Olsem Wanem Krais Jisas Em i Wankain Profet Olsem Moses?
GOD JEHOVA em i no save mekim tok giaman. (Taitus 1:2; Hibru 6:18) Olsem na ol tok profet i stap long Baibel ol bai kamap tru.
God i bin givim tingting long wanpela profet Hibru, nem bilong em Moses, na em i bin raitim wanpela bilong ol dispela tok profet i stori long dispela man God i bin makim bilong kisim bek ol manmeri. Moses i kolim tok bilong Jehova, na em i tok: “Bai mi makim wanpela man namel long ol manmeri yet [lain Israel], na bai em i kamap profet olsem yu [Moses]. Na bai mi givim tok bilong mi long em, na taim mi tokim em long autim wanpela tok long ol manmeri, orait bai em i autim.”—Lo 18:17, 18.
Aposel Pita i kamapim klia olsem dispela tok profet i makim Krais Jisas. Pita i tok: “Bipo Moses i bin tok olsem, ‘God, Bikpela bilong yupela, em bai i makim wanpela brata bilong yupela, na mekim em i kamap profet olsem mi yet. Na yupela i mas bihainim olgeta tok em bai i mekim long yupela.’ ” (Aposel 3:22) Na Jisas yet i tok: “Sapos yupela i bilipim tok bilong Moses, orait bai yupela i bilipim tok bilong mi tu, long wanem, ol tok em i bin raitim i tokaut long mi.” (Jon 5:46) Olsem wanem Jisas em i wankain olsem Moses?
Taim Ol i Yangpela Ol i Wankain
Bipo, long taim bilong Moses na long taim bilong Jisas tu, ol bikman i putim lo i tok ol i mas kilim i dai olgeta liklik pikinini man, tasol Moses na Jisas i bin abrusim dispela bagarap. King bilong Isip i tok long kilim i dai olgeta liklik pikinini man bilong lain Israel, tasol mama bilong Moses i bin putim em long wanpela basket na haitim em insait long pitpit long arere bilong Wara Nail, olsem na Moses i bin abrusim dispela bagarap. Taim Jisas i stap liklik yet, King Herot i putim lo long kilim i dai olgeta liklik pikinini man i no winim yet tupela krismas, em ol i stap long Betlehem na ol distrik long dispela hap, tasol Jisas i bin abrusim dispela bagarap. King Herot na king bilong Isip, tupela i birua bilong God na lain bilong God.—Kisim Bek 1:22–2:10; Matyu 2:13-18.
Moses tupela Jisas i man bilong daunim bel na mekim pasin isi long ol man. Moses i go bikpela long haus bilong bikpela king bilong Isip, olsem pikinini bilong king, tasol Baibel i tok “em i man bilong daunim em yet, na i no gat wanpela man long dispela graun i save daunim em yet inap olsem Moses.” (Namba 12:3) Na Jisas i bin mekim wok olsem namba wan ensel Maikel long heven, tasol em i daunim em yet na i kam daun long graun. (Daniel 10:13; Filipai 2:5-8) Na tu, Jisas i pilim hevi bilong ol manmeri, olsem na em i tok: “Yupela kisim save long mi na aninit long tok bilong mi, . . . long wanem, mi save mekim pasin isi long ol man na mi save daunim mi yet. Na bai ol samting i no ken givim hevi long yupela na bai yupela i kisim malolo.”—Matyu 11:29; 14:14.
Moses na Jisas i tingim wok bilong Jehova, olsem na tupela i lusim bikpela namba na ol gutpela gutpela samting ol i holim. Moses i tingting long mekim wok bilong Jehova na helpim lain bilong Em, olsem na em i no tingim bikpela mani na biknem em inap kisim long Isip. (Hibru 11:24-26) Na Jisas tu i lusim bikpela namba na ol gutpela samting em i holim long heven bambai em inap mekim wok bilong God na helpim lain bilong Em long graun.—2 Korin 8:9.
God i bin makim Moses na Jisas long mekim wok bilong em. God i bin makim Moses bilong mekim wok olsem profet long lain Israel. Aposel Pol i tok: Moses “i ting, sapos em i kisim sem long nem bilong Krais, dispela bai i winim tru olgeta mani na bilas samting bilong Isip. Em i ting long dispela gutpela pe God i laik givim em, na em i sanap strong.” (Hibru 11:26; Kisim Bek 3:1–4:17) Wanem taim Jisas i kamap Krais, o Man God i makim? Dispela samting i kamap taim em i kisim baptais na God i makim em long spirit holi. Taim Jisas i toktok wantaim meri bilong Samaria klostu long hul wara bilong Jekop long Sikar, na taim em kot long ai bilong hetpris bilong Israel, Jisas i tokaut long em i dispela Man God i makim bilong kisim bek ol manmeri bilong em.—Mak 14:61, 62; Jon 4:25, 26.
Inap 40 de, Moses tupela Jisas i bin tambu long kaikai. Taim Moses i kirap mekim wok olsem maus bilong God, Moses i go i stap long Maunten Sainai, na inap 40 de em i no kaikai wanpela samting. (Kisim Bek 34:28) Jisas i bin i stap long ples nating, na inap 40 de em i no bin kisim sampela kaikai, na bihain long dispela Satan i bin traim em. Dispela samting i kamap long Jisas taim em i kirap long mekim wok bilong em olsem Man God i bin makim.—Matyu 4:1-11.
Tupela Wantaim i Litimapim Nem Bilong God
Jehova i mekim wok long Moses na Jisas bilong litimapim nem holi bilong em. God i tokim Moses long i go long ol Israel na kolim nem bilong Jehova, em God bilong ol tumbuna bilong ol. (Kisim Bek 3:13-16) Moses i stap olsem maus bilong God long ai bilong king bilong Isip. Jehova i bin larim king bilong Isip, bambai olgeta man i ken save long bikpela strong bilong Jehova na bai olgeta man long olgeta hap bilong graun i ken tokaut long biknem bilong Em. (Kisim Bek 9:16) Jisas tu i mekim wok long nem bilong Jehova. Jisas i tok: “Mi bin i kam long nem bilong Papa bilong mi, na yupela i no kisim tok bilong mi.” (Jon 5:43) Jisas i litimapim nem bilong Papa bilong em, na em i autim nem bilong Jehova long ol manmeri Jehova i bin givim long em long graun, na olgeta man long graun i save long dispela nem.—Jon 17:4, 6, 26.
God i strongim Moses na Jisas, na tupela wantaim i mekim ol strongpela wok i litimapim nem bilong God. Moses i mekim ol strongpela wok bilong kamapim long ples klia olsem God Jehova i bin makim em long mekim wok bilong Em. (Kisim Bek 4:1-31) Moses i bin mekim planti strongpela wok bilong litimapim nem bilong Jehova. Long strong bilong Jehova, Moses i bin brukim Solwara Retsi i go long tupela hap. (Kisim Bek 5:1–12:36; 14:21-31; 16:11-18; 17:5-7; Buk Song 78:12-54) Na Jisas tu i mekim ol strongpela wok i litimapim nem bilong God, olsem na em inap tok: “Yupela i mas bilip long dispela tok. Mi stap long Papa, na Papa i stap long mi. Sapos nogat, orait yupela i mas tingim olgeta wok mi save mekim, na dispela bai i kirapim bilip bilong yupela.” (Jon 14:11) Wanpela strongpela wok Jisas i bin mekim, em olsem: Em i bin mekim na bikpela win i dai, na Raunwara Galili i stap isi.—Mak 4:35-41; Luk 7:18-23.
Sampela Bikpela Samting Moa Em Tupela i Wankain Long En
Moses na Jisas i bin insait long wanpela strongpela wok olsem mirakel bilong givim kaikai long bikpela lain manmeri. Taim Moses em i mekim wok olsem profet bilong Jehova, Jehova i mekim wanpela strongpela wok na givim kaikai long lain Israel. (Kisim Bek 16:11-36) Na Baibel i stori long tupela taim em Jisas i bin mekim wanpela strongpela wok na givim kaikai long bikpela lain manmeri.—Matyu 14:14-21; 15:32-38.
Mana bilong heven em i samting bilong wok bilong Moses na wok bilong Jisas. Taim Moses i go pas long lain Israel, ol i kisim mana i kam long heven. (Kisim Bek 16:11-27; Namba 11:4-9; Buk Song 78:25) Na Jisas i bin givim laip bilong em yet olsem mana i kam long heven bilong baim bek olgeta manmeri i harim tok.—Jon 6:48-51.
Moses na Jisas i bin helpim sampela lain long lusim kalabus na i stap fri. God i mekim wok long Moses bilong helpim lain Israel long lusim kalabus long Isip na i stap fri olsem lain bilong Em. (Kisim Bek 12:37-42) Na Jisas tu i wok long helpim lain bilong em long i stap fri. Na bihain tu em bai helpim ol manmeri i bihainim tok bilong em na bai ol inap lusim dispela kalabus ol i stap long en, em ol i kalabus long oganaisesen bilong Satan, na ol bai lusim tu kalabus bilong sin na i dai.—1 Korin 15:24-26; Kolosi 1:13; 1 Jon 5:19.
Moses na Jisas, tupela wantaim i namelman bilong kontrak. Moses em i namelman bilong kontrak bilong Lo, namel long God Jehova na lain Israel. (Kisim Bek 19:3-9) Na Jisas em i Namelman bilong nupela kontrak, namel long God na lain Israel bilong spirit.—Jeremaia 31:31-34; Luk 22:20; Hibru 8:6-13.
Moses na Jisas, tupela wantaim i gat wok long harim kot. Moses i stap olsem jas na man bilong givim lo long lain Israel bilong skin. (Kisim Bek 18:13; Malakai 4:4) Jisas tu i mekim wok Jas, na em i bin givim lo long lain “Israel tru bilong God.” (Galesia 6:16; Jon 15:10) Jisas yet i tok: “Papa i no save skelim wanpela man long kot. Olgeta wok bilong harim kot, em i givim pinis long Pikinini. Olsem na bai olgeta man i ken litimapim nem bilong Pikinini, olsem ol i save litimapim nem bilong Papa. Man i no save litimapim nem bilong Pikinini, em i no litimapim nem bilong Papa i bin salim Pikinini i kam.”—Jon 5:22, 23.
Jehova i makim Moses na Jisas long stap olsem bos bilong “haus” bilong em. Moses i mekim olgeta wok God i makim em long mekim, na em i stap gut olsem bos bilong “haus” o lain bilong God long taim bilong ol Israel. (Namba 12:7) Jehova i makim Jisas bilong i stap het o bos bilong “ol lain manmeri i stap olsem haus” bilong em, na Jisas i stap gut long dispela wok. “God i bin givim dispela wok long em, na em i bihainim tru tok bilong God, long wankain pasin olsem bipo Moses i bin mekim namel long ol lain manmeri i stap olsem haus bilong God. Tasol yumi save, biknem bilong man i wokim haus em i winim tru biknem bilong haus yet. Olsem na God i givim Jisas biknem i winim tru biknem bilong Moses. . . . Moses em i stap olsem wokman bilong God, na em i bihainim tru tok bilong God na mekim wok long haus bilong God. Em i gat wok bilong tokaut long ol samting bihain God bai i autim tok long en. Tasol Krais em i Pikinini Bilong God, na em i gat wok bilong bosim ol manmeri i stap olsem haus bilong God. Na em i bihainim tru tok bilong God na i mekim dispela wok. Na sapos oltaim yumi bilip strong na yumi amamas na wetim Bikpela i mekim gut long yumi, orait yumi tu i stap olsem haus bilong God.”—Hibru 3:2-6.
Dai bilong Moses na Jisas tu i wankain. Olsem wanem i wankain? Jehova i kisim bodi bilong Moses, na bai ol man i no inap kisim bodi bilong em na mekim ol dotipela pasin long en o lotuim em olsem god bilong ol. (Lo 34:5, 6; Jut 9) Na God i kisim bodi bilong Jisas tu, na bodi bilong em i no bagarap, nogut ol man i lukim na dispela bai bagarapim bilip bilong ol.—Buk Song 16:10; Aposel 2:29-31; 1 Korin 15:50.
Bilip Strong Moa Long Ol Tok Profet
Yumi stori pinis long sampela samting na yumi save Krais Jisas em i wankain profet olsem Moses. Tok God i bin mekim long Moses long wanpela profet bai kamap bihain long em, dispela tok profet i kamap tru!
Yumi save tru olsem Jehova i truim tok profet bilong em long kamapim wanpela profet wankain olsem Moses. Olgeta samting Krais Jisas i bin mekim taim em i stap olsem man long graun i truim tok bilong Lo 18:18. Yumi lukim truim bilong dispela tok profet, na dispela i helpim yumi na yumi inap save, ol narapela tok profet i stap long Baibel bai kamap tru. Olsem na oltaim yumi mas bilip strong moa long ol tok profet bilong Baibel.