Olsem Wanem Pait Bai Pinis Olgeta?

BILONG daunim pasin bilong pait na em i no ken i go bikpela tru, sampela biktaun long Amerika i tingim wanpela samting ol i ken mekim​—⁠sapos ol man i bringim ol gan bilong ol i kam, ol bai givim mani o kaikai samting long ol, olsem senis bilong en, na ol i no ken askim olsem ol i bin kisim we ol dispela gan. Orait, wanem samting i kamap? Biktaun Sen Lui i tromoi $341,000 na i kisim 8,500 gan. Na Biktaun Nu Yok tu i mekim olsem na i kisim olsem wan tausen gan.

Dispela i mekim wanem long pasin bilong pait na bagarapim man? Sori tru, em i no pasim tumas. Long yia antap long dispela long hap bilong Sen Lui, pasin bilong kilim man i dai long gan i go bikpela tru, winim olgeta yia paslain long en. Ol i ting, ol man bilong Biktaun Nu Yok ol i holim yet 2 milion gan. Long Yunaitet Stets i gat olsem 200 milion gan long haus bilong ol man​—⁠klostu olsem wanpela gan long olgeta wan wan man na meri na pikinini. Long ol narapela kantri, pasin bilong bagarapim man long gan i go bikpela tru. Wanpela nius (The Economist) i tok, long Briten, “namel long 1983 na 1993, ol man i bin holim gan na sut long ol man na ol polis i bin kisim ripot bilong en, em i go bikpela tru inap 14,000.” Long Briten, pasin bilong kilim man i dai i no bikpela tumas sapos yumi skelim wantaim ol narapela kantri, tasol i gat olsem wan milion gan long dispela kantri em gavman i tambuim.

Tru, sapos ol inap daunim dispela namba bilong ol gan i stap long han bilong ol man, em i gutpela. Tasol pasin ol i mekim bilong pinisim dispela hevi, olsem yumi stori pinis long en, dispela i no pinisim as tru bilong pait na bagarapim man. Wanem as bilong en? Ol i bin kolim planti samting, tasol wan wan samting ol i kolim i kamapim as bilong en. Ol famili i no pas gut moa wantaim, na papamama i no skulim ol pikinini long stretpela pasin ol i mas bihainim, na dispela i mekim na planti yangpela ol i bung wantaim ol narapela yangpela olsem ol raskol na bai i gat sampela i save laikim ol. Planti ol i tingim bikpela mani ol inap kisim na dispela i kirapim ol long pait na bagarapim man. Na sampela i lukim olsem ol bikman i daunim lain bilong ol na ol i stap nogut na i no gat helpim, na dispela i kirapim ol long pait bilong stretim dispela hevi. Na sampela i hambak long kantri o lain bilong ol o bikpela namba o nem ol i holim, na ol i no pilim hevi bilong ol narapela em ol i stap nogut. Ol dispela pasin i pas strong long ol man, olsem na i hatwok long pinisim pasin bilong pait na bagarapim man.

Yumi Ken Mekim Wanem?

Ol gavman i bin tingim na traim kain kain samting bilong daunim pasin bilong pait na bagarapim man​—⁠olsem putim planti polis moa, na makim bikpela hap taim bilong kalabus, na lo i mas makim husat inap kisim gan, na ol man i bin kilim man i dai ol i mas kisim bikpela strafe, olsem kilim ol i dai. Sampela wok olsem i bin kamap gutpela liklik, tasol sori tru, pait na bagarapim man i stap yet. Bilong wanem i olsem? Long wanem, ol dispela samting ol i mekim i no pinisim as tru bilong dispela pasin.

Tasol planti saveman i ting, sapos ol man i kisim gutpela skul, dispela bai pinisim pasin bilong pait na bagarapim man. Tru, dispela em i gutpela tingting, tasol pait na bagarapim man i no save kamap tasol long ol kantri ol man i no gat rot long skul gut. Long nau i olsem ol kantri i gat planti pait na pasin bilong bagarapim man, em ol kantri i gat ol gutpela skul na ol yangpela i save skul gut. Olsem na yumi save, bilong stretim dispela hevi, ol i no ken skul tasol​—⁠ol i mas kisim stretpela kain skul. Em wanem kain skul? I gat wanpela man i stap na em inap skulim ol man long kamap man bilong laikim pasin bilong i stap isi na bihainim stretpela pasin?

“Mi God [Jehova], Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut. Sapos yupela i bin harim tok bilong mi, orait nau yupela inap i stap gut na oltaim laip bilong yupela bai i pulap long amamas, olsem wara i ran oltaim na i no save pinis. Na stretpela pasin bilong yupela bai i kamap strong oltaim olsem solwara i save bruk long nambis.” (Aisaia 48:​17, 18) Olsem wanem God Jehova i save skulim ol man long laikim pasin bilong i stap isi na laikim stretpela pasin? Em i save skulim ol long rot bilong Baibel, em Tok bilong em.

Tok Bilong God i Gat Strong

Baibel i no olsem wanpela buk i gat planti tok na stori nating bilong ol tumbuna em ol i no inap helpim yumi ol lain bilong nau, nogat. Baibel i gat ol lo na tingting bilong Man bilong wokim olgeta samting, em i stap antap tru na i lukluk i kam daun na em i save gut tru long pasin bilong yumi ol man. God Jehova i tok: “Skai i stap antap tru long graun, olsem tasol ol pasin bilong mi na tingting bilong mi i winim tru ol pasin bilong yupela na tingting bilong yupela.”​—⁠Aisaia 55:⁠9.

Long dispela as, aposel Pol i tokaut olsem “tok bilong God em i gat laip, na em i wok strong i stap. Em i sap moa, na i winim bainat i gat tupela sap. Dispela tok i save sutim man na i go insait tru. Em i go kamap stret long dispela hap tewel na spirit i bruk, na long ol dispela hap skru na kru bilong bun i pas wantaim. Olsem na em i save gut tru long olgeta tingting na laik bilong bel bilong yumi.” (Hibru 4:12) Tru tumas, Tok Bilong God i gat strong na em inap go insait tru long bel bilong man na senisim tingting na pasin bilong em. Em nau, ol man i mas i gat dispela samting bilong senisim pasin bilong ol long pait na bagarapim man, a?

Ol Witnes bilong Jehova, nau ol inap olsem 5 milion na ol i stap long 230 kantri samting, pasin bilong ol i kamapim klia tru olsem Tok Bilong God em i gat strong tru inap long senisim pasin bilong ol man na pasin bilong ol i kamap gutpela. Namel long ol i gat ol manmeri bilong olgeta lain, na tok ples, na skin. Na sampela ol i skul gut na i holim bikpela wok na sampela nogat, na ol i gat kain kain sindaun. Sampela, pastaim ol i man bilong pait na ol i no sindaun gut wantaim ol narapela man. Tasol nau ol i no larim dispela samting i kamapim pasin namel long ol olsem bel nogut na birua long man, o resis long winim narapela man, o daunim ol narapela lain, nogat; ol i lain pinis long daunim ol dispela pasin, na long olgeta hap bilong graun ol i kamap man bilong i stap isi na ol i stap wanbel. Wanem samting i mekim na ol inap i stap olsem?

Wanpela Wok i Pinisim Pait

Ol Witnes Bilong Jehova i gat wok long helpim ol narapela man long kisim stretpela save long laik bilong God olsem i stap long Baibel. Long olgeta hap bilong graun ol i wok long painim ol man i laik kisim save long ol pasin Jehova i laikim na ol i laik bai em i skulim ol. Na wok bilong ol i karim gutpela kaikai. Dispela wok bilong skulim ol man i truim wanpela gutpela tok profet bilong Baibel.

Inap olsem 2,700 yia bipo, Aisaia i tok profet olsem: “Wanpela taim bai i kamap bihain na . . . ol lain manmeri bilong olgeta hap bai i tok olsem, ‘Kam, yumi go long maunten . . . bilong Bikpela [Jehova]. Yumi go long haus bilong God bilong Israel, bilong em i ken skulim yumi long ol pasin em i laik yumi mekim, na bai yumi ken wokabaut long rot em yet i makim.’ ”​—⁠Aisaia 2:​2, 3.

Taim Jehova i skulim ol man na ol i wokabaut long rot em i makim, dispela inap kirapim ol long senisim tru pasin na wokabaut bilong ol. Dispela tok profet bilong Aisaia i kolim wanpela pasin ol i senisim, olsem: “Bai ol i paitim ol bainat bilong ol i kamap olsem ol ain bilong brukim graun, na bai ol i paitim ol spia bilong ol i kamap olsem ol naip. Na olgeta lain manmeri bai i no ken pait moa, na bai ol i no skul moa long pait.” (Aisaia 2:⁠4) Planti man ol i bin kaunim dispela tok bilong Baibel. Na dispela tok i stap long wanpela banis long ples bilong Yunaitet Nesen long Biktaun Nu Yok. Em i kirapim yumi long tingim samting Yunaitet Nesen i laik mekim tasol ol i no bin mekim. Dispela wok bilong pinisim pait na bagarapim man em i no wanpela wok bai kamap long rot bilong wanpela lain politik bilong dispela graun. Em wanpela wok God Jehova tasol inap mekim. Em bai mekim olsem wanem?

Yumi save pinis, i no olgeta man bai bihainim dispela singaut long ‘go long maunten bilong Jehova’ na bai ‘em i ken skulim ol long ol pasin em i laik ol i mekim,’ na bai ol i “ken wokabaut long rot em yet i makim”; na i no olgeta man ol i laik “paitim ol bainat bilong ol i kamap olsem ol ain bilong brukim graun, na . . . paitim ol spia bilong ol i kamap olsem ol naip.” Orait, Jehova bai mekim wanem long ol kain man olsem? Em i no ken larim dua i op oltaim long ol o wetim ol i senisim pasin bilong ol, nogat. Bilong pinisim pait, Jehova bai pinisim ol man i strong long bihainim pasin bilong ol long pait.

Samting Yumi Mas Tingim

Samting Jehova i bin mekim long taim bilong Noa, dispela i mas givim tingting long yumi ol lain bilong nau. Dispela stori long Baibel i kamapim klia pasin bilong ol manmeri bilong dispela taim bipo. Baibel i tok: “God i lukim pasin bilong ol arapela manmeri i nogut tru. Long olgeta hap bilong graun ol i wok long pait na bikhet tasol.” Olsem na God i tokim Noa: “Olgeta manmeri i wok long pait na bikhet tasol, olsem na mi laik bagarapim ol. Bai mi pinisim tru olgeta lain manmeri.”​—⁠Stat 6:​11, 13.

I gat wanpela bikpela samting bilong dispela stori yumi mas tingim. Taim God i salim Bikpela Tait i kam na bagarapim ol manmeri bilong dispela taim bipo, em i lukautim Noa wantaim lain bilong em. Bilong wanem God i mekim olsem? Baibel i bekim dispela askim olsem: “Noa em i gutpela man, na wokabaut bilong en i stret long ai bilong God. Em i pren tru bilong God.” (Stat 6:9; 7:⁠1) Tru, ating i no olgeta man bilong dispela taim bipo ol i man bilong pait, tasol wokabaut bilong Noa wantaim lain bilong em “i stret long ai bilong God.” Olsem na ol i abrusim bagarap taim God i pinisim ol lain bilong graun ol i save pait na bikhet.

Orait, nau yumi lukim ol man bilong graun “i wok long pait na bikhet tasol,” na yumi save, God i lukim pinis dispela pasin bilong ol. Olsem em i bin mekim long taim bilong Noa, klostu nau em bai kirap na pinisim pasin bilong pait na bagarapim man​—⁠em bai pinisim olgeta na i no ken kamap moa. Tasol ol man nau ol i lain long ‘wokabaut stret long ai bilong God,’ em ol man i lain long i stap isi olsem God i skulim yumi long en, em bai wokim rot bilong ol long abrusim bagarap.

Long rot bilong man bilong raitim Song, Jehova i tokim yumi: “I no longtaim na bai ol man nogut i lus olgeta. Bai yu wok long painim ol long ples bilong ol, tasol yu no inap lukim ol. Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.”​—⁠Song 37:​10, 11.

Ol Witnes Bilong Jehova bai amamas long stadi wantaim yu long Baibel bambai yu tu yu ken tokaut olsem: “Kam, yumi go long maunten . . . bilong Bikpela [Jehova]. Yumi go long haus bilong God bilong Israel, bilong em i ken skulim yumi long ol pasin em i laik yumi mekim, na bai yumi ken wokabaut long rot em yet i makim.” (Aisaia 2:⁠3) Sapos yu mekim olsem, bai yu inap insait long dispela lain ol bai lukim olgeta pasin nogut na pasin bilong pait i pinis long graun. Bai yu inap “sindaun gutpela tumas na amamas i stap.”

[Piksa Kredit Lain long pes 5]

Reuters/Bettmann