Yoga—Em Wanpela Eksasais Tasol o Em i Narapela Samting?

LONG nau planti manmeri i tingting strong olsem skin i mas bun nating liklik na skin i strong. Olsem na planti ol i save go long ol ples bilong mekim eksasais na ol haus klap i bilong helpim man long lukautim gut skin na bai em i no gat sik. Long wankain as, planti tausen manmeri long hap bilong Wes ol i kirap lainim yoga, em ol lain bilong Is i save mekim.

Ol man i bel hevi, na i tingting planti long ol samting, na planti wok samting i mekim na bel na tingting i no stap isi, ol tu i kirap mekim yoga bilong mekim isi bel bilong ol na stretim hevi. Kirap long 1960 samting, long taim bilong ol lain hipi na ol kain lain olsem, em ol i laik kamapim strong pasin bilong laikim narapela na pasin wanbel, planti manmeri long hap bilong Wes ol i kirap laikim ol lotu bilong Is i gat ol narapela kain pasin long en. Pasin bilong sindaun na tingim tingim samting long bel na kolim sampela tok kain olsem beten, em i kain olsem yoga na planti lain bilong mekim piksa wokabaut na musik rok ol i save mekim, olsem na planti man i laikim. Yumi tingim planti lain bilong nau i laikim yoga, olsem na i gutpela yumi askim olsem: ‘Tru yoga em i wanpela eksasais tasol bilong helpim man long kisim gutpela skin na bel i stap isi? Yumi inap mekim yoga, maski yumi no mekim ol samting i olsem samting bilong lotu? Yoga em samting ol Kristen i ken mekim?’

As Bilong Yoga

Dispela tok “yoga” i kam long wanpela tok Sanskrit, na em inap makim pasin bilong skruim tupela samting wantaim, o bilong mekim wok olsem wokboi nating aninit long wanpela bos, o bosim strong wanpela samting. Long ol Hindu, yoga em wanpela pasin bilong bosim ol samting ol i mekim, na bihain bai ol inap pas wantaim wanpela strongpela spirit. Sampela i bin kolim yoga olsem pasin bilong bungim olgeta strong bilong bodi na tingting i stap aninit long God.

Ol i ting yoga i bin kamap long wanem taim bipo? Long Ples Daun Bilong Indus, long hap bilong Pakistan, ol i bin painim sampela hap ston samting ol i bin wokim piksa bilong ol man long en na ol i sindaun long pasin olsem yoga. Ol saveman i ting lain Indus i bin kirap namel long yia 3,000 na 1,000 B.C.E., klostu tru long taim bilong ol lain Mesopotemia. Ol samting ol i bin painim long dispela tupela hap wantaim i gat piksa bilong wanpela man i makim wanpela god, na i gat ol kom bilong animal long het bilong em olsem hat king, na i gat ol animal i raunim em, kain olsem Nimrot, em “strongpela man bilong raunim ol animal.” (Stat 10:​8, 9, NW ) Ol Hindu i tok, ol man long piksa i sindaun long pasin yoga ol i makim god Siva, em bikpela bilong ol animal na bikpela bilong yoga, na planti ol i save lotuim em long rot bilong wanpela imis i makim sem bilong man. Olsem na buk Hindu World i stori long yoga olsem ‘ol lo bilong mekim ol pasin bilong daunim ol laik bilong skin, i bin kamap paslain long taim bilong ol lain Arian, na i gat hap bilip na pasin bilong planti lain bilong bipo bipo.’

Pastaim, ol lo bilong mekim yoga ol i bin kisim long maus bilong ol man tasol. Orait bihain wanpela saveman India bilong mekim yoga, em Patañjali, em i raitim ol lo bilong en na kolim Yoga Sutra, na i kam inap nau dispela i stap yet olsem buk bilong ol lo bilong mekim yoga. Patañjali i tok, yoga em i ‘wanpela pasin bilong kamap gutpela olgeta, long rot bilong bosim skin na tingting bilong man na wanpela samting i stap long ol man, olsem wanpela kain strong i no bilong dispela graun.’ Taim yoga i kirap nupela yet na i kam inap nau, em i insait tru long ol lotu bilong Is, na long nau em i strong tru long ol lotu olsem Hindu, Jain, na Buda. Sampela man bilong mekim yoga ol i bilip olsem em bai bringim ol i go i go na bihain ol bai kamap fri olgeta long rot bilong pas wantaim wanpela spirit i save go insait long olgeta samting.

Olsem na yumi ken mekim narapela askim: ‘Yumi inap mekim yoga olsem wanpela eksasais tasol bilong strongim skin na mekim tingting i stap isi na yumi no gat wok long mekim sampela pasin bilong lotu?’ Taim yumi tingim as bilong yoga, yumi mas tok, nogat.

Yoga Inap Stiaim Yu i Go We?

Wok bilong yoga olsem bilong skulim man long bosim skin, em i bilong stiaim man i go i go na bihain em bai pas wantaim wanpela spirit. Tasol em i wanem spirit?

Man bilong raitim buk Hindu World, em Benjamin Walker, em i tok long yoga olsem: “Ating bipo ol i bin mekim ol pasin bilong majik long en, na yoga i save holim yet sampela pasin i olsem bilong glasman na posin samting.” Ol saveman Hindu i tokaut olsem pasin bilong mekim yoga inap givim wanpela kain strong long man i narapela kain tru, tasol ol i save tok dispela i no nambawan wok tru bilong yoga. Olsem: Long buk Indian Philosophy, wanpela presiden bilong India long bipo, em Dokta S. Radhakrishnan, i stori long man bilong mekim yoga (ol i kolim yogi) olsem, “taim em i bosim bodi long rot bilong kain pasin olsem sindaun samting, dispela i mekim na em i no save pilim hat nogut tru o kol nogut tru. . . . Yogi em inap lukim na harim samting i stap longwe . . . Ol tingting bilong em, em inap salim i go long narapela man na i no mekim wok long maus o long narapela samting. . . . Yogi inap mekim na ol man i no inap lukim bodi bilong em.”

Taim sampela i harim stori bilong wanpela yogi i slip antap long wanpela bet i gat planti longpela nil long en, o em i wokabaut antap long paia, ol i ting em i wanpela trik tasol bilong giamanim man o mekim man i lap. Tasol ol dispela samting i save kamap planti taim long India, na ol i save mekim ol narapela pasin tu, olsem sanap long wanpela lek na lukluk stret i go long san inap planti aua, na man i bosim gut pasin bilong em long pulim win na ol inap planim em insait long wesan na em i stap olsem inap longpela taim. Long Jun 1995, wanpela nius (The Times of India) i tok, wanpela pikinini meri i gat 3 na hap krismas, ol i bin mekim na tingting bilong em i kamap narapela kain olsem man i slip na driman. Em i slip long graun na ol i draivim wanpela ka antap long bel bilong em, em hevi bilong ka inap olsem 750 kilogram. Orait taim em i lusim slip na kirap, ol manmeri i lukim olsem em i no kisim bagarap liklik. Ol i kirap nogut long dispela. Na nius i tok moa: “Strong bilong yoga tasol i mekim na dispela samting i kamap.”

Yumi save tru, i no gat wanpela man bilong graun inap mekim ol dispela samting. Olsem na Kristen i mas askim olsem: Ol dispela kain wok i makim wanem samting? God Jehova, em ‘God Antap Tru i save bosim olgeta hap bilong graun,’ em i as bilong en? O i gat narapela as bilong en? (Song 83:18) Baibel i tokaut klia long dispela samting. Taim ol Israel i laik i go insait long Graun Bilong Promis em ol Kenan i sindaun long en, Jehova i tokim ol Israel long rot bilong Moses: “Yupela i no ken bihainim pasin nogut tru bilong ol lain man bilong dispela hap.” Wanem ol “pasin nogut”? Moses i givim tok lukaut long ol i no ken “mekim olkain pasin bilong glasman, na pasin tambaran na pasin sanguma na wokim posin na mekim marila.” (Lo 18:​9, 10) Long ai bilong God, ol dispela samting i nogut tru, long wanem, em wok bilong ol spirit nogut na bilong ol sinman bilong graun.​—⁠Galesia 5:​19-21.

I No Samting Ol Kristen i Ken Mekim

Tasol maski ol lain bilong skulim man long mekim eksasais ol i no wanbel long dispela tok, yoga i no wanpela eksasais tasol. Wanpela buk (Hindu Manners, Customs and Ceremonies) i kamapim stori bilong tupela man i kirap lainim yoga na wanpela tisa olsem guru i skulim ol. Wanpela i tok: “Mi wok strong tru long pasim win bilong mi i go i go, na taim ai bilong mi i raun na mi laik pundaun, long dispela taim tasol mi pulim win. . . . Wanpela taim long belo, mi ting mi lukim wanpela mun i lait strong, na i olsem em i wokabaut na i meknais i go i kam. Na long narapela taim long belo, mi pilim olsem bikpela tudak i karamapim mi. Tisa bilong mi . . . i amamas tru taim mi tokim em long ol dispela samting i painim mi. . . . Em i tok, i no longtaim na bai sampela bikpela samting moa i painim mi long dispela wok mi mekim bilong soim olsem mi bel hevi long sin bilong mi.” Namba tu man i stori olsem: “Em i tok mi mas lukluk i go antap long skai long olgeta de na mi no ken pasim ai liklik o meknais. . . . Sampela taim mi ting mi lukim paia long win; na sampela taim mi ting mi lukim ol raunpela samting i paia na ol narapela samting olsem sta i sut i go. Tisa i amamas tru long wok bilong mi i kamap gutpela.”

I olsem ol guru i ting i stret ol i bin lukim ol dispela narapela kain samting taim ol i wok long kamap long mak i olsem as tru tru bilong mekim eksasais yoga. Yes, bikpela mak ol i laik winim long yoga, em moksa, em ol i tok bihain ol bai pas wantaim wanpela bikpela spirit. Ol i tok em i olsem ‘pasin bilong pasim tingting na em i no inap tingim ol samting.’ Dispela i no stret wantaim mak ol Kristen i mas wok strong long winim, em Baibel i tokim ol: “Yupela i mas givim bodi bilong yupela long God olsem ofa . . . na bai yupela i mekim ol pasin God i laikim. . . . Na yupela i no ken wokabaut wankain olsem ol man bilong dispela graun. Nogat. Yupela i mas larim God i mekim tingting bilong yupela i kamap nupela na bai pasin bilong yupela i kamap nupela tu. Olsem na bai yupela inap long save tru long laik bilong God.”​—⁠Rom 12:​1, 2.

Ol Kristen yet i mas makim wanem kain eksasais ol bai mekim. Tasol ol i no ken larim wanpela samting​—⁠maski em i eksasais bilong strongim skin, kaikai, dring, klos, ol amamas, o narapela samting⁠—i bagarapim pasin bilong ol long pas gut wantaim God Jehova. (1 Korin 10:31) Ol Kristen i laik mekim eksasais bilong strongim skin, i gat kain kain eksasais i stap na i no inap pulim ol i go insait long sampela wok bilong ol spirit nogut. Sapos yumi klia olgeta long ol pasin na bilip em lotu giaman i as bilong en, yumi inap wetim nupela taim God bai kamapim, i gat stretpela pasin tasol long en, na skin wantaim tingting bilong yumi bai i gutpela olgeta, i go inap oltaim oltaim.​—⁠2 Pita 3:13; KTH 21:​3, 4.

[Ol Piksa long pes 22]

Planti ol i save mekim ol samting bilong strongim skin na i no save pulim ol i go insait long wok bilong ol spirit nogut