Stap Strong na Kisim Prais
1 “Yupela i mas i stap strong, na bai yupela i kisim laip na i stap gut.” (Lu. 21:19) Dispela tok i hap bilong tok profet Jisas i mekim long pasin bilong “dispela graun i laik pinis,” na dispela i soim olsem bilong i stap gut long God, yumi mas redi long karim hevi. Tasol long strong bilong Jehova, yumi olgeta inap “stap strong inap long las de” na ‘God bai i kisim bek yumi.’—Mt. 24:3, 13; Fl. 4:13.
2 Pasin birua, sik, hevi bilong mani, na bel hevi, ol inap mekim na i hatwok long karim ol hevi long olgeta wan wan de. Tasol yumi no ken lusim tingting olsem Satan i laik bai yumi lusim pasin bilong i stap gut long Jehova. Olgeta wan wan de yumi stap gut long Jehova, yumi helpim em long bekim tok giaman Satan i bin sutim long em. Yumi amamas long save olsem Jehova i tingim tru ol “krai” yumi mekim taim ol hevi i painim yumi! Ol i gutpela samting tru long ai bilong em na pasin bilong yumi long i stap gut long em i mekim em i belgut!—Sng. 56:8; Snd. 27:11.
3 Ol Traim i Strongim Bilip: Traim inap kamapim long ples klia olsem bilip i no strong tumas o wanpela pasin kranki bilong yumi, olsem pasin antap o pasin bilong les kwik. Tasol yumi no ken mekim samting i no stret wantaim tok bilong Baibel bilong abrusim o pinisim hevi, yumi mas bihainim Tok Bilong God na “oltaim yumi mas sanap strong na karim hevi, bai dispela pasin i ken kamap strong tru long yumi.” Bilong wanem i olsem? Long wanem pasin bilong stap strong na karim hevi inap helpim yumi na ‘pasin bilong yumi bai i gutpela na i stret olgeta.’ (Jem. 1:2-4) Pasin bilong stap strong inap helpim yumi long kisim ol gutpela pasin, olsem pasin bilong bihainim gutpela tingting, pilim hevi bilong ol man, na pasin marimari.—Ro. 12:15.
4 Traim Bilip: Taim yumi karim ol hevi, yumi kisim bilip i winim traim na em i bikpela samting long ai bilong God. (1 Pi. 1:6, 7) Kain bilip bai helpim yumi long sanap strong long bihain taim hevi i kamap. Na tu, yumi save olsem God i orait long yumi, na dispela i strongim pasin bilong yumi long wetim gutpela samting i kamap, na i gat as tru bilong en.—Ro. 5:3-5.
5 Jems 1:12 i tokaut long gutpela samting tru man inap kisim taim em i sanap strong, em i tok: “Man i save sanap strong na i karim hevi long olgeta traim, em i ken amamas. Sapos em i winim pinis olgeta traim, orait God bai i givim em laip bilong i stap gut oltaim, olsem prais bilong en.” Olsem na, yumi mas givim bel olgeta long Jehova, na bilip tru olsem em bai blesim “olgeta man i save laikim em tru.”