Nupela Program Bilong Ol Kibung
1 Nem bilong kibung sekit bilong 1998 em, “Tingim Gut De Bilong Jehova.” (2 Pi 3:12) Dispela tupela de kibung bai kirapim yumi long kisim tingting olsem taim i sot pinis. Ol man i no slip long ol samting bilong spirit na “wokabaut long pasin holi na bihainim olgeta pasin bilong God” ol tasol bai abrusim bagarap long de bilong Jehova em i kam klostu hariap.—2 Pi 3:11.
2 Wanpela tok i gat fopela hap, nem bilong en “Yumi Mas i Stap Wanem Kain Man” em bai kamapim ol samting yumi mas mekim bilong tingim gut de bilong Jehova i stap klostu pinis. Nem bilong pablik-tok em “Bihainim Gutpela Tingting, Long Wanem De Bilong Jehova i Kam Klostu.” Dispela tok bai kamapim klia olsem wanem yumi ken painim Jehova, na daunim yumi yet bambai yumi ken abrusim bagarap.—Sef 2:3.
3 Bilong pinisim kibung, wasman sekit na wasman distrik bai mekim tok bilong kirapim tru yumi, nem bilong tupela tok em “Tok i Tru i Bosim Olgeta Samting Long i Stap Bilong Yu?” na “Tingim De Bilong Jehova na Stretim Ol Samting Yu Laik Mekim.” Ol tok bilong kibung bai strongim yumi long “stap redi na was gut.”—1 Pi 5:8.
4 Nem bilong nupela program bilong bikpela de kibung bilong 1998 em, “Olgeta Samting Yu Mekim i Mas Helpim Gutnius.” (1 Ko 9:23) Dispela kibung bai helpim yumi long pilim tru dispela gutpela wok yumi kisim bilong autim dispela bikpela tok ol man i harim long nau. Kibung bai strongim yumi long mekim yet dispela wok bilong autim gutnius bilong Kingdom long olgeta taim.—Ap 5:42.
5 Kibung bai soim yumi long olsem wanem yumi bihainim gut ol samting God i bin skulim yumi long en bambai wok autim tok yumi mekim i kamapim planti gutpela kaikai. Bai yumi harim ekspiriens bilong sampela em ol i bin mekim sampela senis bambai ol i ken mekim sampela wok moa bilong autim tok.—Skelim wantaim Filipai 2:22.
6 Wanpela brata em brens-ofis bai salim i kam em bai kamapim bikpela tok bilong kibung, na dispela tok bai kamapim klia olsem yumi gat wok long stap strong yet bambai yumi inap tru long God i ‘givim yumi wok bilong autim gutnius.’ (1 Te 2:4) Dispela tok bai helpim yumi long save long olsem wanem yumi ken bihainim yet ol lo bilong Jehova long tingting na pasin bilong yumi na wanem ol blesing yumi bai kisim sapos yumi mekim olsem.
7 Baptais em i bikpela samting bilong abrusim bagarap long de bilong Jehova. (1 Pi 3:21) Ol pablisa i laik kisim baptais long dispela tupela kibung, ol i ken tokim wasman siaman, na em bai stretim ol samting.
8 Yumi mas larim Jehova i strongim yumi bambai olgeta samting yumi mekim i helpim gutnius na long dispela rot bai yumi pinisim dispela nambawan bikpela wok paslain long Armagedon. Stretim rot bilong yu na ol Baibel-stadi bilong yu bambai yupela i ken i go long dispela tupela kibung long 1998.
This article is unique to PNG.