dispela inap mekim na sip i no go pas long rip bilong nambis. Na olsem tasol, sapos yumi strongim bilip bilong yumi long ol tok promis bilong God long nau, dispela bai helpim yumi taim hevi i kamap. Ol hevi inap kamap wantu tasol. Maski pastaim ol man long Listra i amamas long harim tok Pol na Barnabas i autim, wantu ol samting i senis taim ol Juda i birua long tupela ol i kam long Listra.—Ap. 14:8-19.
4 Man i Sanap Strong i Ken Amamas: Taim yumi wok yet long autim tok maski ol man i mekim nogut long yumi, yumi stap bel isi. Yumi amamas long kisim sem long nem bilong Jisas. (Ap. 5:40, 41) Ol dispela pasin olsem pasin bilong sanap strong, pasin daun, na pasin bilong bihainim tok, ol bai kamap strong tru taim yumi stap strong na karim hevi. (Lo 8:16; Hi. 5:8; Jem. 1:2, 3) Ol hevi i skulim yumi long bilip long Jehova na ol tok promis bilong em, na long i go long em bilong kisim helpim.—Snd. 18:10.
5 Yumi save olsem ol hevi i bilong sotpela taim tasol. (2 Ko. 4:17, 18) Taim ol hevi i kamap, dispela i opim rot long yumi ken kamapim klia olsem yumi laikim tru Jehova. Taim yumi sanap strong na karim ol hevi, yumi inap bekim ol tok Satan i bin sutim. Olsem na yumi no ken givap! “Man i save sanap strong na i karim hevi long olgeta traim, em i ken amamas. Sapos em i winim pinis olgeta traim, orait God bai i givim em laip bilong i stap gut oltaim, olsem prais bilong en.”—Jem. 1:12.