Tok Bilong God i Gat Laip
God i Laik Bai Ol Man i Save Long Nem Bilong Em
OLSEM wanem? Yu save God i gat nem? Long dispela piksa Jisas i beten wantaim ol disaipel bilong em, na em i tokim God: “Mi bin kamapim nem bilong yu long ol. Na bai mi kamapim moa.” (Jon 17:26) Olsem na yumi no ken kirap nogut long dispela tok bilong God i gat nem. Olgeta man i gat nem, na Pikinini bilong God, em Jisas, em tu i gat nem.—Luk 1:30-32.
Ol man i save laik bai yumi kolim nem bilong ol, a? Em pasin bilong yumi man. Na God tu i laik bai ol man i save long nem bilong em na ol i ken kolim dispela nem. Olsem na man bilong raitim hap tok bilong Sam long Baibel em i tok: “Orait bai ol i ken save tru, yu wanpela tasol, nem bilong yu Jehova, yu God Antap Tru, na yu save bosim olgeta graun.” (Sam 83:18, NW; lukim tu Jenesis 14:22.) Bipo yet God i givim sampela tok long Moses na bai em i ken save, nem bilong God em i bikpela samting tru.
Wanpela taim Moses i mekim wok bilong em long was long ol sipsip long hap bilong Midian, na em i lukim wanpela samting na em i kirap nogut long en. Em i lukim paia i kirap namel long wanpela liklik diwai, tasol paia i no kukim diwai! Orait Moses i laik lukim gut na em i kam sanap klostu long en, olsem yu lukim long dispela piksa. Em i lukluk i stap na em i harim wanpela nek i kamap insait long dispela liklik diwai i paia, na dispela nek i singaut long Moses, em i tok: “Moses. Moses.”
Em God yet i toktok long Moses. Em i laik salim Moses i go long Fero, em King bilong Isip, na Moses i mas kisim bek lain bilong God long han bilong ol Isip na helpim ol long lusim Isip. Tasol Moses i tokim God olsem: “Taim mi go kamap long ol Isrel bai mi tokim ol olsem, ‘God bilong ol tumbuna bilong yumi i salim mi na mi kam long yupela.’ Na sapos ol i askim mi, ‘Nem bilong em husat?’ orait bai mi bekim wanem tok long ol?” Orait God i tokim Moses long givim tok long ol olsem: “Jehova, em God bilong ol tumbuna bilong yupela … i bin salim mi na mi kam long yupela.”—Eksodas 3:1-15, NW.
Tasol taim Moses i go long Isip bilong toktok wantaim Fero, ol Isip i ting Jehova em i wanpela liklik god nating bilong lain bilong Isrel. Ol i no ting olsem em i God bilong olgeta hap graun. (Eksodas 5:2) Olsem na Jehova i tokim Moses long givim tok long Fero olsem: Jehova bai kamapim ‘nem bilong em long olgeta hap bilong graun.’ (Eksodas 9:16) Long dispela taim bipo, Jehova i mekim wanem na olgeta man bilong graun i save long nem bilong em?
Moses i kisim ol Isrel na ol i lusim Isip, tasol ol Isip i ranim ol. Taim ol i kamap long Solwara Retsi, i olsem rot bilong ol i pas na ol i no gat rot moa bilong ranawe long ol Isip. Tasol Jehova i tokim Moses long holim stik na litimapim han bilong em antap long solwara, na solwara i bruk tupela hap. Em nau, ol Isrel i brukim solwara na wokabaut i go kamap long hapsait. Orait nau Moses i litimapim stik bilong em gen olsem yu lukim long dispela piksa, na wara i kam bek na i karamapim ol Isip, na olgeta wantaim i bagarap. Orait, stori bilong dispela bikpela samting i go i go na ol manmeri bilong olgeta hap ol i harim na ol i save long nem bilong God.—Eksodas 14:21-31; Josua 2:9-11.
Orait, olsem wanem long nau? God i laik yet bai ol manmeri bilong olgeta hap ol i ken save long nem bilong em? Em i laikim olsem. Na em i bikpela samting tru long ol man bilong nau ol i mas kisim save long Jehova na mekim wok bilong em. Sapos ol i no laik save long Jehova, samting bai painim ol olsem i bin painim ol dispela Isip ol i bin sakim Jehova—bai ol i kisim bagarap “long taim Bikpela Jisas … i kamap ples klia … Long dispela taim bai em i bekim pe nogut long ol man i no save long God.”—2 Tesalonaika 1:7-9.