Pait i Stap Long Olgeta Hap

DRAIVA i sindaun long ka na i wetim grinpela lait i kamap. Wantu em i lukim wanpela traipela man i wokabaut i kam na em i singaut bikmaus na tok nogut long em na brukim han long em. Kwiktaim draiva i lokim ol dua na pasim ol windo bilong ka, tasol man hia i kam yet. Em i seksekim ka na wok long pulim han bilong dua. Bihain em i belhat na em i brukim han na paitim bikpela glas long ka na i bruk olgeta.

Olsem wanem? Ating em i wanpela pilai i kamap long piksa wokabaut? Nogat! Dispela kros i bin kamap tru long wanpela rot long Oahu, long Hawaii, em i gat nem olsem ples bilong bel isi na ol man i stap isi tasol.

Yumi no kirap nogut long dispela kain pasin i kamap. I gat planti samting long nau, olsem ol dua i gat lok, na i gat sekyuriti-ba long ol windo, na ol lain sekyuriti bilong was long ol bikpela haus na stua samting, na i gat ol toksave long ol bas i tok, “Draiva i no save karim mani”​—⁠ol dispela samting i kamapim klia wanpela samting olsem: Pait na bagarapim man i stap long olgeta hap!

Pait Insait Long Famili

Inap longtaim tru, ol manmeri i tingim haus bilong ol em i ples bilong i stap bel isi. Tasol dispela kain tingting i wok long senis hariap. Long olgeta hap ol nius i stori long pait na bagarapim man i kamap insait long planti famili​—⁠ol i paitim nogut ol pikinini na mekim pasin nogut long ol, o paitim poroman, o kilim i dai wanpela insait long famili.

Nius Manchester Guardian Weekly i kamapim wanpela ripot olsem, “inap olsem 750,000 pikinini long Briten ol i save lukim pait i kamap insait long famili na dispela inap bagarapim tingting na bel bilong ol na ol i stap olsem inap longtaim tru. Na lain bilong kisim dispela ripot ol i kisim save olsem: “Long olgeta 4-pela 4-pela meri ol i bin askim ol long dispela samting, 3-pela i tok ol pikinini bilong ol i bin lukim pait i kamap insait long famili, na 2-pela long ol 3-pela 3-pela pikinini ol i bin lukim papa i paitim mama bilong ol.” Na nius U.S.News & World Report i kamapim tok bilong wanpela lain bilong gavman long Amerika i gat wok long helpim ol pikinini em papa o mama i bin paitim ol nogut o ol i no lukautim ol, na dispela lain i tok, ol i ting olsem “2,000 pikinini, em planti ol i no winim yet 4-pela krismas, ol i dai long bagarap ol i bin kisim long han bilong papamama o long wanpela i save lukautim ol.” Ripot i tok, dispela i winim namba bilong ol man i dai long bagarap i bin painim ol long rot o long taim ol i waswas long solwara o long taim ol i pundaun.

Na sampela pait i kamap insait long famili, em olsem: Wanpela marit i subim nabaut poroman bilong em, o paitim long han, o kikim em, o pasim win bilong em, o paitim em nogut, o holim naip o gan na tok long bagarapim em, o kilim em i dai tru. I no ol man tasol i save mekim olsem​—⁠ol meri tu i save mekim. Wanpela lain i skelim ol pait i kamap namel long ol marit na ol i tok, long olgeta 4-pela 4-pela pait, wanpela pait em man yet i kirapim, na wanpela pait em meri yet i kirapim, na long ol narapela taim em tupela i pait wantaim, olsem na tupela wantaim i gat asua.

Pait Long Ples Wok

Long bipo, ples wok em i wanpela ples ol man i save stap gut na ol samting i wok stret, na narapela i save tingim narapela na mekim gutpela tok long em. Tasol long nau i no olsem. Ripot bilong wanpela dipatmen bilong gavman long Amerika (U.S. Department of Justice) i tok, long olgeta yia winim 970,000 ol i kisim nogut long ol pait i kamap long ples wok. Na nius Professional Safety​​—⁠Journal of the American Society of Safety Engineers i stori long dispela samting na i tok, “long olgeta 4-pela 4-pela wokman, wanpela bai kisim nogut long pait i kamap long ples wok.”

Tasol long nau ol pait i kamap long ples wok i no ol liklik pait nating o pait long maus tasol. Dispela nius i tok, ‘pasin bilong pait long ol bos na ol narapela wokman na kilim ol i dai, em wanpela hevi i wok long i go bikpela tru long Amerika.’ Long 1992, wanpela long olgeta 6-pela 6-pela i bin i dai long bagarap em i kisim long ples wok, em wanpela wanwok i bin kilim em i dai; na namel long ol meri, wanpela long olgeta 2-pela 2-pela i dai long ples wok, em wanpela meri i bin kilim em i dai. Tru tumas, pait na bagarapim man i kamap bikpela tru long ol ples wok, bipo em i ples bilong i stap gut na ol samting i wok stret.

Pait Insait Long Spot na Amamas

Bipo ol man i bin ting, spot na ol narapela kain amamas em samting bilong givim malolo na nupela strong long ol, na bai ol i gat strong long mekim ol wok bilong ol. Tasol long nau ol samting bilong kisim amamas long en, olsem ol piksa wokabaut o video samting, em i wanpela bikpela wok bisnis tru ol i save kisim planti bilion dola long en. Bilong kisim bikpela winmani moa long dispela bisnis, ol man bilong wokim ol dispela samting bilong amamas ol i save mekim wok long kain kain samting bilong kirapim ol man long laikim ol dispela amamas. Na wanpela samting ol i mekim wok long en, em ol piksa bilong pait na bagarapim man.

Olsem: Nius Forbes i tok, wanpela kampani i save wokim ol pilai long video-kaset i wokim wanpela kain pilai bilong pait em ol man i save laikim tru, na long dispela pilai wanpela man bilong pait em i katim na rausim het bilong birua bilong em na bun bilong baksait, na ol man i lukim dispela pait ol i singaut, “Kilim em! Kilim em!” Narapela kampani bilong wokim pilai long video-kaset i wokim wanpela olsem, tasol ol i no putim dispela hap piksa bilong katim na rausim het samting bilong man. Orait, yu ting ol man i strong long baim wanem video-kaset? Ol i baim planti bilong dispela namba wan video i gat dispela hap piksa nogut long en, winim dispela namba 2 video. Yumi ken skelim olsem: Ol i baim 3-pela bilong namba wan video na 2-pela bilong namba 2 video. Em nau, ol i kisim bikpela mani tru long dispela video. Taim ol i kamapim ol dispela video-kaset bilong ol man i ken baim, ol i kisim 65 milion dola long en insait long tupela wik tasol! Ol kampani i save tingim winmani, na ol i mekim wok long ol piksa bilong pait na bagarapim man olsem abus bilong pulim ol man long baim ol dispela video-kaset.

Ol pait i kamap insait long ol spot i narapela kain long dispela. Ol man insait long pilai ol i amamas long bagarapim skin bilong narapela. Long 1990, long wanpela pilai ol i kolim hoki, inap 86 taim ol i mekim sampela pasin olsem​—⁠em i winim olgeta taim bipo. Bikpela pait tru i bin kamap long dispela pilai na em i stap inap 3 na hap aua. Wanpela man i kisim planti bagarap, olsem wanpela bun bilong pes i bruk, na ol i skrapim nogut wanpela ai bilong em, na katim skin bilong em, na ol lain olsem dokta i mas stretim. Bilong wanem i gat ol dispela pait insait long spot? Wanpela man bilong pilai hoki i tok: “Sapos yu winim wanpela pilai ol i givim bel tru long mekim, na i gat planti pait i kamap long en, orait taim yu go bek long haus bai yu pilim olsem yu pas gut wantaim ol wanpilai bilong yu. Mi ting olsem ol pait i mekim na ol dispela pilai i samting tru bilong spirit.” Insait long planti spot long nau, pait i no samting ol i mekim bambai ol i ken winim pilai, nogat; em i wanpela hap bilong dispela pilai yet.

Pait Insait Long Skul

Long bipo, skul em ples ol yangpela inap lusim tingting long ol narapela samting na ol i ken wok strong long helpim tingting na skin bilong ol long kamap gutpela. Tasol long nau ol skul i no ples bilong i stap bel isi. Wanpela lain i skelim dispela samting long 1994 na ol i tok, nambawan hevi bilong ol skul gavman long Amerika, em pait na pasin bilong bung wantaim na paitim ol narapela long skul; tasol dispela lain i tok, long 1993, nambawan hevi bilong ol dispela skul, em ol i sot long mani. Tasol tru pasin pait i go bikpela tru long ol skul, o olsem wanem?

Wanpela lain i bin askim ol sumatin, “Wanpela i bin paitim yu insait long skul o ausait?” Wanpela long olgeta 4-pela 4-pela sumatin ol i tok yes. Na long olgeta 10-pela 10-pela tisa, wanpela i tok, yes, ol i bin mekim olsem long em. Na dispela lain i tok, inap 13 pesen bilong ol sumatin, em ol manki na ol yangpela meri wantaim, ol i tokaut olsem sampela taim ol i bin karim naip o gan i go long skul. Planti ol i tok, ol i bin mekim bilong pretim ol narapela o bilong lukautim skin bilong ol yet. Tasol wanpela sumatin i gat 17 krismas em i sutim tisa bilong em taim tisa i laik kisim gan long em.

Pait Em Pasin Bilong Nau

Tru tumas, long nau pait i pulap long olgeta hap. Insait long famili, long ples wok, long skul, long ol spot na video samting, i gat pait na bagarapim man. Long olgeta de ol man i save lukim o harim stori bilong en, olsem na ol i no kirap nogut moa long en​—⁠ol i ting, em pasin bilong yumi ol man tasol. Tasol taim ol yet i kisim nogut long han bilong wanpela raskol, ol i askim olsem: ‘Pasin bilong pait na bagarapim man em bai pinis o nogat?’ Ating yu tu yu laik save long bekim bilong dispela askim, a? Sapos olsem, orait kaunim stori i kamap bihain long dispela.