Lotu Ol Man i Bin Kamapim—Yu Ting Em Inap Bekim Tru Ol Askim Bilong Yumi?

SAMTING olsem 450,000,000 manmeri ol i bihainim lotu Hindu. Wanpela saveman bilong dispela lotu, em Dr. S. Radhakrishnan, em i tok: ‘Lotu i no samting God i mas tokaut long en na yumi mas kisim save long en na bilip; nogat; lotu i olsem yumi wok long kisim save long ol tingting i stap insait tru long bel bilong yumi.’ Na em i tok moa olsem: ‘Ol man yet inap skelim olgeta samting.’

I no gat wanpela lain bilong bosim ol manmeri bilong lotu Hindu, o wanpela pasin tasol ol i mas bihainim bilong mekim dispela lotu. Na ol i no gat wanpela buk tasol, olsem Baibel, i as bilong ol bilip bilong ol. Insait long planti handet yia, planti rait bilong lotu Hindu i kamap na i gat 6-pela narapela narapela kain tingting i bin kamap, olsem: Skelim ol samting long tingting (Nyâya); kisim save long ol kain samting olsem lait na paua na strong na olsem wanem ol samting i wok (Vaiœeshika); bungim kain kain tingting wantaim (Sânkhya); wok bilong i stap wanpela wantaim God (Yoga); askim (Mîmâmsâ); inapim Veda (Vedânta).

Narapela narapela tisa bilong lotu Hindu ol i stap long narapela narapela taim ol i bin kamapim ol dispela kain kain tingting. Ol man i bihainim ol dispela kain kain tingting ol i bihainim narapela narapela kain pasin bilong lotu. Ol man i bihainim tingting Nyâya, ol i bihainim ol narapela kain pasin bilong skelim ol samting long tingting na soim olsem God em i stap (olsem: Ol i tok taim ol lip bilong diwai i meknais, dispela samting i soim yumi win i stap tru).

Dispela tingting bilong ol i stret liklik, long wanem Baibel tu i tok: “Ol man ol i lukim samting [God] i bin wokim. Long dispela ol inap save long sampela pasin bilong God ol man i no inap lukim. I olsem ol i lukim tru as bilong pasin bilong God, na bikpela strong bilong em i stap oltaim oltaim.” (Rom 1:20) Tasol yu ting long rot bilong skelim ol samting long tingting yumi inap kisim save tru long Man bilong wokim olgeta samting? Yu ting long dispela rot yumi inap save long nem bilong Em? o save olsem wanem ol samting i bin kamap long pastaim tru na bilong wanem God i bin larim pen na hevi na pasin nogut i stap? Yu ting long dispela rot yumi inap wetim gutpela samting i kamap na i stap belgut? Wanem kain lotu inap bekim gut ol dispela askim? Lotu i kamapim ol tok i tru God i as bilong en o lotu ol man i bin kamapim?

Tok Bilong Ol Man na Tok Bilong Baibel

Ol Hindu i kamapim planti tingting long pasin bilong God. Ol rait bilong lotu ol i kolim Upanishads, ol dispela rait i as bilong tingting Vedânta . Ol dispela rait i wok long skelim pasin bilong God na ol wok em i mekim long ol man.

Tasol Baibel i tokaut klia long God. Baibel i tok, God em i Man bilong wokim olgeta samting. (Revelesen 4:11) Baibel i stori long God olsem em i wanpela Man na em i gat nem; Baibel i no tok God em i wanpela strong nating na em i no gat nem. Long Sam 148:13 Baibel i tok: “Tru tumas, olgeta i mas litimapim nem bilong [Jehova]. Biknem bilong em wanpela i winim tru biknem bilong olgeta manmeri. Biknem bilong em i antap tru, i winim heven na graun.” Baibel i tok, God em i “as bilong marimari na sori,” na em i “no save belhat kwik,” na em i save “laikim tru olgeta manmeri,” na em i no save giaman. (Eksodas 34:6) Em i laik bai yumi ol sinman yumi ken kisim save long em na i go klostu long em! (Sam 34:8) Baibel i bekim gut ol askim bilong yumi long God, a? I winim tingting ol man i bin kamapim.

Ol dispela rait bilong lotu ol i kolim Upanishads, ol i skelim man tu. Ol i skelim askim olsem: Man em i wanem samting tru? Sampela man i ting i gat tupela hap bilong ol man, olsem skin na spirit o tewel. Tasol Baibel i tok klia olsem: “Yawe God i kisim graun na em i wokim man long en. Na em i winim win bilong laip i go insait long nus bilong dispela man, na man i kamap laip.” (Jenesis 2:7) Olsem na yumi no gat tewel, olsem wanpela samting insait long yumi i kamap nupela gen long planti taim. Taim yumi dai yumi dai tru. Baibel i tok, “Man i mekim sin, em bai dai.”—Esikiel 18:4, NW.

Ol dispela rait i laik skelim tu pasin bilong ol man, tasol Baibel i tokaut klia long as bilong pasin bilong ol man, em sin. Baibel i tok: “Yumi olgeta man yumi bin mekim sin.” (Rom 3:23) Olsem na oltaim yumi mas wok strong long daunim ol laik nogut i kamap long bel. I olsem yumi gat pait.—Rom 7:20, 25.

Ol dispela rait i skelim tu pasin nogut na pe bilong ol man i mekim pasin nogut. Baibel i tok klia olsem pasin nogut i bin kamap long graun, long wanem ol man i sakim God na bihainim laik bilong ol yet. Baibel i tok: “Mi skelim pinis ol dispela samting na nau mi save, God tru em i bin wokim man i stret olgeta, tasol ol man yet i tingim planti samting ol i laik mekim.” (Eklisiastis 7:29, NW) Na Baibel i tok long pe bilong ol man nogut, olsem: “God bai i skelim pe long olgeta man inap long pasin ol i mekim. Sampela man i save stap strong long gutpela pasin . . . Bai God i givim laip i stap gut oltaim oltaim long ol dispela man. Na sampela i save ting long ol yet tasol, na ol i givim baksait long tok tru na bihainim pasin i no stret, bai God i belhat long ol dispela man na bekim pe nogut tru long ol. Bikpela pen na hevi bai i karamapim olgeta man i save mekim pasin nogut, . . . God i no save ting long man i gat nem na em i skelim em. Nogat. Em i save skelim pasin man i mekim.”—Rom 2:6-9, 11.

Ol dispela rait i hatwok long stori long rot bilong kisim laip, tasol Baibel i tok klia olsem: “Bikpela, yu wanpela tasol i save kisim bek mipela.” (Sam 3:8) Ol man i bihainim Jehova, Jehova i tok promis long ol, olsem: “Ol stretpela man bai i kisim graun God i givim ol, na bai ol i stap oltaim long en.”—Sam 37:29.

Baibel i bekim gut ol dispela askim ol man i gat kain kain tingting long en, na ol tok Baibel i bekim i klia na i no hatwok long save long en. No gat wanpela saveman bilong graun inap kamapim ol dispela bekim long tingting bilong em yet.

Baibel—Em Buk Bilong God?

Tasol olsem wanem? Tru Baibel em i buk bilong God? I gat planti samting na yu ken bilip olsem.

Namba wan em olsem: I stret yumi ken ting olsem God i bin wokim rot na yumi inap save long em. Sapos wanpela papa i kamapim ol pikinini na bihain em i ranawe lusim ol, bai yu ting olsem wanem long em? Na olsem wanem sapos dispela man i no tokim ol pikinini long em yet na em i no tokim ol long nem bilong em, olsem na ol i no save liklik long em? Bai yu belhat long dispela man, a? Bai yu pilim olsem em i no gutpela papa. Tasol Man bilong wokim yumi em i gutpela papa na em i sori long yumi ol pikinini bilong em long graun. Olsem na i stret yumi ken ting olsem God i bin wokim rot na yumi inap save long em.

Tasol ating yu bai tok: ‘Bilong wanem yu bilip olsem God i bin wokim wanpela buk bilong givim dispela save long yumi? Ating God I Gat Olgeta Strong em i no ken givim tok long yumi long rot bilong wanpela buk, ating em bai givim tok long yumi long rot bilong wanpela maus i kamap long skai samting?’ Tru, God i stap long heven na sampela taim em i bin tok long ol man, olsem long taim em i kolim ol Tenpela Lo. Long dispela taim ol manmeri i harim klaut i pairap na ol i lukim lait bilong klaut i sut i go i kam na bikpela smok i kamap long maunten na ol i pret. Ol i tokim Moses: “Yu yet i mas tok long mipela na mipela ken harim. Nogut God i tok long mipela, na bai mipela i dai.” Olsem na ol i sanap longwe na Jehova i tok long Moses. (Eksodas 20:18-22)a Tasol Moses inap lusim tingting long ol tok God i bin givim long em. Olsem na Jehova i bihainim gutpela tingting na em i kirapim Moses na sampela narapela gutpela man na ol i raitim ol tok bilong God long buk. (Eksodas 34:28) Nau ol man inap kaunim ol tok bilong God na tingim gut ol dispela tok long bel na lanim gut.—Lukim Josua 1:8; na lukim tu 1 Timoti 4:15.

Tru, ol man i bin raitim ol tok bilong Baibel, olsem ol man i bin raitim ol rait bilong lotu Hindu. Tasol spirit holi bilong God Jehova i bin givim tingting long ol man i raitim ol tok bilong Baibel. (2 Pita 1:21) Ol tok ol i raitim i no kamapim tingting nating bilong ol man. Nogat. Ol tok bilong en i kamapim long ples klia olsem God i bin stiaim tingting bilong ol man i raitim ol dispela tok. Olsem: Taim Babel i stori long God i wokim ol samting, Babel i kolim stret wanem samting em i bin wokim pastaim na wanem samting bihain. Ol man yet i no inap save long dispela samting, a? Olsem na yumi save, God i bin givim dispela save long ol man i raitim dispela tok long Baibel. (Jenesis sapta 1) Winim 2,700 yia bipo Baibel i tok stret olsem graun em i raunpela na i “hangamap nating.” Long dispela taim bipo ol man i no save long dispela samting, olsem na yumi save God em i as bilong dispela tok bilong Baibel. (Jop 26:7, NW; Aisaia 40:22) Na tingim ol tok profet bilong Baibel, olsem tok profet i stap long Aisaia 44:28. Inap 130 yia paslain long taim mama i karim Sairas bilong Pesia, dispela ves i kolim nem bilong em na i tok em bai helpim lain bilong Jehova long i go bek long Jerusalem. Ol samting i kamap stret tru olsem dispela tok profet i makim. Bihain Sairas i daunim ol Babilon na larim ol Isrel i go bek long Jerusalem. No gat wanpela man bilong graun inap kamapim dispela tok profet a? Na no gat wanpela man inap mekim tok profet 2,500 yia bipo na stori long tupela strongpela gavman i kamap long graun long nau na ol i stap birua birua, a?—Danyel 11:27, 36-40.

Olsem na i gat gutpela as tru na yumi ken bilip olsem Baibel em i tok bilong God na i kamapim laik bilong God long ol man. Mipela laik bai yu ken skelim ol tok bilong en. Ol Witnes Bilong Jehova i amamas long helpim ol man long mekim olsem. Long dispela rot bai yu no bihainim tingting nating bilong ol man na lotu nating long God. (Matyu 15:9) Na bai yu no olsem ol Sameria bilong bipo, em ol i save lotu “long samting [ol] i no save long en.” (Jon 4:22) Spirit bilong God inap helpim yu na bai yu inap save long “olgeta tingting na pasin bilong God i hait pinis long yumi.” (1 Korin 2:10) Long wanem “sapos yupela wok long painim em, bai yupela inap save long em.”—2 Kronikel 15:2, NW.

[Futnot]

[Piksa long pes 5]

Planti milion i bihainim ol lotu ol man i bin kamapim, tasol yu ting ol dispela lotu i bekim gut askim bilong ol long God?

[Piksa long pes 7]

Baibel i tok graun i raunpela na i “hangamap nating.” Olsem na yumi save, God em i as bilong ol dispela tok, a?