Yu Ting Wanem Samting i Makim i Stap Bilong Man i Gutpela?

WANPELA dikseneri i tok, i stap bilong man i gutpela taim em i “kisim planti mani kago, ol man i laikim em, o em i gat namba.” Olsem wanem? Dispela i makim olgeta samting i save mekim i stap bilong man i kamap gutpela? Mani kago, namba, na pasin bilong ol man long laikim yu, ol dispela samting tasol i makim i stap bilong yu i gutpela? Paslain long yu bekim ol dispela askim, tingim dispela: Jisas Krais i no bin kisim planti mani kago taim em i stap long graun. Planti man i no laikim em, na long ai bilong ol man i gat namba em i olsem man nating. Tasol i stap bilong Jisas i gutpela tru. Bilong wanem?

Taim Jisas i stap long graun, em i gat planti gutpela samting “long ai bilong God.” (Luk 12:21) Taim em i kirap bek pinis, God i “givim bikpela namba na biknem long em.” Jehova i givim bikpela namba long Pikinini bilong em na “em i stap antap tru. Na God i givim em wanpela nem i gutpela tru na i winim olgeta arapela nem.” (Hibru 2:9; Filipai 2:⁠9) I stap na wokabaut bilong Jisas i amamasim bel bilong Jehova. (Sindaun 27:11) I stap bilong Jisas long graun i gutpela, long wanem, em i mekim olgeta samting em i kam long mekim. Jisas i bin inapim olgeta laik bilong God na dispela i litimapim nem bilong Em. Olsem na God i mekim gut long Jisas na em i givim namba na ol gutpela samting bilong skin long em, na em i laikim em. Ol samting God i givim i winim ol gutpela samting ol saveman, ol man bilong wok politik, o ol man bilong pilai spot i save kisim. I stap na wok bilong Jisas i gutpela tru, winim olgeta narapela man i bin stap long graun.

Ol papamama Kristen i save olsem sapos pikinini bilong ol i bihainim pasin bilong Krais na kisim gutpela nem long ai bilong God olsem Jisas i bin kisim, orait ol bai kisim planti gutpela samting long nau, na long nupela taim ol bai kisim planti gutpela samting moa. Nambawan gutpela rot bilong ol yangpela long bihainim lek mak bilong Jisas em bilong mekim wok bilong Jehova long olgeta de sapos rot i op.

Tasol long sampela hap, em i no pasin bilong ol yangpela long kirap mekim wok painia. Taim yangpela man i pinis long skul, ol narapela i ting em i mas mekim wok mani long olgeta de, na marit, na sindaun gut long wanpela hap. Sampela yangpela bilong kain ples olsem ol i save surik long mekim wok bilong God long olgeta de. (Sindaun 3:27) Bilong wanem? Long wanem, ol narapela i strong long ol i mas bihainim pasin bilong ples. Dispela samting i bin painim Robert.a

Taim Pasin Bilong Ples na Maus Bilong Bel i Pait Wantaim

Robert i go bikpela olsem wanpela Witnes Bilong Jehova. Taim em i yangpela yet, pasin bilong em na ol poroman em i raun wantaim ol i no gutpela. Mama bilong em i tingting planti long em. Olsem na em i askim wanpela painia​—⁠em wanpela Witnes Bilong Jehova i save mekim wok bilong God long olgeta de​—⁠long strongim Robert. Robert i stori long ol samting i kamap bihain long dispela.

Em i tok: “Mi amamas tru long pasin bilong dispela painia long tingim mi. Gutpela pasin bilong em i kirapim laik bilong mi long mekim wok painia taim mi winim skul. Long dispela taim mama i tingting planti gen​—⁠tasol nau i gat narapela as na em i mekim olsem. Long ples bilong mipela, ol man i orait long ol yangpela meri long kirap wantu na mekim wok painia taim ol i winim skul pinis, tasol ol i ting ol yangpela man i mas kisim wanpela gutpela wok mani pastaim, na bihain ol i ken tingting long mekim wok painia.

“Mi lain long mekim wanpela wok na bihain mi kirapim wanpela bisnis. I no longtaim na mi insait tru long wok bisnis, na mi go nating tasol long ol miting na wok autim tok. Bel bilong mi i kotim mi​—⁠mi save mi inap mekim sampela wok moa bilong Jehova. Tasol em i hatwok tru long lusim ol samting ol narapela i ting mi mas mekim, tasol mi amamas tru long mi bin mekim olsem. Nau mi marit, na mi wantaim meri bilong mi i bin mekim wok painia inap 2-pela yia nau. I no longtaim i go pinis na ol i makim mi long kamap wanpela wokman bilong kongrigesen. Mi ken tok tru olsem nau mi amamas tru taim mi givim bel long mekim wok bilong Jehova, long save na strong olgeta bilong mi.”

Planti taim dispela nius i kirapim ol yangpela i stap yet long skul long lainim wanpela wok, o kisim save bilong helpim ol long mekim sampela wok. Wanem as bilong mekim olsem? Bilong kisim planti mani kago? Nogat. Nambawan as bilong mekim olsem, em bilong ol i ken lukautim ol yet taim ol i bikpela pinis na givim bel long mekim wok bilong Jehova long skel bilong ol, na moa yet long mekim wok painia. Tasol planti yangpela man na meri ol i givim bel long kisim gutpela wok mani, na wok autim tok i no bikpela samting long ol. Sampela ol i no tingting liklik long mekim wok painia samting. Bilong wanem?

Tok bilong Robert i givim sampela tingting long yumi long dispela samting. Taim Robert i lain pinis long mekim wanpela wok, em i kirapim wanpela bisnis. Na i no longtaim em i pilim olsem em i ran nating long wanpela masin. Em i laik kisim mani inap tru long em i ken lukautim em yet. Tasol wanem man insait o ausait long kongrigesen i bin winim tru dispela mak? Ol Kristen i mas wok strong bilong lukautim ol yet, olsem ol yet i baim ol samting ol i mas kisim. Tasol ol i mas save tu olsem long dispela taim nogut, wan wan man tasol inap tok olsem em i gat mani samting inap tru long em i ken stap gut. Olsem na tok promis bilong Jisas i stap long Matyu 6:33 i mekim gut bel bilong ol Kristen.

Robert i amamas em i bin bihainim laik bilong bel na em i no larim pasin bilong ples i bosim samting em i mekim. Long nau, em i mekim wok bilong God long olgeta de. Em nau, wok painia samting em i wanpela gutpela wok tru. Bel bilong Robert i stap gut, long wanem, em i mekim wok bilong Jehova ‘long save na strong olgeta bilong em,’ olsem em yet i tok.

Mekim Gutpela Wok Long Save Bilong Yu

Insait long lain Witnes Bilong Jehova i gat planti man i gat gutpela save long mekim sampela wok. Tingting bilong sampela i wok gut tru na ol i gat bikpela save, na sampela narapela ol i save mekim gutpela wok long han bilong ol. Ol dispela samting i olsem presen i kam long Jehova, em Man i “save givim laip na win na olgeta samting long olgeta manmeri.” (Aposel 17:25) Sapos yumi no gat laip, ol dispela gutpela presen i no gat as bilong en.

Olsem na i stret yumi givim laip bilong yumi​—⁠em yumi bin dediketim pinis​—⁠bilong mekim wok bilong Jehova. Wanpela man i gat gutpela save i bin mekim olsem. Em i bin stap long taim bilong ol aposel. Em i bilong wanpela famili i gat nem, na taim em i yangpela em i sindaun long taun Tarsus long Silisia, em wanpela taun planti man i save long en. Em i kamap insait long lain Juda, tasol long rot bilong papa em i kamap olsem wanpela man bilong Rom. Dispela i mekim na em inap mekim planti samting na kisim gutpela wok. Taim em i kamap bikpela, em i kisim save long Lo long rot bilong wanpela “profesa” i gat nem long taim bilong em​—⁠em Gamaliel. I luk olsem i no longtaim na em bai ‘kisim planti mani kago, ol man bai laikim em, na em bai kisim namba.’​—⁠Aposel 21:39; 22:​3, 27, 28.

Dispela yangpela man em i husat? Nem bilong em Sol. Tasol Sol i kamap wanpela Kristen na bihain em i kamap aposel Pol. Em i no tingting moa long inapim ol laik bilong em bilong bipo, na em i givim laip olgeta bilong em bilong mekim wok bilong Jehova olsem wanpela Kristen. Pol i no kisim nem olsem wanpela loya, nogat; em i kisim nem olsem man bilong givim bel long autim gutnius. Taim Pol i bin mekim wok misineri inap 30 yia pinis, em i raitim pas i go long ol pren i stap long Filipai. Long dispela pas em i stori long sampela samting em i bin mekim taim em i no kamap wanpela Kristen yet, na em i tok: “Olgeta gutpela samting bilong dispela graun ol i olsem pipia nating. Mi laik bihainim Krais tasol, na mi lusim pinis olgeta arapela samting, bai mi ken holimpas Krais.” (Filipai 3:⁠8) Pol i no bel hevi long rot em i bihainim long i stap bilong em!

Olsem wanem long skul Pol i kisim long Gamaliel? Pol i bin mekim wok long dispela save? Yes, em i bin mekim! Planti taim em i bin “helpim na strongim gutnius” long kot samting. Tasol nambawan bikpela wok bilong Pol em bilong autim gutnius​—⁠em wanpela wok dispela skul em i bin kisim long bipo i no inap lainim em long mekim.​—⁠Filipai 1:7; Aposel 26:​24, 25.

Long nau tu, sampela ol i bin mekim wok long save na skul ol i bin kisim bilong helpim wok bilong Kingdom. Amy i bin skul long yunivesiti long ol samting bilong wok bisnis na lo, na em i bin winim bikpela mak long dispela tupela samting. Bipo em i gat gutpela wok long wanpela ofis bilong ol loya, tasol long nau em i mekim wok olsem volantia i no kisim pe long wanpela brens-ofis bilong Sosaiti Was Taua. Amy i stori long i stap bilong em long nau olsem: “Mi save olsem mi bin makim nambawan gutpela rot bilong bihainim. . . . Mi no gat laik tru long kisim wankain sindaun olsem bilong ol wanskul bilong mi long yunivesiti. Mi amamas long rot mi bin makim bilong bihainim. Mi gat olgeta samting mi mas i gat na olgeta samting mi laikim​—⁠mi stap belgut tru na amamas, na wok mi mekim i gat as bilong en.”

Amy i makim rot i givim bel isi na amamas long em, na Jehova i mekim gut long em. Ol papamama Kristen i laik bai ol pikinini bilong ol i kisim ol dispela gutpela samting, a?

Wok Kristen i Kamap Gutpela

Tru, yumi mas i gat stretpela tingting long ol samting i makim wok Kristen bilong yumi i kamap gutpela. I no hatwok long ting wok bilong yumi i kamap gutpela taim ol gutpela samting i kamap long wok autim tok, olsem yumi tilim sampela nius bilong Baibel, o yumi toktok gut wantaim ol man bilong haus long Baibel. Tasol sapos wan wan man tasol i laik harim tok bilong yumi, yumi inap ting taim bilong yumi i lus nating. Tasol tingim, wanpela samting i makim i stap bilong man i gutpela, em pasin bilong ‘ol man long laikim em.’ Yumi laik bai husat i laikim yumi? Jehova, a? Jehova bai laikim yumi, maski ol manmeri i harim tok yumi autim o nogat. Jisas i givim bikpela skul long ol disaipel bilong em long dispela samting.

Jisas i bin salim 70 man bilong autim tok bilong Kingdom “long olgeta taun na ples em yet i laik i go long en.” (Luk 10:⁠1) Ol i mas autim tok long ol taun na ples, tasol Jisas bai i no go wantaim ol. Dispela em i nupela samting long ol. Olsem na paslain long Jisas i salim ol i go, em i tokim ol long ol samting ol i mas mekim. Taim ol i bungim “wanpela man bilong bel isi,” ol i mas autim gut tok bilong Kingdom long em. Tasol taim ol man i sakim ol, ol i no ken tingting planti tumas long dispela, ol i mas lusim ol tasol. Jisas i tok, ol man i no laik harim tok bilong ol disaipel, ol i sakim Jehova yet.​—⁠Luk 10:​4-7, 16.

Taim ol 70 disaipel i mekim pinis wok bilong ol long autim tok, ol i go bek long Jisas na “ol i amamas tru. Ol i tok: ‘Bikpela, mipela i bin kolim nem bilong yu, na ol spirit nogut tu ol i bihainim tok bilong mipela.’ ” (Luk 10:17) Ating bel bilong ol dispela sinman i kirap tru taim ol inap rausim ol strongpela spirit! Tasol Jisas i tokim ol disaipel bilong em olsem: “Yupela i no ken amamas na tok olsem, ‘Ol spirit nogut ol i bihainim tok bilong mipela.’ Nogat. Yupela i mas amamas long God i raitim pinis nem bilong yupela long buk bilong en long heven.” (Luk 10:20) Ating ol 70 disaipel bai i no gat strong long rausim ol spirit nogut long olgeta taim, na tu, ol gutpela samting bai i no kamap long wok autim tok long olgeta taim. Tasol sapos ol i stap gut long Jehova, em bai amamas long ol long olgeta taim.

Yu Save Tingim Tru Ol Painia Samting?

Wanpela yangpela man i tokim wanpela elda Kristen olsem: “Taim mi pinis long skul, bai mi traim painim wanpela wok mani. Sapos mi no inap painim wok, bai mi tingting long mekim wok painia samting.” Tasol dispela em i no tingting bilong planti brata sista i bin kirap mekim wok painia. Sampela i gat rot bilong kisim gutpela wok mani, tasol ol i lusim bilong mekim wok painia. Sampela ol i bin sakim bikpela skul samting. Olsem aposel Pol, ol i bin daunim laik bilong ol yet, tasol olsem Pol, Robert, na Amy, ol i no bel hevi long rot ol i bin bihainim. Ol i amamas long ol i ken mekim wok long save bilong ol bilong litimapim nem bilong Jehova, na i stret ol i givim ol gutpela samting bilong ol long Em.

I gat kain kain as na planti Witnes i stap gut long Jehova ol i no inap mekim wok painia. Ating ol i mas mekim sampela wok em Baibel i tok man i mas mekim. Tasol sapos ol i mekim wok bilong God long ‘bel, spirit, na tingting’ olgeta bilong ol, Jehova bai amamas long ol. (Matyu 22:37) Ol yet i no inap mekim wok painia, tasol ol i save olsem ol brata sista i mekim wok painia, ol i bin makim gutpela wok bilong mekim.

Aposel Pol i tok: “Yupela i no ken wokabaut wankain olsem ol man bilong dispela graun.” (Rom 12:⁠2) Olsem Pol i tok, yumi no ken larim pasin bilong ples o tingting bilong ol man bilong dispela graun i stiaim tingting bilong yumi. Maski yu inap mekim wok painia o nogat, putim wok bilong Jehova i stap nambawan bikpela samting long i stap bilong yu. I stap bilong yu bai kamap gutpela tru sapos Jehova i orait long yu.

[Futnot]

[Piksa long pes 19]

Tasol no ken mekim wok i olsem yu ran nating long wanpela masin