Tokaut Yet Long Ol Gutpela Gutpela Samting Jehova i Bin Mekim
1 I no gat narapela man i olsem bikpela God bilong yumi, Jehova! Devit i tok: “God, Bikpela bilong mi, yu bin mekim planti gutpela wok bilong helpim mipela. I no gat man i olsem yu. Yu winim ol tru.” (Sng. 40:5) Sampela gutpela gutpela wok bilong Jehova em olgeta samting bilong heven na graun em i bin mekim i kamap, Kingdom Bilong Mesaia, ol gutpela pasin sori em i mekim long ol pipel bilong em, na wok bilong autim tok long olgeta hap. (Sng. 17:7, 8; 139:14; Dan. 2:44; Mt. 24:14) Yumi laikim Jehova na tenkyu long ol samting em i mekim long yumi, dispela i kirapim yumi long tokim ol narapela long em. (Sng. 145:5-7) Long mun Mas, Epril, na Me yumi inap mekim dispela samting moa yet.
2 Mekim Wok Painia Haptaim: Olsem wanem? Yu inap stretim sediul na bai yu inap lusim 50 aua long autim tok long wanpela, tupela, o tripela mun long dispela taim bilong mekim bikpela wok? Em bai gutpela tru sapos yu inap stretim rot long mekim olsem. (Ef. 5:16) Planti i luksave olsem wok painia haptaim i helpim wok bilong ol long autim tok i kamap gutpela moa. Ol i painimaut olsem i no hatwok long toktok wantaim ol man na yusim Baibel. Taim ol i lusim planti aua long autim tok dispela i mekim na ol i gat taim bilong go bek lukim ol man i bin putim yau, na sampela pablisa husat i no bin lukautim wanpela Baibel-stadi bipo ol i bin kirapim Baibel-stadi taim ol i mekim wok painia haptaim. Painia haptaim em i wanpela wok bilong helpim ol narapela man, olsem na em i wanpela wok i save givim bikpela amamas long man i mekim.—Ap. 20:35.
3 No ken hariap na tok yu no inap insait long dispela wok. Wanpela elda husat i bin mekim wok painia haptaim las yia em i gat tupela pikinini na em i wok skin fultaim. Olsem wanem em inap mekim? Em i save wok skin Mande i go Fraide, olsem na em i autim tok planti aua long wiken, olsem kirap tilim nius long rot long 7 klok Sarere moning. Sampela narapela long kongrigesen i gat wankain sindaun ol tu i bin wok painia, na narapela i sapotim na strongim narapela. Long narapela kongrigesen, wanpela sista i gat 99 krismas i wok painia long mun Me taim pikinini meri bilong em i singautim em long wok wantaim em. Bilong helpim dispela lapun sista long autim tok long ol haus na go lukim ol Baibel-stadi, ol narapela long kongrigesen i bin kisim em raun long wilsia. Em i autim tok long telefon, long rot, na long raitim pas. Em i bilip strong olsem em i no bin mekim dispela wok long strong bilong em yet, nogat, long strong bilong Jehova tasol.—Ais. 40:29-31.
4 Wokim wanpela sediul i stret long sindaun bilong yu. Ol sediul i stap long dispela Wok Kingdom inap helpim yu long mekim olsem. Yu save wok skin fultaim o go long skul? Ating yu mas bihainim wanpela sediul i makim bikpela wok autim tok long ol wiken. Sapos skin bilong yu i no strong tumas na yu no inap autim tok planti aua long wanpela de, orait sediul i mas makim liklik haptaim bilong autim tok long olgeta wan wan de. Toktok wantaim ol narapela long laik bilong yu long mekim wok painia haptaim. Ating ol tu bai putim dispela wok olsem wanpela mak ol i laik winim.
5 Rot Ol Yangpela i Ken Mekim: Jehova i save amamas taim ol yangpela i tokaut long ol gutpela gutpela samting em i bin mekim. (Sng. 71:17; Mt. 21:16) Sapos yu yangpela na yu baptais pinis, ating yu ken mekim wok painia haptaim long taim bilong wanpela skul holide. Olsem wanem? Sapos yu no inap wok painia haptaim, yu inap putim mak long winim sampela aua moa na mekim gutpela wok moa long dispela 3-pela mun? Sapos yu save wok autim tok wantaim papamama tasol yu no kamap pablisa i no baptais yet, nau em gutpela taim long wok long winim dispela mak. Yu no ken ting olsem yu mas save long bekim bilong olgeta askim bilong Baibel o save bilong yu i mas wankain olsem ol man i bikpela pinis na ol i baptais pinis, nogat. Olsem wanem? Yu save long ol bikpela as tok bilong Baibel? Yu save bihainim ol lo bilong Baibel long stretpela pasin? Yu laik bai ol man i save olsem yu wanpela Witnes Bilong Jehova? Sapos olsem, toktok wantaim papamama. Ol i ken stretim rot long go lukim ol elda na bai ol i ken skelim olsem yu winim ol mak o nogat.—Lukim buk Lo, pes 98-99.
6 Helpim Ol Narapela Long Autim Tok: Ating ol sumatin yumi stadi wantaim ol husat i wok long kamap strong ol inap kamap pablisa long ol dispela mun we yumi laik mekim bikpela wok moa. Sapos sumatin i wok long kamap strong, orait kisim helpim long wasman bilong Buk-Stadi bilong yu o wasman autim tok. Wanpela bilong tupela i ken go wantaim yu taim yu mekim dispela stadi bilong skelim sumatin i kamap strong olsem wanem. Sapos sumatin i winim ol mak na em i laik kamap pablisa, orait wasman siaman i ken stretim rot bilong tupela elda i bung wantaim yu na sumatin. (Lukim Wastaua, Me 1, 1989, pes 18.) Taim ol elda i orait long em i kamap pablisa, orait kirap wantu long skulim em long pasin bilong autim tok.
7 Ol wasman bilong Buk-Stadi i mas tingim ol pablisa long grup bilong ol husat i no mekim wok autim tok moa o ol i no mekim long olgeta mun. Singautim ol long raun autim tok wantaim yu. Sapos longtaim tru ol i no bin autim tok, gutpela sapos tupela elda i ken toktok wantaim ol pastaim bilong painimaut ol i winim yet mak bilong stap pablisa o nogat. (Lukim Askim i stap long Wok Kingdom bilong Novemba 2000.) Bikpela laik bilong kongrigesen long mekim bikpela wok long ol dispela mun inap kirapim ol long kirap gen na autim tok long olgeta mun.
8 Redi Nau Long Mekim Bikpela Wok: Ol elda, kirap nau long strongim ol brata sista long mekim wok painia haptaim. Ol tok na pasin yu mekim bilong strongim wok painia haptaim bai helpim tru dispela wok. (1 Pi. 5:3) Hamas brata sista i bin mekim dispela wok bipo? Kongrigesen inap winim dispela namba nau long dispela yia? Ol wasman bilong Buk-Stadi wantaim ol helpim bilong ol i laik painim rot long kirapim olgeta insait long grup bilong ol long mekim bikpela wok moa. Ating ol wasman autim tok i laik kamapim sampela moa bung bilong autim tok. Toksave pastaim long kongrigesen long dispela. Makim ol strongpela pablisa long go pas long lukautim ol bung bilong autim tok na ol i mas kirapim na pinisim ol dispela bung long taim stret. (Lukim Askim 1 i stap long Wok Kingdom bilong Oktoba 2001.) Na tu, wasman autim tok i mas stretim ol samting na bai i gat planti teritori, ol nius, na ol buk samting.
9 Las yia ol elda long wanpela kongrigesen long narapela kantri i bin kirap paslain tru long givim bel long kirapim ol brata sista long mekim wok painia haptaim, na sampela ol elda yet i mekim dispela wok. Ol i kamapim sampela narapela bung bilong autim tok—bilong autim tok long rot, bilong ol sumatin bihain long skul, na narapela bilong lain i wok mani, bihain long taim bilong wok. Na tu, ol i kamapim 3-pela bung bilong autim tok long ol Sarere. Dispela i mekim na 66 i insait long wok painia haptaim long mun Epril!
10 Gutpela sapos long neks famili-stadi makim taim bilong toktok long sampela mak famili i laik winim long mun Mas, Epril na Me. Sapos yupela i wok gut wantaim na stretim gut ol samting, sampela o olgeta insait long famili inap mekim wok painia haptaim. Sapos yupela i no inap mekim olsem, orait putim mak long winim sampela aua moa long rot bilong skruim sampela minit o aua samting long ol de yupela save autim tok o long rot bilong autim tok long sampela de moa. Beten wantaim famili long dispela samting. Yupela ken bilip tru olsem Jehova bai blesim wok bilong yupela.—1 Jo. 3:22.
11 Nambawan Gutpela Gutpela Samting God i Bin Mekim: Nambawan samting i kamapim pasin laikim bilong Jehova em presen em i givim, em i givim Pikinini bilong em olsem pe bilong baim bek yumi. (1 Jo. 4:9, 10) Pe bilong baim bek man i opim rot bilong kisim bek olgeta man long sin na i dai. (Ro. 3:23, 24) Blut bilong Jisas i strongim nupela kontrak, na long dispela rot God inap adoptim ol man i no gutpela olgeta na ol i kamap olsem ol pikinini bilong God na ol inap mekim wok king long Kingdom long heven. (Jer. 31:31-34; Mk. 14:24) Nambawan bikpela samting, pasin bilong Jisas long bihainim stret olgeta tok bilong God i bin mekim holi nem bilong Jehova. (Lo 32:4; Snd. 27:11) Long Sande, Epril 4, bihain long san i go daun pinis, long olgeta hap bilong graun ol bai mekim Memorial bilong tingim i dai bilong Krais.
12 Bung bilong Kaikai Bilong Bikpela i save litimapim ol gutpela gutpela samting Jehova i bin mekim. Tok i kamap long dispela bung i givim save long yumi na i helpim yumi long tingim tru samting Jehova i mekim taim em i givim dispela pe bilong baim bek ol man. Ol man i gat laik long harim tok na ol i kam bung bai lukim ol narapela gutpela gutpela samting Jehova i bin mekim. Ol bai lukim pasin wanbel na pasin laikim em Jehova i bin lainim ol manmeri bilong em long kamapim. (Ef. 4:16, 22-24; Jems 3:17, 18) Ol samting i kamap long dispela bikpela bung inap mekim bikpela samting long tingting bilong ol man, olsem na yumi laik bai planti man i kam long dispela bung.—2 Ko. 5:14, 15.
13 Singautim Ol Narapela Long Kam: Kirap redim ol samting nau long rot bilong wokim wanpela lista bilong ol man yu laik singautim ol i kam. Long lista yu ken raitim nem bilong ol wanblut husat i no Witnes, ol neiba, ol wanwok na wanskul, ol man yu stadi wantaim ol long nau na long bipo, na olgeta gobek bilong yu. Ol wasman bilong Buk-Stadi i ken raitim nem bilong ol pablisa husat i lusim wok autim tok long lista bilong ol.
14 Yusim ol pepa bilong singautim man long kam long Memorial na raitim taim na hap we Memorial bai kamap long en. O yu ken yusim toksave bilong Memorial i stap long baksait bilong Wastaua, Mas 15, 2004, o Awake! bilong Mas 22, 2004. Taim Epril 4 i wok long kam klostu, go bek lukim o ringim gen ol man i stap long lista bilong kirapim tingting bilong ol.
15 Long Bung Bilong Memorial: Long nait bilong Memorial, kamap paslain tru long bung i kirap. Mekim gutpela pasin long ol man long rot bilong amamas na tok welkam long ol nupela man. (Ro. 12:13) Yu gat wok yu mas mekim long ol man yu bin singautim ol i kam. Mekim gut bel bilong ol, na kisim ol i go bungim ol narapela bilong kongrigesen. Helpim ol long painim sia klostu long yu. Sapos ol i no gat Baibel o buk singsing, orait stretim rot na bai ol i ken lukluk long buk bilong yu o bilong narapela. Taim bung i pinis, stap redi long bekim ol askim bilong ol. Sapos em namba wan taim long ol i kam, askim ol sapos ol i laik kisim sampela save moa long Tok Bilong God na samting God bai mekim. Tokim ol olsem yu laik stadi long Baibel wantaim ol.
16 Wok Yet Long Helpim Ol Man i Bin Kam: Long ol wik bihain long Memorial, ating ol man i bin kam bung i mas kisim sampela helpim. Sampela bilong ol em ol man bipo ol i bin kam oltaim long ol miting tasol nau ol i no kam tumas. Ol elda bai redi long stretim rot bilong helpim ol kain man olsem, na ol i laik painimaut as na ol i no wok moa long kamap strong long samting bilong spirit na kirapim ol long tingim olsem taim i sot nau. (1 Pi. 4:7) Helpim ol long luksave long ol gutpela samting inap kamap taim man i bihainim tok bilong Baibel long bung wantaim ol manmeri bilong God.—Hi. 10:24, 25.
17 Maski yumi stap oltaim oltaim bai yumi no inap save gut long ol gutpela gutpela samting Jehova i bin mekim. (Jop 42:2, 3; Sav. 3:11) Olsem na, oltaim bai i gat ol samting bilong litimapim nem bilong em long en. Long dispela taim bilong Memorial yumi ken kamapim olsem yumi amamas long ol gutpela gutpela samting Jehova i mekim long rot bilong mekim bikpela wok moa bilong autim tok.
[Askim Bilong Stadi]
1. Wanem sampela gutpela gutpela samting Jehova i bin mekim na yu save amamas long en?
2. Olsem wanem wok painia haptaim i save helpim yumi?
3. Olsem wanem sampela i bin mekim wok painia haptaim maski sindaun bilong ol i gat hatwok?
4. Taim yumi laik wokim sediul bilong wok painia haptaim, ating yumi mas tingim wanem ol samting?
5. Ol yangpela i ken putim wanem ol mak bilong winim long mun Mas, Epril na Me?
6. Olsem wanem yumi ken helpim ol sumatin i stadi long Baibel long kamap ol pablisa bilong autim gutnius?
7. Ol pablisa i no save autim tok long olgeta mun na ol pablisa i lusim wok autim tok, olsem wanem ol i ken kisim helpim?
8, 9. Ol elda i ken mekim wanem bilong kirapim laik bilong kongrigesen long insait long dispela bikpela wok?
10. Ol famili i ken mekim wanem bilong mekim bikpela wok moa?
11. (a) Ofa bilong Krais i bin mekim wanem ol gutpela gutpela samting? (b) Memorial bai kamap long hap bilong yumi long wanem taim na long wanem hap?
12. Sapos ol man husat i laik harim tok i kam long Kaikai Bilong Bikpela, dispela bai helpim ol olsem wanem?
13, 14. Gutpela yumi singautim husat long i kam long Memorial? Yumi ken mekim olsem wanem?
15. Yumi ken mekim wanem bilong mekim isi bel bilong ol man long nait bilong Memorial?
16. Wanem samting inap helpim ol man i bin kam long Memorial long wok long kamap strong long ol samting bilong spirit?
17. Wanem as na yumi laik wok yet long tokaut long ol gutpela gutpela samting Jehova i bin mekim?
[Sat long pes 5]
Yu Inap Bihainim Wanpela Bilong Ol Dispela Sediul na Mekim Wok Painia Haptaim?
Mas San M* Tu* Tr* Fo F Sa Mun Olgeta Aua
Wan Wan De 2 1 1 1 1 1 5 51
Tupela De 0 5 0 5 0 0 0 50
Ol Wiken Tasol 5 0 0 0 0 0 8 52
Ol Wiken na
Tupela De Namel
Long Wik 2 0 0 2 0 2 6 50
Epril San M Tu Tr Fo* F* Sa Mun Olgeta Aua
Wan Wan De 2 1 1 1 1 1 5 50
Tupela De 0 0 0 0 5 5 0 50
Ol Wiken Tasol 5 0 0 0 0 0 8 52
Ol Wiken na
Tupela De Namel
Long Wik 2 0 0 2 0 2 6 50
Me San* M* Tu Tr Fo F Sa* Mun Olgeta Aua
Wan Wan De 2 1 1 1 1 1 4 51
Tupela De 0 5 0 0 0 0 5 50
Ol Wiken Tasol 3 0 0 0 0 0 7 50
Ol Wiken na
Tupela De Namel
Long Wik 2 0 0 2 0 2 5 51
* Faipela long mun