Askim

Baibel i givim wanem gutpela tok long wok bilong skulim pikinini taim wanpela poroman marit em i Witnes Bilong Jehova na narapela nogat?

Tupela bikpela stiatok bilong Baibel long wok bilong skulim pikinini i gutpela helpim long wanpela papa o mama Witnes em poroman marit bilong em i no wanpela Witnes. Wanpela em: “Mipela i mas bihainim tok bilong God tasol. Mipela i no ken bihainim tok bilong ol man.” (Aposel 5:29) Narapela em: “Man em i het bilong meri bilong en, olsem Krais em i het bilong sios.” (Efesus 5:23) Dispela stiatok i stret long ol meri Witnes em man bilong ol i Witnes, na tu, em i stret long ol meri Witnes em man bilong ol i no Witnes. (1 Pita 3:⁠1) Olsem wanem wanpela papa o mama Witnes i ken bihainim ol dispela stiatok taim em i skulim ol pikinini bilong em?

Sapos man marit em i wanpela Witnes Bilong Jehova, em i gat wok bilong lukautim famili bilong em long ol samting bilong spirit na bilong skin wantaim. (1 Timoti 5:⁠8) Tru, mama i no Witnes bai lusim bikpela hap taim moa wantaim ol pikinini, tasol papa Witnes i mas skulim ol pikinini bilong em long ol samting bilong spirit, em bai mekim olsem long haus na long taim em i kisim ol i go long ol miting Kristen, em ples ol inap kisim skul bilong helpim ol long bihainim stretpela pasin na bung wantaim ol gutpela poroman.

Olsem wanem sapos meri i no bilip long Jehova i strong long kisim ol pikinini bilong ol i go long lotu bilong em o skulim ol long ol bilip bilong em? Ating lo bilong ples i orait long em i mekim olsem. Long kain taim olsem, traim bai painim ol pikinini, ol bai bihainim sampela pasin bilong lotu bilong mama o nogat? Ol samting bilong spirit papa i skulim ol pikinini long en i bikpela samting long helpim ol pikinini long sanap strong. Taim ol pikinini i wok long kamap bikpela, tok bilong Baibel papa i skulim ol long en inap helpim ol long bihainim tok i tru. Man marit i bilip long Jehova bai amamas tru sapos ol pikinini bilong em i strong long stap gut long tok i tru!

Sapos mama em i wanpela Witnes Bilong Jehova, em i mas daun long dispela stiatok olsem man em i het bilong em, tasol em i mas tingim tu i stap bilong ol pikinini bilong em long bihain bihain. (1 Korin 11:⁠3) Planti taim, man marit i no Witnes bai i no pasim meri Witnes bilong em long skulim ol pikinini long stretpela pasin na ol samting bilong spirit, na ol miting bilong lain bilong Jehova inap helpim em long mekim olsem. Mama i ken helpim man bilong em long luksave long olsem wanem ol pikinini bilong ol i kisim gutpela helpim long rot bilong oganaisesen bilong Jehova. Long gutpela pasin em i ken kamapim as na i gutpela long skulim ol pikinini long ol stiatok bilong Baibel long stretpela pasin, long wanem, ol pikinini i stap long dispela taim we ol man i no strong moa long bihainim stretpela pasin.

Tasol man marit i no bilip long Jehova inap strong long ol pikinini bilong em i bihainim lotu bilong em, na em i kisim ol i go long lotu bilong em na skulim ol long bilip bilong em. O ating i gat man marit i no laikim olgeta lotu na em i strong long ol pikinini bilong em i no ken lainim ol samting bilong lotu. Olsem het bilong famili, em i gat bikpela wok long makim wanem samting ol famili i mas mekim.a

Em i wanpela Kristen i dediket pinis, na em i daun long wok bos bilong man bilong em, tasol dispela meri Witnes i mas tingim pasin bilong aposel Pita na Jon, ol i tok: “Tasol mitupela i no inap pasim maus. Mitupela i mas autim tok long olgeta samting mitupela i bin lukim na harim.” (Aposel 4:​19, 20) Wanpela gutpela mama Witnes bai tingim i stap bilong ol pikinini long ol samting bilong spirit, olsem na em bai painim rot bilong helpim ol long bihainim stretpela pasin. Em i gat wok long ai bilong Jehova long skulim ol narapela long tok i tru, na ol pikinini bilong em tu i insait long dispela. (Sindaun 1:8; Matyu 28:​19, 20) Mama Witnes inap karim dispela hevi olsem wanem?

Olsem: Tingim dispela pasin bilong bilip long God. Ating meri Witnes i no inap mekim stadi wantaim ol pikinini bilong em long Baibel, long wanem, man bilong em i tambuim dispela samting. Tasol yu ting tambu bilong Man, i mas pasim meri long toktok wantaim ol pikinini bilong em long Jehova? Nogat. Ol toktok na pasin bilong meri bai kamapim bilip bilong em long Man bilong wokim olgeta samting. Na ating ol pikinini bai gat ol askim long dispela samting. Meri i no ken pret long bihainim lotu, em i ken tingim lotu na kamapim bilip bilong em long Man bilong wokim olgeta samting, na em i ken kamapim dispela bilip tu long ol pikinini bilong em. Maski sapos em i no inap stadi wantaim ol pikinini long Baibel o kisim ol i go long miting long olgeta taim, em i ken skulim ol long save long God Jehova.​—⁠Lo 6:⁠7.

Aposel Pol i stori long i stap bilong wanpela Witnes na poroman bilong em i no wanbilip olsem: “Yupela i save, man i no bilip, em i pas wantaim meri bilong en, na long dispela pasin man i kamap holi. Na meri i no bilip, em i pas wantaim dispela brata, na long dispela pasin meri i kamap holi. Sapos nogat, orait ol pikinini bilong yupela bai i no inap i stap klin long ai bilong God. Tasol nau ol i stap holi.” (1 Korin 7:14) Long tingting bilong Jehova dispela marit i samting holi, long wanem, poroman marit i bilip long Jehova, na ol pikinini tu i samting holi long ai bilong em. Meri Witnes i mas wok strong long helpim ol pikinini bilong em long save long tok i tru, na ol wanem wanem samting wok bilong em i kamapim em bai lusim long han bilong Jehova.

Taim ol pikinini i wok long kamap bikpela, save ol i bin kisim long papamama bilong ol bai mekim na ol yet bai makim wanem rot ol i laik bihainim. Ating bai ol i laik bihainim tok bilong Jisas: “Man i laikim tumas papa o mama bilong en, na i no laikim mi moa yet, em i no inap i stap pren bilong mi. Na man i laikim tumas pikinini man o pikinini meri bilong en, na em i no laikim mi moa yet, em i no inap i stap pren bilong mi.” (Matyu 10:37) Narapela lo God i givim long ol pikinini i olsem: “Yupela pikinini, yupela i mas bihainim tok bilong papamama bilong yupela. Yupela olgeta i pas wantaim Bikpela.” (Efesus 6:⁠1) Taim tok bilong papa o mama i no Witnes i pait wantaim tok bilong God, planti yangpela i laik bihainim ‘tok bilong God’ maski sapos ol i kisim hevi long papa o mama. Papa o mama Witnes bai amamas taim em i lukim ol pikinini i laik lotuim Jehova maski sapos ol i karim hevi long mekim olsem!

[Futnot]