Yu Inap Mekim Wok Painia Haptaim?
1. Bilong wanem taim bilong Memorial em i gutpela taim bilong mekim bikpela wok moa?
1 Taim bilong Memorial em i gutpela taim bilong mekim bikpela wok moa bilong autim tok. Em i taim bilong yumi tingim tingim long bel bikpela pasin laikim bilong Jehova long givim Pikinini bilong em olsem pe bilong baim bek man. (Jon 3:16) Yumi pilim tru dispela pasin, na yumi laik tokim ol narapela long Jehova na long samting em i mekim long ol manmeri. (Ais. 12:4, 5; Luk 6:45) Na tu, em i taim bilong mekim bikpela wok moa bilong singautim ol man yumi save long ol na ol man long teritori long bung wantaim yumi long Memorial. Na bihain, yumi laik wok strong long kirapim laik bilong ol man husat i kam long Memorial long kisim sampela save moa. Yu ting yu inap mekim bikpela wok moa bilong autim tok long rot bilong mekim wok painia haptaim long Mas, Epril, o Me?
2. Bilong wanem mun Mas i gutpela taim long mekim wok painia haptaim?
2 Mas Em i Spesel Mun: Mun Mas em i gutpela taim bilong mekim wok painia haptaim. Ol pablisa i laik mekim wok painia haptaim, ol i ken makim olsem ol bai autim tok inap 30 aua o 50 aua. Sapos wasman sekit i kam lukim kongrigesen long mun Mas, ol painia haptaim inap insait long miting olgeta em bai mekim wantaim ol painia oltaim na painia salim. Memorial bai kamap long Tunde, Mas 26, 2013. Nau ol i surikim wok bilong tilim invatesen bilong Memorial i go sampela wik moa, i no olsem long ol yia i go pinis, na dispela wok bai kirap long Mas 1. Mun Mas i gat 5-pela wiken. Olsem na yu ting yu inap skelim gut ol samting na bai yu insait tu long wok painia haptaim long dispela mun?
3. Olsem wanem yumi ken mekim plen long mekim bikpela wok moa bilong autim tok?
3 Mekim Plen Nau: Nau em i taim bilong skelim ol wok bilong yu na lukim sapos i gat sampela samting yu mas stretim bambai yu inap mekim wok painia. Em i bikpela samting long famili i wok gut wantaim, olsem na taim yupela i mekim Famili Lotu yupela i ken toktok wantaim long ol mak em famili i laik winim na wokim wanpela sediul. (Snd. 15:22) Sapos yu no inap mekim wok painia haptaim, orait no ken bel hevi. Sapos inap, yu ken stretim ol wok bilong yu na bai yu autim tok sampela aua moa long ol de bilong yu long autim tok. Olsem wanem? Yu inap autim tok wanpela de moa namel long wik?
4. Wanem gutpela samting bai kamap taim yumi mekim bikpela wok long Mas, Epril na Me?
4 Taim yumi mekim bikpela wok long Mas, Epril na Me, yumi bai kisim bikpela amamas moa long yumi mekim wok bilong Jehova, na long givim samting long ol narapela. (Jon 4:34; Apo. 20:35) Na bikpela samting moa, taim yumi daunim sampela laik bilong yumi yet bilong mekim wok bilong Jehova, dispela bai givim amamas long em.—Snd. 27:11.