Kisim Amamas Long Taim Bilong Dispela Memorial!
1. Wanem wanpela rot bilong kisim amamas long taim bilong Memorial?
1 Olsem wanem? Yu laik kisim bikpela amamas long Mas, Epril na Me? Wanpela rot bilong mekim olsem, em long mekim bikpela wok bilong autim tok, na sapos inap, mekim wok painia haptaim. Olsem wanem dispela bai givim amamas long yu?
2. Olsem wanem pasin bilong mekim bikpela wok bilong autim tok bai givim bikpela amamas long yumi?
2 Kisim Bikpela Amamas: Jehova i wokim yumi na yumi inap kisim amamas long lotuim em taim yumi inapim dispela laik bilong yumi long pas gut wantaim em. (Mat. 5:3) Na tu, em i wokim yumi long rot we yumi inap kisim amamas long pasin bilong givim samting long ol narapela. (Apo. 20:35) Wok autim tok i helpim yumi long mekim 2-pela samting—long lotuim God na helpim ol man. Olsem na taim yumi mekim bikpela wok moa bilong autim tok, amamas bilong yumi i go bikpela. Na tu, taim yumi autim tok planti taim, pasin bilong yumi long autim tok i kamap gutpela moa. Taim yumi kisim pasin bilong autim gut tok, dispela i strongim yumi na yumi no pret long autim tok. Planti rot bai op long yumi autim tok na kirapim ol Baibel stadi. Ol dispela samting i mekim na yumi amamas long autim tok.
3. Bilong wanem Mas na Epril i gutpela taim bilong mekim wok painia haptaim?
3 Mas na Epril i gutpela taim bilong mekim wok painia haptaim, long wanem, yumi ken autim tok inap 30 o 50 aua. Na tu, kirap long Sarere, Mas 22, na i go inap long de bilong Memorial long Mande, Epril 14, bai yumi mekim wok bilong singautim ol man i kam long Memorial. Ol kongrigesen bai kisim bikpela amamas, long wanem, planti bai “wok gut wantaim” long inapim olgeta hap bilong teritori insait long dispela haptaim.—Sef. 3:9, NW.
4. Sapos yumi laik insait long wok painia haptaim, yumi mas mekim wanem?
4 Redi Nau: Sapos yu no mekim yet, i gutpela long kirap nau long stretim ol samting long sindaun bilong yu bambai yu ken mekim bikpela wok moa bilong autim tok long dispela mun na ol narapela mun tu. Beten long God long dispela samting. (Jems 1:5) Toktok wantaim famili bilong yu na ol narapela long kongrigesen. (Snd. 15:22) Ating bai yu luksave olsem maski yu gat sik o yu gat wok mani, yu tu inap kisim amamas long insait long mekim wok painia haptaim.
5. Wanem samting bai kamap sapos yumi mekim bikpela wok bilong autim tok long taim bilong Memorial?
5 Jehova i laik bai ol wokman bilong em i mas amamas. (Sng. 32:11) Taim yumi mekim bikpela wok moa bilong autim tok long taim bilong dispela Memorial, dispela bai givim bikpela amamas long yumi, na tu, long Papa bilong yumi long heven.—Snd. 23:24; 27:11.