Ol Amamas Bilong Fultaim Sevis
1 Sapos yu wanpela yangpela, ating yu bin tingting long i stap bilong yu long bihain. Sindaun 21:5 i tokim yumi olsem “ol man bilong wok ol i save tingting gut na mekim wok, olsem na wok bilong ol i kamap gutpela.” Sapos yu tingting gut long ol mak yu laik winim long bihain, dispela bai helpim yu tru. Taim yu tingting long ol samting yu laik mekim long bihain, tingting long insait long wok bilong autim tok fultaim. Bilong wanem?
2 Askim sampela manmeri i bikpela pinis em ol i bin mekim wok painia taim ol i yangpela, long kamapim tingting bilong ol long dispela wok. Ating ol bai mekim wankain tok olsem: “Em i nambawan gutpela hap taim long laip bilong mi!” Wanpela brata i bin kisim ol amamas bilong wok bilong autim tok fultaim taim em i yangpela yet, em i tok: “Bel bilong mi i stap gut tru taim mi tingim bek taim mi yangpela yet, na mi inap tok olsem mi bin bihainim dispela gutpela tok: ‘God i bin wokim yumi olgeta. Olsem na long taim yupela i yangpela yet, yupela i mas tingim em.’ ” (Sav. 12:1) Yu na papamama bilong yu i mas kirap nau long skelim wanem rot bai helpim yu long kisim kain amamas olsem taim yu yangpela yet.
3 Ol Papamama, Strongim Pikinini Long Insait Long Fultaim Sevis: Jehova i wanpela papa i save lukautim gut yumi, na em i soim yumi long rot yumi mas bihainim. (Ais. 30:21) Em i givim ol gutpela tok bilong stiaim wokabaut bilong yumi, na long dispela pasin em i stap olsem gutpela piksa yupela ol papamama Kristen i ken bihainim. No ken larim ol pikinini yet i makim wanem samting i gutpela long mekim, nogat; yupela i mas bihainim gutpela tingting na skulim ol long rot ol i mas bihainim na bai Jehova i ken mekim gut long ol. Na taim ol i wok long kamap bikpela, dispela skul yu bin givim long ol bai helpim ol long “skelim wanem ol pasin i gutpela na wanem ol pasin i nogut.” (Hi. 5:14) Ol manmeri i bikpela pinis, ol i save olsem ol i no ken bihainim tingting bilong ol yet, ol i mas askim Jehova long soim ol stretpela rot bilong bihainim. (Snd. 3:5, 6) Dispela i bikpela samting moa long ol yangpela, long wanem, ol i no gat bikpela save yet long ol samting bilong sindaun bilong yumi ol man.
4 Yupela ol papamama, taim ol pikinini bilong yupela i kisim 13 krismas samting o paslain long en, toktok gut wantaim ol long ol samting ol i laik mekim. Ol wanblut, ol man bilong helpim ol pikinini long ol hevi bilong ol long skul, ol tisa, na ol wanklas, ol inap kirapim ol pikinini bilong yupela long tingim ol samting bilong graun, olsem mani kago samting. Sapos skul i gat ol kos bilong lainim ol long mekim sampela wok, orait helpim ol pikinini bilong yu long makim kos i helpim ol long lukautim ol yet long ol samting bilong skin, na mekim wok bilong Kingdom. (1 Ti. 6:6-11) Sampela taim, save ol i kisim long haiskul na vokesenel, o sampela trening bilong mekim wanpela wok, dispela inap helpim brata o sista long kisim gutpela wok mani haptaim, na ol inap lukautim ol yet na mekim wok painia. Sampela ol inap wok haptaim long mekim wok gaden samting bilong lukautim ol yet long ol samting bilong skin. Sampela ol inap salim kaikai samting long maket bilong kisim mani bilong lukautim ol long kaikai na klos samting taim ol i kirap long mekim wok painia.
5 Strongim ol yangpela long i stap singel. Sapos bihain ol i tingting long marit, ol bai redi gut long mekim ol wok em ol marit i mas mekim. Toktok wantaim ol yangpela long ol gutpela samting bilong wok painia, bilong wok long hap i sot long ol man bilong autim tok, na wok Betel. Kirapim laik bilong ol taim ol i liklik yet long mekim ol samting Jehova i laikim long i stap bilong ol, na i helpim ol narapela, na i givim amamas long ol yet.
6 Ol Yangpela, Mekim Ol Samting Bilong Winim Mak Bilong Fultaim Sevis: Yupela ol yangpela, paslain long yupela i tingting long mekim fultaim sevis, yupela i mas mekim sampela bikpela samting. Olsem wanem? Yu wanpela pablisa i no baptais yet, na sapos olsem, yu save putim ripot bilong autim tok long olgeta mun? Yu insait pinis long Skul Tiokratik? Klostu nau yu tingting long dediket na kisim baptais olsem wanpela Witnes Bilong Jehova? Taim yu baptais pinis, em nau rot bai op long yu inap mekim fultaim sevis. Pastaim yu ken traim long mekim wok painia haptaim sampela taim long yia taim rot i op. Long dispela rot bai yu inap save olsem wok painia i save mekim bel bilong man i stap gut tru!
7 Taim yu baptais pinis, sapos yu wanpela yangpela brata long oganaisesen bilong God, yu ken tingting strong long winim ol mak bilong kamap kongrigesen sevent. (1 Ti. 3:8-10, 12) Na tu, sapos yu winim pinis krismas ol i makim bilong man i mas winim bilong wok long Betel, wokim tingting, yu laik putim aplikesen long Betel o nogat. Wok painia bai skulim yu long planti gutpela samting, olsem pasin bilong bihainim sediul, olsem wanem yu inap stretim gut ol wok bilong yu, na stap gut wantaim ol narapela, na kisim pasin bilong mekim gut ol wok. Olgeta dispela samting bai helpim yu long redi long mekim ol bikpela wok long bihain. Sapos yu yangpela brata, ating rot bai op long yu inap i go long Ministerial Trening Skul.
8 Wanpela bikpela samting bilong helpim yu long mekim gut wok fultaim sevis, em pasin bilong givim bel long mekim ol wok bilong God. Aposel Pol i strongim yumi long mekim olsem, na em i kolim ol gutpela samting yu inap kisim taim yu mekim: “Olgeta samting yupela i mekim, yupela i mas wok strong na mekim. . . . Yupela i mekim wok bilong Bikpela. Yupela i save, bihain Bikpela bai i givim pe long yupela.” (Kl. 3:23, 24) Jehova i ken givim bikpela amamas long yu taim yu insait long fultaim sevis!
This article is repeated in km 12/05.