Jehova—Em God Tru i Stap Laip
KING bilong Isip i bikhet na i laik daunim Jehova taim em i tok: “[Jehova] em i husat?” (Kisim Bek 5:2) Olsem yumi kaunim pinis long narapela stori, dispela pasin bilong em i as na ol hevi na dai i painim ol Isip, na king wantaim ami bilong em i dring wara na i dai.
Long Isip bilong bipo God Jehova i kamapim long ples klia olsem em i winim tru ol god giaman. Tasol i gat planti samting moa bilong em na yumi mas save long en. Olsem wanem long sampela pasin bilong em? Em i laik bai yumi mas mekim wanem?
Nem na Pasin Bilong Em
Taim Moses i tokim king bilong Isip long mekim sampela samting, Moses i no tok: ‘Bikpela i tok olsem olsem.’ Nogat. King wantaim ol Isip i gat planti god na ol i tingim ol dispela god i olsem bikpela bilong ol. Moses i kolim nem tru bilong God, olsem Jehova. Moses i bin harim dispela nem long taim em i stap long kantri Midian na em i lukim wanpela diwai i paia. Baibel i tok:
“God i tokim Moses olsem, ‘Mi yet mi [Jehova]. Planti yia bipo mi bin kamap long Abraham na Aisak na Jekop, . . . tasol mi no toksave long ol olsem, [Jehova] em i nem bilong mi, . . . Yu mas givim dispela tok bilong mi long ol Israel, “Mi yet mi [Jehova]. Mi bai kisim yupela long han bilong ol Isip na long ol hevi ol i putim long yupela na . . . bai mi mekim save tru long ol, na . . . bai mi mekim yupela i kamap ol manmeri bilong mi yet na bai mi stap God bilong yupela. . . . Bai yupela i save tru olsem, mi [Jehova], mi God bilong yupela. Mi bai kisim yupela i go long dispela graun mi bin tok promis long givim long Abraham na Aisak na Jekop. Na mi bai givim dispela graun long yupela . . . Mi [Jehova], mi tok pinis.” ’ ”—Kisim Bek 6:1-8.
Jehova i truim tok promis bilong em. Em i helpim ol Israel long lusim kalabus long Isip na long kisim graun Kenan. Em i stret, long wanem, insait bilong nem bilong em i olsem, “Em i kamapim laik bilong em.” Baibel i kolim sampela hap nem bilong em olsem “God,” na “God, Bikpela,” na “God i bin wokim (ol samting),” na “Papa,” na “God I Gat Olgeta Strong,” na “God Antap Tru.” Tasol insait bilong nem tru bilong em i makim ol samting em i laik kamapim.—Aisaia 42:8.
Sapos yumi kaunim Baibel long tok ples ol i bin raitim long pastaim, bai yumi lukim nem bilong Jehova i stap planti tausen taim. Long tok Hibru i gat 4-pela leta bilong raitim dispela nem, ol i kolim o spelim olsem Yod He Waw He (יהוה), na taim dispela 4-pela leta i bung olsem, ol i kolim Tetragramaton, na taim ol i kaunim, ol i kirap long han sut na kaunim i go long han kais, na ol i putim sampela nek moa i go namel namel long dispela 4-pela leta. Long nau ol man i no save gut long ol i mas raitim olsem wanem, na sampela i raitim olsem Yahweh o Yawe, tasol planti man i save raitim olsem Jehova, na dispela i stret long makim God bilong yumi.
Song 110:1 long Baibel tok Pisin i tok: “Bikpela [tok Hibru, יהוה] i tokim Bikpela bilong mi olsem, ‘Yu sindaun long han sut bilong mi inap mi putim ol birua bilong yu i stap aninit long yu.’ ” Tasol narapela Baibel (New World Translation) i kolim stret nem tru bilong God na i tok: “Jehova i tokim Bikpela bilong mi olsem: ‘Yu sindaun long han sut bilong mi inap mi putim ol birua bilong yu i stap aninit long lek bilong yu.’ ” Man i bin raitim dispela tok long Song 110:1 em i kolim Krais Jisas olsem “Bikpela bilong mi.”
Jehova i bin kamapim biknem bilong em long taim bilong dispela king bilong Isip. Long rot bilong Moses, Jehova i tokim dispela bikhetman: “Nau bai mi mekim save tru long yu yet na long ol manmeri bilong yu. Na bai yupela i ken save gut olsem, . . . i no gat wanpela man o wanpela god i olsem mi. . . . Mi bin larim yupela i stap olsem bai mi ken soim bikpela strong bilong mi long yupela, na bai ol manmeri i ken tokaut long biknem bilong mi long olgeta hap.”—Kisim Bek 9:14-16.
Rahap bilong Jeriko i tingim taim ol Israel i lusim Isip na ol i daunim sampela king bilong Kenan, na em i tokim tupela man Hibru i bin kam lukstil long Kenan: “Mi save, [Jehova] i givim pinis dispela kantri long han bilong yupela Israel. . . . Mipela i guria nogut tru. Long wanem, ol i bin stori long mipela long [Jehova] i mekim solwara Retsi i drai . . . Na tu, mipela i harim pinis olsem yupela i kilim i dai Sihon na Ok, tupela king . . . Mipela i harim dispela tok na mipela i pret tru long yupela. Na nau mipela olgeta i no gat strong. God [Jehova], Bikpela bilong yupela, em i God bilong heven na graun.” (Josua 2:9-11) Biknem bilong Jehova i bin go kamap long olgeta hap.
Jehova na Ol Pasin Bilong Em
Wanpela man bilong raitim tok bilong Buk Song em i tokim Jehova olsem: “Mi laik . . . bai ol i ken save tru, yu wanpela tasol, yu [Jehova], na yu God Antap Tru, na yu save bosim olgeta hap bilong graun.” (Song 83:18) Jehova em i nambawan bikpela King bilong olgeta hap, olsem na lain bilong Jisas i bin beten long Jehova olsem: “Bikpela, yu bin wokim skai na graun na solwara na olgeta samting i stap long en.” (Aposel 4:24) Na yumi amamas tru long Jehova, long wanem, olsem Devit i toktok long em: “Yu save harim beten bilong mipela”!—Song 65:2.
Pasin sori em i nambawan pasin bilong Jehova. “Em i as bilong dispela pasin bilong laikim ol arapela.” Em i win tru long kamapim dispela pasin. (1 Jon 4:8) Na “gutpela tingting na save bilong God i winim tru save bilong ol lapun. Na em i gat bikpela strong tu.” Tasol em i no mekim wok nogut long strong bilong em. (Jop 12:13; 37:23) Na yumi save, Jehova bai mekim stretpela pasin long yumi, long wanem, “em i bosim ol manmeri long stretpela pasin.” (Song 97:2) Sapos yumi bin mekim rong tasol yumi tanim bel na lusim dispela pasin, bel bilong yumi i ken stap isi, long wanem, Jehova i tok: “Mi as bilong marimari na sori. . . . Mi save laikim tru olgeta manmeri.” (Kisim Bek 34:6) Olsem na yumi ken amamas tru long mekim wok bilong Jehova!—Song 100:1-5.
No Gat Narapela King Olsem
Pikinini bilong Jehova, em Jisas, em i tok: “God em i Spirit.” (Jon 4:24) Olsem na ai bilong ol man i no inap lukim Jehova. Em i bin tokim Moses olsem: “Yu no inap lukim pes bilong mi, long wanem, sapos wanpela man i lukim pes bilong mi bai em i dai.” (Kisim Bek 33:20) Jehova i lait tumas, na i no inap long man bilong graun i ken lukim em na i stap laip.
Maski yumi no inap lukim Jehova, i gat planti samting i stap na yumi inap lukim na bai yumi ken save Bikpela God I Gat Olgeta Strong em i stap tru. “Ol man i lukim ol samting [God] i bin wokim. Long dispela rot ol man inap save long sampela pasin bilong God . . . na ol inap save long bikpela strong bilong en.” (Rom 1:20) Yumi inap lukim graun na gras na ol diwai na pikinini bilong diwai na ol kaikai bilong gaden na ol plaua, na ol dispela samting i makim Jehova i God tru. Ol god giaman i no inap helpim yumi long wanpela samting, tasol Jehova i save givim ren na kaikai long yumi. (Aposel 14:16, 17) Long nait, lukim ol sta antap. Dispela i kamapim klia moa olsem Jehova i God tru na em i mekim stret ol wok bilong em!
Jehova i gat planti ensel holi long heven, ol i gat bikpela save na Jehova i bosim ol na stretim ol wok ol i mas mekim. Ol i wok gut wantaim long mekim wok bilong em. Baibel i tok: “Yupela olgeta ensel bilong [Jehova], yupela . . . i save bihainim tok bilong em, yupela i save putim yau gut long tok bilong en. Orait yupela i mas litimapim nem bilong [Jehova]. Yupela ol wokman bilong [Jehova] . . . i save bihainim laik bilong em.” (Song 103:20, 21) Jehova i bosim lain bilong em long graun tu. Em i bin bosim lain Israel na stretim gut ol wok ol i mas mekim, na em i bin mekim olsem long ol Kristen bilong pastaim. Na long nau tu Jehova i gat oganaisesen i stap long olgeta hap, em ol Witnes bilong em, na ol i givim bel long autim gutpela tok bilong Kingdom olsem klostu em bai kamap.—Matyu 24:14.
Jehova Em i God Tru i Gat Laip
Planti taim Jehova i bin mekim wok i kamapim klia olsem em i God tru! Em i bin mekim ol god giaman i kamap pipia god, na em i bin bringim ol Israel i kamap gut long Graun Bilong Promis. Na ol samting em i bin wokim na yumi lukim ol i kamapim klia moa yet olsem Jehova i God tru. Na em i winim tru ol god giaman bilong ol lotu giaman, em ol i no gat strong long mekim wanpela wok.
Profet Jeremaia i skelim pasin bilong Jehova wantaim pasin bilong ol god giaman. Jehova i stap laip, tasol ol god giaman nogat. Jeremaia i tok: “[Jehova], yu God tru. Yu God bilong i stap oltaim, na oltaim bai yu stap king.” (Jeremaia 10:10) Trupela God Jehova i save stap oltaim na em i bin wokim olgeta samting. Em i bin helpim ol Israel long lusim Isip, maski ol i bin stap kalabus. Em inap mekim olgeta samting.
Jehova em i “King bilong olgeta taim” na em i save harim beten olsem: “Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” (1 Timoti 1:17; Matyu 6:9, 10) Krais Jisas i kirap pinis long bosim dispela Kingdom long heven, na klostu nau em bai bagarapim ol birua bilong Jehova. (Daniel 7:13, 14) Dispela Kingdom bai kamapim nupela taim long graun na em bai mekim gut long ol man bilong harim tok.—2 Pita 3:13.
I gat planti samting moa bilong Jehova na laik bilong em na yumi mas kisim save long en. Gutpela sapos yu givim bel long kisim dispela save na bai yu ken bihainim. Sapos yu mekim olsem, bai yu inap i stap oltaim long paradais long graun, na Kingdom bai bosim, na bai i no gat krai o pen o dai moa, na olgeta man bai save long Jehova. (Aisaia 11:9; KTH 21:1-4) Yu ken i stap long dispela taim sapos nau yu bihainim tok bilong Baibel na yu inap bekim dispela askim olsem “[Jehova] em i husat?”
[Piksa Kredit Lain long pes 7]
Pictorial Archive (Near Eastern History) Est.