Bilong Wanem Yumi Wok Yet Long Autim Tok?
1 Olsem wanem? Yupela i bin mekim wok bilong autim tok bilong Kingdom long hap bilong yupela inap longpela taim pinis? (Mt. 24:14) Sapos olsem, yu inap ting i no gat wok moa long autim tok long teritori bilong kongrigesen. Taim yu autim tok, ating planti man yu bungim ol i les long harim tok bilong Kingdom. Long sampela hap, yumi inap ting wok bilong yumi i no karim bikpela kaikai tumas taim yumi skelim dispela wantaim bikpela hatwok yumi bin mekim. Olsem na bilong wanem yumi wok yet long autim tok?
2 Tingim Jeremaia: Maski ol man i harim tok yumi autim o nogat, yumi mas i stap gut yet long wok bilong autim tok. Jeremaia i autim tok inap 40 yia long wankain teritori, maski wan wan man tasol i harim tok na planti ol i birua long tok em i autim. Bilong wanem Jeremaia i no les long autim tok? Long wanem, em i mekim wanpela wok God i bin tokim em long mekim, na em i save long ol samting bai kamap bihain na dispela i kirapim em long autim tok yet.—Jer. 1:17; 20:9.
3 I stap bilong yumi tu i wankain. Jisas i bin ‘tokim yumi long autim tok long ol manmeri na tokaut klia olsem, “God i bin makim dispela man tasol bai em i stap man bilong harim kot bilong ol man i stap laip na bilong ol man i dai pinis.” ’ (Ap. 10:42) Ol man i harim tok yumi autim ol inap kisim laip. God bai skelim ol manmeri long ol samting ol i mekim taim ol i harim gutnius. Olsem na em wok bilong yumi long mekim ol samting God i bin tokim yumi long mekim. Maski ol manmeri i no laik harim, taim yumi strong long mekim wok yumi mas mekim, dispela i opim rot long yumi ken soim pasin bilong yumi long laikim tru ol man na givim bel long Jehova. Tasol i gat sampela samting moa.
4 Em i Helpim Yumi: Maski ol man long teritori i harim tok yumi autim o nogat, taim yumi mekim laik bilong God, yumi kisim bel isi na amamas, em ol samting yumi no inap kisim long narapela rot. (Sng. 40:8) I stap bilong yumi bai i gat as tru bilong en. Taim yumi autim tok planti taim, bai yumi tingting strong moa long ol gutpela samting yumi ken wet long kisim long nupela taim God bai kamapim. Taim yumi tingim tingim ol dispela tok promis bilong Baibel, bai yumi strong moa long ol samting bilong spirit na pas gut moa wantaim Jehova.
5 Maski wok autim tok bilong yumi i no karim kaikai hariap, yumi inap planim pikinini kaikai bilong tok i tru long bel bilong wanpela man na em bai karim kaikai long taim Jehova i makim. (Jo. 6:44; 1 Ko. 3:6) I no gat wanpela bilong yumi inap save hamas man moa long hap bilong yumi o long ol narapela hap bilong graun bai kisim save long Kingdom long rot bilong wok em lain bilong Jehova i mekim.
6 Nau em i bikpela samting long yumi mas bihainim tok bilong Jisas: “Yupela lukaut. Yupela i mas was i stap, long wanem, yupela i no save wanem taim dispela ol samting bai i kamap. Dispela tok mi givim long yupela, em mi givim long olgeta manmeri. Yupela i mas was i stap.” (Mk. 13:33, 37) Olsem na yumi olgeta i mas wok yet long autim gutnius bilong Kingdom, na mekim bel bilong Jehova i amamas taim yumi mekim gut nem holi bilong em.
This article is repeated in km 4/07.