I Mas i Gat Sampela Brata Moa Bilong Mekim Wok Painia
1 Pol i tok olsem yumi “mas wok strong long mekim wok bilong Bikpela.” (1 Ko 15:58) Bilong mekim olsem, planti ol i kirap mekim wok painia. Long Septemba i go pinis, winim 5,000 brata na sista i go insait long wok painia!
2 Long nau long dispela kantri, bikpela hap bilong lain painia em ol sista. (Sng 68:11) Ating kongrigesen bai amamas tru sapos sampela brata moa i go insait long wok painia! (Sng 110:3) Mipela i save olsem planti brata i gat wok bilong skin na wok bilong famili ol i mas mekim. Na sampela narapela ol i save wok strong long lukautim kongrigesen long ol samting bilong spirit. Mipela i pilim tru hatwok ol dispela brata i mekim bilong helpim wok bilong Kingdom.—1 Ti 4:10.
3 Tasol olsem wanem? Sampela moa bilong yupela ol brata inap kirap mekim wok painia? Sapos meri bilong yu i wok painia, yu inap kamap painia na wok wantaim em? Sapos yu pinis long mekim wok mani, ating yu save olsem sapos yu mekim wok painia, bai yu stap belgut na amamas, a? Sapos klostu nau yu laik pinisim skul, yu bin tingting na beten strong long kamap painia, na tingim wok painia em inap opim rot long yu ken kirap mekim sampela wok moa?—Ef 5:15-17.
4 Wanpela brata i salim gutpela bisnis bilong em na em i kisim wok haptaim bambai em i ken mekim wok painia. Em i stap gutpela piksa, na taim ol 4-pela pikinini bilong em ol i pinisim skul, 3-pela i kamap painia. Namba 4 pikinini tu i gat laik long mekim olsem. Dispela brata wantaim famili bilong em ol i bin kisim planti blesing.
5 Bikpela Dua i Op: Wok painia em inap ‘opim rot long mekim bikpela wok.’ (1 Ko 16:9) Ol brata i mekim wok painia ol inap kisim bikpela wok insait long kongrigesen. Sapos ol i givim bel long wok autim tok, dispela bai helpim ol long kamap strong moa long spirit. Wok painia inap opim rot long ol i ken mekim sampela wok moa bilong God. Taim ol i mekim wok painia inap wanpela yia pinis, ol inap go long Skul Bilong Wok Painia. Ol elda na ol wokman bilong kongrigesen em ol i no marit yet ol i ken tingting long go long Skul Bilong Lainim Wok Bilong Lukautim Kongrigesen. Ol brata inap winim mak bilong kamap wasman bilong raun. Tru tumas, wok painia i save opim dua bilong mekim ol dispela bikpela wok insait long oganaisesen bilong Jehova.
6 Sapos sampela brata moa i stretim ol samting bilong ol na mekim wok painia oltaim, bai ol i kisim bikpela amamas long pasin bilong givim planti samting moa.—Ap 20:35.