Helpim Ol Poroman Marit i No Witnes
1 Taim man na meri wantaim i insait long lotu i tru, dispela em samting bilong kisim bikpela amamas. Tasol long planti famili, man o meri tasol i bihainim rot bilong tok i tru. Olsem wanem yumi ken helpim ol dispela poroman i no Witnes na kirapim ol long lotuim Jehova wantaim yumi?—1 Ti 2:1-4.
2 Save Gut Long Tingting Bilong Ol: Sampela poroman marit i no Witnes, ol i birua long yumi, tasol planti taim ol i mekim olsem, long wanem, ol i ting lotu i no bikpela samting o ol i no klia gut long ol samting yumi mekim. Ating wanpela poroman i pilim olsem narapela i no tingim em o em i tingting nogut long nupela lotu bilong poroman bilong em. Wanpela man marit i tok: “Taim mi stap wanpela tasol long haus, mi pilim olsem olgeta i lusim mi pinis.” Na narapela i tok: “Mi pilim olsem meri pikinini bilong mi i lusim mi olgeta.” Ating sampela man bai ting olsem famili i lusim ol na i givim bel long wanpela lotu. (Lukim Wastaua, Julai 1, 1991, p. 27-30.) Olsem na sapos inap, i gutpela sapos man i insait long Baibel-stadi wantaim meri bilong em kirap long namba wan stadi.
3 Man na Meri i Mas Wok Wantaim: Tupela marit i bin wok gut wantaim bilong helpim ol marit long kam insait long tok i tru. Taim sista i kirapim stadi wantaim wanpela meri, bihain brata i save go lukim man bilong em. Planti taim em inap long kirapim stadi wantaim man.
4 Mekim Pasin Pren na Tingim Gut Ol: Ol famili long kongrigesen i ken tingim gut ol famili i no stap wanbel yet long lotu i tru na dispela inap helpim ol. Wan wan taim ol i ken i go lukim ol na dispela inap helpim poroman i no Witnes long save olsem ol Witnes Bilong Jehova i bihainim gutpela pasin Kristen na ol i save tingim gut ol narapela.
5 Wan wan taim ol elda i ken skelim ol samting kongrigesen i bin mekim bilong helpim ol poroman i no Witnes, na ol i ken skelim wanem ol samting moa ol bai mekim bilong helpim ol bambai ol i ken lotuim Jehova.—1 Pi 3:1.