Lukaut Long Dispela Man Bilong Giaman!

SAPOS yu bungim wanpela man na em i mekim gut long yu na yu ting em i gutpela man na yu kisim em i go long haus bilong yu, tasol taim em i stap pinis long haus, em nau, yu save em i man nogut bilong mekim pasin hait na bagarapim ol man. Sapos samting olsem i kamap, bai yu mekim wanem?

Ating yu save o nogat, tasol i gat wanpela man nogut olsem em i stap, na em i laik bagarapim yumi olgeta. Nem bilong em Seten, na Baibel i tok, ol i bin “tromoi dispela snek i go daun” long graun wantaim ol ensel nogut bilong em. (Revelesen 12:9) Olsem na em wantaim ol dispela lain ensel bilong em ol i stap klostu tru long yumi nau long dispela taim. Na Seten i laik giamanim yumi na bai yumi ting em i laik helpim yumi long kisim sampela amamas. Olsem na yumi mas lukaut long dispela Man Bilong Giaman. Sapos yumi givim rot long em, bai em i mekim ol samting long yumi bilong bagarapim yumi, olsem aposel Pol i tok: “Seten yet i save senisim pasin bilong en na long skin tasol em i kamap olsem ensel bilong lait.”—2 Korin 11:14.

Plis nau yu ken tingim ol samting ol man i save kisim bilong painim amamas, na long ai bilong ol, dispela samting i olsem gutpela samting, tasol nogat. Em i wanpela samting nogut bilong Seten.

Sampela Kain Pilai Ol i Mekim

Long taim bilong ren olsem long Sarere samting, taim ol man i no gat wok, ol i save amamas long bung wantaim long haus bilong ol pren bilong ol na mekim sampela kain pilai. Tru planti kain pilai i no gat samting nogut long en, tasol wan wan pilai i nogut.

Wanpela pilai olsem, ol i kolim plang Wija (Ouija). Dispela pilai i bin kirap long 1890 samting. Em i wanpela hap plang na i gat ol leta, olsem rait, na ol namba na mak i stap long en, na i gat wanpela liklik hap plang i stap long en, em i bilong makim ol dispela rait na namba. Na sapos man i putim han bilong em long dispela liklik plang na em i givim wanpela askim long dispela plang, orait liklik hap plang hia bai wok long makim ol rait na namba na kamapim bekim bilong dispela askim.

Dispela plang Wija i save bekim wanem kain tok long ol dispela askim man i givim long en? Wanpela man i gat wanpela plang olsem, na em i raitim pas i go long kampani ol i bin wokim dispela plang Wija, na em i tok: “Plang Wija bilong mipela em i save giaman, na em i mekim mipela i bel hevi tru.” Na narapela man i raitim pas long kampani na i tok: “Mi gat wanpela plang Wija bilong yupela, na mi wantaim ol pren bilong mi i save mekim ol pilai long en. Long moningtaim em i save bekim gut ol askim bilong mipela, tasol long nait em i save bekim ol tok doti i gat sem.”

Wanpela meri, nem bilong em Selena, bipo em i gat wanpela plang Wija. Selena i tok, wanpela taim dispela plang i kamapim wanpela tok na i tok, em i save laikim em. Selena i askim em, “Bilong wanem yu save laikim mi?” Plang i bekim tok olsem: “Long wanem, yu wanpela meri.” Planti man ol i tok, ol plang Wija i save tok giaman na mekim ol toktok bilong pamuk na ol narapela tok doti i gat sem.

Olsem wanem na dispela plang inap bekim tok long man? Wanpela nius bilong Englan i tok: “As bilong dispela Wija em ol spirit nogut, na em i bilong ‘toktok wantaim’ ol man i dai pinis.” Planti man i bin mekim pilai long plang Wija na ol i tok, ol i bin toktok wantaim ol spirit. Wanpela meri, nem bilong em Denise, em i tok em i bin mekim wok long plang Wija, na wanpela spirit nem bilong em Bob, em i kirap long toktok wantaim Denise na tupela i save toktok wantaim. Tasol bihain Bob i tokim Denise, em i no gutpela spirit; em i wanpela spirit nogut i stap long hel. Na em i tok, Denise i wok long kamap longlong, na liklik taim bai Bob i kisim spirit bilong Denise na givim em long Seten.

Sapos ol spirit i kirapim plang Wija long toktok, yumi laik save, husat ol dispela spirit? Ol i no ol man i dai pinis, long wanem, Baibel i tok, “ol man i dai pinis ol i no save long wanpela samting.” (Eklisiastis 9:5, NW) Na yumi save, God i no salim ol dispela spirit tu, long wanem, ol i givim ol tok giaman na tok doti long ol man. Olsem na nau yumi save, em ol spirit nogut bilong Seten yet ol i mekim na plang Wija i toktok. Seten em i namba wan bilong ol dispela lain spirit nogut. “na em i papa tru bilong pasin bilong tok giaman.” (Jon 8:44) Tru tumas, dispela plang Wija na ol narapela wok bilong ol spirit nogut ol i samting nogut bilong bagarapim yumi, na yumi mas klia olgeta long en bambai pasin nogut na pasin doti bilong Seten i no ken kalap long yumi na holimpas yumi.—Diuteronomi 18:10-12.

I gat narapela pilai ol man i save laikim, ol i kolim Danjons na Dragons (Dungeons and Dragons). Taim ol i pilai, sampela i makim olsem ol i draipela animal nogut, na sampela i makim olsem ol i spirit nogut, na sampela i kamap olsem god giaman na sampela i makim pasin bilong kilman, na sampela i olsem man bilong kukim haus bilong ol man, na sampela i olsem man bilong holim na bagarapim meri, na sampela i makim olsem ol i givim pen long man. Yu ting olsem wanem long ol dispela kain pilai? Yu ting i gutpela sapos yumi kisim ol kain man olsem i kam insait long haus bilong yumi? Sampela taim ol man insait long pilai ol i mas makim pasin na wok bilong ol spirit nogut na majik. Yu ting em i gutpela samting? Nogat tru. Long wanem, pasin doti na wok bilong ol spirit nogut em i “pasin bilong olpela bel,” na man i mekim dispela wok em i no ken i stap long kingdom bilong God.—Galesia 5:19-21.

Wanpela man bilong bosim dispela pilai, em John Holmes, em i putim wanpela tok long nius (Psychology Today) na em i tok, planti taim televisen na video piksa wokabaut na ol buk i save kamapim pasin bilong kros na pait na bagarapim man, na dispela pilai Danjons na Dragons tu, tasol em i no inap bagarapim tingting bilong man. Em dispela man i tok olsem. Tasol planti man i no ting olsem. Ol i ting ol dispela pait na bagarapim man em i save kamap long televisen na piksa wokabaut na buk samting, em i save bagarapim tingting bilong man. Yu yet yu ting olsem wanem? Seten em i Man Bilong Giaman na em i laik bai yumi kisim tingting wankain olsem bilong em, na dispela pilai em i wanpela rot bilong Seten long mekim olsem.

Sampela Kain Piksa Wokabaut Ol i Lukim

Wanem kain piksa ol man i laik lukim long piksa wokabaut o video samting? Planti ol i laik lukim ol piksa bilong pasin pamuk na pasin sem na pait na bagarapim man. Na sampela i laikim piksa bilong ol samting nogut i save pretim man, na piksa bilong ol tewel na ol samting nogut olsem ol spirit nogut i save mekim. Kain samting olsem em inap bagarapim tingting bilong man.—2 Kronikel 33:6.

Wanpela meri nem bilong em Roxanne, em i bin lukim wanpela piksa wokabaut, nem bilong piksa em Man Bilong Rausim Spirit Nogut. (The Exorcist). Roxanne i tok: “Dispela piksa i pretim mi tru. Mi lukim i stap na bel bilong mi i pret na mi laik traut; bel i tanim na ai bilong mi i raun. Olsem na mi kirap na mi lusim piksa na mi wokabaut i go; mi no wetim piksa i pinis. Inap tupela mun bihain mi pret nogut yet, na taim mi slip mi driman nogut. Mi wanpela mi no inap wokabaut. Mi save lukluk nabaut, nogut wanpela samting nogut i laik holim mi. Mi no wasim gras bilong mi, nogut wanpela samting i flai i kam antap long het bilong mi na bagarapim mi.” Na narapela meri tu i lukim dispela piksa i kamap long televisen na bihain em i kirap katim bel bilong liklik pikinini meri bilong em i gat 4-pela krismas, na meri i kamautim klok bilong pikinini. Em i ting spirit nogut i stap insait long pikinini.

Baibel i tok, Seten em i “god giaman bilong dispela graun” na em i “hetman bilong ol spirit nogut. Nau dispela spirit i save wok insait long bel bilong ol man i save sakim tok bilong God.” (2 Korin 4:4; Efesas 2:2) Olsem na yumi save, Seten i as bilong ol piksa i stori long ol samting bilong ol spirit nogut na pait na bagarapim man na pasin doti na pasin sem olsem i save kamap long piksa wokabaut.

Sampela Kain Musik Ol i Save Harim

Planti man i tok, ol musik bilong nau i save pairap tumas na krai bilong en i strong tru long yau bilong man. Sampela singsing i gat ol tok nogut insait long en. Wanpela man i tok, i gat 5-pela as bilong ol singsing na musik bilong nau, em i olsem: Maritpasin, drak, bagarapim man, samting bilong ol spirit nogut, pasin bikhet.

Sampela grup bilong wokim musik na singsing ol i insait long sampela pasin bilong ol spirit nogut, olsem sampela pasin yumi kolim marila na papait samting. Sampela piksa i stap long karamap bilong ol plet singsing na kaset i makim samting bilong ol spirit nogut o samting ol man i ting i stap long ples bilong ol spirit. Dispela Man Bilong Giaman, em Seten, em i as bilong ol dispela samting.

Pasin pamuk na pasin sem na marila na ol kain wok bilong ol spirit, em i samting nogut bilong bagarapim yumi. Baibel i toksave olsem: “Ol man i save . . . mekim kain kain pasin nogut tru, na ol man i kilim man i dai, na ol man i mekim pasin pamuk, na ol man i wokim posin, na ol man i lotu long god giaman, na olgeta man i mekim tok giaman, ol bai i kisim . . . namba tu dai.” (Revelesen 21:8) Ating sampela musik i gutpela na i no gat pasin doti long en, tasol ol man i gat gutpela tingting ol bai lukaut, nogut sampela musik i givim rot long ol spirit nogut i kam long yumi.

Sampela Eksasais Ol i Mekim

Long nau planti man ol i save eksasais, olsem ran o spot o subim wara samting. Ol i ting long strongim skin bilong ol na ol i mekim eksasais. Olsem wanem? I gat rong long mekim dispela eksasais? Nogat. Sapos man i no givim bel tumas long en, em i orait. Aposel Pol i tok: “Pasin bilong skulim bodi long wok em inap helpim yumi liklik.” (1 Timoti 4:8) Tasol i gat wanpela kain eksasais em inap kamapim sampela hevi long yumi, em yoga.

Yoga (em wanpela tok Sanskrit, na insait bilong en i olsem “tewel bilong man i go i stap wantaim Namba Wan Spirit”) em i olsem eksasais bilong skin na bilong tingting, na pasin bilong sindaun, na sanap, na pulim win, na tingting strong long wanpela samting. Yoga i kirap long India long bipo yet. Sampela man i gat hevi o ol i pat na i gat bikpela gris tumas, o ol i laik kamap strong long skin, ol i save mekim yoga. I gat sampela buk i stori long pasin na wok bilong yoga. Yu ting yu laik mekim ol dispela eksasais bilong yoga?

Sapos yu gat laik long en, orait pastaim yu mas tingim dispela samting: Yoga tru em i no wanpela eksasais nating tasol. Nogat. Em i wanpela samting bilong lotu Hindu. Dokta B. S. Surti i tok: “Yoga i bilong skulim man long pasin bilong mekim tewel bilong man i kamap wanbel tru wantaim Namba Wan Spirit.” Ol eksasais bilong Yoga long bipo i bilong mekim dispela samting.

Na wanpela kain pasin bilong yoga tu em bilong sindaun na tingting strong inap longpela taim liklik. Sampela man i tok, Baibel tu i tok yumi mas mekim olsem. Tasol taim Kristen i sindaun na tingting, em i no wankain olsem yoga. Kristen i save tingting long ol gutpela samting bilong helpim man na mekim gut bel bilong man. (Sam 63:6; Provep 15:28; Filipai 4:8) Tasol pasin bilong yoga long sindaun na tingting strong, em i no olsem. Wanpela buk (Encyclopedia Americana), em i toktok long sampela bilip bilong yoga na i tok, gutpela tingting bilong man em i save stap insait tru long bel bilong man, tasol ol tingting nabaut bilong skin na bilong graun em i pasim dispela gutpela tingting i stap insait, na wok bilong Yoga em i bilong daunim ol dispela tingting nabaut bilong skin bambai ol gutpela tingting bilong insait tru em i ken kamap strong; olsem na man bilong yoga em i mas mekim dai olgeta tingting na pasim tingting bilong em na bai tingting i no ken wok.

Tasol olsem wanem? I gutpela yumi mekim dai o rausim olgeta tingting bilong yumi na bai tingting i stap nating na i no wok? Wanpela man i bin traim long mekim olsem, na bihain em i tok, taim em i mekim dispela samting, em i pilim olsem wanpela samting i laik holimpas em, olsem wanpela spirit samting. Sapos ol spirit nogut i lukim tingting bilong yumi i stap nating, bai ol i pulimapim ol tingting bilong ol yet i go insait long tingting bilong yumi. (Luk 11:24-26) Olsem na lukaut! Dispela pasin bilong yoga em inap givim rot long ol spirit nogut long bagarapim yu.

Ol Pilai Bilong Video

Long olgeta yia ol man i save tromoi bikpela mani long ol pilai bilong video. Olsem wanem? Ol dispela pilai bilong video i save nogutim man? Sampela man i tok, nogat. Tasol long sampela hap, gavman i tambuim ol dispela kain pilai.

Sampela kain pilai long video em i olsem spot tasol, tasol planti ol i no olsem. Wanpela nius (Natural History) i tok: “Klostu olgeta pilai bilong video i bilong winim narapela man. Long sampela pilai, yu mas sutim kwik ol dispela birua insait long pilai na kilim ol i dai, nogut ol i sutim yu. Na yu mas kaikai ol hariap, nogut ol i kaikai yu. Na long sampela pilai i gat wanpela samting nogut i stap, na yu mas bagarapim em kwik, nogut em i bagarapim yu.” Olsem wanem na ol man i laikim ol kain pilai olsem? Wanpela man bilong raitim nius, em Jack Colhoun, em i tok: “Dispela kain pilai em i kamap insait long taim bilong yumi long nau.” Nau yumi stap long taim bilong ol man i save bagarapim man. Ol yangpela i lain pinis long dispela pasin, na ol i laikim; ol i no ting pasin bilong pait na bagarapim man em i samting nogut. Tasol Baibel i tok: “Bikpela i save skelim ol stretpela man na ol man nogut. Em i no laikim tru ol man i sakim lo bilong em.”—Sam 11:5.

Wanpela nius (Psychology Today) i toktok long ol samting nogut dispela kain pilai inap mekim long man na i tok, em inap kirapim ol man long bagarapim narapela man. Em inap long nogutim ol yangpela, olsem na John Rosemund, em man bilong raitim ol tok long nius, em i tok, ol pilai bilong video i olsem ol pipia i go long tingting bilong ol man; em inap bagarapim moa yet tingting bilong ol yangpela.

Wanpela profesa bilong Yunivesiti i stori long ol man i mekim ol pilai bilong video na em i tok, taim ol i pilai bel bilong ol i kirap na bihain gen ol i bel hevi, na sampela taim ol i kros na sampela taim ol i belhat na i laik paitim sampela man. Wanpela manki long Englan i givim bel olgeta long dispela pilai, na mama bilong em i tok, sapos em i no inap i go pilai long video, bel bilong em i kros tru olsem man bilong dring i mekim sapos em i no gat dring. Na dispela mama i tok, sapos pikinini hia i no inap i go pilai na em i mas i stap long haus, em i belhat na kros nabaut olsem wanpela animal i kalabus insait long banis.

Pasin bilong ol yangpela, ol i laik painim nabaut ol amamas, tasol ol yangpela Kristen i mas “tingting gut na wokabaut stret na bihainim pasin bilong God nau long dispela taim.” (Taitas 2:12) Olsem bai dispela Man Bilong Giaman i no inap pulim taim bilong ol na tingting bilong ol na strong bilong ol long dispela pilai bilong video.

Sampela eksasais na musik na pilai na piksa wokabaut i orait, tasol ol dispela samting em inap tu long mekim nogut long yumi. Olsem na yumi mas lukaut long ol dispela samting. Bikpela Man Bilong Giaman, em Seten, em i giaman long helpim yu long painim amamas, tasol em bai paulim yu. Yu no ken larim em i kam insait long haus bilong yu o long sindaun bilong yu. “Sakim Seten, na bai em i lusim [yu] na ranawe.”—Jems 4:7.

[Piksa long pes 28]

Sampela pilai inap bagarapim yumi

[Piksa long pes 30]

Yu ting i gutpela sapos yu mekim pasin bilong yoga long sindaun na tingting strong?