Askim
◼ Yumi mas i gat wanem kain tingting long mekim wok painia haptaim?
Yumi mas tingim wok painia haptaim em i wanpela gutpela wok bilong mekim, na em i wanpela bikpela wok tu. Long olgeta mun planti tausen tausen pablisa i mekim wok painia haptaim, na sampela i mekim long olgeta mun. Mipela i amamas tru long ol dispela pablisa i autim tok inap 60 aua long olgeta mun bilong mekim wok painia haptaim. Ol elda na ol narapela brata tu i mas kirapim ol pablisa i laik mekim wok painia haptaim long tingim tru wok bilong ol na ol i no ken ting wok painia haptaim em liklik samting tasol.
Wankain olsem ol painia oltaim, painia haptaim tu i mas tingting gut pastaim, taim em i laik mekim wok painia long wanpela mun o sampela mun. (Lu 14:28) Em i mas tingting gut, em inap autim tok 60 aua samting na mekim yet ol narapela wok em Kristen i mas mekim, o nogat? Sapos wanpela brata i laik mekim wok painia haptaim, gutpela em i skelim gut sindaun bilong em na beten long Jehova long helpim em. Nogut em i mekim tasol long wanem sampela narapela brata tu i mekim. Yu mas tingting gut na raitim wanpela sedyul i helpim yu long winim ol aua. Em i bikpela samting yu mas kaunim gut aplikesen na yu mas save tru yu inapim olgeta mak bilong dispela wok o nogat.
Yu mas taitim bun tru. Sampela mun bilong yia i gutpela long “autim tok bilong God long olgeta de.” (Ap 18:5) Em ol mun long taim bilong Memorial, olsem Mas na Epril samting, na taim wasman sekit i kam lukim kongrigesen. Planti pablisa i amamas tru long taitim bun long bihainim gut sedyul bilong autim tok long dispela bikpela taim, na ol i amamas, long wanem, ol i save Jehova bai blesim tru wok bilong ol. (2 Ko 9:6) Planti pablisa i wok strong long mekim wok painia haptaim long taim ol i gat holide long wok skin bilong ol o long ol mun i gat 5-pela Sarere Sande. Na taim ol i sainim aplikesen ol i save ol i tok “yes” na ol i laik truim dispela tok na wok strong long autim tok inap 60 aua, o winim 60 aua, long mekim wok painia haptaim.—Mt 5:37.
Ol pablisa i no inap long mekim wok painia ol i ken helpim ol brata i mekim wok painia haptaim na makim sampela de long go autim tok wantaim ol. Na taim ol i go autim tok wantaim ol, gutpela ol i autim tok inap longpela taim liklik wantaim ol painia haptaim. Ol painia bai amamas tru sapos yu wok wantaim ol long moningtaim tru o long apinun. Na taim yu gat sampela gobek o Baibel-stadi gutpela yu askim ol long go wantaim yu. Sapos yu helpim ol brata sista i mekim wok painia haptaim bai yu kisim bikpela amamas, long wanem, yu helpim narapela man.—Ap 20:35.
Ol painia haptaim i wok strong na ol brata i amamas tru long dispela. Ol brata em ol inap long wok wantaim ol, bai ol i kisim bikpela blesing. (Snd 10:4) Wanem taim bai yu inap long mekim wok painia haptaim na kisim bikpela amamas?