Tilim Kingdom Nius Namba 35 Long Olgeta Hap
1 Long mun Oktoba na Novemba yumi olgeta bai i gat planti wok bilong mekim. Kirap long namba wan de i go inap long namba 11 de bilong Oktoba, bai yumi tilim sabskripsen bilong Wastaua na Kirap! Na bihain, kirap long Sande Oktoba 12 i go inap long Sande Novemba 16, bai yumi insait long wok bilong tilim Kingdom Nius Namba 35 long olgeta hap bilong graun. Em i gutpela samting tru long yumi inap bringim dispela bikpela tok long ol manmeri long hap bilong yumi. Dispela tok i bekim dispela askim: “Olsem Wanem? Bihain Bai Olgeta Man i Laikim Tru Ol Narapela?” Long ol dispela wik, bai yumi tilim Kingdom Nius Namba 35 long Mande i go inap Fraide. Taim yumi tilim Kingdom Nius long Sarere Sande, bai yumi tilim tu sabskripsen o sapos ol i no laik kisim sabskripsen, yumi ken tilim wan wan magasin.
2 Husat Inap Insait Long Dispela Wok? Ol elda bai go pas long mekim dispela wok. Olgeta i save amamas long tilim Kingdom Nius, olsem na ating planti pablisa bai mekim wok painia haptaim long dispela taim long wanpela mun o tupela mun wantaim. Ol narapela pablisa i ken lusim sampela aua moa bilong mekim wok autim tok.
3 Olsem wanem? Yu gat wanpela Baibel-stadi i stadi pinis long planti sapta bilong buk Save na i no longtaim em bai winim ol mak bilong insait long wok autim tok? Ating em inap long kamap pablisa i no baptais yet na bai em i ken insait long wok bilong tilim Kingdom Nius. I no olsem yumi mas kolim planti tok bilong tilim dispela nius. Ating em inap tok olsem: “Dispela em wanpela bikpela tok olsem na mipela i tilim dispela nius long ol man bilong olgeta hap long 169 tok ples. Mi laik bai yu ken kisim wanpela bilong yu yet.” Ol liklik pikinini tu inap insait long mekim dispela gutpela wok.
4 Ol wasman bilong Buk-Stadi i mas kirapim olgeta pablisa long grup bilong ol long insait tru long wok bilong tilim Kingdom Nius Namba 35. Ating i gat sampela pablisa i no autim tok moa, tasol ol bai autim tok gen sapos wanpela i givim sampela tok long ol bilong strongim ol. Paslain long taim bilong tilim nius, ol elda i ken i go lukim olgeta dispela pablisa na helpim ol long sampela rot bambai ol i ken wok wantaim ol strongpela pablisa long taim bilong tilim dispela Kingdom Nius.
5 Wanem Taim Yumi Ken Mekim Ol Bung Bilong Autim Tok? Bilong mekim dispela wok, yumi ken mekim ol bung bilong autim tok long taim na ples i stret long ol pablisa. Sapos inap, yupela ken stretim rot bilong mekim bung bilong autim tok long olgeta wan wan de namel long wik, na long Sarere Sande. Yupela i mas mekim long taim em inap helpim ol pablisa na painia long lusim bikpela hap taim long mekim wok autim tok. Yupela i ken stretim rot tu long bung long apinun olsem 5 klok samting bambai ol pikinini i skul na ol brata i wok mani, na ol narapela i ken insait long dispela wok. Wasman bilong wok autim tok i mas stretim ol samting bambai i gat bikpela hap teritori bilong autim tok long en, long ol haus na long ol ples bisnis bambai olgeta i ken mekim tru dispela wok. Sapos planti pablisa i stap long wanpela hap, ol i mas bihainim gutpela tingting na skelim gut hamas i wok long wanpela hap bilong teritori.
6 Taim Ol Man i No Stap Long Haus Yumi laik toktok wantaim planti man bilong haus na tokim ol bilong wanem ol i mas kaunim Kingdom Nius Namba 35. Olsem na taim yu go long wanpela haus na man i no stap, raitim nem bilong strit na namba bilong haus na go bek bihain liklik long dispela de yet. Sapos long laspela wik bilong tilim nius yu no bin bungim yet wanpela man long dispela haus, orait, yu ken lusim wanpela Kingdom Nius long dua na putim long hap ol man i go i kam ol i no ken lukim. Redi oltaim long tilim Kingdom Nius long ol man i wokabaut long rot. Long ol ples i stap ausait long taun na long ol hap i gat bikpela teritori bilong autim tok na yumi no inap pinisim olgeta long taim bilong tilim Kingdom Nius, yumi ken lusim wanpela Kingdom Nius long ol haus i no gat man long en long namba wan taim.
7 Yumi Laik Winim Wanem Ol Mak? Ol kongrigesen i mas wok strong long tilim olgeta Kingdom Nius long olgeta hap bilong teritori bilong ol paslain long wok bilong tilim nius i pinis long Novemba 16. Sapos teritori bilong kongrigesen i bikpela na no gat ol raskol long en, ating yu wanpela i ken wok long en na maski long wok wantaim poroman. Long dispela rot yu inap autim tok long planti manmeri moa em ol i gat gutpela bel. (Mt 10:11) Ating em i gutpela long holim sampela nius long han tasol, na putim Baibel long wanpela liklik paus. No ken lusim tingting long raitim nem bilong ol man i bin amamas long harim tok.
8 Yu Redi Long Mekim Wok? Olgeta wan wan pablisa na painia i mas wok strong long tilim ol magasin bilong oda bilong ol yet, na tu, ol i ken painim rot bilong tilim ol olpela magasin i stap yet long Haus Kingdom o long haus bilong sampela pablisa. Yumi no gat wok long putim oda long ol Kingdom Nius Namba 35, long wanem, Sosaiti bai salim ol nius i go long olgeta kongrigesen na grup na ol pablisa na painia i ken kisim ol wan wan nius long 2 toea. Ol brata i lukautim litresa ol i mas skelim gut ol nius bambai olgeta pablisa i ken insait tru long wok bilong tilim dispela nius long ol man. Taim ol i skelim hamas nius Sosaiti i salim i kam na hamas pablisa i stap long kongrigesen o grup, orait ol bai save ol wan wan pablisa i ken kisim 10, 20 o 50 nius. Ol painia salim, painia oltaim, na painia haptaim i ken kisim 20, 40, o 100 nius pastaim—ol brata i mas skelim hamas nius Sosaiti i bin salim na hamas painia i insait long dispela wok. Yumi olgeta i gat hap wok yumi mas mekim. Olsem wanem? Yu gat strongpela laik long insait long dispela gutpela wok? Tru tumas, yu gat laik long mekim olsem. Olsem na tilim dispela bikpela tok bilong Baibel i stap long Kingdom Nius Namba 35 long olgeta hap!