Yu Stap Wanpela Witnes Long Olgeta Taim?
1 Bai yu tok yes long dispela askim? I no olgeta wokman bilong Jehova i dediket pinis ol inap mekim wok autim tok long olgeta de. Tasol i stret yumi ken tingim yumi yet olsem wanpela Witnes bilong God long olgeta taim, a? Tru tumas, yumi mas ting olsem.
2 Yumi no inap stap olsem wanpela Kristen long sampela taim tasol. Jisas i tok long Papa bilong em olsem: “Oltaim mi save mekim ol samting em i laikim.” (Jo 8:29) Pol tu i gat wankain tingting, na em i tokim yumi long ‘mekim olgeta samting bilong givim biknem long God.’ (1 Ko 10:31) Olsem na yumi olgeta i mas tingim yumi yet olsem wanpela Witnes Bilong Jehova long olgeta taim. Sapos yumi gat dispela tingting, dispela bai helpim yumi long mekim gutpela pasin long olgeta samting yumi mekim.
3 Tingim Ol Dispela Samting: Klos samting yumi pasim, toktok, na pasin bilong yumi inap kamapim long ol narapela olsem yumi i Witnes Bilong Jehova. Yumi save yumi mas bilas gut, mekim ol gutpela tok, na mekim ol gutpela pasin long taim bilong autim tok o taim yumi go long ol miting Kristen. Tasol taim yumi go long skul, o go long wok, o mekim sampela samting bilong kisim amamas, olgeta samting yumi mekim i mas kamapim klia olsem yumi save bihainim ol stretpela lo bilong Jehova.
4 Jisas i tok: “Wanpela taun i stap antap long maunten, em i no inap hait. . . . Lait bilong yupela i mas lait long ai bilong ol manmeri, bai ol i lukim ol gutpela pasin yupela i mekim, na bai ol i litimapim nem bilong Papa bilong yupela i stap long heven.” (Mt 5:14-16) Yumi mas mekim olsem long olgeta samting yumi mekim na long olgeta taim. Sapos yumi pilim olsem yumi no laik autim tok, long wanem, hap yumi stap long en o wok yumi mekim i no stret long yumi autim tok, orait yumi mas askim yumi yet olsem: ‘Mi mekim wok bilong Jehova sampela taim tasol o long olgeta taim?’ Long olgeta taim rot i op, yumi mas tokim ol narapela long gutnius bilong Kingdom bilong God.
5 Tingim! Yumi litimapim nem bilong Jehova na mekim em i amamas taim yumi singaut strong “Yes!” bilong bekim dispela askim, “Yu stap wanpela Witnes long olgeta taim?”