Taim Bilong Memorial—Rot i Op Long Mekim Bikpela Wok Moa!
1. I gat wanem as na yumi mas tingting long mekim bikpela wok moa long Mas, Epril, na Me?
1 Olsem wanem? Yu inap mekim bikpela wok moa bilong autim tok long taim bilong Memorial? Sampela pablisa i kisim malolo long wok o skul, na ol inap yusim dispela haptaim bilong mekim wok autim tok. Kirap long Epril 2, bai yumi mekim spesel wok bilong singautim ol man long kam bung wantaim yumi long Memorial long Epril 17. Bihain, bai yumi wok strong long kirapim laik bilong ol man i bin kam long Memorial long kisim sampela save moa, na singautim ol long kam long spesel tok bai kamap long wik bilong Epril 25. Tru tumas, i gat as tru na yumi mas tingting long mekim bikpela wok moa long Mas, Epril, na Me.
2. Wanem wanpela gutpela rot tru bilong mekim bikpela wok moa?
2 Painia Haptaim: Wanpela gutpela rot tru bilong mekim bikpela wok moa, em wok painia haptaim. Yumi olgeta i bisi, olsem na yumi mas tingim gut pastaim ol samting na mekim sampela senis long sediul bilong yumi. (Snd. 21:5) Ating yu inap surikim taim bilong mekim ol samting i no bikpela samting. (Fili. 1:9-11) Gutpela sapos yu tokim ol narapela long kongrigesen olsem yu laik mekim wok painia, ating sampela bai i gat laik long mekim wok painia haptaim wantaim yu.
3. Olsem wanem ol famili inap stretim rot bilong mekim bikpela wok moa?
3 Long neks Famili Lotu bilong yupela, gutpela sapos yupela i toktok long ol mak em famili i laik winim. (Snd. 15:22) Taim olgeta i wok gut wantaim, ating sampela long famili inap mekim wok painia haptaim inap wanpela o tupela mun samting. Olsem wanem sapos yupela i luksave olsem yupela i no inap mekim dispela wok? Ating yupela inap stretim yet rot bilong mekim bikpela wok moa, na autim tok long sampela apinun o autim tok longpela taim moa long ol wiken.
4. Taim yumi mekim bikpela wok moa long taim bilong Memorial, bai yumi kisim wanem ol blesing?
4 Jehova i tingim olgeta samting yumi mekim long wok bilong em na em i amamas tru long ol ofa yumi givim. (Hib. 6:10) Yumi kisim amamas taim yumi givim ol samting long Jehova na ol narapela man. (1 Sto. 29:9; Apo. 20:35) Olsem wanem? Yu inap mekim bikpela wok moa long taim bilong Memorial na kisim bikpela amamas na ol blesing?