Taim Bel Isi i No Stap Moa Long Tupela Marit
“Meri i no ken lusim man bilong en. . . . Na man tu em i no ken rausim meri bilong en.”−1 KORIN 7:10, 11.
1. Jehova i laik bai ol marit i stap olsem wanem?
GOD JEHOVA i pasim pinis namba wan man na meri long marit, na tupela i kamap olsem wanpela, na em i laik bai tupela i stap olsem inap long olgeta taim. Jehova bai blesim tupela na dispela bai mekim ol i stap amamas na tupela bai kamapim ol stretpela pikinini, na ol dispela samting bai litimapim nem bilong God.−Jenesis 1:27, 28; 2:24.
2 Tasol bihain dispela tupela marit i kirap long bihainim tingting na laik bilong tupela yet na ol i mekim rong, na dispela i bagarapim gutpela marit em Jehova i bin kamapim. (Jenesis 3:1-19; Rom 5:12) Na long nau tu dispela pasin bilong bihainim laik na tingting bilong yumi yet em i as bilong planti marit i bruk. Long hap bilong Amerika long 1985, long olgeta tupela tupela marit, inap olsem wanpela i bruk. Na long Rasia long 1986, planti marit i stap inap 3-pela yia tasol na ol i bruk (inap olsem 37 pesen); na planti marit (inap 70 pesen) i save stap inap 10-pela yia na nau ol i katim marit.
3 Sapos man o meri marit i bihainim laik na tingting bilong em yet, dispela pasin inap kamapim kros namel long tupela na tupela i no stap wanbel, na i hatwok long tupela i kamap strong long ol samting bilong spirit. Long wanem, Baibel i tok, “Sapos yumi stap wanbel, dispela em i olsem yumi planim pikinini kaikai. Na long dispela pasin bilong wanbel, bai stretpela pasin i kamap olsem gutpela kaikai.” (Jems 3:18) Husat i namba wan man bilong bagarapim bel isi bilong ol marit? Em Seten tasol. Sori tumas sapos sampela marit long lain bilong God ol i “opim dua long Seten” na em i bagarapim bel isi bilong ol!−Efesas 4:26, 27.
4 Sapos hevi i kamap namel long tupela marit Kristen, na tupela i tingting long bruk na bai dispela i pinisim hevi bilong ol, tupela i mas lukaut−ol i givim rot long Seten na em bai wok long pulim ol long mekim olsem. Na dispela tingting bilong ol i kamapim long ples klia olsem ol i no stap strong long ol samting bilong spirit. (2 Korin 2:11) Ating wanpela, o ating tupela wantaim, i no bihainim tru ol lo bilong God. (Provep 3:1-6) Olsem na kwiktaim tupela i mas beten na wok strong long stretim hevi bilong ol. Sapos tupela i no inap, orait ol i ken askim ol elda long helpim ol. (Matyu 18:15-17) Tru, ol dispela elda i no gat wok long tokim ol narapela Kristen long ol samting ol i mas mekim bilong stretim hevi bilong ol, tasol ol elda i ken tokim ol long sampela tok bilong Baibel na dispela bai givim sampela tingting long ol dispela marit.−Galesia 6:5.
5 Sapos hevi bilong tupela marit Kristen i bikpela tru na tupela i tingting long katim marit bilong ol, ol elda i ken tokim tupela, Baibel i kolim wanpela as tasol bilong katim marit na maritim nupela poroman, olsem: Sapos wanpela i pamuk o mekim narapela kain pasin sem; i no gat narapela as. (Matyu 19:9; Rom 7:2, 3) Orait, sapos wanpela i no bin mekim pasin pamuk, tasol tupela i no i stap wanbel na narapela i tingting long lusim narapela, olsem wanem long dispela? Sapos tupela i go long kot na kot i orait long tupela marit i bruk, o sapos tupela i no i go long kot na tupela i bruk, Baibel i tok wanem long dispela?
Tok Bilong Pol
6 Sapos marit bilong tupela Kristen i laik bagarap, ol elda i ken givim tok bilong Pol long tupela, olsem: “Long ol manmeri i marit pinis mi givim dispela lo. Em i no lo bilong mi yet. Nogat. Em i lo bilong Bikpela. Em i olsem: Meri i no ken lusim man bilong en. Sapos em i lusim man pinis, em i mas i stap nating. Sapos nogat, em i ken i go bek na wanbel gen wantaim man bilong en. Na man tu em i no ken rausim meri bilong en.” (1 Korin 7:10, 11) Sapos man wantaim meri bilong em i Kristen, tupela i mas inap long stretim ol hevi bilong tupela. Tupela i mas save, tupela wantaim i no gutpela olgeta na ol i save popaia, olsem na narapela i mas isi long narapela. Maski hevi i bikpela, sapos tupela i beten strong long God, na ol i wok long bihainim ol tok bilong Baibel, na ol i mekim dispela pasin sori em spirit bilong God i save kamapim long man, tupela inap stretim hevi bilong ol.−Galesia 5:22; 1 Korin 13:4-8.
7 Tasol olsem wanem sapos narapela i lusim narapela na tupela i Kristen? Tupela “i mas i stap nating. Sapos nogat,” narapela “i ken i go bek na wanbel gen wantaim” narapela. Sapos wanpela i bin mekim pasin pamuk, orait narapela i ken katim marit. Tasol sapos wanpela i no bin pamuk, orait Baibel i tok ol i no ken maritim gen narapela poroman. Olsem na i gutpela sapos tupela i ken kamap “wanbel gen” wantaim. Na nogut wanpela i pundaun na mekim pasin pamuk, olsem na tupela i mas tingim dispela samting tu na wok long kamap “wanbel gen.” (1 Korin 7:1, 2) I no stret sapos ol elda i tokim tupela long ol i mas i go bek na sindaun gen wantaim na kamap wanbel gen; dispela i no wok bilong ol elda. Tasol ating tupela i no ken mekim sampela wok insait long kongrigesen sapos tupela i no sindaun wantaim. Sapos “man i no save bosim meri pikinini bilong em,” ating “em i no inap i stap [elda] bilong [kongrigesen] bilong God.”−1 Timoti 3:1-5, 12.
8 Ol marit i mas wok long strongim marit bilong ol, maski wanpela tasol i insait long tok i tru. Pol i tok: “Sapos wanpela brata i marit na meri bilong en i no bilip long Krais, na sapos meri i laik i stap wantaim em, dispela brata i no ken rausim em. Na sapos wanpela meri i marit na man bilong en i no bilip long Krais, na sapos man i laik i stap wantaim em, orait meri i no ken lusim man. . . . Tasol, sapos man i no bilip em i lusim meri bilong en, i orait, em i ken lusim. Sapos pasin olsem i kamap, dispela brata o susa bilong yupela em i no olsem kalabus i stap. God i bin singautim yupela bilong bihainim pasin bilong bel isi. Yu meri, bai yu inap helpim man bilong yu na em i kamap Kristen, o nogat, em yu no save. Na yu man, bai yu inap helpim meri bilong yu na em i kamap Kristen, o nogat, em yu no save.” (1 Korin 7:12-16) Sapos wanpela i no bilip long tok i tru na em i laik lusim poroman Kristen bilong em, poroman i ken larim em i go. Tasol dispela Kristen yet i no ken kirapim poroman bilong em long lusim em, long wanem, em i laik bai dispela poroman i ken tanim bel na em tu i ken kamap Kristen. Mama bilong Timoti, em Yunis, ating em i no lusim man bilong em, maski man i no bilip. Yunis i stap wantaim em na em i wok long lainim pikinini bilong em long ol samting bilong spirit.−2 Timoti 1:5; 3:14, 15.
Sampela As na Wanpela Marit i Ken Lusim Poroman
9 Yumi lukim tok bilong Pol long 1 Korin 7:10-16 na yumi save, i gutpela sapos tupela marit i no ken bruk. Sampela marit i bin wok strong long lukautim marit bilong ol, tasol bihain ol i ting ol i no inap, na ol i ting ol i mas lusim poroman, na bel bilong ol i orait long ol i mekim olsem. I gat wanem ol as na ol inap mekim olsem?
10 Man i no laik lukautim meri Pikinini bilong em long ol samting bilong skin, em wanpela as na meri inap lusim man. Taim tupela i marit, nau man i gat wok long lukautim meri long ol samting bilong skin, na sapos tupela i kamapim sampela pikinini, orait man i mas lukautim ol tu olsem. Baibel i tok: “Man i no lukautim ol wanlain bilong em yet, man i no lukaut liklik long ol wanblut tru bilong en, dispela man em i lusim bilip pinis, na em i man nogut tru. Ol haiden yet i no save mekim pasin nogut olsem.” (1 Timoti 5:8) Olsem na sapos man marit i no mekim dispela wok bilong em, orait meri bilong em inap lusim em. Tasol sapos tok i kamap olsem man Kristen i no lukautim meri pikinini bilong em long ol samting bilong skin, ol elda i mas save gut na tingim dispela samting. Sapos em i bikhet na i no laik mekim dispela wok bilong em, ating kongrigesen inap rausim em.
11 Sapos man i paitim nogut tru o bagarapim skin bilong meri bilong em, dispela i wanpela as na meri i ken lusim em. Sapos man i no Kristen na em i save dring spak na i belhat na paitim meri bilong em na bagarapim skin bilong em, inap meri i ken lusim em. (Provep 23:29-35) Tasol sapos meri Kristen i beten na em i bihainim ol pasin em spirit bilong Jehova i kamapim, ating em inap helpim man bilong em long lusim dispela pasin bilong kros na belhat, na nau tupela i ken i stap wantaim na meri Kristen inap karim dispela hevi. Tasol sapos man i mekim nogut tru long meri bilong em na i laik bagarapim em, Baibel i orait long em i ken lusim man bilong em. Sapos hevi olsem i kamap namel long tupela marit Kristen, ol elda i mas save gut long dispela samting, na ating ol i mas rausim dispela poroman i bin mekim olsem.−Lukim Galesia 5:19-21; Taitas 1:7.
12 Sapos wanpela i laik bagarap long ol samting bilong spirit, dispela em i wanpela as na Kristen i ken lusim poroman bilong em. Sapos man o meri Kristen i marit long wanpela poroman i no Kristen, dispela Kristen i mas wok strong long stadi na go long miting na mekim ol narapela samting bambai em i ken i stap strong long ol samting bilong spirit. Tasol sapos poroman i no laikim tok i tru na em i putim bikpela hevi long Kristen (na ating em i mekim wanpela samting bilong pasim em bambai em i no inap mekim ol wok bilong spirit) na nau Kristen i no inap lotuim Jehova na em i laik lus long ol samting bilong spirit, orait em i ken lusim poroman bilong em. Na olsem wanem sapos tupela wantaim i Kristen, tasol tupela i stap nogut long ol samting bilong spirit? Ol elda i mas helpim tupela, na sapos man i baptais, em i mas givim bel long stretim hevi i stap namel long em na meri bilong em. Tasol sapos man i baptais pinis na em i wok long pasim rot bilong meri na bai meri i no inap mekim wok bilong Jehova, ol elda i mas mekim sampela samting olsem Baibel i makim. Orait, olsem wanem sapos kongrigesen i rausim wanpela marit, long wanem em i mekim ol samting bilong bagarapim poroman bilong em long ol samting bilong spirit, o man i no lukautim meri pikinini long ol samting bilong skin, o man i paitim nogut meri bilong em na i bagarapim skin bilong em? Sapos meri i laik lusim em na meri i stretim dispela long kot, dispela meri i no kalapim tok bilong Pol em i tok yumi no ken kisim wanlotu bilong yumi i go long kot, long wanem, kongrigesen i rausim pinis dispela man.−1 Korin 6:1-8.
13 Sapos hevi i bikpela tru namel long tupela marit, ating tupela i ken bruk. Tasol nogut tupela i giaman na i no gat as tru bilong mekim olsem. Nogut liklik hevi tasol i stap na narapela i laik lusim nating narapela. Sapos wanpela Kristen i lusim poroman man marit bilong em, em yet i mas karim ol hevi i kamap long dispela samting em i bin mekim, na em i mas save, Jehova yet bai skelim olgeta samting yumi mekim.−Hibru 4:13.
Sapos Tupela i Bruk Em Gutpela o Nogat?
14 Sapos wanpela marit i tingting long lusim poroman bilong em, pastaim em mas tingim ol hevi inap painim em bihain. Sapos em wanpela i mas lukautim em yet wantaim ol pikinini, ating bai ol i no gat planti samting olsem bipo. Na em wanpela bai hatwok long stretim gut ol pikinini olsem bipo tupela i bin mekim. Na ating ol pikinini bai bel hevi tru long tupela i bruk−i olsem papamama i katim marit bilong tupela. Wanpela nius (India Today) i stori long wanpela pikinini meri, nem bilong em Sina, em papamama bilong em i bin katim marit, na nius i tok: “Sina i gat 6-pela krismas. Tupela yia bipo papamama bilong em i bin katim marit bilong ol, na bikpela tok pait i bin kamap long kot long dispela taim. Bihain papa i maritim narapela meri. Inap wanpela yia bikpela sik sotwin i kisim Sina, na oltaim em i susu long pinga bilong em. Em i save sindaun wantaim mama bilong em long hap bilong Saut Deli. Mama i tok: ‘Belhevi bilong mi i kisim Sina tu. . . . Em i sori long papa bilong em; . . . em i no olsem liklik pikinini−em i gat tingting na pasin olsem bilong ol pikinini i bikpela long em. Na em i save krai nating, olsem em i laik kamapim wanpela hevi i stap long bel bilong em. Em i no amamas long i go long skul, long wanem ol pikinini i save mekim nogut long em. Planti taim em i save kolim sampela stori nating long ol poroman bilong em na em i tok mipela olgeta i bin raun wantaim.’ ”
15 Sapos tupela marit Kristen i bruk, planti taim dispela samting i no save helpim tupela. Man i pilim olsem em i sot long poroman na sot long pikinini, na meri tu i pilim olsem. Na sampela hevi moa i painim tupela. Bai ol i tingting: ‘Olsem wanem long mani bilong baim ol samting? Na olsem wanem long ol narapela wok mi mas mekim?’ Na nau tupela i stap narapela narapela, olsem wanpis, na nogut ol i pundaun na mekim pasin pamuk samting. Jisas i tok: “Ol wok bilong God i soim save bilong em i samting tru.” (Matyu 11:19) Taim tupela marit Kristen i bruk na ol i stretim tok long ol bai mekim wanem na i stap olsem wanem, planti taim ol dispela samting i no wok gut, long wanem ol i no bin bihainim savepasin.
Wok long Stretim Hevi
16 Sapos tupela marit Kristen i pilim olsem bel isi i no i stap moa namel long tupela, orait tupela i mas toktok gut wantaim na kamapim hevi bilong tupela, na toktok long olsem wanem tupela i no i stap wanbel. Taim tupela i mekim olsem, tupela i mas mekim long pasin i stret long ol manmeri i save lotuim God. Na ol i mas save, tupela wantaim i save popaia; tupela i mas tingim dispela samting na narapela i mas isi long narapela. (Filipai 2:1-4) Na wanem sampela samting moa tupela i ken mekim?
17 Sapos tupela i bihainim savepasin long mani na ol narapela samting bilong skin tupela i holim, dispela bai helpim tupela long i stap bel isi na i stap wanbel. Sapos man i laik bai em wantaim meri pikinini i go sindaun long narapela hap, ating meri i no amamas long dispela. Tasol man i ting i gutpela sapos ol i go. Ating man i tingim mani o sindaun bilong ol, o em i ting sapos ol i go long wanpela hap ol i sot long ol man bilong autim tok, famili i ken mekim bikpela wok moa bilong Kingdom. (Matyu 6:33) Tru ating meri bilong em i no laik lusim papamama na ples bilong em. Tasol sapos em i gat gutpela tingting bai em i bihainim laik bilong man bilong em long dispela samting, long wanem man yet em i bos bilong famili, na ol i go sindaun we, em wok bilong papa yet long tingim na skelim dispela. Sapos meri i bihainim pasin daun, na long pasin sori em i bihainim laik bilong man bilong em, dispela bai helpim tupela long i stap bel isi wantaim.−Efesas 5:21-24.
18 Sapos man na meri bilong em i wok wantaim long mekim ol samting, dispela bai helpim famili long i stap bel isi na wanbel, na bai tupela i pilim olsem ol hevi bilong tupela i no bikpela. Sapos tupela wantaim i Kristen, tupela i ken raun wantaim na autim tok. Sapos long olgeta taim ol i mekim olsem, na ol i kisim ol pikinini i go wantaim ol, dispela bai helpim olgeta wan wan long famili. Na sapos wanpela marit i save kisim amamas long mekim sampela gutpela samting, orait i gutpela sapos poroman bilong em i ken mekim wantaim em. Dispela pasin bai strongim marit bilong tupela na bai tupela i stap wanbel.
19 Sapos man i bosim stret famili bilong em, dispela bai strongim marit bilong em na bai tupela i pas gut wantaim. Tasol man Kristen i no ken mekim hatpela pasin long meri bilong em. Baibel i tok: “Yupela man, yupela i mas laikim tru ol meri bilong yupela, na yupela i no ken mekim nogut bel bilong ol.” Jehova i laik bai man i bosim meri pikinini bilong em long pasin sori. (Kolosi 3:18, 19) Na sapos man i mekim olsem, dispela bai kamapim bel isi insait long famili.
Taim Tupela Marit i No Stap Wanbel
20 Taim hevi i kamap namel long tupela marit Kristen na narapela i isi long narapela, dispela bai helpim tupela long stretim hevi bilong ol. (Filipai 4:5) Sapos wanpela tasol i Kristen na narapela i bilong narapela lotu, na tupela i no stap bel isi wantaim, Kristen i mas bihainim pasin isi bilong stretim hevi bilong tupela. Sapos man i no bilip na em i laik pasim meri Kristen bilong em na bai em i no ken mekim wok bilong Jehova, ating meri i ken tok isi long em na em i ken tok, ‘Mi larim yu bihainim lotu bilong yu, na mi laik bai yu mekim olsem long mi.’ (Matyu 7:12) Tru, meri i mas daun long man bilong em long planti samting, tasol sapos laik bilong man i narapela kain long laik bilong God, meri i mas bihainim laik bilong God. (1 Korin 11:3; Aposel 5:29) Meri i laik i go long miting Kristen inap 3-pela taim tasol long olgeta wik, tasol long ol narapela apinun i gutpela sapos meri i stap long haus. Na em i ken i go autim tok long taim man bilong em i stap long wok na ol pikinini i stap long skul. Sapos meri i bihainim gutpela tingting na skelim gut taim bilong mekim ol wok bilong em, bai em i gat taim bilong “mekim gutpela pasin,” olsem mekim wok bilong God.−Galesia 6:9.
21 Na meri i ken mekim pasin isi long ol narapela samting tu. Tru, i stret yumi ken bihainim wanem wanem lotu yumi laik bihainim, tasol meri Kristen hia i mas tingting gut na em i no ken skrapim bel bilong man bilong em sapos man i no laikim lotu bilong meri bilong em. Meri i no ken putim nabaut ol Baibel na buk samting bilong em long ai bilong man, nogut dispela i kirapim kros. Sapos meri i haitim ol dispela samting na em i kaunim long taim man i no i stap, man i no ken kros tumas. Tasol meri i no ken larim man i pasim em olgeta na nau em i no inap bihainim ol stretpela lo bilong God.−Matyu 10:16.
22 Sapos meri i laik lainim ol pikinini long tok i tru, tasol man i kros long dispela, meri i mas bihainim gutpela tingting na stretim tok wantaim man bilong em bambai ol pikinini i ken i go wantaim em long ol miting na long autim tok. Na sapos man i no orait long ol i mekim olsem, meri i ken lainim ol pikinini long ol lo bilong Baibel, na taim ol i go bikpela na lusim papamama, ating bai ol i bihainim lotu i tru. Tasol sapos man yet em i Kristen na meri nogat, orait man em i bos, na Baibel i tok papa i gat wok long lainim ol pikinini na bai ol i kamap Kristen. Olsem na papa i mas stadi wantaim ol long Baibel, na kisim ol i go long miting, na lainim ol long autim tok. (Efesas 6:4) Em i mas mekim gut long meri bilong em na sori long em na isi long em, maski meri i no bilip long tok i tru.
Holimpas Bel Isi Bilong Famili
23 Ol marit “i stap wanpela bodi,” olsem na tupela i mas sindaun gut wantaim na i stap bel isi, olsem God i laik bai ol marit i mekim. Na sapos tupela wantaim i Kristen, tupela i mas wok strong tru long i stap bel isi wantaim. (Matyu 19:5; 1 Korin 7:3-5) Tasol sapos yu na poroman marit bilong yu i no i stap bel isi wantaim, i gutpela sapos yutupela i beten na skelim gen ol tok bilong Baibel yumi kamapim pinis. Na yutupela i ken tingim taim yupela i singel yet na yutupela i tingting long marit. Yutupela wantaim i wok strong long mekim ol samting i stret bambai yupela i ken i stap amamas taim yupela i marit na bai yupela i ken pas gut wantaim! Orait nau yupela i mas wok strong olsem bambai marit bilong yupela i ken i stap strong na yupela ken i stap wanbel.
24 Ol Kristen i marit pinis ol i holim wanpela gutpela prais em God i bin givim long ol−em marit bilong ol! Sapos yu bihainim gut ol tok promis yu bin mekim taim yu marit, na yu stap gut long Jehova na bihainim ol lo bilong em, orait yu ken tingting long i stap long nupela taim, na stretpela pasin bai stap long graun na bai ol marit i no ken bruk moa na ol i no ken katim marit. Ol dispela hevi i no ken painim moa ol marit. Olsem na yu mas amamas long marit bilong yu, em i olsem wanpela “rop i gat tripela hap bilong en,” na Jehova i stap olsem wanpela strongpela hap bilong dispela rop. (Eklisiastis 4:12, NW ) Mipela laik bai olgeta wan wan long famili bilong yu i pas gut wantaim na i stap amamas, na bai i gat bel isi na malolo long haus bilong yupela.
Bai Yu Bekim Olsem Wanem?
◻ Sotim na kolim ol bikpela hap tok bilong Pol long 1 Korin 7:10-16.
◻ Wanem sampela wanpela marit em inap lusim poroman marit bilong em?
◻ Taim tupela marit i no stap bel isi wantaim, tupela i ken mekim wanem bilong stretim ol hevi bilong tupela?
◻ Sapos tupela marit i bilong narapela narapela lotu, olsem wanem pasin isi i ken helpim tupela long i stap bel isi wantaim?
2. Wanem wanpela as na planti marit i bruk?
3. (a) Wanem pasin inap kamapim kros?
(b) Husat i namba wan man bilong bagarapim bel isi bilong ol marit?
4. Taim bikpela hevi i kamap namel long tupela marit Kristen, tupela i mas save long wanem samting? Tupela i mas mekim wanem?
5. Sapos tupela marit i katim marit na wanpela o tupela i laik marit gen long nupela poroman, i mas i gat wanem as na tupela i bin katim marit, olsem Baibel i tok?
6. Pol i tok wanem long 1 Korin 7:10, 11? (b) Sapos tupela marit wantaim i Kristen na hevi i kamap namel long tupela, ol i mas mekim wanem bilong stretim?
7. (a) Sapos wanpela marit Kristen i lusim poroman bilong em, tupela i mas i stap olsem wanem, olsem Baibel i tok? (b) Sapos hevi i bin kamap namel long tupela marit Kristen na tupela i no sindaun moa wantaim, olsem wanem long wok bilong tupela insait long kongrigesen?
8. Kolim ol bikpela tok bilong Pol long 1 Korin 7:12-16.
9, 10. (a) Olsem 1 Timoti 5:8 i tok, wanem wanpela as na meri Kristen i ken lusim man bilong em? (b) Sapos ol elda i harim olsem wanpela brata, i no lukautim meri pikinini bilong em long ol samting bilong skin, orait ol i mas mekim wanem?
11. I gat wanem narapela as na wanpela marit i ken lusim poroman bilong em? Tasol em i ken mekim wanem bambai em inap karim dispela hevi na tupela i ken sindaun yet wantaim?
12. (a) Sapos Kristen i marit long wanpela i no Kristen, ating Kristen i stap olsem wanem long ol samting bilong spirit na nau em i tingting long lusim poroman bilong em? (b) Sapos tupela marit i Kristen na tupela i stap nogut long ol samting bilong spirit, i gat wanem rot bilong helpim tupela?
13. Wanem samting inap kamap na long dispela as tasol ating tupela marit i ken bruk?
14. (a) Sapos wanpela marit i lusim poroman bilong em, wanem sampela hevi inap painim em? (b) Sapos tupela marit i bruk, dispela inap mekim wanem long ol pikinini?
15. Sapos tupela marit Kristen i bruk, ating dispela bai mekim wanem long narapela narapela?
16. Sapos tupela marit Kristen i ting bel isi i no i stap moa namel long ol, orait tupela i mas mekim wanem?
17. Sapos tupela marit i bihainim savepasin long mani na ol samting bilong skin tupela i holim, olsem wanem dispela, bai helpim tupela long i stap bel isi wantaim?
18. Wanem sampela samting tupela marit Kristen i ken mekim wantaim?
19. Man i mas i stap wanem kain bos long famili na bai famili i ken i stap isi wantaim?
20, 21. Sapos meri i Kristen na man bilong em nogat, na tupela i no stap bel isi wantaim, pasin isi bilong meri inap helpim tupela olsem wanem?
22. Sapos man i no orait long meri i lainim ol pikinini long tok bilong Baibel na dispela i bagarapim bel isi bilong famili, meri i ken mekim wanem?
23. Sapos tupela marit i no stap bel isi wantaim, wanem samting inap helpim tupela?
24. Ol Kristen i mas ting olsem wanem long marit?
[Piksa long pes 23]
Sapos bel isi i no i stap namel long tupela marit Kristen, tupela i mas toktok gut wantaim long hevi bilong ol, na tupela i mas mekim long pasin i stret long ol manmeri i save lotuim Jehova.