Wok Yet Long Mekim Wok Autim Tok!
1 Em i laik bilong God long “kisim bek olgeta [kain] manmeri,” na em i laik ol i ken save long as bilong tok tru. (1 Ti 2:4) Long dispela as em i givim wok bilong autim gutnius long yumi. (Mt 24:14) Sapos yumi tingim gut i gat wanem as na yumi mas wok yet long autim gutnius, orait taim yumi bel hevi o ol samting i laik pulim tingting bilong yumi, dispela bai i no pasim yumi.
2 Bilong Wanem Yumi Mas Strong? I gat planti samting long graun bilong pulim tingting bilong ol man na dispela i save mekim na ol i lusim tingting o ol i no tingim tumas ol tok yumi mekim. Olsem na yumi mas tokim ol gen long ol tok bilong God long kisim bek ol man. (Mt 24:38, 39) Na tu, sindaun na i stap bilong ol man i wok long senis oltaim. Ol samting long graun tu i save senis wantu tasol. (1 Ko 7:31) Ating long tumora, long wik antap, o long narapela mun, ol nupela hevi bai painim ol manmeri yumi save autim tok long ol o sampela samting bai mekim na bai ol i laik save tru long dispela gutnius yumi autim long ol. Olsem wanem? Yu save amamas, long wanem, dispela Witnes i bin helpim yu long kisim tok i tru em i no bin les?
3 Bihainim Marimari Bilong God: Long pasin isi Jehova i larim sampela hap taim i lus pastaim na em i no kamapim hariap kot bilong em long ol man nogut. Em i mekim wok long yumi bilong kirapim yet ol manmeri i gat gutpela bel long kam long em na bai em i kisim bek ol. (2 Pi 3:9) Bai yumi gat asua long blut sapos yumi no tokim ol manmeri long tok bilong God na tokim ol long kot God bai kamapim long olgeta man nogut i no lusim ol pasin nogut bilong ol. (Ese 33: 1-11) Maski sampela taim ol man i no harim tok yumi autim, yumi no ken slek long helpim ol man i gat gutpela bel long pilim tru bikpela marimari bilong God.—Ap 20:26, 27; Ro 12:11.
4 Kamapim Sori Bilong Yumi: Long rot bilong Jisas Krais, God Jehova i tokim yumi long autim gutnius long olgeta hap bilong graun. (Mt 28:19, 20) Maski ol man i no laik harim tok bilong yumi, rot i op long yumi long kamapim olsem yumi laikim God na yumi daun long em taim yumi strong long mekim ol pasin i stret.—1 Jo 5:3.
5 Yumi mas strong long mekim yet wok autim tok! Yumi mas givim bel long mekim dispela wok long nau, taim yumi stap yet long taim bilong Jehova long kisim bek ol man.—2 Ko 6:2.