“Autim Tok Long Gutnius”
1 Long dispela graun we ol man i no save harim planti gutpela tok, yumi gat gutpela wok “bilong autim tok long gutnius bilong marimari bilong God.” (Ap. 20:24) Wanpela hap bilong dispela wok, em yumi mas tokim ol man olsem klostu nau “taim bilong las de” bai pinis na nupela taim bilong Jehova i gat stretpela pasin long en bai i kamap, na ‘ol samting bilong bipo bai pinis olgeta.’ (2 Ti. 3:1-5; KTH 21:4) Long dispela taim bai i no gat sik moa. (Ais. 33:24) Ol man i dai pinis ol bai kirap bek na stap gen wantaim famili na ol pren bilong ol. (Jo. 5:28, 29) Graun olgeta bai kamap wanpela naispela paradais. (Ais. 65:21-23) Dispela em sampela tok tasol bilong ol gutpela tok yumi ken autim long ol man!
2 Mun Mas, Epril, na Me i gutpela taim bilong autim ol kain gutpela tok olsem. Na tu, nambawan bikpela bung bilong yia, em Memorial, bai kamap long olgeta hap bilong graun taim san i go daun pinis long Sarere, Mas 22. Nau em i taim bilong kirap stretim ol samting bilong mekim bikpela wok moa bilong autim tok.
3 Mekim Wok Painia Haptaim: Olsem wanem? Yu inap stretim sediul bilong yu bilong mekim wok painia haptaim inap wanpela o tupela mun o olgeta dispela tripela mun? Long neks famili stadi bilong yupela, lusim liklik hap taim bilong toktok long dispela samting. Taim famili i wok gut wantaim, ating wanpela o tupela bilong famili inap mekim wok painia haptaim. (Snd. 15:22) Beten long dispela samting, na lukim olsem wanem Jehova bai blesim hatwok bilong yu. (Snd. 16:3) Maski sapos i no gat wanpela long famili inap mekim wok painia haptaim, olgeta long famili inap putim mak long mekim bikpela wok moa bilong autim tok taim ol i wok wantaim ol bratasista i mekim wok painia.
4 Sapos yu mekim wok mani fultaim, ating gutpela sediul bai helpim yu long mekim wok painia haptaim. Ating yu ken yusim hap taim bilong lans brek bilong yu long autim tok. O yu inap kisim tok orait long wasman autim tok long yu ken autim tok long wanpela hap bilong teritori i stap klostu long haus o ples wok bilong yu, na autim tok inap wanpela aua samting paslain o bihain long wok. Ating yu inap kisim sampela hap taim moa long rot bilong putim sampela wok i no bikpela samting i go long narapela mun, na autim tok inap de olgeta long ol wiken. Sampela i bin kisim wanpela o tupela de malolo long wok mani na mekim wok autim tok.
5 Sapos yu lapun o yu gat sik o yu no gat bikpela strong, ating yu inap mekim wok painia haptaim sapos yu autim tok inap liklik taim long olgeta de. Askim Jehova long givim yu ‘bikpela strong em i strong bilong God.’ (2 Ko. 4:7) Wanpela sista i gat 106 krismas i bin mekim wok painia haptaim. Long rot bilong helpim em i kisim long ol wanblut Kristen na ol narapela insait long kongrigesen, em i autim tok long ol haus, mekim ol gobek, go lukim ol Baibel stadi, na mekim ol narapela hap bilong wok autim tok. Em i helpim ol narapela long kirapim Baibel stadi wantaim 10-pela man. Em i tok: “Taim mi tingim gutpela wok mi mekim olsem wanpela painia haptaim, mi amamas tru na mi laikim tru Jehova, Pikinini bilong em, na gutpela oganaisesen bilong Em. Mi gat bikpela laik long tok olsem ‘tenkyu, Jehova!’ ”
6 Sapos yu wanpela yangpela i baptais pinis na i stap yet long skul, ating yu tu inap mekim wok painia haptaim. Olsem ol lain i mekim wok mani fultaim, ating yu bai mekim bikpela wok bilong autim tok long ol wiken. Ating long sampela de yu inap autim tok inap wanpela aua samting bihain long skul. Olsem wanem? I gat sampela holide long skul em yu inap yusim bilong autim tok? Sapos yu laik mekim wok painia haptaim, toktok wantaim ol papamama bilong yu long dispela samting.
7 Kirapim Laik Bilong Ol Narapela: Long rot bilong pasin bilong ol, ol elda inap mekim planti samting bilong kirapim kongrigesen long givim bel long wok. (1 Pi. 5:2, 3) Ol inap makim sampela bung moa bilong ol lain i laik autim tok long bikmoning, bihain long skul, o bihain long wok. Wasman autim tok i mas makim ol strongpela pablisa long lukautim grup, na stretim ol samting na bai i gat planti teritori na ol buk na nius bilong tilim long ol dispela mun.
8 Long wanpela kongrigesen, inap planti mun paslain long taim bilong Memorial, ol elda i kirap strongim ol brata long mekim wok painia haptaim. Long olgeta wik ol i toksave long kongrigesen long hamas pablisa i kisim tok orait long mekim dispela wok. Dispela i helpim ol narapela i gat laik long mekim bikpela wok moa long save olsem bai i gat planti bratasista ol i ken wok wantaim. Ol i kamapim sampela bung moa bilong wok autim tok long bikmoning na long apinun. Dispela i mekim na inap 53 pablisa i mekim wok painia haptaim long Epril, klostu 50 pesen bilong kongrigesen!
9 Helpim Ol Narapela Long Autim Tok: Taim ol nupela man na ol yangpela i winim mak bilong kamap pablisa, ol brata inap makim ol long autim tok wantaim ol strongpela pablisa. Ating rot bai op long mekim olsem long taim bilong Memorial, em taim planti long kongrigesen bai mekim bikpela wok moa bilong autim tok. Olsem wanem? Yu gat wanpela Baibel sumatin i wok long kamap strong na em i senisim pinis pasin bilong em na bai wokabaut bilong em i stret wantaim ol stretpela lo bilong Jehova? Yu gat ol pikinini i gat gutpela pasin na i wok long kamap strong, tasol ol i no kamap pablisa yet? Sapos ol kain lain olsem i tok ol i laik kamap pablisa i no baptais na yu ting ol i winim mak pinis, orait toksave long wanpela elda. Wasman siaman bai makim tupela elda long toktok wantaim yu na pikinini bilong yu o sumatin bilong yu.
10 Ol mun i kamap bihain i gutpela taim tru bilong ol lain i bin lusim wok autim tok long ol i ken kirap gen long wok wantaim kongrigesen. Ol wasman bilong Buk Stadi na ol narapela elda i mas wok strong long go lukim ol dispela kain bratasista, na long gutpela pasin singautim ol dispela lain long wok wantaim ol long wok autim tok. Sapos ol i bin lusim wok autim tok inap longtaim tru, orait tupela elda i mas toktok wantaim ol pastaim bilong painimaut ol i winim mak bilong autim tok o nogat.—km 11/00 p. 3.
11 Redi Long Memorial: Pe bilong baim bek man i nambawan bikpela samting i kamapim pasin “marimari bilong God.” (Ap. 20:24) Planti milion manmeri long olgeta hap bilong graun bai bung long Sarere, Mas 22, taim san i go daun pinis, bilong mekim Memorial bilong tingim dai bilong Krais. Mipela i laik singautim na helpim olgeta man i gat gutpela bel long kam long dispela bikpela bung i kamapim bikpela pasin marimari bilong Jehova long olgeta lain man.
12 Wokim wanpela lista i gat nem bilong ol man yu laik singautim ol i kam. Ating bai yu raitim nem bilong sampela wanblut, neiba, wanwok o wanskul, ol lain i stadi long Baibel long nau o i bin stadi long bipo, na olgeta narapela man yu save go lukim ol oltaim. Sapos sampela em yu singautim ol, ol i gat sampela askim long Memorial, yu ken mekim wok long stori bilong Kaikai Bilong Bikpela i stap long apendiks long pes 206-8 long buk Baibel i Tok bilong bekim askim bilong ol. Dispela inap opim rot long yu kirapim wanpela Baibel stadi, long wanem, nau yu gat rot long soim dispela buk yumi save mekim ol Baibel stadi long en.
13 Wanpela sista i raitim long lista nem bilong 48 famili em i laik singautim. Taim em i wok long singautim ol, em i putim mak long nem bilong ol na raitim det em i bin singautim ol. Em i amamas tru long lukim 26 manmeri em i bin singautim ol i kam long Memorial! Wanpela brata husat i gat stua, em i singautim wanpela wokman em bipo dispela man i wanpela pris. Dispela man i kam na bihain em i tok, “Mi kisim bikpela save long Baibel insait long wanpela aua, winim save mi bin kisim insait long 30 yia mi bin stap long Misin Katolik.” Bihain liklik long Memorial, em i kirap stadi long buk Baibel i Tok.
14 Bikpela Wok Bilong Singautim Ol Man: Kirap long Sarere, Mas 1, na i go inap long Mas 22, bai yumi tilim wanpela spesel invatesen pepa bilong Memorial long olgeta hap bilong graun. Yumi olgeta i laik insait long dispela bikpela wok. I gutpela moa long givim invatesen pepa long man bilong haus na yumi no laik lusim nating long dua bilong haus. Tasol sapos yupela i gat bikpela teritori, ol elda inap wokim disisen olsem yupela i ken lusim ol pepa long ol haus i no gat man na putim long hap we i no pulim ai bilong ol man. Long ol wiken bai yumi tilim ol magasin tu.
15 Yumi no gat bikpela hap taim bilong tilim ol invatesen pepa, olsem na i gutpela yumi mekim sotpela tok tasol. Mekim gutpela pasin pren na givim bel long toktok wantaim man. Yu inap mekim kain tok olsem: “Mipela i laik singautim yu, famili bilong yu, na ol pren bilong yu i kam long wanpela bikpela bung bai kamap long Mas 22. Em hia invatesen pepa bilong yu. Ol narapela samting bilong dispela bung i stap long dispela pepa.” Man bilong haus inap kamapim sampela askim. O em inap kisim invatesen pepa na tok olsem em bai kam. Raitim long notbuk nem bilong ol man i laik harim tok, na stretim rot bilong go bek lukim ol.
16 Long las yia, wanpela soldia i painim invatesen pepa bilong Memorial long dua bilong em. Em i laik kam, tasol em i mas kisim tok orait long sajen bilong em. Taim em i soim invatesen pepa long sajen, pastaim sajen i no mekim wanpela tok na bihain em i tok papamama bilong em i Witnes na bipo em i save go wantaim ol long ol miting. Sajen i givim tok orait long soldia i ken go, na tu, sajen yet i go long Memorial wantaim em!
17 Kamapim Tok Tenkyu Bilong Yu: Taim bilong Memorial bilong 2008 i wok long i kam klostu, na i gutpela yumi olgeta i tingim bikpela pasin marimari Jehova i bin kamapim bilong helpim yumi. Aposel Pol i tok: “Mipela i tok strong long yupela olsem, ‘Yupela i kisim pinis marimari bilong God, na nogut yupela i lusim nating marimari bilong em.’ ” (2 Ko. 6:1) Olsem wanem yumi soim olsem yumi no bin lusim nating marimari bilong God? Pol i tok: “Mipela i stap wokman bilong God, olsem na oltaim mipela i save soim gutpela pasin bilong mipela long olgeta manmeri.” (2 Ko. 6:4) Olsem na yumi kamapim tok tenkyu bilong yumi long presen Jehova i bin givim yumi na yumi mekim ol gutpela pasin na givim bel long autim gutnius. Long dispela taim bilong Memorial bai yumi gat gutpela rot long mekim bikpela wok moa bilong autim tok long gutnius.
[Askim Bilong Stadi]
1. Yumi gat wanem ol gutpela tok bilong autim?
2. Bilong wanem taim bilong Memorial i gutpela taim bilong autim gutnius?
3. Wanem samting bai helpim yumi long mekim bikpela wok moa bilong autim tok olsem famili?
4. Sapos yumi mekim wok mani fultaim, olsem wanem yumi inap stretim ol wok bilong yumi na bai yumi inap mekim wok painia haptaim?
5. Olsem wanem yu inap helpim ol lapun o ol sikman long mekim wok painia haptaim?
6. Olsem wanem ol yangpela i baptais pinis na i stap yet long skul inap mekim wok painia haptaim?
7. Ol elda inap mekim wanem bilong kirapim ol narapela long givim bel long wok long taim bilong Memorial?
8. Stori bilong wanpela kongrigesen i lainim yumi long wanem samting?
9. Bilong wanem taim bilong Memorial i gutpela taim bilong ol man i winim mak long kirap autim gutnius?
10. Ol elda i ken mekim wanem bilong helpim ol lain i bin lusim wok autim tok?
11. Wanem samting i nambawan bikpela samting i kamapim pasin “marimari bilong God”?
12. Yumi mas singautim husat i kam long Memorial?
13. Olsem wanem Jehova i blesim hatwok bilong tupela pablisa i strong long singautim ol narapela long Memorial?
14. Wanem bikpela wok bai kirap long Mas 1 long olgeta hap?
15. Olsem wanem yumi ken tilim Memorial invatesen pepa?
16. Wanem ekspiriens i soim gutpela samting wok bilong singautim ol man long Memorial i kamapim?
17. Olsem wanem yumi ken soim olsem yumi no bin lusim nating marimari bilong God?
[Blok long pes 3]
Ating Husat Inap Mekim Wok Painia Haptaim?
◼ Ol famili
◼ Ol lain i mekim wok mani fultaim
◼ Ol lapun na ol sikman
◼ Ol lain i stap long skul
[Blok long pes 4]
Taim Yumi Tilim Memorial Invatesen:
◼ Mekim sotpela tok; givim bel long mekim tok
◼ Raitim nem bilong ol man i laik harim tok na go bek lukim ol
◼ Tilim nius long ol wiken