Bilong Wanem Yumi Save Go Bek Oltaim?
1 Wanpela taim yu bin givim dispela askim long yu yet? Ating yu bin mekim taim yu wok long redi long go autim tok, a? Long sampela hap yumi wokim teritori planti taim, na ating ol man i save yumi husat na ol bai hariap long tok ol i no laik harim tok. Ating wan wan tasol bai harim tok bilong yumi. Tasol maski ol i mekim olsem, i gat ol as tru na yumi save go bek oltaim.
2 Namba wan as em olsem, Jisas i tokim yumi long autim tok bilong Kingdom i go inap long las de. (Mt 24:14; 28:19, 20) Profet Aisaia i askim Jehova long em i mas autim tok i go inap long wanem taim. Bekim bilong askim bilong em i stap long Aisaia 6:11. Tru tumas, God i tokim Aisaia long go bek yet long ol manmeri bilong kamapim tok bilong Em long ol. Olsem tasol long nau, ating ol man bai i no laik harim tok bilong yumi, tasol Jehova i laik bai yumi autim tok yet long ol manmeri i stap long teritori bilong yumi. (Ese 3:10, 11) Dispela em wanpela wok holi God i givim long yumi.—1 Ko 9:17.
3 Narapela as na yumi save go bek oltaim em olsem, dispela i opim rot long yumi bilong kamapim klia olsem yumi givim bel tru long Jehova. (1 Jo 5:3) Na tu, taim yumi tingim ol samting klostu nau bai painim ol manmeri, yumi laik mekim pasin sori na toksave long ol man i stap klostu long yumi, a? (2 Ti 4:2; Je 2:8) Taim yumi stap gut long mekim wok bilong yumi, rot i save op yet long ol i ken harim tok bilong God long kisim bek ol man, olsem na bai ol i no inap tok i no gat wanpela man i bin toksave long ol.—Ese 5:13.
4 Na tu, yumi no save wanem taim sampela man bai tanim bel. Dispela samting inap kamap taim sindaun bilong ol i senis, wanpela long famili i dai, o ol samting i kamap long olgeta hap bilong graun i mekim na ol i tingting planti long ol samting bai painim ol long bihain. Na ating tok yumi mekim long ol inap kirapim ol long harim tok. (Sav 9:11; 1 Ko 7:31) Na tu, ol manmeri i save go sindaun long narapela hap. Ating yumi inap painim ol nupela manmeri long teritori bilong yumi na ol bai amamas long harim gutnius—ating em ol yangpela nau ol i gat haus bilong ol yet na ol i tingting planti long as bilong i stap bilong ol.
5 Olsem wanem? Bai yumi wok long go bek yet? Yes! Baibel i gat planti tok bilong kirapim yumi long i go bek oltaim bilong lukim ol man. Na bihain, taim wok autim tok i pinis, Jehova bai blesim yumi, long wanem, yumi bin wok oltaim long autim tok, na em bai blesim ol manmeri i bin amamas long bihainim dispela gutnius bilong Kingdom.—1 Ti 4:16.