Yu Laik Mekim Wanem Wok Long Bihain?

OLSEM WANEM? Yu yangpela na yu skul yet? Sapos olsem, orait ating yu gat ol gutpela samting bilong ol yangpela, olsem strong bilong skin samting. Taim yu yangpela yet na yu tingting long bihain, ating yu tingim laip bilong yu i olsem wanpela longpela rot i go i go na yu no inap lukim pinis bilong en, na yu no save wanem samting bai painim yu long dispela rot. Tasol yu tingting long mekim wanem wok long bihain?

Taim yu tingting long ol samting yu laik mekim long bihain, ating yu gat sampela askim, olsem: Bai mi go long bikpela skul, olsem yunivesiti, na lain long kamap dokta o loya o man bilong saiens? O mi laik insait long wanpela bisnis na wok long kisim bikpela mani kago na bikpela nem? O mi laik wokim ol pilai o penim ol gutpela gutpela piksa na kisim biknem long dispela rot? Tasol mi mas tingting gut, long wanem mi givim bel long God Jehova, olsem na ating mi mas kirap mekim wok painia na ‘taim mi yangpela yet bai mi tingim gut Man bilong wokim mi’?—Eklisiastis 12:1.

Ol buk na nius i save stori long ol man na meri i gat nem na ol i stori olsem ol dispela man na meri i save kisim bikpela amamas long wok ol i mekim, a? Orait, olsem wanem long wok painia? Sapos yu mekim wok painia, yu ting yu inap kisim bikpela amamas long mekim dispela wok? Orait, nau yu ken kaunim stori bilong sampela man ol i bin mekim wok painia inap planti yia pinis, na dispela bai helpim yu long tingim gut wanem wok yu laik mekim long bihain.

Bilong Wanem Ol i Laik Mekim Wok Painia

Taim bikpela pait i stap yet long Vietnam, Hari (Harry) i skul long Yunivesiti bilong Hawaii. Em i laik kamap tisa. Tasol em i lainim tok bilong Baibel tu. Ol Witnes Bilong Jehova i stadi wantaim em. Em i wankain olsem planti yangpela long dispela taim, em ol i skul long yunivesiti—em i insait long sampela lain ol i laik daunim gavman na em i kirap kisim drak; em i save kisim drak LSD. Wanpela moningtaim em i lusim slip na kirap na em i lukim planti botol bilong bia i bruk nabaut na ol hap hap smok i stap na ol man na meri i slip nabaut long plua insait long haus bilong em. Hari i no inap tingim ol samting i bin kamap asde long nait, tasol em i tingting liklik long tok pait i bin kamap wantaim polis, na papa bilong dispela haus i tok em i laik rausim Hari. Nau Hari i kisim tingting olsem em i mas lusim stadi na em i no ken lainim moa ol tok bilong Baibel o em i mas stretim pasin bilong em. Gutpela tru em i kirap stretim pasin bilong em na em i no lusim stadi.

Taim Hari i wok long kisim sampela save moa long ol tok bilong Baibel nau em i no laik moa long winim bikpela skul na kamap tisa. Em i lusim yunivesiti na kisim wanpela wok bilong haptaim na em i kisim baptais. Liklik taim bihain em inap kamap wanpela painia. Nau Hari i kirap mekim wanpela wok i gat sampela hevi na hatwok long en, tasol i gat bikpela amamas bilong en tu.

Hari wantaim meri bilong em tupela i mekim wok painia salim na bihain tupela i kamap misineri. Sosaiti i salim tupela i go long ol ailan Belau long hap bilong Pasifik, na tupela i stap yet long dispela hap na mekim wok. Wanem ol samting i save painim ol manmeri i mekim wok misineri long kain ples olsem?

Ol i Raun long Bot na Autim Tok

Long ol ailan bilong Maikronisia, planti taim ol brata i mas raun long bot bilong i go autim tok. Hari wantaim meri bilong em, Rene, i tingim wanpela taim ol i go long wanpela ailan i stap longwe liklik na long namba wan taim ol i raun long bot na autim tok. Hari i stori olsem: “Haus mipela i stap long en i stap long wanpela wara. Mipela bihainim wara i go inap planti mail na mipela i kamap long dispela haus. Bikpela bus i stap arere arere long wara na ol han bilong diwai i pas antap na i olsem mipela i stap aninit long grinpela rup. Mipela save raun long wara na autim tok long ol man i stap klostu long dispela wara, na long apinun mipela i go bek long haus. Wanpela apinun, mipela hariap i go bek long haus, nogut tudak i painim mipela long rot. Wantu Rene i singaut na mi tanim na lukim wanpela draipela pukpuk bilong solwara i go daun insait long wara. Mipela kamap gut long haus, tasol maski em taim bilong waswas, mipela no laik waswas long dispela wara. Mipela tingim dispela draipela pukpuk nau tasol mipela lukim long dispela wara. Mipela pulimapim wara long baket na waswas.”

Planti liklik ples ol brata i no inap go long en long ka o long bot na ol misineri i mas wokabaut long lek bihainim ol liklik rot long bus i go kamap long ol dispela liklik ples. Ol manmeri bilong dispela ples ol i gat pasin daun na ol i save pren gut wantaim ol man. Hari i tok: “Ol i save harim tok mipela i autim long ol na planti taim ol i laik mekim gut long mipela, olsem na ol i goap long kokonas na givim kulau long mipela na mipela i dring. Em gutpela dring i swit long maus na i save strongim skin.”

Olsem wanem long wok autim tok ol misineri i bin mekim long Belau? Wok bilong ol i karim kaikai? Tru tumas, long wanem nau i gat 42 Kristen tru i stap olsem wanpela kongrigesen, na long 1985, long olgeta mun, samting olsem 10-pela ol i mekim wok painia. Inap olsem 193 ol i bung long taim bilong Memorial long 1985.

Hari i bin mekim wok painia inap 17 yia pinis na em i ting olsem wanem long dispela wok bilong givim laip bilong em olgeta long Jehova? Em i tok: “Sapos 17 yia bipo mi no bin kisim save long tok i tru bilong God, bai mi lusim nating taim na laip na strong bilong mi long bihainim ol pasin bilong dispela graun. Tasol mi mekim wok painia na wok misineri taim mi singel yet na inap 8-pela yia wantaim meri bilong mi, Rene, na mi stap bel isi na amamas. I no gat narapela rot bilong i stap gutpela olsem.”

Wok Painia Em Gutpela Wok

Milton i stap long haiskul long Hawaii. Planti man i tokim em, gutpela sapos em i kisim wanpela wok mani na bai em i gat mani na gutpela sindaun. Tasol susa bilong em na tupela bikpela brata bilong em ol i mekim wok painia na dispela i kirapim Milton tu long tingting long mekim wok painia. Na tu em i harim wanpela tok long ol blesing ol painia i save kisim na Jehova i save lukautim yumi long ol samting bilong skin sapos yumi givim bel long em na tingim em pastaim. Milton i stori olsem: “Dispela i kirapim tingting bilong mi na mi gat laik long mekim wok painia. Olsem na taim mi no pinis yet long skul, mi kisim baptais na mi kirap mekim wok painia.”

Taim Milton i kirap mekim wok painia i gat olsem 8 o 9 painia long kongrigesen. Orait, Milton i mekim wanem? Em i tok: “Mi singautim ol yangpela brata long i kam autim tok wantaim mi. Olsem na bihain ol tu i kirap mekim wok painia.”

Milton i stori moa olsem: “Tambu bilong mi em i wanpela elda long dispela kongrigesen na em i mekim wok painia. Olsem na mitupela i pasim tok long mekim olsem: Mi bai helpim ol yangpela long mekim wok painia na em bai helpim ol sista i no wok mani, em ol i save stap long haus. Sampela mun bihain i gat 25 painia long dispela kongrigesen. Taim wasman sekit i kam, em i singautim 10-pela bilong mekim wok painia salim long sampela kongrigesen i stap klostu. Orait, long dispela taim stret mipela i toktok long helpim 10-pela moa long kirap mekim wok painia, olsem senis bilong ol dispela painia ol i bin salim ol i go. Taim wasman sekit i kam gen i gat 15 moa ol i bin kirap mekim wok painia, na i gat 30 painia long dispela kongrigesen. Wasman sekit i tokim 10-pela moa long i go helpim ol narapela kongrigesen. Orait, mipela kirap gen painim senis bilong dispela 10-pela, na paslain long taim wasman sekit i kam lukim mipela gen i gat 20 brata sista moa ol i laik mekim wok painia!”

Planti long kongrigesen ol i tingting long mekim wok painia na dispela i givim gutpela tingting long ol yangpela. Planti bilong ol, taim ol i go long haiskul ol i tingting pinis long ol i laik mekim wok painia taim ol i pinis long skul. Wanpela sista, taim em i gat 13 krismas tasol, em i tingting pinis olsem em i laik mekim wok painia. Em i tok: “Mi pilim olsem i stret mi mas mekim dispela wok.” Em wantaim ol narapela yangpela long kongrigesen ol i no tingting long mekim narapela wok. Ol painia i putim wanpela bung bilong autim tok taim skul i pinis long apinun, na bihain i gat 60 yangpela brata sista bilong 3-pela skul ol i save bung wantaim ol na i go autim tok. Na long taim bilong bikpela san sampela taim 130 ol i bung wantaim bilong i go autim tok!

Ol i Mekim Wok Painia na Bihain Ol i kisim Bikpela Wok Moa

Milton i stori olsem: “Long 1974 ol i singautim mi bilong mekim wok misineri long wanpela ples i stap longwe long ples bilong mi inap 6,400 kilomita—long ol ailan bilong Belau long Maikronisia.” Wanpela samting i givim hatwok long ol misineri long dispela hap em olsem ol i mas wokabaut long lek long bus o raun long bot.

Wanpela de i gat bikpela san na ol i wokabaut longwe na Milton i stori olsem: “Mipela kamap long haus bilong stadi bilong mipela na skin bilong mipela i les olgeta. Mama i salim pikinini man i go kisim wanpela melen ol i bin putim long wara bilong mekim kol. Mipela kaikai bikpela hap melen na nau skin bilong mipela i kisim bek strong!”

Milton i stap mekim wok misineri long dispela hap inap wanpela yia pinis na em i tingim tripela samting em i laik lukim i kamap long Belau em olsem: Ol brata bilong Belau yet i mas holim wok insait long kongrigesen, olsem elda samting, na ol yangpela i mas kirap mekim wok painia, na kongrigesen i mas wokim Haus Kingdom bilong ol yet. Nau em i tok: “Mi stap 10-pela yia pinis long dispela hap na mi lukim dispela tripela samting i kamap pinis. God i harim beten bilong mi.”

Milton i bin mekim wok painia na wok misineri inap 14 yia, orait em i ting olsem wanem long dispela wok em i mekim? Em i amamas long mekim? Em i tok: “Mi mekim wok painia na mi kisim save olsem: Sapos yumi laik long mekim wok, long taim stret bai Jehova i givim wok long yumi. Yumi no ken les; yumi mas laik long mekim wok bilong Jehova. Sapos yu mekim wok painia na mekim wok bilong Jehova oltaim, bihain bai yu no bel hevi long dispela samting yu bin mekim.”

Bai Yu Mekim Wanem Wok?

Yupela ol yangpela man na meri—yupela laik mekim wanem wok long bihain? Yu laik bihainim laik bilong yu yet o givim bel olgeta long mekim wok bilong Jehova? (Rom 14:8) Gutpela sapos yu beten na tingting long mekim wok painia. Bihainim pasin bilong Jisas na givim bel long “bihainim laik bilong God.” (1 Pita 4:2) Dispela samting bai lukautim yu. Em bai helpim yu bambai yu no ken wok long kisim biknem long dispela graun o poroman wantaim ol man bilong dispela graun. Skelim gut ol samting yu mas mekim na makim wanpela de stret yu laik kirap mekim wok painia. Oltaim tingim dispela de yu bin makim na wok i go long en. Beten askim Jehova long helpim yu bambai yu inap kirap mekim wok painia long dispela de yu bin makim.—Efesas 6:18.

Sapos yu kirap mekim wok painia, bihain yu inap kisim ol narapela wok. Na bai yu kisim bikpela amamas na yu stap bel isi. Em gutpela wok bilong helpim yu long i stap belgut na amamas. Na bikpela samting em olsem: Bai yu mekim Jehova i amamas.—Provep 27:11.

[Rait long pes 31]

“Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.”—Provep 27:11.