“Bringim . . . Gutpela Tok Bilong Samting i Gutpela Moa”

“Man i ran i kam long ol ples maunten bilong bringim gutpela tok i kam, lek bilong em i naispela tru; em man bilong autim . . . gutpela tok bilong samting i gutpela moa.”​—⁠AISAIA 52:​7, NW.

1, 2. (a) Wanem ol samting nogut i wok long kamap long olgeta wan wan de? (b) Taim ol man i harim ol nius nogut long olgeta taim, dispela i mekim wanem long ol?

LONG nau long olgeta hap ol man i pilim olsem ol i harim stori bilong ol samting nogut tasol i kamap. Ol i onim redio na harim stori bilong ol sik nogut i wok long kisim planti man. Ol i lukim nius long TV na ol i lukim piksa bilong ol pikinini i no gat kaikai na ol i krai i stap. Long niuspepa ol i ritim stori bilong ol bom i pairap insait long ol haus na i kilim i dai planti manmeri na pikinini, em ol i no gat asua.

² Tru tumas, ol samting nogut i wok long kamap long olgeta de. Ol samting bilong dispela graun i wok long senis​—⁠em i senis i go nogut moa. (2 Timoti 3:​1, 13) Wanpela nius long Westen Yurop i tok sampela taim i luk olsem dispela graun olgeta “i laik bagarap olgeta.” Olsem na yumi save i gat as na planti manmeri i bel hevi! Wanpela man long Amerika i kamapim tingting bilong em long ol nius em i save lukim long TV, na ating dispela i makim tingting bilong planti milion manmeri, em i tok: ‘Taim mi lukim pinis nius, mi bel hevi stret. Ol nius i stori long ol samting nogut tasol. Dispela i daunim mi tru.’

Nius Olgeta Man i Mas Harim

3. (a) Baibel i tokaut long wanem gutpela nius? (b) Bilong wanem yu ting gutnius bilong Kingdom em i bikpela samting?

³ Olsem wanem? Yumi inap harim sampela gutpela nius long dispela taim nogut bilong nau? Yes, yumi inap! Bel bilong yumi i ken i stap isi taim yumi save Baibel i tokaut long sampela gutpela nius. Dispela gutpela nius i olsem: Kingdom Bilong God bai pinisim sik, hangre, pasin raskol, woa, na ol narapela samting i daunim ol man. (Song 46:9; 72:12) Olgeta man i mas harim dispela nius, a? Ol Witnes Bilong Jehova i save ting olsem. Olsem na long olgeta hap ol man i save long wok bilong ol long autim gutnius bilong Kingdom Bilong God.​—⁠Matyu 24:⁠14.

4. Wanem ol bikpela samting bilong wok autim tok bilong yumi bai yumi skelim long dispela stadi, na long neks stadi?

⁴ Tasol yumi inap mekim wanem na bai yumi pilim yet olsem wok yumi mekim bilong autim gutnius i bikpela samting na yumi amamas long en maski ol man i no putim yau long tok yumi mekim? (Luk 8:15) Bilong helpim yumi, em i gutpela long skelim 3-pela bikpela samting bilong wok autim tok bilong yumi. Yumi laik skelim (1) astingting, o bilong wanem yumi autim tok; (2) tok yumi autim, o wanem tok yumi autim; na (3) pasin yumi bihainim, o olsem wanem yumi autim tok. Taim yumi gat gutpela astingting, na tok yumi autim i klia, na pasin yumi bihainim i wok gut, dispela bai mekim na kain kain man inap harim nambawan gutpela nius​—⁠em gutnius bilong Kingdom Bilong God.a

Astingting na Yumi Autim Gutnius

5. (a) Wanem bikpela astingting i kirapim yumi long mekim wok autim tok? (b) Bilong wanem yumi ken tok taim yumi bihainim tok Baibel i mekim long autim tok, dispela i soim olsem yumi laikim tumas God?

⁵ Yumi laik skelim namba wan bikpela samting bilong wok autim bilong yumi​—⁠astingting bilong yumi. Bilong wanem yumi save autim gutnius? Long wankain as olsem Jisas i bin mekim. Em i tok: “Mi laikim tru Papa.” (Jon 14:31; Song 40:⁠8) Nambawan samting i kirapim yumi em yumi laikim tumas God. (Matyu 22:​37, 38) Baibel i soim olsem pasin bilong laikim God na pasin bilong mekim wok autim tok i poroman wantaim, em i tok: “Sapos yumi laikim tru God, orait yumi save bihainim ol lo bilong en.” (1 Jon 5:3; Jon 14:21) Olsem wanem? Tok bilong “i go mekim olgeta lain manmeri i kamap disaipel” em i wanpela lo bilong God? (Matyu 28:19) Yes. I tru Jisas i bin mekim dispela tok, tasol as tru bilong en em Jehova. Olsem wanem i olsem? Jisas i tok: “Mi no mekim wanpela samting long tingting bilong mi yet. Nogat. Mi save autim olgeta tok olsem Papa i bin soim mi.” (Jon 8:28; Matyu 17:⁠5) Olsem na taim yumi bihainim lo bilong autim tok, yumi soim Jehova olsem yumi laikim em tru.

6. Long wanem ol rot pasin bilong laikim God i save kirapim yumi long autim tok?

⁶ Na tu, pasin bilong laikim Jehova i kirapim yumi long autim tok bikos yumi laik daunim ol tok giaman Satan i mekim long em. (2 Korin 4:⁠4) Satan i sutim tok olsem: I no stret Jehova i stap king. (Stat 3:​1-5) Yumi ol Witnes Bilong Jehova, yumi laik kamapim long ples klia ol giaman bilong Satan na insait long wok bilong mekim holi nem bilong God long ai bilong olgeta man. (Aisaia 43:​10-12) Na tu, yumi insait long wok autim tok, long wanem, yumi save long ol pasin bilong Jehova. Yumi stap klostu long em na yumi gat strongpela laik long tokim ol narapela long God bilong yumi. Yumi tingim gutpela na stretpela pasin bilong Jehova na yumi amamas long tokim ol man long em, yumi no inap pasim maus. (Song 145:​7-12) Yumi pilim olsem yumi mas litimapim nem bilong em na tokaut long ol man husat i laik putim yau long ol tok bilong ‘olgeta gutpela pasin em i bin mekim long yumi.’​—⁠1 Pita 2:9; Aisaia 43:⁠21.

7. Pasin bilong laikim tumas God i kirapim yumi long autim tok, tasol i gat wanem narapela bikpela as na yumi mekim dispela wok?

⁷ I gat narapela bikpela as na yumi mekim yet wok autim tok: Yumi gat laik tru long mekim isi bel bilong ol manmeri em ol i pilim nogut tru long harim ol nius long ol samting nogut i wok long kamap na ol manmeri em kain kain samting i mekim na ol i karim pen na hevi. Long dispela rot yumi wok long bihainim pasin bilong Jisas. Tingim samting Mak sapta 6 i stori long en.

8. Jisas i pilim olsem wanem long ol manmeri olsem stori bilong Mak sapta 6 i kamapim?

⁸ Ol aposel i pinisim raun bilong ol long autim tok na ol i stori long Jisas long olgeta samting ol i bin mekim na lainim ol man long en. Jisas i luksave olsem ol aposel i taiet, na em i tok ‘yumi go na malolo liklik.’ So ol i kisim bot na ol i go long wanpela hap i no gat man. Tasol ol manmeri i wokabaut long nambis na bihainim ol na ol i kamap long hap Jisas na ol disaipel i go long en. Jisas i mekim wanem? “Em i lukim bikpela lain manmeri i stap. Na em i sori tru long ol, long wanem, ol i olsem ol sipsip i no gat wasman. Na em i stat long givim planti tok long ol.” (Mak 6:⁠31⁠-⁠34) Pasin sori i kirapim Jisas long mekim yet wok autim tok maski em i taiet. Jisas em i pilim tru hevi bilong ol dispela manmeri. Em i sori tru long ol.

9. Stori bilong Mak sapta 6 i givim wanem save long yumi long as na yumi mekim wok autim tok?

⁹ Dispela stori i givim wanem save long yumi? Yumi Kristen, yumi pilim olsem em i wok bilong yumi long autim gutnius na kamapim ol disaipel. Yumi luksave olsem wok bilong autim gutnius em i wok yumi mas mekim, long wanem, em i laik bilong God long “kisim bek olgeta manmeri.” (1 Timoti 2:⁠4) Yumi autim tok, long wanem, em samting yumi mas mekim, na tu, yumi save sori long ol manmeri. Sapos yumi sori tru long ol man olsem Jisas i bin mekim, orait bel bilong yumi bai kirapim yumi long wok strong long autim gutnius long ol. (Matyu 22:39) Sapos ol kain gutpela astingting i kirapim yumi long autim tok, dispela bai kirapim yumi long autim strong gutnius, na no ken slek.

Tok Yumi Autim​—⁠Gutnius Bilong Kingdom Bilong God

10, 11. (a) Aisaia i tok wanem long tok yumi autim? (b) Olsem wanem Jisas i bin bringim “gutpela tok”? Olsem wanem ol wokboi bilong God long nau i bin bihainim pasin bilong Jisas?

¹⁰ Olsem wanem long namba tu bikpela samting bilong wok autim tok bilong yumi​—⁠olsem tok yumi autim? Yumi autim wanem tok? Profet Aisaia i mekim gutpela tok long dispela tok yumi save autim: “Bai ol manmeri i amamas tru long lukim wanpela man i ran i kam long ol ples maunten, bilong bringim gutpela tok long Jerusalem. Em bai i tok olsem, ‘Saion, gutpela taim i kamap pinis. God i win pinis na em bai i mekim yu i stap gut. Nau God bilong yu i bosim olgeta samting.’ ”​—⁠Aisaia 52:⁠7.

¹¹ Bikpela tok insait long dispela skripsa, olsem “God bilong yu i bosim olgeta samting,” i kirapim yumi long tingim tok yumi mas autim, em gutnius bilong Kingdom Bilong God. (Mak 13:10) Lukim tu olsem dispela ves i kamapim ol gutpela samting bilong dispela toksave yumi autim. Aisaia i kolim ol tok olsem “stap gut,” “gutpela tok,” na “gutpela taim.” Planti handet yia bihain long Aisaia, Jisas Krais i bin truim dispela tok profet taim em i givim bel long autim tok long gutpela samting bai kamap​—⁠em Kingdom Bilong God i laik kamap. (Luk 4:43) Long taim bilong yumi, na moa yet kirap long 1919 na i kam, ol Witnes Bilong Jehova i bin bihainim pasin bilong Jisas taim ol i givim bel long autim gutnius bilong Kingdom Bilong God i kamap pinis na ol gutpela samting Kingdom bai kamapim.

12. Gutnius bilong Kingdom i save mekim wanem long ol manmeri i harim na bihainim dispela gutnius?

¹² Dispela gutnius bilong Kingdom i save mekim wanem long ol man i putim yau long en? Em i mekim wankain samting long nau olsem em i bin mekim long taim bilong Jisas​—⁠em i mekim isi bel bilong man na i mekim na ol i gat hop, olsem ol inap bilip na wetim gutpela samting bai kamap bihain. (Rom 12:12; 15:⁠4) Em i mekim na ol man i gat gutpela bel ol i gat hop, long wanem, ol i kisim save olsem i gat as tru bilong bilip olsem gutpela taim bai kamap bihain. (Matyu 6:​9, 10; 2 Pita 3:13) Kain hop olsem i save helpim ol manmeri i pret long God long holim gutpela tingting long ol samting bai kamap bihain. Man bilong raitim song i tok, taim ol dispela man ‘i harim nius bilong ol hevi i kamap, ol i no save pret.’​—⁠Song 112:​1, 7.

Wanpela Tok i “Pinisim Bel Hevi Bilong Ol Man i Stap Wantaim Bikpela Wari”

13. Profet Aisaia i stori long wanem ol blesing ol man husat i bihainim tok bilong gutnius bai kisim long nau stret?

¹³ Na tu, ol manmeri i bihainim tok bilong gutnius yumi autim i save kisim helpim na ol blesing long nau stret. Olsem wanem i olsem? Profet Aisaia i bin stori long sampela blesing olsem taim em i tok profet olsem: “Spirit bilong God, Bikpela i kam i stap long mi, long wanem, Bikpela yet i kapsaitim wel long het bilong mi bilong makim mi bilong i go bringim gutpela tok bilong en long ol rabisman. Na em i salim mi i kam long pinisim bel hevi bilong ol man i stap wantaim bikpela wari, na long tokaut long ol man i stap long kalabus long ol i ken lusim kalabus na i go fri. Em i salim mi long tokaut olsem, taim i kamap pinis bilong God, Bikpela bilong yumi, i laik mekim gut long ol manmeri bilong en na mekim save long ol birua bilong ol. Na em i salim mi long strongim bel bilong ol manmeri i sori na i krai.”​—⁠Aisaia 61:​1, 2; Luk 4:​16-21.

14. (a) Dispela tok “pinisim [“pasim,” NW ] bel hevi bilong ol man i stap wantaim bikpela wari” i givim wanem save long yumi long gutnius bilong Kingdom? (b) Olsem wanem yumi kamapim pasin bilong Jehova long tingim ol man i stap wantaim bikpela wari?

¹⁴ Olsem dispela tok profet i kamapim, long rot bilong autim gutnius, Jisas bai “pinisim [“pasim,” NW ] bel hevi bilong ol man i stap wantaim bikpela wari.” Aisaia i kamapim gutpela tok piksa! Wanpela dikseneri bilong Baibel i tok, dispela tok Hibru ol i tanim olsem “pasim” em i kain tok ol i save yusim taim ol i tok long ‘pasim’ banis, olsem ol i putim marasin na oraitim sua. Wanpela nes inap taitim wanpela banis long hap bilong bodi i bagarap bilong strongim dispela hap. Long wankain pasin, long taim bilong autim tok bilong Kingdom, ol pablisa i save helpim o strongim ol man i gat sampela kain hevi, em ol man husat i putim yau long tok ol i autim. Na taim ol i helpim ol man i mas i gat helpim, ol i kamapim pasin bilong Jehova long tingim man. (Esekiel 34:​15, 16) Man bilong raitim song i tok long God olsem: “Em i save mekim orait ol manmeri, hevi i bagarapim tingting bilong ol na ol i pilim nogut. Na em i pasim ol sua bilong ol.”​—⁠Song 147:⁠3.

Tok Bilong Kingdom i Helpim Ol Man

15, 16. Kamapim ol eksampel bilong samting i bin kamap tru tru na i soim olsem wanem tok bilong Kingdom i save helpim na strongim ol manmeri i karim hevi.

¹⁵ I gat planti eksampel bilong ol samting i bin kamap tru tru na i soim olsem wanem tok bilong Kingdom i bin helpim na strongim ol man i gat bikpela wari. Tingim Oreanna, wanpela lapun meri bilong Saut Amerika, em i no gat moa laik long i stap laip. Wanpela Witnes Bilong Jehova i kirap visitim em na ritim Baibel na buk Baibel Stori Buk Bilong Mi long em.b Pastaim dispela meri i bel hevi em i slip long bet, pasim ai, na sampela taim em i pulim strong win taim sista i rit long em. Tasol i no longtaim na lapun i kirap sindaun long bet taim sista i rit. Bihain liklik, em i sindaun long sia long narapela rum bilong haus, na wetim tisa bilong em long i kam. Bihain moa, lapun meri i kirap kam long ol miting Kristen long Haus Kingdom. Ol samting em i lainim long ol miting i strongim bel bilong em, na em i kirap tilim ol litresa bilong Baibel long ol man i wokabaut i go i kam klostu long haus bilong em. Bihain, taim em i gat 93 krismas, Oreanna i kisim baptais olsem wanpela Witnes Bilong Jehova. Tok bilong Kingdom i bin kirapim gen laik bilong em long i stap laip.​—⁠Sindaun 15:30; 16:⁠24.

¹⁶ Tok bilong Kingdom i save strongim ol man i save olsem klostu nau sik bilong ol bai pinisim laip bilong ol. Wanpela eksampel olsem em Maria bilong Westen Yurop. Em i gat wanpela sik bilong i dai na em i no gat hop. Em i stap bel hevi stret taim ol Witnes Bilong Jehova i painim em. Tasol taim em i kisim save long ol samting God i tingting pinis long mekim, laip bilong em i gat as bilong en gen. Em i kisim baptais na em i autim tok planti. Long laspela tupela yia bilong em long i stap laip, pes bilong em i kamapim klia olsem em i gat hop na em i stap amamas. Taim Maria i dai em i gat strongpela hop long kirap bek.​—⁠Rom 8:​38, 39.

17. (a) Olsem wanem tok bilong Kingdom i wok long senisim laip bilong ol man husat i harim na bihainim? (b) Wanem ol samting i painim yu yet na yu pilim tru olsem Jehova i “litimapim olgeta manmeri” i gat hevi?

¹⁷ Ol kain stori i kamapim klia ol senis tok bilong Kingdom inap mekim insait long laip bilong ol man husat i gat laik long harim ol tok i tru bilong Baibel. Ol man i bel hevi, long wanem, wanpela ol i laikim tumas em i dai, ol inap kisim nupela strong taim ol i kisim save long kirap bek. (1 Tesalonaika 4:13) Ol man i stap rabis na ol i hatwok long painim kaikai bilong lukautim famili, ol i kisim nupela strong taim ol i kisim save olsem Jehova i no inap lusim ol sapos ol i stap gut long em. (Song 37:28) Planti man husat i gat bikpela bel hevi i kisim helpim long Jehova na isi isi ol i kisim strong bilong karim dispela hevi na sampela inap lusim bel hevi olgeta. (Song 40:​1, 2) Tru tumas, long nau stret, long rot bilong strong bilong Tok bilong em, Jehova i save “litimapim olgeta manmeri” i gat hevi. (Song 145:14) Taim yumi lukim olsem wanem gutnius bilong Kingdom i mekim gut bel bilong ol man i bel hevi​—⁠long teritori bilong yumi na insait long kongrigesen Kristen​—⁠dispela i kirapim yumi long tingim gen olsem gutnius yumi holim em i nambawan tru, winim olgeta narapela nius long nau!​—⁠Song 51:⁠17.

‘Mi Save Prea Long God Long Kisim Bek Ol’

18. Pasin bilong ol Juda long sakim gutnius i mekim wanem long Pol? Bilong wanem?

¹⁸ Maski tok yumi autim em i nambawan gutpela nius, tasol planti i sakim dispela tok. Dispela inap mekim wanem long yumi? Em inap mekim wankain samting long yumi olsem em i bin mekim long aposel Pol. Planti taim em i autim tok long ol Juda, tasol klostu olgeta bilong ol i bin sakim tok bilong kisim bek ol. Pasin bilong ol i givim bel hevi long Pol. Em i tok: “Oltaim mi save bel sori tru, na mi save wari na tingting planti.” (Rom 9:⁠2) Pol i sori long ol Juda em i save autim tok long ol. Em i bel hevi taim ol i sakim gutnius.

19. (a) I gat wanem as na sampela taim yumi inap bel hevi? (b) Wanem samting i bin helpim Pol long mekim yet wok autim tok?

¹⁹ Pasin sori i kirapim yumi tu long autim gutnius. Olsem na i gat as na yumi bel hevi taim ol manmeri i sakim tok bilong Kingdom. Dispela i soim olsem yumi wari tru long ol man yumi autim tok long ol, ol i stap gut long samting bilong spirit o nogat. Tasol i gutpela yumi tingim pasin bilong aposel Pol. Wanem samting i bin helpim em long mekim yet wok bilong em long autim tok? Tru, pasin bilong ol Juda long sakim gutnius i givim bel hevi na pen long em, tasol Pol i no kisim tingting olsem olgeta Juda bai sakim gutnius na em i no inap helpim sampela bilong ol. Em i bilip olsem i gat sampela husat bai bilip long Krais. Olsem na Pol i bin kamapim tingting bilong em long ol wan wan Juda olsem: “Bel bilong mi i laikim tumas bai God i kisim bek ol Israel, na oltaim mi save prea long God long dispela samting.”​—⁠Rom 10:⁠1.

20, 21. (a) Olsem wanem yumi ken bihainim pasin bilong Pol long wok autim tok bilong yumi? (b) Bai yumi stori long wanem samting long wok autim tok bilong yumi long stadi i kamap bihain long dispela?

²⁰ Tingim tupela samting Pol i bin kamapim. Laik bilong bel bilong em i olsem: Em i gat bikpela laik tru long God i ken kisim bek sampela man, na em i prea long God long dispela samting. Long nau yumi bihainim pasin bilong Pol. Yumi laik tru long painim ol man husat i gat laik long harim na bihainim gutnius. Yumi wok long prea long Jehova long helpim yumi long painim ol kain man olsem na bai yumi ken helpim ol long mekim ol samting ol i mas mekim bilong God i ken kisim bek ol.​—⁠Sindaun 11:30; Esekiel 33:11; Jon 6:⁠44.

²¹ Tasol bilong helpim planti man long kisim tok bilong Kingdom, yumi no ken tingim tasol bilong wanem yumi autim tok na wanem tok yumi autim, nogat. Yumi mas tingim tu olsem wanem yumi autim tok. Bai yumi stori long dispela samting long stadi i kamap bihain long dispela.

[Ol Futnot]

Yu Lainim Wanem Samting?

• I gat wanem ol as na yumi save autim tok?

• Wanem bikpela tok yumi save autim?

• Ol man i harim na bihainim tok bilong Kingdom i save kisim wanem ol blesing?

• Wanem samting bai helpim yumi long mekim yet wok autim tok?

[Ol Piksa long pes 18]

Tok bilong Kingdom i givim strong long ol man i bel hevi na i wari i stap

[Ol Piksa long pes 20]

Prea i save helpim yumi long mekim yet wok bilong yumi long autim tok