Olsem Wanem? God i Bin Singautim Yu Bilong i Stap Bel Isi?
“Sapos man i no bilip em i lusim meri bilong en, i orait, em i ken lusim. Sapos pasin olsem i kamap, dispela brata o susa bilong yupela em i no olsem kalabus i stap. God i bin singautim yupela bilong bihainim pasin bilong bel isi.”−1 KORIN 7:15.
1. Kristen i mas ting olsem wanem long marit, olsem Baibel i tok?
TAIM Jehova i kamapim marit long pastaim, em i no laik bai sampela hevi i kamap namel long ol marit na ol i mas bruk o katim marit bilong ol. Taim tupela i marit, tupela i kamap olsem ‘wanpela skin,’ na Jehova i laik bai tupela i stap olsem long olgeta taim, na bai tupela i stap amamas na bel isi. (Jenesis 2:24; Rut 1:9) Baibel i tok ol marit i mas i stap wantaim na i no ken bruk, maski wanpela i Kristen na wanpela nogat. (1 Korin 7:12-16) Na sapos wanpela marit i giaman na katim marit bilong em, tasol i no gat as na em i mekim olsem, em i mekim pasin nogat long ai bilong God, na bai God i gat tok long em, long wanem, Baibel i tok God i “nolaik tru long pasin bilong katim marit.”−Malakai 2:13-16, NW.
2 Yumi olgeta man i gat sin na yumi save popaia, olsem na maski sampela marit i baptais pinis na ol i mekim wok bilong God, tasol sampela hevi i painim ol na ol i katim marit. Tasol ol Kristen i save pinis, marit em i wanpela bikpela samting tru, olsem samting i holi, olsem na ol i no katim hariap marit bilong ol−pastaim ol i wok strong tru long painim rot bilong strongim marit bilong ol. God i stap olsem gutpela piksa tru bilong dispela samting. Bipo em i olsem “man” bilong lain Isrel, na inap planti handet yia ol i save bikhet na sakim tok bilong em na ol i no i stap gut long em−ol i mekim olsem meri marit i prenim narapela man na mekim pasin pamuk wantaim em. Tasol Jehova i karim dispela hevi na em i no les. (Aisaia 54:1-5; Jeremaia 3:14-17; Hosea 1:10, 11; 3:1-5) Tasol bihain ol dispela lain Isrel i go nogut olgeta na i no inap Jehova i stretim bek pasin bilong ol na kisim bek ol, olsem na em i rausim ol na ol i no i stap moa olsem lain bilong em.−Matyu 23:37, 38.
3 Sampela taim bikpela hevi i save kamap namel long tupela marit Kristen na ol i save askim ol elda bilong helpim ol long stretim dispela hevi bilong ol. Ol elda i no gat wok long tokim wanpela marit olsem em i mas lusim poroman bilong em, o em i mas katim marit; tasol ol i ken kamapim sampela tok bilong Baibel i stori long ol samting bilong marit. Olsem yumi stori pinis long en, i gat sampela as na Baibel i orait long man o meri marit i ken lusim poroman, olsem sapos man i no laik lukautim meri pikinini long kaikai na ol narapela samting bilong skin, o em i paitim nogat tru meri bilong em, o poroman marit i laik bagarap long ol samting bilong spirit. Na yumi kamapim pinis tok bilong Baibel i tok, sapos wanpela marit i katim marit bilong em, long wanem poroman bilong em i bin mekim pasin pamuk o ol narapela kain pasin sem olsem, orait long dispela wanpela as tasol em inap maritim nupela poroman. (Matyu 19:9) Tasol taim wanpela hevi i kamap namel long tupela marit, nogut wanpela i ting em i mas lusim poroman bilong em, o tupela i ting tupela i mas katim marit. Tupela i mas wok strong long stretim hevi bilong tupela na bai tupela i kamap wanbel gen. Na sapos wanpela i bin pundaun na mekim pasin pamuk o narapela kain pasin sem olsem, orait poroman bilong em i ken lusim tingting long rong em i bin mekim na tupela i ken sindaun yet wantaim.−Matyu 5:31, 32; lukim Hosea 3:1-3.
4 Na yumi bin stori tu long tok bilong aposel Pol, em i tokim ol marit Kristen ol i no ken lusim poroman bilong ol. (1 Korin 7:10-16) Olsem na sapos wanpela marit i no Kristen na em i orait long i stap wantaim poroman Kristen bilong em, orait dispela Kristen i mas wok long helpim em long kamap Kristen. (1 Pita 3:1-4) Sapos em i tanim bel na kamap Kristen, dispela bai helpim famili long i stap bel isi na wanbel. Tasol sapos em i no tanim bel na em i nolaik tru long lotu bilong poroman Kristen bilong em, na em i laik lusim poroman bilong em, orait Kristen i ken mekim wanem? Sapos em i wok long pasim poroman na nau poroman i no lusim em, ating bihain bai poroman i mekim nogut long dispela Kristen na givim bikpela hevi long em, na em i no inap i stap bel isi moa. Olsem na Kristen i ken larim poroman i go na bai Kristen i ken i stap bel isi. (Matyu 5:9) Sapos wanpela marit em i no Kristen na em i lusim poroman Kristen bilong em, long dispela taim tasol Kristen i ken tok, God i bin singautim em bilong i stap bel isi. Tasol tupela marit Kristen i no inap tok olsem sapos tupela i bruk na i no gat as bilong en o Baibel i no orait long en.
5 I gat kain kain hevi i save painim ol marit em ol i bin brukim o katim marit, olsem na yumi no inap makim wanpela samting tasol bilong helpim olgeta wantaim. Nogat. Orait wanem sampela hevi i save painim ol marit em ol i brukim o katim pinis marit bilong ol? Ol i ken mekim wanem long dispela samting? Na ol narapela i ken mekim wanem bilong helpim ol?
Bilong Mekim Gut Bel o Inapim Laik Bilong Skin
6 Sapos wanpela marit i lusim poroman bilong em o em i katim marit, na dispela i stret long tok bilong Baibel, ating sampela hevi bilong em bai pinis. Tasol nau em i stap wanpis na ol narapela kain hevi inap painim em. Wanpela Kristen i katim pinis marit bilong em na em i tok, ‘Nau mi stap bel isi, na mi tenkyu tru long Jehova long dispela samting.’ Tasol dispela meri i tok moa olsem: ‘Mi wanpela mi hatwok long lukautim ol pikinini bilong mi na mekim bikpela long ol. Na sampela taim mi save bel hevi tru, long wanem mi stap wanpis. Na laik bilong skin long mekim maritpasin, dispela tu i givim hevi long mi. Nau sindaun bilong mi i no wankain olsem bipo, na mi mas lain long i stap bel isi long dispela kain sindaun.’
7 Olsem na sapos wanpela marit Kristen em inap tingim wanem samting em i laik mekim, olsem em bai katim marit o i stap yet wantaim poroman bilong em, em i mas tingting gut na skelim ol hevi inap painim em taim em i lusim poroman o katim marit. Sapos Kristen hia em i meri, em i mas tingim sampela samting olsem: Meri i gat laik long i stap wantaim man na toktok wantaim em, na dispela i save mekim gut bel bilong meri. (Lukim Jenesis 3:16.) Tasol taim meri i katim marit na i stap wanpis, em i no gat rot bilong inapim dispela laik. Sampela meri em ol i katim pinis marit, ol i gat bikpela laik long marit gen. Na sampela ol i bin kisim bikpela hevi long marit bilong ol na ol i laik katim marit bambai ol dispela hevi bilong ol i ken pinis. Tasol olsem wanem sapos ol i no gat rot bilong marit gen long bihain? Ol i redi long i stap wanpis na karim dispela kain hevi?
8 Pol i tok: “Sapos em i lusim man pinis, em i mas i stap nating. Sapos nogat, em i ken i go bek na wanbel gen wantaim man bilong en.” (1 Korin 7:11) Sapos meri i wok strong long painim rot, ating em inap “i go bek na wanbel gen wantaim man bilong en.” Olsem na sapos tupela marit Kristen i bruk, tupela i mas beten na tingting strong long sindaun gen wantaim na kamap wanbel gen. Na tupela i mas save, sapos ol i bruk na bel bilong ol i gat laik long mekim maritpasin, nogut dispela laik i kirapim ol long mekim pasin nogut. God bai ting olsem wanem long ol sapos ol i no laik sindaun gen wantaim na wanpela o tupela i mekim pasin pamuk? Dispela samting i bin painim wanpela meri i baptais pinis. Taim em i katim pinis marit, em i kirap prenim wanpela man bilong ausait. I no longtaim na em i gat bel, na kongrigesen i mas rausim em. Tru bihain kongrigesen i kisim em bek, tasol ol marit i brukim marit bilong ol, ol i mas tingim dispela samting i bin painim dispela meri na ol i mas was gut; na ol i mas beten askim Jehova long strongim ol bambai ol i no ken ‘mekim sin long ai bilong em.’ (Jenesis 39:7-12) Olsem na taim ol marit i tingting long brukim o katim marit, ol i mas tingting gut na ol i mas save, ating bihain bai ol i bel hevi long ol i stap wanpis; na tu, nogut laik bilong skin long mekim maritpasin i kirap na pulim ol long mekim pasin pamuk.
Samting Ol i Ken Mekim Sapos Ol i Bel Hevi long i Stap Wanpis
9 Sapos tupela marit i bruk o i katim marit, ol i mas karim ol hevi i painim ol. Sapos Kristen i bruk long poroman marit bilong em, o em i katim pinis marit bilong em, belhevi em i wanpela bikpela samting inap painim em. Orait, ol narapela i ken mekim wanem bilong helpim em? Ol elda na sampela ol narapela i ken helpim em long ol samting bilong spirit na traim strongim bel bilong em. (Lukim 1 Tesalonaika 5:14.) Ating yumi ken singautim em i kam long haus bilong yumi na em i ken kisim ol pikinini bilong em tu i kam na ol i ken kaikai wantaim famili bilong yumi, na yumi ken kamapim sampela gutpela tok bilong strongim bel bilong ol. I no olsem yumi mas redim bikpela kaikai, long wanem, Baibel i tok, sapos yumi “kaikai kumu tasol, dispela, i winim tru pasin bilong i stap wantaim ol man yumi no laikim, na [yumi] kaikai mit bilong bulmakau.” (Provep 15:17) Na ating yupela i ken stori long sampela gutpela samting i bin kamap taim yupela i bin autim tok, o yupela i ken stadi long sampela samting bai kamap long miting Kristen, olsem redim.
10 Sapos wanpela marit Kristen i no i stap moa wantaim poroman bilong em, o tupela i katim marit bilong ol, yumi ken singautim em wantaim ol pikinini bilong em long i kam raun wantaim famili bilong yumi long autim tok na ating dispela bai helpim ol na ol i no ken bel hevi tumas. Tru ol narapela i no inap i stap olsem senis bilong dispela papa o mama nau em i no i stap moa wantaim ol. Tasol wanpela meri Kristen i tok: “I hatwok long lukautim ol pikinini, long wanem papa bilong ol i no i stap. Tasol ol elda na wokman bilong kongrigesen i bin mekim ol samting bilong helpim ol pikinini bilong mi, olsem na mi no bin hatwok tumas.”
11 Tasol ol marit i no stap wantaim poroman bilong ol, ol i mas was gut. Wanpela sista i tok: “Pikinini man bilong mi i no gat papa, na wanpela brata i mekim pasin sori long em. . . . Mi lukim dispela gutpela pasin em i mekim long pikinini bilong mi, na bel bilong mi i kirap long laikim em, na dispela tingting i no stret. Mi mekim olsem Devit bipo, em i laikim samting i no stret long em i laikim.” (2 Samuel 11:1-4) Dispela sista i no bin mekim pasin pamuk wantaim dispela brata, tasol em i sem long dispela tingting i bin kamap long bel bilong em na sampela pasin em i bin mekim. Olsem na em i beten long Jehova i ken lusim tingting long dispela rong, na em i no pren moa wantaim dispela brata. Olsem na yumi ken save, yumi mas sakim ol laik nogut “na abrusim olgeta kain samting nogut.”−1 Tesalonaika 5:22; Galesia 5:24.
12 Na sapos wanpela marit i stap wanpis na em i wok long helpim ol narapela man, dispela bai helpim em long lusim tingting long belhevi bilong em. Marit bilong wanpela sista i pinis na em i gat bikpela hevi long dispela, tasol bihain em i tok: “Sapos yumi wok strong long helpim ol narapela, yumi no tingim tumas hevi bilong yumi yet.” Na sapos yumi gat dispela kain hevi na yumi laik “wok strong” long daunim, yumi ken singautim wanpela famili i kam long haus bilong yumi long apinun na yumi olgeta i ken pren gut na toktok na mekim ol samting i save strongim yumi long ol samting bilong spirit. O sapos yumi no inap mekim olsem, orait, yumi ken i go lukim sampela i gat sik o ol i gat hevi samting na yumi ken traim strongim ol. O ating yumi ken helpim ol lapun long baim ol kaikai samting bilong ol o mekim wok bilong ol. Sapos yumi lusim sampela laik bilong yumi yet long mekim olsem, bai yumi pilim olsem “amamas bilong man i givim samting long arapela man, dispela i winim amamas bilong man i kisim samting bilong em yet.”−Aposel 20:35.
13 Na sapos yumi gat dispela kain hevi yumi ken wok wantaim ol wanbilip bilong yumi long autim tok bilong Kingdom. Wanpela sista em marit bilong em i bruk, em i tok: “Sampela taim mi tingim man bilong mi na mi sori long em na mi bel hevi, tasol mi wok strong long autim tok. Bipo mi no inap bung wantaim ol brata sista, tasol nau mi inap, olsem na dispela hevi i no kamap tumas long bel bilong mi.” Na sapos planti taim yumi raun long ol haus na autim tok, ating bai yumi kisim sampela gobek, na bihain moa yumi gat sampela Baibel-stadi wantaim ol man i laik harim tok i tru, na ating sampela bai kamap strong na dediket long Jehova na mekim wok bilong em. Tru, yumi no mekim wok autim tok bambai yumi ken lusim tingting long ol hevi bilong yumi. Nogat. Tasol taim yumi mekim dispela gutpela wok, ating bai yumi amamas, na hevi bilong yumi bai go liklik.−Provep 10:22.
14 Taim olgeta wan wan long lain bilong Jehova i mekim wok bilong autim tok na i go oltaim long miting, na ol i ‘wok pastaim long painim Kingdom,’ dispela bai helpim ol long ol samting bilong spirit. (Matyu 6:33) Ol dispela kain gutpela wok i save helpim olgeta manmeri long lain bilong Jehova, olsem na em inap strongim tu ol Kristen em poroman bilong ol i bin lusim ol o ol i katim pinis marit bilong ol. Tru, ol dispela wok i no inap stretim olgeta hevi bilong ol, tasol em inap strongim bel bilong ol na ol i no tingim tumas ol hevi bilong ol.
Beten Em i Bikpela Samting
15 Wanpela sista Kristen em i hatwok liklik long i stap wanpis, olsem singel gen, tasol em i tok, samting i bin helpim em, em olsem: Em i wok strong long autim tok, na em i go lukim ol brata sista i gat sik, na ol lapun, na sampela ol i bin lusim wok bilong Jehova. Tasol dispela sista i tok: “Taim mi bel hevi long i stap wanpis, mi save go lukim sampela pren bilong mi, na mi save beten askim Jehova long strongim mi, long wanem mi save, nau long dispela taim Seten i wok strong tru.” Tru tumas, beten em i bikpela samting sapos Kristen i laik i stap gut long God na holimpas stretpela pasin. Ol marit Kristen em poroman bilong ol i bin lusim ol o ol i katim marit bilong ol, ol i mas beten askim Jehova long givim spirit bilong em long ol na wanpela samting em spirit i save kamapim long man, olsem pasin bilong bosim skin, bambai ol i ken daunim laik bilong skin long mekim maritpasin na ol i ken bosim gut skin bilong ol. (Luk 11:13; Galesia 5:22, 23; Kolosi 3:5, 6) Na i gat narapela hevi tu i save painim ol meri marit i bin katim marit bilong ol, olsem: Taim ol i bin i stap wantaim man bilong ol, man yet i save stretim tok long ol samting ol i mas mekim long sindaun bilong ol na ol samting bilong haus. Tasol nau man bilong ol i no i stap wantaim ol, na ol yet i mas tingim ol samting ol i mas mekim long haus na long sindaun bilong ol. Ating bai ol i gat hevi long mekim dispela wok. Olsem na ol dispela meri i mas beten askim Jehova long helpim ol bambai ol i ken tingting gut na mekim gut ol dispela wok, na ol i ken tingim gut ol samting ol i mas mekim taim ol hevi i painim ol.−Jems 1:2-8.
16 Sampela taim bel bilong ol i gat tok na ol i pilim olsem ol i gat asua, na dispela i save putim hevi long ol. Wanpela Kristen i tok: “Taim kot i wok long pinisim marit bilong yu, bel bilong yu i gat tok na dispela inap bagarapim bel bilong yu, maski yu yet yu no gat rong long dispela.” Tasol sapos yu no bin mekim stret ol samting yu mas mekim long poroman, na dispela i as na marit bilong yu i bruk, ating i stret bel bilong yu i mas i gat tok. (1 Korin 7:3-5) Tasol sapos yutupela poroman bilong yu i no inap i stap moa wantaim, long wanem yu no laik brukim lo bilong Baibel, na yu bin beten na tingim gut na nau yu orait long lusim poroman o katim marit, orait, yu ken beten askim Jehova long helpim yu bambai bel bilong yu i no gat tok. Na sapos Kristen i lusim poroman marit bilong em o em i katim marit na dispela i stret wantaim Baibel na ol elda i laik givim sampela tok long em, ol i mas givim tok bilong Baibel tasol long em, nogut ol i mekim sampela tok na nau bel bilong dispela Kristen i gat tok na em i pilim olsem em i gat asua.
“Bel Isi God i Save Givim Yumi” Bai Was Gut long Bel Bilong Yumi
17 Taim Kristen i no stap moa wantaim poroman marit bilong em, o marit bilong em i pinis, dispela kain samting i givim ol narapela kain hevi long em. Tasol sampela kain hevi olsem i save painim ol narapela Kristen tu. Baibel i tok: “Yupela i save, olgeta brata bilong yupela, ol i stap long olgeta hap graun, ol i save karim pen olsem yupela.” (1 Pita 5:6-11) Olgeta man i mekim wok bilong Jehova, ol man bilong graun i save mekim nogut long ol. Na planti Kristen i gat hevi long mani samting o sik o sampela belhevi bilong ol yet na sampela traim na sampela ol narapela hevi. Olsem na dispela Kristen i gat hevi long marit em i wankain olsem ol narapela Witnes Bilong Jehova, na em tu i mas mekim ol samting bilong strongim em long spirit, olsem stadi long Baibel na go long ol miting, na wok strong long autim tok−em ol gutpela wok holi; na em i mas beten oltaim long Jehova bambai bel na tingting bilong em i ken i stap klostu long Jehova. (Matyu 5:3) Sapos Witnes Bilong Jehova i no mekim olsem, em i no inap i stap strong long spirit, tasol sapos em i “wok pastaim long painim kingdom,” em inap i stap amamas na strong nau long dispela taim nogut.
18 Sapos yumi laik i stap strong long spirit, yumi mas bihainim tok bilong Baibel. Sapos yu wanpela Kristen na poroman marit bilong yu em tu i dediket long God, tasol yutupela i bruk na i no sindaun wantaim, yu bin tingim tok bilong Pol long 1 Korin 7:10-16? Sapos inap longpela taim yutupela i no sindaun wantaim, i gutpela yu ken beten askim Jehova long helpim yu long pas bek wantaim poroman bilong yu. Yu ken askim skin bilong yu yet olsem: ‘Mi marit, olsem na Jehova i laik bai mi mas mekim wanem? Olsem wanem? Sapos man tupela meri i marit na tupela i Kristen, orait tupela i mas bihainim laik bilong God o nogat? Jehova i no blesim marit bilong mitupela, na ating as bilong dispela em mipela i no truim tok promis mipela i bin mekim taim mipela i bin marit, a?’ Sapos yutupela i bihainim pasin daun na yupela toktok gut wantaim long dispela hevi bilong yupela na yu givim bel long beten askim God long helpim yu long stretim dispela hevi, na yu wok strong long bihainim tok bilong God long ol samting, ating gutpela samting bai kamap. Sapos yutupela inap stretim hevi bilong yupela long ol samting bilong marit na yupela i kamap wanbel gen na i stap amamas wantaim, orait bel isi bai stap long marit bilong yutupela. Sapos olsem, em bai gutpela tru!
19 Olgeta manmeri i stap gut long Jehova ol i mas amamas long wanpela gutpela samting na ol inap long mekim tu. Dispela samting em “bel isi God i save givim yumi, em i winim olgeta save bilong man.” Yumi ol Kristen inap long kisim dispela gutpela bel isi sapos yumi bihainim tok bilong Pol, em i tok: “Yupela i no ken wari. Nogat. Long olgeta samting yupela i mas tokim God long samting yupela i laikim. Yupela i mas [beten] long em, na singaut long em, na tenkyu long em. Bel isi God i save givim yumi, em i winim olgeta save bilong man. Long wok bilong Krais Jisas bai dispela bel isi i was gut long bel bilong yupela wantaim tingting bilong yupela.”−Filipai 4:6, 7.
20 Dispela bel isi em wanpela samting God i givim long yumi na nau yumi no hevi nabaut long ol samting, na yumi no tingting planti long ol samting; nogat; bel bilong yumi i stap isi tasol, maski ol liklik hevi i bungim yumi. Yumi ken stap bel isi olsem sapos bel na tingting bilong yumi i stap klostu long Jehova na yumi save em i amamas long ol samting yumi save mekim. Ol man i gat dispela “bel isi God i save givim yumi” ol i save larim spirit bilong God i kirapim ol, na ol i no hevi o tingting planti long ol samting. Bilong wanem? Long wanem, ol i save, i no gat wanpela hevi inap painim ol sapos God yet i no laik. Na sapos hevi i painim ol, em God yet i larim dispela i painim ol. (Efesas 4:30; lukim Aposel 11:26.) Olsem na yumi olgeta i mas laikim tumas dispela “bel isi God i save givim yumi” na holimpas olsem wanpela gutpela samting, maski yumi singel o marit o yumi no stap moa wantaim poroman marit bilong yumi o marit bilong yumi i pinis. Na i gutpela sapos yumi gat gutpela tingting olsem bilong Devit, em i tok: “God, yu tasol i save lukautim mi na mi stap gut. Olsem na mi no save pret long wanpela samting. Taim mi go long bet, wantu mi slip olsem daiman.”−Sam 4:8.
Bai Yu Bekim Olsem Wanem?
◻ Long wanem taim tasol Kristen i ken tok, “God i bin singautim [em] bilong bihainim pasin bilong bel isi”?
◻ Sapos Kristen i no stap moa wantaim poroman marit bilong em, em i ken mekim wanem bambai em i no ken bel hevi tumas long i stap wanpis?
◻ Sapos marit bilong Kristen i bruk o tupela i katim marit, orait beten i ken helpim dispela Kristen olsem wanem?
◻ Wanem dispela bel isi i save was long bel na tingting bilong Kristen, maski em i singel o marit o em i no stap moa wantaim poroman bilong em?
2. Ol Kristen i ting olsem wanem long pasin bilong lusim poroman marit o pasin bilong katim marit?
3. (a) I gat wanem sampela as na Baibel i orait long wanpela marit Kristen i lusim poroman bilong em? (b) Long wanem taim i orait long Kristen i katim marit na dispela i stret wantaim tok bilong Baibel?
4. (a) Kolim sampela tok Pol i bin givim long ol marit Kristen long 1 Korin 7:10-16. (b) Long wanem taim tasol i stret long wanpela marit Kristen i ken tok, “God i bin singautim [em] bilong bihainim pasin bilong bel isi”?
5. Nau yumi laik skelim wanem ol askim?
6. Taim wanpela marit i lusim poroman o katim marit, olsem wanem long ol hevi bilong em?
7. Sapos Kristen i tingting long lusim poroman marit bilong em o katim marit, bilong wanem em i mas tingting gut pastaim?
8. (a) Sapos tupela marit Kristen i no sindaun moa wantaim, tupela i mas beten na tingting long mekim wanem, olsem 1 Korin 7:11 i tok? (b) Taim tupela marit i tingting long brukim o katim marit, tupela i mas tingim wanem ol hevi inap painim ol long bihain?
9. Sapos Kristen i bruk long poroman marit bilong em o marit bilong em i pinis, yumi ken mekim wanem bilong helpim em?
10, 11. (a) Wanem narapela pasin yumi ken mekim bilong helpim Kristen em i no stap moa wantaim poroman marit bilong em o marit bilong em i bruk? (b) Bilong wanem yumi mas was gut?
12. Man o meri i ken mekim wanem na bai em i no ken bel hevi tumas long i stap wanpis?
13. Wanem narapela samting inap helpim em na em i no ken bel hevi tumas long i stap wanpis?
14. Sapos Kristen i no stap moa wantaim poroman marit bilong em o em i katim pinis marit, em i ken mekim wanem ol samting na dispela bai helpim em?
15. Sapos wanpela marit i stap wanpis gen, beten i ken helpim em olsem wanem?
16. Sapos tupela marit Kristen i bruk o ol i katim pinis marit, olsem wanem sapos bel bilong wanpela i gat tok na em i ting em i gat asua?
17. Wanem ol samting i ken helpim olgeta Kristen long i stap amamas na stap strong nau long dispela taim nogut?
18. Sapos tupela marit Kristen i no sindaun moa wantaim, ol i ken tingim wanem ol askim na wanem ol samting ol i ken mekim bilong stretim marit bilong tupela?
19. Olgeta manmeri long lain bilong Jehova ol i ken amamas long wanem gutpela samting, olsem Filipai 4:6, 7 i tok?
20. (a) Wanem dispela “bel isi God i save givim yumi”? (b) Maski yumi marit o nogat o yumi stap olsem wanem, yumi mas mekim wanem?
[Piksa long pes 29]
Beten i ken helpim olgeta gutpela Kristen long kisim dispela “bel isi God i save givim yumi” na dispela bai was gut long bel na tingting bilong ol