“Nupela Milenium—Wanem Samting Bai Painim Yu Long Bihain?”
1 Planti man long olgeta hap bilong graun i bin tingting long dispela askim. Ol man i bin wokim planti samting long planti handet yia i go pinis, tasol ol manmeri i no bilip moa long ol, long wanem, ol bikpela hevi i save painim ol man inap planti handet yia ol i stap yet. (Jop 14:1; Sng 90:10) Ol manmeri inap painim we ol samting bilong mekim gut bel bilong ol?
2 Long mun Oktoba na Novemba yumi bai mekim wanpela bikpela wok tru bilong helpim ol man i sindaun long hap bilong yumi long painim bekim bilong dispela askim. Yumi bai mekim olsem wanem? Yumi bai mekim long rot bilong tilim Kingdom Nius Namba 36. Nem bilong en “Nupela Milenium—Wanem Samting Bai Painim Yu Long Bihain?” Long wik namba 1 na 2 bilong Oktoba, bai yumi tilim nius Wastaua na Kirap! Na long Mande, Oktoba 16, i go inap long Fraide, Novemba 17, yumi bai mekim save tru long tilim Kingdom Nius Namba 36. Long dispela taim bai yumi tilim Kingdom Nius Namba 36 namel long wik. Orait long Sarere Sande, bai yumi tilim Kingdom Nius wantaim ol nupela magasin.
3 Bai Yu Insait Tru Long Dispela Wok? Ol elda, ol wokman, na ol painia bai i go pas long dispela wok bilong tilim nius, long wanem, ol i stap olsem gopas bilong dispela wok. Planti pablisa i bin stretim sampela samting long sindaun bilong ol na bai ol i ken mekim wok painia haptaim long wanpela o tupela mun wantaim em yumi bai tilim Kingdom Nius. Sampela i tingting long lusim planti aua long autim tok, winim olgeta narapela mun.
4 Ol wasman bilong Buk-Stadi i mas strongim olgeta wan wan long grup bilong ol long insait tru long tilim Kingdom Nius Namba 36. Ating i gat sampela pablisa em ol i no autim tok moa. Ol elda i ken i go lukim ol dispela pablisa na skelim olsem ol i ken mekim wanem bilong helpim ol. Ating ol i ken stretim rot bambai wanpela pablisa i gat save long mekim dispela wok em i ken wok wantaim dispela pablisa long autim tok long ol dispela mun. Yumi mekim liklik tok tasol bilong tilim Kingdom Nius Namba 36, olsem na ating dispela bai helpim dispela pablisa na bai em i kirap gen long autim tok.
5 Dispela em i gutpela rot bilong ol Baibel-stadi i wok long stadi long buk Save na ol i winim mak bilong kamap pablisa i no baptais yet, ol i ken kirap insait long wok autim tok. Ol pikinini tu i ken insait long dispela gutpela wok.
6 Yu ken mekim liklik tok tasol bilong tilim nius. Ating yu ken tok:
◼ “Mi lusim taim bilong mi yet long helpim wok bilong tilim dispela nius long olgeta famili long [kolim nem bilong taun o ples], em i gat sampela bikpela tok long en. Yu ken kisim wanpela bilong yu. Plis yu mas kaunim.” Em i gutpela sapos yu no karim paus bilong autim tok long taim yu tilim Kingdom Nius Namba 36.
7 Stretim Gut Ol Bung Bilong Wok Autim Tok: Taim ol elda i stretim ol samting bilong wok autim tok, ol i mas mekim gut na bai em i no givim hatwok long ol pablisa. Wasman bilong wok autim tok i mas skelim gut na bai i gat planti teritori bilong autim tok long ol haus na ples bisnis na bai olgeta i ken insait tru long dispela wok. Sapos i gat rot, yupela i mas mekim ol bung bilong wok autim tok long olgeta de namel long wik na long Sarere Sande. Ol i ken stretim rot bilong autim tok long apinun na bai ol sumatin bilong skul, na ol man i save wok nait samting, na ol narapela i ken insait long en.
8 Ol Samting Yumi Ken Mekim Taim Ol Man i No Stap Long Haus: Sapos inap, yumi laik toktok wantaim ol man long olgeta haus. Sapos ol man i no stap long haus taim yu go, raitim namba bilong haus na nem bilong rot na go bek long narapela taim. Sapos em laspela wik bilong tilim nius na yu no bungim man i stap long dispela haus, orait yu ken putim gut wanpela Kingdom Nius Namba 36 bilong em long wanpela hap ol man i no ken lukim taim ol i wokabaut long rot. Sapos hap teritori yupela i tilim nius long en i hatwok long i go bek gen insait long taim bilong tilim dispela nius, o sapos i gat planti teritori na yupela i no inap pinisim, ating ol elda bilong kongrigesen bilong yupela bai tokim kongrigesen long lusim wanpela Kingdom Nius Namba 36 long ol haus i no gat man long taim yupela i go namba wan taim long dispela teritori.
9 Yumi Mas Taitim Bun na Wok Strong! Ol kongrigesen i mas strong long pinisim teritori bilong ol paslain long dispela wok bilong tilim Kingdom Nius i pinis long Novemba 17. Sapos teritori bilong yupela em i bikpela, sampela pablisa i ken wok wan wan long hap ples i gutpela na no gat hevi long en. Long dispela rot yupela inap toktok wantaim planti man i gat gutpela bel. No ken lusim tingting long raitim nem bilong olgeta man i laik harim tok.
10 Yupela i no ken putim oda long kisim Kingdom Nius Namba 36, long wanem, Sosaiti bai salim i kam long olgeta wan wan kongrigesen. Olsem wanem? Yu redi pinis na yu gat laik long wok strong long mekim dispela bikpela wok? Man! Yumi kisim gutpela wok tru long tokim ol man i sindaun long hap bilong yumi long ol samting God i tok promis long mekim liklik taim bihain!