Olsem Wanem Yumi Inap Helpim Ol Poroman Marit i No Witnes?

¹ Poroman marit bilong planti wokboi bilong Jehova ol i no Witnes. Na ol i save mekim pasin pren long ol brata na ol i amamas long kongrigesen tasol ol i no wok long kamap wanpela wokboi bilong God. Wanpela man marit i tok: “Taim mi tingim wok bilong go long ol haus na autim tok, dispela i olsem bikpela banis i pasim rot bilong mi.” Ating sampela i mekim ol pasin i no stret em ol i mas lusim, o ol i pilim olsem ol i no inap bihainim wankain sediul tiokratik olsem poroman marit i save bihainim. Olsem wanem yumi inap helpim ol?

² Soim Olsem Yu Tingim Ol: Taim yumi soim olsem yumi tingim narapela na luksave long ol samting ol i tingting long en, ating dispela bai opim rot long ol long harim tok i tru bilong Baibel. (Fl. 2:⁠4) Ol manmeri em pastaim ol i no wanbel long bilip bilong ol poroman marit ol i save toktok long pasin ol narapela i bin mekim bilong tingim ol. Dispela man marit yumi bin stori long en long pastaim i tok: “José, wanpela elda long kongrigesen, em i bin mekim samting bilong tingim mi. Mi ting pasin bilong em long kirapim mi i mekim na mi kirap givim bel long stadi.” Narapela man marit i tingim pasin bilong ol brata i bin kam lukim em long toktok long ol samting em i laik toktok long en. Em i tok: “Mi kisim narapela tingting olgeta long lotu bilong meri bilong mi. Ol pren bilong em i gat save na ol inap toktok long kain kain samting.”​—⁠1 Ko. 9:​20-23.

³ Givim Helpim Long Ol: Bel bilong ol poroman marit husat i no Witnes inap kirap taim ol brata i mekim samting bilong helpim ol. (Snd. 3:27; Ga. 6:10) Taim ka bilong wanpela man marit husat i no Witnes i bagarap, wanpela yangpela Witnes i bin helpim em. Man hia i tok: “Mi kirap nogut long dispela samting.” Narapela brata i lusim wanpela de olgeta long helpim man bilong wanpela sista long sanapim banis long graun bilong em. Taim ol i wok tupela i toktok wantaim na ol i kamap pren. Tupela wik bihain, dispela man i kam long brata na tok: “Nau em taim bilong mi long kamapim sampela senis long laip bilong mi. Bai yu stadi wantaim mi long Baibel?” Em i kisim na bihainim kwik ol tok na nau em i wanpela Witnes i baptais pinis.

⁴ Taim yumi wok long painim ol man i gat gutpela bel long teritori bilong yumi, yumi laik wok yet long helpim ol manmeri husat i marit long ol wanbilip bilong yumi.​—⁠1 Ti. 2:​1-4.