Yu Tingim Yet?
Olsem wanem? Yu bin amamas long ritim ol tok bilong ol nupela Wastaua? Orait, yu ken traim bekim ol dispela askim i stap daunbilo:
• Dispela pasin bilong pilim hevi bilong narapela em i wanem kain pasin, na bilong wanem ol Kristen i mas kisim dispela pasin?
Em pasin olsem yu pilim hevi bilong narapela olsem em i hevi bilong yu yet, na yu pilim bel hevi bilong em long bel bilong yu yet. Ol Kristen i mas ‘sori long olgeta man na laikim tru ol arapela manmeri bilong God na marimari long ol.’ (1 Pita 3:8) Jehova i stap gutpela piksa yumi ken bihainim long pasin bilong pilim hevi bilong narapela. (Song 103:14; Sekaraia 2:8) Bilong helpim yumi long pilim moa yet hevi bilong man, yumi ken putim gut yau, lukluk, na wokim tingting.—4/15, pes 24-26.
• Bilong kisim amamas tru, bilong wanem man i mas kamap orait long ol samting bilong spirit paslain long taim bilong pinisim tru olgeta bagarap bilong skin?
Planti manmeri em ol i gat gutpela skin ol i no i stap amamas na ol i pilim olsem ol hevi i daunim ol. Tasol planti Kristen long nau em ol i gat bagarap long skin ol i amamas tru long lotuim Jehova. Ol lain i kamap orait long ol samting bilong spirit ol bai i gat rot long lukim ol bagarap long skin i pinis olgeta long nupela taim.—5/1, pes 6-7.
• Bilong wanem Hibru 12:16 i bungim pasin bilong Iso wantaim pasin pamuk?
Stori bilong Baibel i soim olsem Iso i kamapim pasin bilong tingting tasol long samting em inap kisim nau tasol na em i no tingim ol samting i holi. Sapos wanpela long nau i larim dispela kain tingting i kamap, dispela pasin inap kirapim em long mekim bikpela rong, olsem pasin pamuk samting.—5/1, pes 10-11.
• Tertullian em i husat, na em i gat nem long wanem samting?
Em i wanpela man i save raitim buk na em i tisa bilong lotu na em i bin stap 180 yia bihain long Krais. Em i gat nem long raitim sampela buk bilong helpim ol Kristen long bekim tok long ol birua bilong ol. Taim em i wok long mekim ol tok bilong helpim ol Kristen em i kamapim tingting na save i as bilong ol bilip giaman, kain olsem God triwan.—5/15, pes 29-31.
• Bilong wanem ol jin insait long skin i no gat asua long olgeta sik bilong ol man, na pasin bilong ol, na indai?
Ol saientis i tok i gat ol jin i stap insait long skin i as bilong sampela sik bilong ol man, na sampela i ting olsem ol pasin yumi save mekim em jin i save kirapim yumi long mekim. Tasol Baibel i stori long man i kamap olsem wanem na olsem wanem sin i painim ol man. Tru, ol jin insait long skin inap bosim yumi long sampela samting, tasol sin i stap long skin na ol samting i stap long hap bilong yumi ol tu i as bilong ol samting i save painim yumi.—6/1, pes 9-11.
• Olsem wanem wanpela olpela rait ol i painim long Oxyrhynchus, Isip, i givim save long yumi olsem ol i bin mekim wok long nem bilong god long bipo?
Dispela hap bilong wanpela olpela rait bilong Jop 42:11, 12 long Baibel Grik Septuagint i gat Tetragramaton (nem bilong God ol i raitim long 4-pela leta Hibru) i stap long en. Dispela samting tu i kamapim klia olsem nem bilong God long tok Hibru i stap long Septuagint, na planti taim ol man bilong raitim Ol Skripsa Grik i raitim dispela nem.—6/1, pes 30.
• Dispela ol pait nogut bilong ol gladieta bilong Rom i wankain long wanem kain spot ol man i save lukim long nau?
Wanpela so long haus Kolisium long Rom, Itali, i kamapim sampela samting long nau i wankain long ol pait long bipo. Ol i soim piksa wokabaut bilong ol man i pait wantaim bulmakau, ol man i boksen, ol ka na ol motabaik i resis na bam, na ol man i sindaun lukim, ol tu i pait. Ol Kristen bilong bipo ol i tingim olsem Jehova i no laikim pasin bilong pait na ol man i save pait, na ol Kristen long nau tu i mas i gat wankain tingting. (Song 11:5)—6/15, pes 29.
• Taim yumi wok strong long kamap gutpela tisa, yumi inap lainim wanem samting long pasin bilong Esra?
Esra 7:10 i kolim 4-pela samting Esra i bin mekim, em ol samting yumi tu i ken bihainim. Em i tok: “Esra i man bilong [1] wok strong [“redim bel,” NW ] long [2] kisim save long lo bilong Bikpela na [3] long bihainim gut dispela lo. Na tu em i wok [4] long skulim gut ol Israel long olgeta tok bilong lo.”—7/1, pes 20.
• Long wanem tupela taim i stret wanpela meri Kristen i karamapim laplap samting long het?
Wanpela em long taim i gat sampela samting bilong lotu i kamap insait long famili. Taim meri Kristen i karamapim laplap long het bilong em dispela i soim olsem man bilong em i gat wok long go pas long beten na skulim famili long Baibel. Narapela em long taim meri i mekim sampela wok bilong kongrigesen. Long dispela taim em i soim olsem Baibel i makim ol man i baptais pinis long mekim wok tisa insait long kongrigesen na ol wok bilong lukautim kongrigesen. (1 Korin 11:3-10)—7/15, pes 26-27.
• Bilong wanem ol Kristen i ting olsem yoga em i no wanpela eksasais tasol na em inap bagarapim yumi?
Wok bilong yoga olsem bilong skulim man long bosim skin, em i bilong stiaim man i go i go na bihain em bai pas wantaim wanpela spirit. Dispela i no stret wantaim tok bilong God, long wanem, yoga em i pasin bilong pasim tingting na man i no inap tingim ol samting. (Rom 12:1, 2) Yoga inap long pulim ol man i go insait long sampela wok bilong ol spirit nogut. (Lo 18: 10, 11)—8/1, pes 20-22.