Baibel i Tok Wanem?

God i Ting Olsem Wanem Long Pait na Bagarapim Man?

PASIN bilong pait na bagarapim man i go bikpela long olgeta hap na i kamap ples klia long kain kain rot. Dispela pasin i no kamap long ol pait tasol, nogat, em i kamap tu namel long ol man bilong pilai spot, kisim drak, long skul, long wok, na insait long ol amamas. Na tu, dispela pasin i kamap bikpela insait long planti famili. Olsem: Wanpela lain bilong skelim ol samting i tok, long Kanada inap 1.2 milion man na meri i save kisim bagarap long poroman marit i paitim ol nogut tru​—⁠wanpela taim insait long 5-pela yia i go pinis. Narapela ripot i tok, 50 pesen bilong ol man i save paitim ol meri bilong ol, ol i save paitim tu ol pikinini na mekim nogut long ol.

Tru, yu kirap nogut long kain pasin nogut tru olsem, na planti ol narapela man tu i kirap nogut long en. Tasol dispela pasin i stap olsem wanpela bikpela samting bilong planti amamas bilong nau. Ol man i no kisim save long dispela pasin long televisen tasol​—⁠em ol man i save giaman long pait na bagarapim narapela, nogat; ol i save lukim samting tru tru i kamap taim man i belhat nogut tru na paitim narapela. Planti kantri i save laikim pilai boksen na ol narapela spot i gat pait insait long en. Tasol God i ting olsem wanem long dispela pasin?

Stori Bilong Pait na Bagarapim Man

Stori bilong pait na bagarapim man i kirap long bipo yet. Stori bilong namba wan pasin bilong pait i stap long Stat 4:​2-​15. Kein, namba wan pikinini man bilong Adam na Iv, em i jeles long brata bilong em Abel na kilim em i dai. God i kirap mekim wanem? Baibel i tok, God Jehova i givim bikpela strafe long Kein, long wanem, em i kilim i dai brata bilong em.

Long Stat 6:​11, yumi ritim stori olsem, winim 1,500 yia bihain long dispela, pasin bilong “pait na bikhet” i go bikpela tru long graun. Orait nau, God i mekim wanem? God i tokim stretpela man Noa long wokim wanpela sip bilong lukautim em na famili bilong em na ol i no ken bagarap taim Jehova i mekim tait wara i kamap long graun na “bagarapim” ol lain manmeri i wok long mekim ol pasin nogut. (Stat 6:​12-​14, 17) Tasol wanem samting i kirapim planti man moa long strong long pait na bagarapim man?

Ol Spirit Nogut i Stiaim Ol

Buk Stat i stori long ol pikinini bilong God, em ol ensel i bikhet long em, ol i bin tanim i kamap man, maritim ol meri, na kamapim ol pikinini. (Stat 6:​1-4) Baibel i kolim ol dispela pikinini olsem Nefilim, ol i traipela strongpela man na ol i gat biknem. Ol papa bilong ol, em ol ensel nogut, i stiaim ol long pait na mekim nogut long ol man. Taim Bikpela Tait i karamapim graun, ol dispela man nogut i bagarap. Tasol ol ensel nogut i tanim i kamap spirit na go bek long ples spirit.

Baibel i tok klia olsem, kirap long dispela taim inap long nau ol dispela bikhet ensel i wok strong long stiaim ol man. (Efesus 6:​12) Hetman bilong ol, Satan, Baibel i kolim em olsem man bilong bipo yet em “man bilong kilim ol man i dai.” (Jon 8:​44) Olsem na pasin bilong bagarapim man i stap long graun, yumi ken tok em i pasin bilong ol spirit nogut, o pasin bilong Satan.

Baibel i givim tok lukaut long dispela strongpela laik bilong kirapim man long pait. Long Sindaun 16:​29, Baibel i tok: “Man bilong pait i save grisim wantok bilong en, na bringim em i go long rot nogut.” Dispela strongpela laik i bin giamanim planti man long nau na ol i orait long pait na bagarapim man na ol i mekim dispela pasin. Na tu, dispela i bin pulim planti milion man long laikim ol amamas i save givim biknem long pait. Tok bilong Song 73:6 i makim stret ol man bilong nau. Em i tok: “Ol i hambak nating na amamas long skin bilong ol. Na ol i save paitim nating ol arapela man na bagarapim ol.”

God i Nolaik Tru Long Pait

Ol Kristen i mas bihainim wanem kain pasin long dispela graun i gat pait na bagarapim man long en? Stori bilong Baibel long tupela pikinini man bilong Jekop, Simeon na Levi, inap givim gutpela tok bilong stiaim yumi. Susa bilong ol Daina, em i save poromanim ol manmeri bilong Sekem i save mekim pasin nogut. Dispela i mekim na wanpela man Sekem i pulim Daina long mekim pasin pamuk wantaim em. Bilong bekim nogut long ol, Simeon na Levi i belhat nogut tru na kilim i dai olgeta man bilong lain Sekem. Bihain, God i givim tingting long Jekop na em i demim dispela pasin bilong tupela pikinini bilong em long ol i no bosim belhat bilong ol, em i tok: “Simeon na Livai, tupela i brata. Tupela i save kisim ol samting bilong pait na mekim nogut long ol arapela. Mi no ken wanbel long tingting bilong tupela, na mi no ken orait long ol samting tupela i pasim tok long mekim.”​—⁠Stat 49:​5, 6.

Bilong mekim samting i stret wantaim dispela tok, ol Kristen i save abrusim pasin bilong bung wantaim ol man i save strongim pasin bilong pait, o ol i save mekim. Yumi save, God i no laikim tru ol man i save strongim dispela pasin. Baibel i tok: “Jehova yet i save skelim ol stretpela man na ol man nogut. Na em i no laikim tru ol man i laikim pasin pait.” (Song 11:​5, NW ) Baibel i tok strong long ol Kristen i mas abrusim olgeta pasin bilong belhat ol i no inap bosim, na tu, pasin bilong toknogutim man bilong bagarapim em.​—⁠Galesia 5:​19-​21; Efesus 4:​31.

Pait na Bagarapim Man Bai Pinis?

Profet Habakuk bilong bipo i askim God Jehova: “Wanem taim bai yu harim singaut bilong mi na yu helpim mipela, na ol dispela samting nogut i kamap long mipela i no ken bagarapim mipela?” (Habakuk 1:⁠2) Ating yu tu i gat wankain askim olsem. God i bekim askim bilong Habakuk na em i tok promis long rausim “ol man nogut.” (Habakuk 3:13) Tok profet i stap long Buk Aisaia i helpim yumi long wetim ol gutpela samting bai kamap bihain. God i tok promis olsem: “Long olgeta hap bilong graun yu bosim bai i no gat nois moa bilong ol man i pait nabaut na brukim na bagarapim ol samting.”​—⁠Aisaia 60:⁠18.

Ol Witnes Bilong Jehova i bilip olsem klostu nau God bai rausim olgeta kain pasin bilong pait na bagarapim man na ol man husat i save strongim dispela pasin. Long dispela taim, pasin bilong pait na bagarapim man nau i stap long graun em bai pinis, na “olgeta manmeri na olgeta samting long graun bai i save tru long biknem na strong bilong Bikpela. Dispela save bai inapim olgeta hap graun olsem solwara i inapim mak bilong en olgeta.”​—⁠Habakuk 2:⁠14.

[Piksa long pes 30]

Pasin bilong pait i kirap long taim Kein i kilim Abel i dai