Amamas Long Man i Winim Moses
“God, Bikpela bilong yupela, em bai i makim wanpela brata bilong yupela, na mekim em i kamap profet olsem mi yet. Na yupela i mas bihainim olgeta tok em bai i mekim.”—AP. 3:22.
1. Jisas Krais i bin mekim wanem long i stap bilong ol lain man?
INAP 2,000 yia i go pinis, wanpela pikinini man i kamap na dispela i kirapim planti ensel long heven long litimapim nem bilong God, na sampela wasman bilong ol sipsip i bin harim dispela tok. (Lu. 2:8-14) Inap 30 yia bihain, dispela pikinini, nau em i bikpela man pinis, em i kirap mekim wanpela wok na em i mekim inap tri na hap yia tasol, tasol dispela wok i senisim i stap bilong ol lain man. Wanpela saveman i bin stap long yia 1880 samting, em Philip Schaff, em i stori long dispela yangpela man olsem: “Maski em yet i no bin raitim wanpela tok, tasol ol tok bilong em na ol samting em i mekim i bin kirapim planti man long raitim ol buk, ol lotu singsing, ol tok ol man i autim long ol haus lotu, na droim ol piksa. Dispela i kamapim klia olsem em i bin mekim bikpela samting tru long sindaun bilong ol lain man kirap long bipo yet na i kam inap long nau.” Dispela narakain yangpela man, em Jisas Krais.
2. Aposel Jon i tok wanem long Jisas na long wok bilong Em?
2 Aposel Jon i bin raitim stori bilong wok bilong Jisas na long pinis bilong buk bilong em, em i tok: “I gat planti arapela samting tu Jisas i bin mekim. Tasol sapos ol i laik raitim ol buk i gat tok long olgeta dispela samting wan wan, ating graun bilong yumi bai i no gat ples inap long yumi ken putim ol dispela buk.” (Jo. 21:25) Jon i save olsem em inap raitim sampela stori tasol long ol tok na wok Jisas i bin mekim insait long dispela tri na hap yia we planti samting i bin kamap. Tasol ol stori Jon i bin raitim long Gutnius bilong em ol inap helpim tru yumi.
3. Olsem wanem yumi ken kliagut moa long wok bilong Jisas insait long ol samting God i tingting pinis long mekim?
3 Ol fopela Gutnius na sampela narapela hap bilong Baibel i kamapim ol stori long laip na wok bilong Jisas i strongim bilip bilong yumi. Olsem, ol stori bilong Baibel long sampela bilipman husat i bin stap paslain long Jisas i helpim yumi long kliagut moa long wok bilong Jisas insait long ol samting God i tingting pinis long mekim. Yumi ken skelim sampela stori olsem.
Sampela Bilipman i Olsem Piksa Bilong Krais
4, 5. Husat i olsem piksa na i makim Jisas? Long wanem ol rot ol i makim Jisas?
4 Jon na ol arapela man i raitim ol Gutnius, ol i tok Moses, Devit, na Solomon i olsem piksa na i makim Jisas olsem Man God i Makim na Man Bilong Kamap King. Olsem wanem ol dispela wokboi bilong God long bipo i kamapim klia ol samting Jisas bai mekim? Yumi inap kisim wanem skul long ol dispela stori?
5 Baibel i tok Moses em i wanpela profet, namelman, na man bilong kisim bek ol man. Jisas tu i mekim ol dispela wok. Devit em i wanpela wasman bilong ol sipsip na king i daunim ol birua bilong lain Israel. Jisas tu i wanpela wasman bilong ol sipsip na king i daunim ol birua. (Ese. 37:24, 25) Taim Solomon i stap gut yet long God, em i wanpela king i gat savetingting, na taim em i bosim lain Israel ol i stap bel isi. (1 Kin. 4:25, 29) Jisas tu i gat bikpela savetingting tru na Baibel i kolim em olsem “King bilong kamapim gutpela sindaun na bel isi.” (Ais. 9:6) Tru tumas, wok bilong Krais Jisas i wankain olsem wok bilong ol dispela man bilong bipo, tasol wok bilong Jisas insait long ol samting God i tingting pinis long mekim i nambawan tru. Orait pastaim yumi ken skelim Jisas wantaim Moses na lukim olsem wanem dispela i helpim yumi long amamas moa long wok bilong Jisas insait long ol samting God i tingting pinis long mekim.
Moses—Man i Go Pas Long Jisas
6. Pita i tok wanem bilong soim olsem em i bikpela samting long harim tok bilong Jisas?
6 Bihain liklik long Pentikos bilong yia 33 C.E., aposel Pita i kolim tok profet bilong Moses i kamap tru long Jisas Krais. Pita i sanap long ai bilong bikpela lain manmeri i mekim lotu long tempel. Ol manmeri i “kirap nogut tru” taim Pita na Jon i oraitim wanpela rabisman husat i lek nogut pinis taim mama i karim em, na olgeta i ran i kam bilong lukim dispela samting i bin kamap. Pita i tok holi spirit i kam long rot bilong Jisas i kamapim dispela narakain samting. Orait nau, em i kolim sampela tok bilong Ol Skripsa Hibru, na i tok: “Bipo Moses i bin tok olsem, ‘God, Bikpela bilong yupela, em bai i makim wanpela brata bilong yupela, na mekim em i kamap profet olsem mi yet. Na yupela i mas bihainim olgeta tok em bai i mekim long yupela.’ ”—Ap. 3:11, 22, 23; ritim Lo 18:15, 18, 19.
7. Bilong wanem ol man i harim tok Pita i autim ol i kliagut long tok em i mekim long wanpela profet i winim Moses?
7 Ating ol man i harim tok Pita i autim ol i save pinis long dispela tok bilong Moses. Ol i Juda, na ol i save tingim tru Moses. (Lo 34:10) Ol i wetim tru taim we profet i winim Moses bai kamap. Dispela profet i no wanpela mesaia tasol, olsem wanpela man God i bin makim olsem Moses, nogat, em i dispela Mesaia, “dispela man God i bin makim.”—Lu. 23:35; Hi. 11:26.
Sampela Samting Bilong Jisas na Moses i Wankain
8. Wanem sampela samting bilong laip bilong Moses na bilong Jisas i wankain?
8 Long sampela rot, laip bilong Jisas long graun i wankain olsem laip bilong Moses. Olsem, taim ol i bebi yet, hatpela bosman bilong kantri i laik kilim i dai Moses na Jisas, tasol ol i abrusim dispela. (Kis. 1:22–2:10; Mt. 2:7-14) Na tu, God i ‘singautim ol na ol i lusim Isip.’ Profet Hosea i tok: “Taim ol Israel i olsem liklik pikinini yet mi laikim ol tru, na mi singautim dispela pikinini long lusim Isip na i kam.” (Hos. 11:1) Tok bilong Hosea i makim taim we lain Israel i stap aninit long lida em God i makim, em Moses, na em i kisim ol na ol i lusim Isip. (Kis. 4:22, 23; 12:29-37) Tasol tok bilong Hosea i no makim tasol samting i bin kamap bipo, nogat, em i makim tu samting i kamap bihain. Tok bilong em i wanpela tok profet i kamap tru taim Josep na Maria i lusim Isip wantaim Jisas bihain long taim King Herot i dai.—Mt. 2:15, 19-23.
9. (a) Moses na Jisas i mekim wanem ol mirakel? (b) Stori long sampela narapela samting we Jisas na Moses i wankain. (Lukim blok “Sampela Narapela Samting Moa We Jisas i Olsem Moses,” long pes 26.)
9 Moses na Jisas i wokim ol mirakel, na long dispela rot ol i kamapim klia olsem Jehova i stap wantaim tupela. Olsem Baibel i kamapim, Moses em i namba wan man i wokim ol mirakel. (Kis. 4:1-9) Olsem, Moses i wokim ol mirakel long wara, taim em i tokim wara Nail na ol baret bilong en long tanim i kamap blut, na taim solwara Retsi i bruk long tupela hap, na long taim wara i kamap long wanpela ston long ples drai nating. (Kis. 7:19-21; 14:21; 17:5-7) Jisas tu i wokim ol mirakel long wara. Namba wan mirakel em i wokim, em i tanim wara i kamap wain long wanpela marit kaikai. (Jo. 2:1-11) Bihain, em i mekim strongpela win na biksi i dai long raunwara Galili. Na long wanpela taim, em i wokabaut antap long wara! (Mt. 8:23-27; 14:23-25) Sampela narapela samting we Moses na Man i Winim Moses, em Jisas, i wankain, i stap long blok long pes 26.
Amamas Long Wok Bilong Krais Olsem Profet
10. Trupela profet i save mekim wanem? Bilong wanem yumi ken tok Moses i wanpela trupela profet?
10 Planti man i ting, wanpela profet em i wanpela man husat i tokaut long ol samting bai kamap bihain, tasol i gat sampela narapela wok tu em profet i mas mekim. Trupela profet em i mausman bilong Jehova, em i tokaut long “ol strongpela wok bilong God.” (Ap. 2:11, 16, 17) Em inap tok profet long ol samting bai kamap bihain, kamapim klia sampela samting em Jehova i tingting pinis long mekim, o autim tok long strafe bilong God. Moses em i kain profet olsem. Em i tok profet long olgeta wan wan Tenpela Bikpela Hevi i painim Isip. Em i tokaut long kontrak bilong Lo long Sainai. Na em i skulim lain Israel long save long laik bilong God. Tasol wanpela profet i winim Moses bai kamap bihain.
11. Olsem wanem Jisas i mekim wok profet i winim wok profet bilong Moses?
11 Bihain, long taim bilong ol aposel, Sekaraia i mekim wok profet na i kamapim klia laik bilong God long pikinini man bilong em, em Jon. (Lu. 1:76) Dispela pikinini man i kamap Jon Bilong Baptais, husat i tokaut olsem profet ol man i bin wetim longtaim pinis na i winim Moses—Jisas Krais—em bai kamap. (Jo. 1:23-36) Jisas i wanpela profet na em i bin tok profet long planti samting. Olsem, em i toktok long dai bilong em yet, em i tok profet long olsem wanem em bai i dai, em bai i dai long wanem hap, na husat bai kilim em i dai. (Mt. 20:17-19) Ol man em Jisas i toktok long ol, ol i kirap nogut long harim Jisas i tok profet long bagarap bai painim Jerusalem na tempel bilong en. (Mk. 13:1, 2) Em i tok profet long ol samting bai kamap long taim bilong yumi tu.—Mt. 24:3-41.
12. (a) Jisas i mekim wanem bilong kirapim wok bilong autim tok long olgeta hap? (b) Bilong wanem yumi bihainim pasin bilong Jisas long nau?
12 Jisas i wanpela profet, na tu, em i man bilong autim tok na wanpela tisa. Em i autim gutnius bilong Kingdom Bilong God, na i no gat narapela man i gat kain strongpela bel long autim tok olsem Jisas. (Lu. 4:16-21, 43) Jisas em i nambawan gutpela tisa. Sampela husat i harim tok em i mekim, ol i tok: “Bipo i no gat wanpela man i mekim toktok olsem dispela man i mekim.” (Jo. 7:46) Jisas i givim bel long autim gutnius, na em i kirapim ol disaipel bilong em tu long givim bel long wok bilong Kingdom. Olsem na em i kirapim wok bilong autim tok na skulim ol man long olgeta hap, em dispela wok i save kamap yet. (Mt. 28:18-20; Ap. 5:42) Long 2008, inap 7 milion manmeri i bihainim Krais ol i bin lusim inap olsem 1,500,000,000 aua long autim gutnius bilong Kingdom na skulim ol man i laik kisim save long ol tok i tru bilong Baibel. Olsem wanem? Yu save insait tru long mekim dispela wok?
13. Wanem samting bai helpim yumi na bai “ai bilong yumi i op i stap”?
13 Yumi save tru olsem Jehova i truim tok profet long kamapim wanpela profet i wankain olsem Moses. Dispela save i mekim wanem long yu? Em i mekim na yu bilip strong moa long truim bilong ol tok profet long ol samting bai kamap klostu nau? Yes, taim yumi tingim tingim long bel pasin bilong Man i Winim Moses, dispela i kirapim yumi na bai “ai bilong yumi i op i stap, na tingting bilong yumi i klia” long ol samting klostu nau God bai mekim.—1 Te. 5:2, 6.
Tingim Wok Bilong Krais Olsem Namelman
14. Olsem wanem Moses i namelman bilong lain Israel na God?
14 Olsem Moses, Jisas i wanpela namelman. Jehova i yusim Moses bilong stap namelman bilong kontrak Jehova i bin mekim wantaim lain Israel. Sapos ol lain tumbuna bilong Jekop i bihainim ol lo bilong God, ol bai stap olsem lain manmeri bilong em, olsem kongrigesen bilong em. (Kis. 19:3-8) Dispela kontrak i kirap long yia 1513 B.C.E. na i kam inap long taim bilong ol aposel.
15. Olsem wanem Jisas i wanpela namelman i gutpela moa?
15 Long 33 C.E., Jehova i kamapim wanpela kontrak i gutpela moa wantaim nupela lain Israel, em “Israel tru bilong God,” na dispela lain i kamap wanpela kongrigesen bilong ol Kristen God i bin makim na i stap long olgeta hap bilong graun. (Ga. 6:16) Kontrak em Moses i namelman bilong en i gat ol lo God i bin raitim long ston, tasol kontrak em Jisas i namelman bilong en i gutpela moa. God i raitim ol lo bilong dispela kontrak long bel bilong ol man. (Ritim 1 Timoti 2:5; Hibru 8:10.) Olsem na nau “Israel tru bilong God” em lain manmeri bilong God, em “wanpela lain manmeri i save kamapim kaikai” bilong Kingdom Bilong Mesaia. (Mt. 21:43) Ol manmeri bilong dispela lain ol i insait long dispela nupela kontrak. Tasol i no ol tasol i kisim helpim long en. Dispela nambawan gutpela kontrak i mekim na bikpela lain manmeri, na planti man husat i slip long matmat, ol bai kisim ol blesing bilong i stap oltaim.
Tingim Tru Krais Olsem Man Bilong Kisim Bek Ol Man
16. (a) Long wanem ol rot Jehova i yusim Moses long kisim bek lain Israel? (b) Olsem Kisim Bek 14:13 i kamapim, husat i As bilong pasin bilong kisim bek ol man?
16 Long laspela nait paslain long ol i lusim Isip, sampela pikinini bilong lain Israel inap kisim bagarap. Klostu nau, ensel bilong God bai raun long kantri Isip na kilim i dai olgeta fesbon pikinini. Jehova i tokim Moses olsem ol fesbon pikinini bilong lain Israel bai abrusim bagarap sapos ol Israel i kisim blut bilong pikinini sipsip bilong Pasova, na penim long plang antap long dua na tupela pos bilong dua bilong haus bilong ol. (Kis. 12:1-13, 21-23) Na dispela samting i bin kamap tru. Bihain, lain Israel olgeta inap kisim bagarap. Ol i stap namel long solwara Retsi na lain ami bilong Isip wantaim ol karis bilong pait. Jehova i kisim bek gen lain bilong em long rot bilong Moses, em i wokim mirakel na brukim solwara i go tupela hap.—Kis. 14:13, 21.
17, 18. Olsem wanem Jisas i winim Moses olsem man i kisim bek ol man?
17 Wok bilong Jehova long kisim bek ol man long rot bilong Moses i bikpela samting tru, tasol taim Jehova i kisim bek ol man long rot bilong Jisas, dispela i bikpela samting moa. Jisas em i rot bilong kisim bek ol man i bihainim tok na ol i ken lusim kalabus bilong sin. (Ro. 5:12, 18) Na dispela wok bilong kisim bek ol man em “bilong oltaim oltaim.” (Hi. 9:11, 12) Mining bilong nem Jisas em “Jehova i Save Kisim Bek Ol Man.” Jisas, em Man Bilong Kisim Bek yumi, o Seivia, na em bai kisim bek yumi long ol sin yumi bin mekim long bipo, na tu, em i opim rot long yumi ken kisim gutpela laip long bihain. Taim Jisas i kisim bek ol disaipel bilong em long kalabus bilong sin, em i helpim ol long abrusim kros bilong God na ol i ken pas gut wantaim Jehova.—Mt. 1:21.
18 Wok bilong Jisas long kisim bek ol man long sin bai mekim na bihain ol man i stap fri long ol samting nogut sin i save kamapim—sik na indai. Bilong piksaim long tingting dispela samting, tingim samting i bin kamap taim Jisas i go long haus bilong wanpela man nem bilong em Jairus, na pikinini meri bilong em i gat 12-pela krismas em i dai pinis. Jisas i tokim Jairus: “Yu no ken pret. Yu mas bilip tasol, na pikinini bilong yu bai i orait.” (Lu. 8:41, 42, 49, 50) Na tru tumas, pikinini meri i kirap bek! Olsem wanem? Yu inap pilim bikpela amamas bilong papamama bilong dispela pikinini? Sapos olsem, yu inap save long bikpela amamas yumi bai kisim taim “olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.” (Jo. 5:28, 29) Em nau, Jisas em i Seivia, Man Bilong Kisim Bek yumi!—Ritim Aposel 5:31; Ta. 1:4; KTH 7:10.
19, 20. (a) Taim yumi tingim tingim long bel wok bilong Jisas olsem Man i Winim Moses, dispela i mekim wanem long yumi? (b) Bai yumi skelim wanem samting long stadi i kamap bihain long dispela?
19 Taim yumi save olsem yumi ken helpim ol man long kisim gutpela samting long wok bilong Jisas long kisim bek ol man, dispela i kirapim yumi long insait long wok bilong autim tok na skulim ol man. (Ais. 61:1-3) Na tu, taim yumi tingim tingim long bel wok bilong Man i Winim Moses, dispela i strongim yumi long bilip tru olsem em bai kisim bek ol man i bihainim em taim em i kam bilong givim strafe long ol man nogut.—Mt. 25:31-34, 41, 46; KTH 7:9, 14.
20 Yes, Jisas em i Man i Winim Moses. Em i bin mekim planti bikpela samting tru em Moses i no inap mekim. Ol tok profet bilong Jisas na ol wok em i mekim olsem namelman i mekim bikpela samting long olgeta lain man. Jisas em i Man Bilong Kisim Bek ol man, na em bai kisim bek ol bilong ol i ken stap gut inap oltaim oltaim, na i no bilong i stap liklik taim tasol. Tasol yumi ken kisim sampela save moa long Jisas long rot bilong ol bilipman bilong bipo. Stadi i kamap bihain long dispela bai skelim olsem wanem Jisas em i Man i Winim Devit na Man i Winim Solomon.
Yu Inap Stori Long Dispela?
Olsem wanem Jisas i winim Moses olsem
• profet?
• namelman?
• man i kisim bek ol man?
[Blok/Piksa long pes 26]
Sampela Narapela Samting Moa We Jisas i Olsem Moses
◻ Tupela i lusim bikpela namba bambai ol i ken mekim wok bilong Jehova na helpim lain bilong em.—2 Ko. 8:9; Fl. 2:5-8; Hi. 11:24-26.
◻ Tupela i mekim wok olsem man God i makim, olsem ‘krais.’—Mk. 14:61, 62; Jo. 4:25, 26; Hi. 11:26.
◻ Tupela i kam long nem bilong Jehova.—Kis. 3:13-16; Jo. 5:43; 17:4, 6, 26.
◻ Tupela i gat pasin daun.—Nam. 12:3; Mt. 11:28-30.
◻ Tupela i givim kaikai long bikpela lain manmeri.—Kis. 16:12; Jo. 6:48-51.
◻ Tupela i mekim wok olsem jas na man i givim lo.—Kis. 18:13; Mal. 4:4; Jo. 5:22, 23; 15:10.
◻ Tupela i kisim bikpela wok long lukautim lain bilong God.—Nam. 12:7; Hi. 3:2-6.
◻ Tupela i man bilong autim tok bilong Jehova.—Hi. 11:24-29; KTH 1:5.
◻ Taim Moses na Jisas i dai pinis, God i kisim bodi bilong ol.—Lo 34:5, 6; Lu. 24:1-3; Ap. 2:31; 1 Ko. 15:50; Ju. 9.