Mekim Sampela Wok Moa Bilong Litimapim Nem Bilong Jehova
1. Wanem dispela nupela rot bilong mekim wok painia haptaim bai helpim yumi long ‘litimapim nem bilong Jehova’?
1 Long mun Mas, yumi bin stat long bihainim nupela rot bilong mekim wok painia haptaim. Dispela i opim rot long ol pablisa inap mekim wok painia haptaim na kisim 30 aua long olgeta Mas na Epril na long mun em wasman sekit i visitim kongrigesen. Sapos visit bilong wasman sekit i kirap long pinis bilong wanpela mun na i go inap long kirap bilong narapela mun, orait pablisa husat i laik kisim 30 aua long dispela taim bilong visit em i ken makim wanpela bilong dispela tupela mun bilong mekim painia haptaim. Ol painia haptaim inap insait long miting olgeta em wasman i mekim wantaim ol painia oltaim na painia salim. Sapos yumi no inap winim 50 aua, yumi inap yet long “litimapim nem bilong em [Jehova],” long rot bilong bihainim dispela nupela rot bilong mekim wok painia haptaim inap 4-pela taim long yia na kisim 30 aua!—Sng. 109:30; 119:171.
2. Ol pablisa i mekim wok painia haptaim long taim bilong visit bilong wasman sekit ol bai amamas long wanem ol samting?
2 Taim Wasman Sekit i Visitim Kongrigesen: Long nau planti pablisa inap mekim wok painia haptaim long taim bilong visit bilong wasman sekit na amamas long autim tok wantaim em na narapela i strongim narapela. (Rom 1:11, 12) Ating planti painia haptaim bai stretim rot bilong kisim wanpela de malolo namel long wik bilong wok wantaim wasman sekit. Ol painia haptaim husat i mekim wok mani namel long wik, ol i ken askim em sapos ol inap wok wantaim em long Sarere o Sande. Na tu, taim ol painia haptaim i go long painia miting wantaim ol painia oltaim na painia salim, dispela bai strongim tru ol!
3. Bilong wanem taim bilong Memorial i gutpela taim bilong mekim wok painia haptaim?
3 Long Mas na Epril: Ol pablisa husat i bin mekim wok painia haptaim na kisim 30 aua wanpela mun tasol long taim bilong Memorial, nau ol inap mekim long tupela mun na dispela i olsem bikpela ‘sakrifais ol i givim long God’! (Hib. 13:15) Mas na Epril i gutpela taim bilong mekim bikpela wok moa olsem painia haptaim. Long olgeta yia long ol dispela mun, yumi save amamas long insait long wok bilong singautim ol man i kam long Memorial. Na tu, planti i mekim bikpela wok moa bilong autim tok long taim bilong Memorial, olsem na yumi inap wok wantaim ol narapela narapela pablisa. Bihain long Memorial, yumi go bek lukim ol man husat i laik harim tok em ol i bin kam long Memorial na strongim laik bilong ol long kam harim spesel pablik tok. Olsem wanem? Bel bilong yu bai kirapim yu long insait long ol dispela nupela rot bilong mekim wok painia haptaim?—Luk 6:45.