Stretim Rot Nau Long Mekim Bikpela Wok Moa Bilong Autim Tok
1. Wanem samting i bikpela samting long taim bilong Memorial? Yumi ken mekim wanem bilong redi long en?
1 Long taim bilong Memorial, rot i op long yumi “litimapim nem” bilong Jehova. (Sng. 109:30) Olsem wanem? Bai yu mekim bikpela wok moa bilong autim tok long mun Mas bilong soim amamas bilong yu long Man Bilong Givim pe bilong baim bek man? Nau em taim bilong stretim rot long mekim olsem.—Snd. 21:5.
2. Yu yet i gat wanem tingting taim ol i daunim aua bilong painia haptaim long Epril las yia? Sampela bratasista i pilim olsem wanem long dispela samting?
2 Painia Haptaim: Las yia ol kongrigesen i amamas tru taim ol i kisim save olsem aua bilong painia haptaim i go daun long Epril. Wanpela brata i tok: “Mi stap yet long haiskul, olsem na i hatwok long mi mekim wok painia oltaim. Tasol mi bai putim aplikesen bilong kisim 30 aua long wok painia haptaim na wok strong moa long winim 50 aua long Epril.” Wanpela sista i mekim wok mani fultaim, em i tok: “Teti aua—em samting nating tru!” Taim ol i toksave long dispela senis, wanpela sista i gat 80 krismas samting em bipo em i bin mekim wok painia, em i tok: “Mi bin wet long dispela samting i mas kamap! Jehova i save olsem long dispela haptaim mi bin mekim wok painia em i wanpela taim we mi bin amamas tru!” Ol narapela husat i no inap mekim wok painia haptaim ol i putim mak long mekim bikpela wok moa bilong autim tok.
3. I gat wanem ol as na i gutpela long mekim wok painia haptaim long Mas, Epril, na Me?
3 Mun Mas em i gutpela taim bilong mekim wok painia haptaim, long wanem, ol i daunim gen aua na yu inap winim 30 o 50 aua. Na tu, kirap long Sarere, Mas 17, bai yumi insait long wanpela bikpela wok bilong singautim ol man i kam bung wantaim yumi long Memorial long Epril 5. Planti bai amamas moa yet long bikpela wok ol i mekim na dispela bai kirapim ol long mekim wok painia haptaim long Epril na Me tu, na ol i mas winim 50 aua.
4. Olsem wanem yumi ken mekim bikpela wok moa bilong autim tok? Wanem gutpela samting bai kamap?
4 Long Famili Lotu bilong yupela, i gutpela yupela i ken toktok wantaim long olsem wanem olgeta wan wan insait long famili i ken mekim bikpela wok moa bilong autim tok long taim bilong Memorial. (Snd. 15:22) Beten askim Jehova long blesim wok bilong yupela. (1 Jon 3:22) Taim yu mekim bikpela wok moa bilong autim tok, yu litimapim nem bilong Jehova, na tu, amamas bilong yu bai i go bikpela moa.—2 Kor. 9:6.