Sapta 3

Husat Em i God Tru?

1. Olsem wanem na planti man i wanbel long namba wan tok bilong Baibel?

LONG nait, taim ples antap i klin tru, yu kirap nogut long lukim ol planti planti sta i stap, a? Ol i kamap olsem wanem? Yu save? Na olsem wanem long ol samting i gat laip long graun—ol plaua i gat kain kain kala, na ol pisin yumi amamas long harim krai bilong ol, na ol traipela weil i kalap long solwara? Na i gat planti samting moa. Olgeta dispela samting i no inap kamap nating. Olsem na planti man i wanbel long namba wan tok bilong Baibel, olsem: “Bipo bipo tru God i mekim kamap skai na graun na olgeta samting i stap long en”!—Stat 1:1.

2. Baibel i tok wanem long God? Baibel i kirapim yumi long mekim wanem?

² Ol man i gat kain kain tingting long God. Sampela i ting God em i wanpela strong. Planti milion manmeri i lotuim ol tumbuna, na ol i ting God i stap longwe tumas na ol i no inap save long em. Tasol Baibel i kamapim klia olsem God tru em i wanpela man i stap tru na em i tingim yumi olgeta wan wan. Olsem na Baibel i kirapim yumi long “wok long painim” God. Baibel i tok: “Em i no i stap longwe long yumi olgeta wan wan.”—Aposel 17:27.

3. Olsem wanem na yumi no inap wokim piksa bilong God?

³ Pes bilong God i wanem kain? Sampela wokboi bilong em i bin lukim bikpela lait bilong em long driman. Long ol dispela driman God i makim olsem em i sindaun long sia king na bikpela lait bilong em i go nabaut. Tasol ol man i lukim ol dispela driman, ol i no stori long pes bilong em. (Daniel 7:9, 10; KTH 4:2, 3) Long wanem, “God em i Spirit”; em i no gat bodi bilong graun. (Jon 4:24) Olsem na yumi no inap wokim piksa bilong Man bilong wokim yumi, long wanem, “i no gat wanpela man i bin lukim God.” (Jon 1:18; Kisim Bek 33:20) Tasol Baibel i lainim yumi long planti samting bilong God.

GOD TRU EM I GAT NEM BILONG EM

4. Wanem sampela biknem Baibel i kolim long God?

⁴ Baibel i kolim God tru olsem “God I Gat Olgeta Strong,” na “God Antap Tru,” na Baibel i tok “God i bin wokim yumi,” na em i Man bilong “skulim” yumi, na em i “Bikpela,” na “King bilong olgeta taim.” (Stat 17:1; Song 50:14; Saveman 12:1; Aisaia 30:20; Aposel 4:24; 1 Timoti 1:17) Sapos yumi tingim gut ol dispela biknem bilong God, bai yumi kisim sampela save moa long em.

5. Nem bilong God husat? Dispela nem i stap hamas taim long Ol Skripsa Hibru?

⁵ Tasol God i gat nem tru bilong em, na long Ol Skripsa Hibru tasol dispela nem i stap olsem 7,000 taim, winim tru olgeta biknem Baibel i kolim long em. Inap 1,900 yia bipo ol Juda i bihainim bilip kranki na ol i no kolim moa nem bilong God. Long tok Hibru bilong Baibel, ol i no bin raitim ol leta olsem a, e, i, o, u, em ol inap helpim yumi long kolim stret ol tok. Olsem na i no gat rot bilong yumi ken save tru, olsem wanem Moses na Devit na ol narapela long bipo i bin kolim fopela leta bilong nem bilong God (יהוה). Sampela saveman i ting ol i bin kolim olsem “Yawe,” tasol ol i no save tru. Inap planti handet yia nau ol man i bin kolim olsem “Jehova” long tok Inglis na ol i kolim wankain long planti narapela tok ples. Planti man i save kolim olsem.—Lukim sta daunbilo bilong Kisim Bek 3:15; na lukim Aisaia 26:4 long Baibel King James Version.

BILONG WANEM YU MAS KOLIM NEM BILONG GOD?

6. Song 83:18 i stori olsem wanem long Jehova? Bilong wanem yumi mas kolim nem bilong em?

⁶ God Jehova wanpela tasol i holim dispela nem, na dispela i makim em i narapela kain long olgeta narapela god. Olsem na dispela nem i stap planti taim long Baibel, na em i stap planti taim moa long hap ol i raitim pastaim long tok Hibru. Planti man bilong tanim tok bilong Baibel ol i lusim nem bilong God, tasol Song 83:18 i tok klia olsem: “Yu, nem bilong yu Jehova, yu wanpela tasol yu God Antap Tru, na yu save bosim olgeta hap bilong graun.” (NW) Olsem na i stret yumi mas kolim nem tru bilong God taim yumi toktok long em.

7. Insait bilong nem Jehova i givim wanem save long yumi long God?

⁷ Nem Jehova i insait long wanpela tok Hibru, em i olsem “i kamap.” Olsem na insait bilong nem bilong God i olsem: “Em i Mekim i Kamap.” Long dispela rot Jehova i makim olsem em i Man bilong kamapim laik bilong em. Olgeta samting em i laik mekim, em i save mekim. I stret God tru tasol i holim dispela nem, long wanem, ol man i no save bai ol inap mekim samting ol i laik mekim o nogat. (Jems 4:13, 14) Jehova wanpela tasol inap tok: “Tok bilong mi bai i no inap kam bek nating long mi. Nogat. Em bai . . . kamapim ol samting mi gat laik long ol i mas kamap.”—Aisaia 55:11.

8. Long maus bilong Moses, Jehova i tokaut long wanem laik bilong em?

⁸ Ol tumbuna bilong lain Israel, em Abraham na Aisak na Jekop, ol i “lotu long Bikpela”; ol i save long nem bilong em, tasol ol i no save dispela nem i makim wanem samting tru. (Stat 21:33; 26:25; 32:9; Kisim Bek 6:3) Taim Jehova i tokaut olsem em i laik helpim lain Israel long lusim wok kalabus long Isip na givim gutpela graun long ol “i gat planti gris,” ating ol i pilim olsem em i no inap mekim. (Kisim Bek 3:17) Tasol God i kamapim klia samting nem bilong em i makim inap oltaim oltaim, taim em i tokim profet bilong em Moses: “Yu mas tok olsem long ol manmeri bilong Israel, ‘[Jehova], em God bilong ol tumbuna bilong yupela, Abraham na Aisak na Jekop, em i bin salim mi na mi kam long yupela.’ ” Na God i tok, “[Jehova], em i nem bilong mi oltaim oltaim, na ol lain tumbuna i kamap bihain i mas kolim mi olsem.”—Kisim Bek 3:15.

9. King bilong Isip i ting olsem wanem long Jehova?

⁹ Moses i askim king bilong Isip long larim ol Israel i go long ples nating bilong lotuim Jehova. Tasol dispela king, em ol Isip i ting em i wanpela god, na em yet i save lotuim ol narapela god bilong Isip, em i bekim tok long Moses: “[Jehova] em i husat? Bilong wanem mi mas harim tok bilong en na larim yupela Israel i go? Mi no save long [Jehova], olsem na mi no ken larim yupela i go.”—Kisim Bek 5:1, 2.

10. Long Isip bipo, Jehova i mekim wanem bilong kamapim tru ol samting em i laik mekim long ol Israel?

¹⁰ Nau Jehova i kirap mekim ol samting bilong kamapim laik bilong em, olsem insait bilong nem bilong em i makim. Em i mekim na tenpela bikpela hevi i kamap long ol Isip. Laspela hevi i olsem: Ol namba wan pikinini man bilong ol Isip i dai, na namba wan pikinini man bilong bikhet king tu em i dai. Nau ol Isip i laik tru bai ol Israel i lusim Isip na i go. Tasol sampela Isip i pilim tru strong bilong Jehova na ol i go wantaim ol Israel.—Kisim Bek 12:35-38.

11. Jehova i wokim wanem mirakel long solwara Retsi? Olsem na ol Isip i tokaut olsem wanem?

¹¹ Bikhet king i kisim ami wantaim planti handet karis pait bilong ol i go bilong bringim ol dispela wokboi bilong em i kam bek. Ol i go kamap klostu long ol Israel na God i wokim mirakel—solwara Retsi i bruk tupela hap na ol Israel i wokabaut long graun i drai na kamap long narapela hapsait bilong solwara. Ol soldia bilong Isip i bihainim ol Israel i go namel long solwara na Jehova “i mekim ol wil bilong karis i pas long graun, olsem na ol karis i no inap ran strong.” Ol Isip i singaut: “[Jehova] i helpim ol Israel na i pait long yumi. Hariap, yumi ranawe i go.” Tasol nogat. Wara i kam bek na “karamapim olgeta soldia wantaim hos na karis bilong ol.” (Kisim Bek 14:22-25, 28) Long dispela samting Jehova i mekim, em i kisim biknem tru, na inap long nau ol man i no lusim tingting long dispela samting i bin kamap long bipo.—Josua 2:9-11.

12, 13. (a) Olsem wanem nem bilong God i bikpela samting long yumi long nau? (b) Ol man i mas hariap na lain long wanem samting? Bilong wanem ol i mas mekim olsem?

¹² Ol samting God i mekim na i givim biknem long em, dispela i bikpela samting long yumi long nau. Nem bilong em, Jehova, i makim olsem olgeta samting em i laik mekim, em bai mekim i kamap tru, na wanpela samting i olsem: Em bai kamapim laik bilong em bilong pastaim na mekim graun i kamap ples paradais. (Stat 1:28; 2:8) Bilong kamapim laik bilong em, em bai pinisim olgeta man ol i birua long wok king bilong em long nau. Em i tok pinis: “Bai ol i save gut olsem, mi yet mi [Jehova].” (Esekiel 38:23) Na bai God i truim tok promis bilong em long bringim lain bilong em i go insait long nupela taim i gat stretpela pasin tasol i stap long en.—2 Pita 3:13.

¹³ Olgeta man i laik bai Jehova i orait long ol, ol i mas lain long singaut long nem bilong em long pasin bilong bilip. Baibel i tok promis olsem: “Olgeta manmeri i singaut long nem bilong Jehova, bai em i kisim bek ol.” (Rom 10:13, NW) Tru tumas, nem bilong Jehova i bikpela samting tru. Sapos yu singaut long Jehova olsem God bilong yu na Man bilong kisim bek yu, bai yu inap i stap amamas oltaim.

OL PASIN BILONG GOD TRU

14. Baibel i kamapim wanem ol bikpela pasin bilong God?

¹⁴ Sapos yumi skelim ol samting God i mekim bilong helpim ol Israel long lusim Isip, dispela bai kamapim klia olsem God i gat 4-pela bikpela pasin ol i stret wantaim. Ol samting em i mekim long king bilong Isip i kamapim bikpela strong bilong em. (Kisim Bek 9:16) Gutpela rot God i bihainim bilong stretim ol dispela hevi i kamap, dispela i kamapim gutpela tingting na save bilong em. (Rom 11:33) Taim em i givim strafe long ol bikhetman i birua long lain bilong em na daunim ol, em i kamapim stretpela pasin bilong em. (Lo 32:4) Na wanpela bikpela pasin tru bilong God em pasin bilong laikim tru ol narapela. Taim em i helpim ol lain tumbuna pikinini bilong Abraham olsem em i tok promis pinis, dispela i kamapim klia olsem em i laikim ol tru. (Lo 7:8) Na em i kamapim pasin sori bilong em taim em i larim sampela Isip i lusim ol god giaman na lotuim em, em wanpela tasol em i God tru, na ol i kisim ol gutpela samting tru long dispela rot.

15, 16. Long wanem ol rot God i bin kamapim klia olsem em i laikim tru ol narapela?

¹⁵ Taim yu kaunim Baibel bai yu lukim olsem pasin bilong laikim tru ol narapela em i nambawan bikpela pasin bilong God, na em i kamapim long kain kain rot. Olsem: Em i gat pasin sori na dispela i kirapim em long wokim ol samting—pastaim em i wokim ol ensel bambai ol inap amamas wantaim em long i stap laip. Ol dispela milion milion ensel i laikim tumas God na ol i save litimapim nem bilong em. (Jop 38:4, 7; Daniel 7:10, NW) Na taim God i wokim graun na redim bilong ol man i ken i stap amamas long en, em i kamapim klia olsem em i laikim tru ol man.—Stat 1:1, 26-28; Song 115:16.

¹⁶ Dispela pasin bilong God long laikim tru ol man i helpim yumi long planti rot na yumi no inap kolim olgeta—ol i planti tumas. Wanpela i olsem: Em i wokim gut bodi bilong yumi bambai yumi inap amamas long i stap laip. (Song 139:14) Em i laikim tru yumi, olsem na em i mekim ren i kam daun na “planti gutpela kaikai i kamap. Em i givim [yumi] planti kaikai na i mekim bel bilong [yumi] i amamas.” (Aposel 14:17) Na em i save “mekim san bilong en i kamap antap long ol man nogut na long ol gutpela man wantaim. Na em i save mekim ren i kam daun long ol stretpela man na long ol man bilong mekim pasin i no stret tu.” (Matyu 5:45) Na dispela pasin bilong God long laikim tru yumi i kirapim em long helpim yumi long kisim save long em na amamas long lotuim em. Tru tumas, “God yet em i as bilong dispela pasin bilong laikim ol arapela.” (1 Jon 4:8) Na em i gat planti narapela gutpela pasin.

GOD EM I “AS BILONG MARIMARI NA SORI”

17. Kisim Bek 34:6, 7 i givim wanem save long yumi long God?

¹⁷ Ol Israel i brukim pinis solwara Retsi, tasol ol i no save gut yet long God; ol i sot yet long sampela save. Moses i pilim dispela samting na em i beten long God olsem: “Sapos yu laikim mi, orait mi laik yu tokim mi long tingting bilong yu na bai mi ken save gut long yu na oltaim mi ken mekim pasin yu save laikim.” (Kisim Bek 33:13) Moses i kisim bikpela save moa long ol pasin bilong God taim em i harim God yet i tokaut olsem: “Mi [Jehova], mi Bikpela. Mi God na mi as bilong marimari na sori. Na mi no save belhat kwik. Mi save laikim tru olgeta manmeri, na mi save bihainim olgeta tok bilong mi. Mi save laikim tumas planti tausen lain manmeri, olsem mi promis pinis, na mi save lusim ol kain kain sin na bikhetpasin bilong ol. Tasol mi save mekim save long ol man i gat asua.” (Kisim Bek 34:6, 7) God i save sori na mekim stretpela pasin tu wantaim—ol man i bikhet na mekim rong em i no ken larim ol i abrusim strafe bilong dispela.

18. Marimari bilong Jehova i bin kamap ples klia olsem wanem?

¹⁸ Moses i kisim save olsem Jehova i save mekim pasin marimari. Man bilong marimari em i save sori long ol man i gat hevi na em i wok long helpim ol. Olsem na God i mekim pasin sori long ol man, na em i wokim rot bilong pinisim tru ol hevi bilong ol na sik na i dai. (KTH 21:3-5) Ol man i lotuim God, hevi inap painim ol tu, long wanem, ol i stap namel long ol man nogut, o sapos ol yet i no bihainim savepasin, hevi inap bungim ol. Tasol sapos ol i daunim ol yet na askim Jehova long helpim ol, em bai mekim isi bel bilong ol na helpim ol. Bilong wanem em bai mekim? Long wanem, em i save mekim pasin marimari na sori long ol man i lotuim em.—Song 86:15; 1 Pita 5:6, 7.

19. Olsem wanem yumi inap tok God i save sori long ol man?

¹⁹ Planti man i gat namba ol i save mekim hatpela pasin long ol narapela. Tasol Jehova i narapela kain—em i mekim pasin sori na gutpela pasin long ol wokboi bilong em i daun long em! Em i Nambawan Bikpela bilong heven na graun, tasol em i mekim gutpela pasin tru long olgeta manmeri. (Song 8:3, 4; Luk 6:35) Na em i save sori long ol wan wan man na helpim ol long samting ol i askim em long en. (Kisim Bek 22:26, 27; Luk 18:13, 14) Tasol i no olsem God i mas marimari na sori long ol man, nogat; em laik bilong em. (Kisim Bek 33:19) Olsem na yumi mas pilim tru na tenkyu long God long marimari na sori bilong em.—Song 145:1, 8.

NO SAVE BELHAT KWIK, LAIKIM OLGETA, MEKIM STRETPELA PASIN

20. Wanem samting i makim olsem Jehova i no save belhat kwik na em i no save laikim sampela lain tasol na sampela lain nogat?

²⁰ Jehova i no save belhat kwik. Tasol i no olsem em i no mekim wanpela samting—em i bagarapim bikhet king bilong Isip na ami bilong em long solwara Retsi. Na Jehova i laikim olgeta manmeri, maski ol i bilong wanem lain. Em i laikim lain bilong em, ol Israel, tasol taim ol i mekim rong planti taim, em i no laikim ol moa. God i orait long ol man bilong ol narapela lain i lotuim em, tasol ol i mas bihainim ol stretpela pasin em i makim.—Aposel 10:34, 35.

21. (a) Kamapim Tok Hait 15:2-4 i skulim yumi olsem wanem long God? (b) Wanem samting inap helpim yumi long mekim ol pasin i stret long ai bilong God?

²¹ Buk Kamapim Tok Hait long Baibel i kamapim klia olsem i bikpela samting long yumi mas lain long “stretpela pasin” bilong God. Kamapim Tok Hait i tok ol ensel i singim song olsem: “Bikpela, yu God I Gat Olgeta Strong, yu save mekim ol narakain strongpela wok . . . King bilong olgeta lain manmeri, ol pasin bilong yu ol i stret na i tru olgeta. Bikpela, yu wanpela tasol yu stap holi. Olsem na olgeta manmeri ol i mas pret long yu na litimapim nem bilong yu. Olgeta lain man bai i kam lotu long yu. Long wanem, stretpela pasin bilong yu i kamap ples klia pinis.” (KTH 15:2-4) Taim yumi bihainim ol pasin i stret long ai bilong God, yumi kamapim klia olsem yumi daun na pret long Jehova. Bai yumi no hatwok long daun long em sapos yumi tingim gutpela tingting na sori bilong em. Olgeta lo bilong em i bilong helpim yumi.—Aisaia 48:17, 18.

JEHOVA “EM WANPELA TASOL EM I GOD”

22. Ol man i bilip long Baibel, bilong wanem ol i no save lotuim wanpela God Triwan?

²² Ol Isip bilong bipo i lotuim planti god, tasol Jehova i “no inap larim wanpela giaman god i senisim [em].” (Kisim Bek 20:5) Moses i tokim ol Israel: “[Jehova], em wanpela tasol em i God bilong yumi.” (Lo 6:4) Krais Jisas i kolim gen dispela tok. (Mak 12:28, 29) Olsem na ol man i bilip olsem Baibel em i tok tru bilong God, ol i no save lotuim God Triwan; ol i no bilip olsem i gat tripela man o tripela god ol i wanpela God tasol. Nogat. Dispela tok “God Triwan” i no stap long Baibel. God tru em i wanpela tasol, na Krais Jisas em i narapela. (Jon 14:28; 1 Korin 15:28) Spirit holi bilong God i no wanpela man. Em i strong bilong Jehova bilong mekim wok; God i Gat Olgeta Strong i save mekim wok long en bilong kamapim laik bilong em.—Stat 1:2; Aposel 2:1-4, 32, 33; 2 Pita 1:20, 21.

23. (a) Yu mas mekim wanem na bai yu laikim God moa yet? (b) Jisas i tok wanem long yumi mas laikim tumas God? Yumi mas save long wanem samting bilong Krais?

²³ Taim yu tingim ol gutpela pasin bilong Jehova, i stret yu mas lotu long em, a? Taim yu skul long Baibel, em Tok bilong em, bai yu save gut long em na bai yu lain long ol samting yu mas mekim bambai yu inap i stap gutpela oltaim oltaim na i stap amamas. (Matyu 5:3, 6) Na bai yu laikim God moa yet. I stret yu mekim olsem, long wanem, Jisas i tok: “Yupela i mas laikim [God] tru long bel bilong yupela na long spirit bilong yupela na long tingting bilong yupela na long strong bilong yupela.” (Mak 12:30) Jisas i laikim God olsem. Baibel i givim wanem save long yumi long Krais Jisas? Em i gat wanem wok long kamapim laik bilong God?

TRAIM SAVE BILONG YU

Nem bilong God husat? Dispela nem i stap hamas taim long Ol Skripsa Hibru?

Bilong wanem yu mas kolim nem bilong God?

Yu laikim tru wanem ol pasin bilong God Jehova?

[Piksa long pes 29]

Yu save gut long Man i bin wokim olgeta samting?