Askim
Sapos man i pilaim ol kompiuta gem i kamapim pasin pait, em inap pas gut yet wantaim Jehova?
King Devit bilong Israel bilong bipo i tok: “Jehova yet i save skelim ol stretpela man na ol man nogut. Na em i no laikim tru ol man i laikim pasin pait.” (Song 11:5, NW ) Tok Hibru ol i tanim olsem “i no laikim tru” inap makim “wanpela birua.” Olsem na man i laikim tumas pasin pait, em i mekim em yet i kamap wanpela birua bilong God. Askim yumi mas skelim i olsem: Pasin bilong pilaim sampela kompiuta gem inap kamapim pasin bilong laikim pait?
Ol kompiuta gem bilong pait i save litimapim pasin bilong yusim ol gan na naip samting. Planti taim ol i skulim man long pasin bilong mekim woa. Nius The Economist i tok: “Ami bilong Amerika i wok long mekim bikpela wok moa long ol kompiuta gem bilong skulim lain bilong ol. Sampela gem em lain ami i yusim em ol wankain gem ol man nating i save baim long stua.”
Tru, ol lain i save pilaim ol kompiuta gem nogut ol i no bagarapim ol man tru tru. Tasol dispela kain amamas i mekim wanem samting long bel bilong ol? (Matyu 5:21, 22; Luk 6:45) Bai yu ting wanem long wanpela man i kisim amamas long yusim naip o gan bilong bagarapim o kilim i dai man insait long kompiuta gem? Olsem wanem sapos man hia i tromoi planti aua long olgeta wik long pilaim dispela gem bilong pait, na i olsem ol dispela gem i kalabusim em? Ating bai yu pilim olsem em i strongim pasin bilong laikim tru pait, kain olsem man i lukluk long ol piksa bilong pasin sem i wok long kirapim ol laik nogut.—Matyu 5:27-29.
Devit i tok, Jehova “i no laikim tru” man i laikim pasin pait. Na long taim bilong Noa, Jehova i kamapim klia olsem em i no laikim tru ol dispela kain man. Jehova i tokim Noa: “Olgeta manmeri i wok long pait na bikhet tasol, olsem na mi laik bagarapim ol. Bai mi pinisim tru olgeta lain manmeri.” (Stat 6:13) Trupela God i bin bagarapim ol man long olgeta hap graun, long wanem, ol i bikhet na pait. Em i bin lukautim Noa na famili bilong em tasol—em 8-pela manmeri husat i no laikim pasin pait.—2 Pita 2:5.
Ol manmeri i laik stap pren bilong Jehova ol i save ‘paitim ol bainat bilong ol i kamap olsem ol ain bilong brukim graun, na paitim ol spia bilong ol i kamap olsem ol naip.’ Ol i no lain long laikim pait na ol i no “skul moa long pait.” (Aisaia 2:4) Bilong stap pren bilong God na no ken kamap birua bilong em, yumi mas “givim baksait long pasin nogut, na bihainim gutpela pasin tasol.” Yumi mas ‘wok strong long kamap wanbel wantaim ol manmeri na bihainim dispela pasin.’—1 Pita 3:11.
Olsem wanem sapos yumi bin insait pinis long pasin bilong pilaim ol vidio gem bilong pait? Sapos olsem, yumi mas i gat strongpela tingting long amamasim Jehova na lusim ol samting em i no laikim. Yumi mas beten long holi spirit bilong God i ken helpim yumi long stopim dispela pasin em inap bagarapim yumi long samting bilong spirit. Yumi inap stopim sapos yumi larim ol pasin i gutpela, bel isi, na pasin bilong bosim gut bel i stretim wokabaut bilong yumi na bai i stret wantaim laik bilong God.—Luk 11:13; Galesia 5:22, 23.