“Autim Tru Olgeta Tok Bilong God”
1 Taim yu amamas tru long kisim wanpela gutpela samting, yu save soim amamas bilong yu long rot bilong gutpela tingting na pasin, a? Yes, bai yu mekim olsem! Jehova i mekim gutpela pasin sori long ol manmeri, na lukim tok aposel Pol i mekim long dispela samting. Em i tok: “Yumi mas tenkyu long God long dispela presen”! Dispela “presen” em i wanem samting? Em pasin bilong God long “mekim gut long” yumi, na nambawan bikpela samting em i bin mekim bilong kamapim dispela samting i olsem: Em i givim Pikinini bilong em olsem presen bilong baim bek yumi long sin.—2 Ko. 9:14, 15; Jo. 3:16.
2 Olsem wanem? Pol i tenkyu long rot bilong maus bilong em tasol? Nogat! Long planti rot em i soim olsem em i pilim tru gutpela pasin bilong God. Em i tingim tru i stap bilong ol wanwok Kristen long ol samting bilong spirit, na em i laik mekim ol samting em inap mekim bilong helpim ol na bai pasin sori bilong God i ken helpim tru ol. Pol i tok long ol dispela man olsem: “Mipela i laikim yupela tumas, olsem na mipela i laik givim gutnius bilong God long yupela. Na mipela i redi tu long givim laip bilong mipela bilong helpim yupela, long wanem, yupela i bin kamap pren tru bilong mipela.” (1 Te. 2:8) Pol i laik helpim ol man i stap insait pinis long kongrigesen na bai ol i stap gut na God i ken kisim bek ol, na tu, em i no les long autim gutnius, na raun inap planti tausen kilomita long graun na solwara bilong painim ol man inap “kisim laip i stap gut oltaim.” (Ap. 13:48) Pasin bilong Pol long pilim tru ol samting Jehova i bin mekim bilong helpim em i kirapim em long “autim tru olgeta tok bilong God.”—Kl. 1:25.
3 Olsem wanem? Pasin bilong yumi long pilim ol samting Jehova i bin mekim bilong helpim yumi i kirapim yumi long helpim ol narapela long ol samting bilong spirit insait long kongrigesen bilong yumi? (Ga. 6:10) Bel bilong yumi i kirapim yumi long autim strong gutnius bilong Kingdom long teritori bilong yumi?—Mt. 24:14.
4 Rot Bilong Tenkyu Long Jehova na Jisas: Long olgeta yia Memorial bilong tingim i dai bilong Jisas i opim rot long yumi ken tenkyu long Jehova na Jisas long ol samting ol i bin mekim bilong helpim yumi. Memorial i no wanpela miting tasol o wanpela bung nating bilong tingim wanpela samting. Jisas i tok: “Yupela i mas mekim olsem bilong tingim mi.” (Lu. 22:19) Memorial bilong tingim i dai bilong Krais em i taim bilong tingim pasin bilong Jisas. Em i taim bilong luksave olsem em i stap laip na mekim wok long nau. Em i bin stap gut long God na givim em yet olsem ofa, olsem na em i gat biknem na em i stap king. Memorial em i gutpela taim tu long soim olsem yumi stap daun long wok bos bilong Krais taim em i bosim ol wok bilong kongrigesen Kristen. (Kl. 1:17-20) Olgeta manmeri bilong God i mas i stap long Memorial bilong tingim i dai bilong Krais. Long dispela yia em bai kamap long Fonde, Mas 28, 2002, taim san i go daun pinis.
5 Yumi bin wok strong paslain long Memorial bilong las yia, olsem na 16,645 manmeri i bung long Memorial long Papua Niugini, dispela namba i winim olgeta taim bipo. Hamas man bai bung long dispela yia? Sapos yumi “hatwok tru” long helpim planti man long kam, namba bai go bikpela tru.—1 Ti. 4:10.
6 Yumi go long Kaikai Bilong Bikpela, na tu, yumi inap mekim bikpela wok moa bilong autim tok. Planti brata na sista bai mekim wok painia haptaim long wanpela o tupela mun samting. Long olgeta yia insait long 5-pela yia i go pinis, kirap long mun Mas i go inap Me, averes bilong ol painia haptaim em 648. Olsem wanem? Yu inap stretim ol samting bilong yu na bai yu inap mekim wok painia haptaim long dispela yia? Em i gutpela rot tru bilong tenkyu long God long gutpela pasin bilong em long givim Krais olsem ofa. Yu ken bilip tru olsem Jehova bai blesim wok bilong yu, olsem ekspiriens hia i soim.
7 Wanpela sista long narapela kantri i mekim wok mani fultaim, em i stori long ekspiriens bilong em long mekim wok painia haptaim long Mas long las yia. Em i tok: “Wok Kingdom Bilong Yumi bilong Februeri 2001, i kirapim olgeta em sindaun bilong ol i orait long ol i ken mekim wok painia haptaim long mun Mas na Epril. Long mun Mas i gat 5-pela Sarere, olsem na sediul bilong mi i wok gut long dispela mun. Mi putim aplikesen bilong mi.” Taim mun bilong wok painia i kirap, em i putim mak long kirapim wanpela Baibel-stadi. Olsem wanem? Em i winim mak bilong em? Yes, em i winim, taim em i bin autim tok inap 52 aua! Em i ting olsem wanem long dispela? “Taim yumi wok strong bai yumi kisim ol gutpela blesing.”
8 Wanem ol gutpela samting i painim famili i mekim wok painia wantaim? Long wanpela kantri wanpela famili i gat tupela pikinini ol i mekim wok painia long las Epril, na ol i ting em i wanpela mun ol bai tingim oltaim. Mama i tok: “Long olgeta de mipela i amamas long ol samting, long wanem, mipela i wanbel long wok bilong autim tok! Taim mipela i kaikai mipela i toktok long ol samting i bin kamap long wok autim tok, olsem na taim bilong kaikai em taim bilong amamas.” Pikinini man i tok: “Long olgeta narapela taim namel long wik papa i save mekim wok mani, tasol nau em inap autim tok namel long wik na mi amamas long wok wantaim em.” Papa i tok: “Olsem het bilong famili, mi belgut long save olsem mipela i wok wantaim long mekim nambawan bikpela wok bilong taim bilong yumi.” Olsem wanem? Famili bilong yu inap mekim wok painia wantaim? Gutpela sapos yupela famili i toktok wantaim na skelim sapos famili olgeta inap mekim wok painia haptaim long mun Mas na long sampela mun moa.
9 Inap Yumi Mekim Bikpela Wok Moa Long Mas Winim Olgeta Mun Bipo? Long Wok Kingdom Bilong Yumi bilong Mas, 2000, ol i kamapim dispela askim: “Inap Yumi Mekim Bikpela Wok Moa Long Epril 2000 Winim Olgeta Mun Bipo?” Wanem samting i bin kamap? Inap 404 i mekim wok painia haptaim, dispela namba i winim olgeta mun bipo. Na tu, yumi tilim planti nius, winim olgeta taim bipo. Yu inap tingim bikpela amamas i kamap long kongrigesen bilong yupela taim yupela i mekim planti wok bilong spirit long dispela mun? Yumi inap mekim wankain wok o bikpela wok moa long dispela yia? Taim yumi olgeta i wok strong, Mas 2002 inap kamap gutpela mun, winim olgeta mun bipo. Olsem wanem Mas inap kamap gutpela mun olsem?
10 I gat tupela as na mun Mas i mas kamap mun bilong mekim bikpela wok. Namba wan as i olsem: Memorial bai kamap long pinis bilong Mas, olsem na yumi gat bikpela hap taim long kirap bilong mun long singautim planti man long kam. Namba tu, long dispela yia mun Mas i gat 5-pela wiken, olsem na i no hatwok tumas long ol brata i wok mani o go long skul i mekim wok painia. Gutpela sapos yu skelim na wokim wanpela gutpela sediul long nau, mekim wok long kalenda i stap long dispela pepa. Ating bai yu luksave olsem wok painia haptaim i no hatwok tumas olsem yu bin ting. Olsem: Sapos yu autim tok 8-pela aua long olgeta 5-pela wiken, orait insait long ol narapela de bilong mun yu mas autim tok 10-pela aua tasol bilong kisim 50 aua.
11 Ol elda i ken mekim wanem bilong helpim olgeta long kongrigesen long “autim tru olgeta tok bilong God”? Ol i ken kirapim ol brata long givim bel long rot bilong ol tok bilong miting na pasin bilong toktok wantaim ol. Ol brata i lukautim Buk-Stadi na helpim bilong ol i ken go pas long toktok wantaim olgeta wan wan i stap long grup bilong ol na helpim ol. Sapos yu mekim sampela gutpela tok bilong strongim bel bilong ol o givim sampela tok inap helpim ol, dispela samting tasol inap kirapim ol. (Snd. 25:11) Planti bai luksave olsem ol inap mekim wok painia haptaim sapos ol i mekim sampela liklik senis long sediul bilong ol. Sapos planti elda na kongrigesen sevent wantaim meri bilong ol inap mekim wok painia haptaim long mun Mas, dispela gutpela pasin bilong ol inap kirapim planti pablisa long mekim wok painia wantaim ol. Sampela pablisa i no gat strongpela skin o sampela narapela samting i mekim na ol i no inap mekim wok painia, tasol yumi ken strongim ol long kamapim amamas bilong ol long ol gutpela samting ol i kisim na mekim bikpela wok autim tok wantaim kongrigesen inap long skel bilong ol.
12 Wok inap kamap gutpela sapos ol elda i stretim gut ol samting pastaim. Ol i mas makim ol bung bilong wok autim tok long wik olgeta long taim i stret long hap bilong yupela. Sapos inap, paslain long olgeta miting bilong wok autim tok, wasman autim tok bai makim ol strongpela brata long lukautim ol dispela bung. Ol brata i mas redi gut na bai ol dispela bung i no ken abrusim 10 i go inap 15 minit. Insait long dispela hap taim ol i mas makim ol poroman, makim teritori, na beten. (Lukim Askim i stap long Wok Kingdom Bilong Yumi bilong Oktoba 2001.) Yupela i mas stori gut long kongrigesen long sediul bilong dispela mun na putim sediul long notisbot.
13 Yupela i mas redim planti teritori. Wasman autim tok i mas bung wantaim brata i lukautim ol teritori na stretim rot bilong autim tok long ol teritori yupela i no save autim tok planti taim long en. Yupela i mas wok strong long go lukim ol haus i no gat man, autim tok long rot na ol stua, na autim tok long apinun.
14 Helpim Ol Long Autim Tok Gen: Olsem wanem? Sampela long teritori bilong kongrigesen bilong yupela i no autim tok moa? Ol kain brata olsem ol i insait yet long kongrigesen na i mas i gat man bilong helpim ol. (Sng. 119:176) Pinis bilong dispela olpela pasin i klostu tru na nupela taim i laik kamap, olsem na i gat as tru na yumi mas wok strong long helpim ol brata i no autim tok moa. (Ro. 13:11, 12) Yumi ken mekim wanem bilong kirapim bel bilong ol dispela brata na helpim ol long bilip olsem ol inap mekim dispela wok?—Hi. 3:12-14.
15 Lain elda i ken toktok wantaim long olsem wanem ol i ken helpim ol brata i bin lusim wok autim tok insait long sampela yia i go pinis. (Mt. 18:12-14) Kuskus i mas sekim ol kat Congregation’s Publisher Record na kisim save long ol brata i bin lusim wok autim tok. Ol elda i mas wok strong long go lukim ol dispela brata na helpim ol. Ating elda i laik go lukim wanpela pablisa bipo em i save poroman wantaim em, o ol elda inap askim sampela pablisa long helpim ol kain brata olsem. Ating ol dispela pablisa i bin stadi wantaim brata i lusim wok autim tok na ol i amamas long ol inap helpim ol long kain taim olsem. Gutpela sapos planti brata husat i bin lusim wok autim tok ol i kirap gen long autim tok bilong God. Sapos ol i winim mak bilong autim tok, mun Mas em i gutpela taim long ol i kirap mekim olsem!—Bilong kisim sampela save moa, lukim Askim i stap long Wok Kingdom Bilong Yumi bilong Novemba 2000.
16 Sampela Narapela i Winim Mak Bilong Autim Tok? Jehova i wok yet long mekim gut long lain bilong em na bungim “ol gutpela samting bilong olgeta lain man.” (Hag. 2:7, NW ) Long olgeta yia planti tausen i winim mak bilong kamap pablisa i no baptais. Ol i husat? Em ol pikinini bilong ol Witnes Bilong Jehova na ol Baibel-stadi i wok long kamap strong. Olsem wanem yumi ken save sapos ol i winim mak bilong kamap pablisa bilong autim gutnius?
17 Ol Pikinini Bilong Ol Witnes Bilong Jehova: Planti pikinini i bin autim tok long ol haus wantaim papamama bilong ol inap planti yia, tasol ol i no mekim wok yet olsem pablisa i no baptais. Mun Mas em i gutpela taim long ol i ken kirap mekim dispela wok. Olsem wanem yu ken save sapos pikinini bilong yu i winim mak? Long pes 99 bilong buk Lo Bilong Yumi Bilong Mekim Wok Autim Tok i tok olsem: “Pikinini i bihainim gutpela pasin na em inap kamapim bilip bilong em long narapela man na autim gutpela tok, na bel bilong em i kirapim em long mekim dispela wok.” Sapos yu ting pikinini bilong yu i winim mak, orait toktok wantaim wanpela elda bilong Kongrigesen Sevis Komiti.
18 Ol Baibel-Stadi i Winim Mak: Taim wanpela sumatin bilong Baibel i bin kisim save na go long ol miting inap sampela taim pinis, ating em i gat laik long kamap pablisa i autim tok bilong Kingdom. Sapos yu stadi wantaim kain sumatin olsem, tingim ol dispela askim: Em i wok long kamap strong long skel i stret long krismas na save bilong em? Em i kirap pinis long autim bilip bilong em long ol narapela long kain kain taim na ples? Em i wok long “kamap nupela man”? (Kl. 3:10) Em i winim mak bilong kamap pablisa i no baptais olsem buk Lo i makim long pes 97-99? Sapos olsem, yu mas toksave long Kongrigesen Sevis Komiti na bai ol i ken stretim rot long tupela elda i ken bung wantaim yu na sumatin. Sapos em i winim mak, tupela elda bai tokim em olsem em inap kirap autim tok wantaim kongrigesen.
19 Olsem Wanem Long Epril na Me? Ol dispela mun tu i bilong mekim bikpela wok moa bilong autim tok. Planti pablisa em ol i mekim wok painia haptaim long Mas, ating ol inap mekim dispela wok gen long Epril o Me, o long tupela mun wantaim. Long Epril na Me, bai yumi wok strong long tilim nius Wastaua na Kirap! Ol nius i bin helpim tru sindaun bilong ol man i save ritim ol! Ol dispela nius i bin mekim bikpela wok bilong helpim namba bilong yumi i go bikpela long olgeta hap bilong graun. Long Epril na Me bai yumi wok strong long tilim ol dispela nius long planti man. Stretim nau ol samting na bai yu ken givim bel long dispela wok.
20 Bai yumi mekim bikpela wok moa bilong autim tok, olsem na yu ting yu mas apim namba bilong ol magasin yu save kisim long kongrigesen? Long sevis yia olgeta, yumi save tilim nius Wastaua na Kirap! long olgeta Sarere, em De Magasin bilong yumi. Planti ol bai mekim wok painia haptaim na yumi olgeta bai tilim ol nius inap tupela mun, olsem na ating yu mas apim namba bilong ol magasin yu save putim oda long en long kongrigesen. Sapos olsem, toksave hariap long brata i lukautim ol magasin long kongrigesen bilong yu. Na brata i lukautim buk-rum i mas stretim ol samting na bai kongrigesen i gat liklik nius Yu Laik Kisim Sampela Save Moa Long Baibel? bilong olgeta i ken tilim.
21 Planti ol i bin tok amamas long hap “Ol Tok Yu Ken Mekim Bilong Tilim Ol Nius” i stap long Wok Kingdom Bilong Yumi. Olsem wanem? Yu bin kisim helpim long dispela hap na lainim ol dispela tok bilong tilim ol nius? Yu ken makim hap taim bilong famili-stadi long olgeta wik bilong lainim ol dispela tok.
22 Mekim Gutpela Wok Long Ol Dispela Mun: Olsem aposel Pol i bin mekim, yumi tu i ken soim Jehova olsem yumi amamas tru long “dispela presen” em i givim yumi. Yumi ken mekim olsem long rot bilong givim bel long olgeta wok bilong spirit bai kamap long ol mun i klostu pinis. Ol dispela wok i olsem: (1) go long nambawan bikpela bung bilong yia, em Kaikai Bilong Bikpela, long Fonde, Mas 28, 2002; (2) helpim ol brata i bin lusim wok autim tok na bai bel bilong ol i kirap gen olsem long taim ol i “bilip nupela” (KTH 2:4; Ro. 12:11); (3) helpim ol pikinini bilong yumi na ol Baibel-stadi i winim mak bilong kamap pablisa i no baptais; na (4) givim bel long wok autim tok, mekim wok painia haptaim long Mas na long ol narapela mun.—2 Ti. 4:5.
23 Yumi beten bambai yumi olgeta inap mekim bikpela wok bilong autim gutnius bilong Kingdom long ol mun i klostu pinis. Long dispela rot yumi soim olsem yumi pilim tru olgeta gutpela samting Jehova i bin mekim bilong helpim yumi.
[Blok long pes 6]
Sediul Bilong Autim Tok Long Mas 2002
Sande Mande Tunde Trinde Fonde Fraide Sarere
1 2
De Magasin
3 4 5 6 7 8 9
De Magasin
10 11 12 13 14 15 16
De Magasin
17 18 19 20 21 22 23
De Magasin
24 25 26 27 28 29 30
MEMORIAL De Magasin
TAIM SAN I GO
31 DAUN PINIS
Yu inap wokim sediul bilong winim 50 aua bilong mekim wok painia haptaim long Mas?