Tingting Bilong Ol Narapela Long Yumi—Em i Bikpela Samting o Nogat?
KLOSTU olgeta man i laik bai ol narapela i litimapim nem bilong ol. Taim narapela i mekim gutpela tok amamas long yumi, dispela inap mekim gut bel bilong yumi, yumi pilim olsem yumi bin mekim gutpela wok. Tok amamas bilong ol narapela inap mekim na yumi gat laik long mekim gut moa wok bilong yumi. Tasol yumi no save amamas taim yumi luksave olsem sampela i no laikim yumi. Sapos wanpela i bekim tok long pasin i no gutpela o sutim tok long yumi, dispela inap bagarapim bel bilong yumi. Tingting bilong ol narapela long yumi inap mekim bikpela samting long tingting yumi gat long yumi yet.
Bai yumi popaia stret sapos yumi no tingim liklik tingting ol narapela i gat long yumi. Sapos ol narapela i skelim pasin bilong yumi, dispela inap helpim yumi. Taim ol stretpela stiatok i as bilong en, tingting bilong ol narapela inap kamapim gutpela samting, em inap kirapim yumi long bihainim stretpela pasin. (1 Korin 10:31-33) Tasol planti taim tingting bilong ol narapela i no stret. Tingim tingting nogut ol bikpris na ol narapela man i gat long Jisas Krais taim “ol i singaut olsem, ‘Kilim em! Kilim em! Nilim em long diwai.’ ” (Luk 23:13, 21-25) Ating yumi mas lusim tingting tasol long tingting kranki bilong ol man em tok giaman o pasin jeles o pasin bilong tingting nogut long narapela skin o lain i as bilong en. Olsem na yumi mas skelim gut ol samting na bihainim gutpela tingting taim ol narapela i kamapim tingting bilong ol.
Tingting Bilong Husat i Bikpela Samting?
Yumi laik bai ol lain i pas wantaim yumi long lotu i tru i amamas long yumi. Insait long dispela lain em famili bilong yumi husat i bilip na ol brata na sista Kristen bilong yumi. (Rom 15:2; Kolosi 3:18-21) Pasin bilong ol wanbilip long laikim, na rispektim, na “strongim bel” bilong narapela narapela i bikpela samting long yumi. (Rom 1:11, 12) Yumi ‘daunim yumi yet na ting pasin bilong ol arapela i winim pasin bilong yumi.’ (Filipai 2:2-4) Na tu, yumi laik bai “ol lida” bilong yumi—em ol elda bilong kongrigesen—i amamas long yumi na i ting yumi gutpela samting.—Hibru 13:17.
Yumi laik bai yumi gat “gutpela nem namel long ol man i stap ausait long sios.” (1 Timoti 3:7) Taim ol wanblut i no bilip, ol wanwok, na ol neiba i rispektim yumi, dispela i save strongim bel bilong yumi! Na yumi mekim gutpela pasin long ol man yumi autim tok long ol bambai ol i ken amamas long harim tok bilong Kingdom. Taim yumi gat gutpela nem long komiuniti, olsem yumi man bilong bihainim stretpela pasin na yumi no save giaman, dispela i litimapim nem bilong God. (1 Pita 2:12) Tasol yumi no ken kalapim sampela stiatok bilong Baibel bambai ol narapela i amamas long yumi, na tu, yumi no ken giaman na mekim sampela pasin bilong grisim ol narapela long laikim yumi. Yumi mas save olsem yumi no inap amamasim olgeta man. Jisas i tok: “Sapos yupela i stap olsem ol man bilong dispela graun, orait ol manmeri bilong graun ol inap laikim yupela olsem ol lain bilong ol yet. Tasol yupela i no man bilong dispela graun. Nogat. Mi makim yupela pinis bai yupela i lusim pasin bilong dispela graun. Olsem na ol manmeri bilong graun i save birua long yupela.” (Jon 15:19) Olsem wanem? Yumi inap mekim sampela samting bambai ol birua i rispek long yumi?
Mekim Ol Samting Bambai Ol Birua i Rispek Long Yumi
Jisas i mekim tok lukaut: “Olgeta man bai i bel nogut tru long yupela, long wanem, nem bilong mi em i stap long yupela. Tasol ol manmeri i stap strong inap long las de, God bai i kisim bek ol.” (Matyu 10:22) Sampela taim dispela pasin birua i kirapim ol man long sutim kain kain tok. Ol bikman bilong gavman i tingting nogut long yumi, ol inap tok yumi birua long gavman o yumi laik daunim gavman. Ol birua inap tok yumi wanpela liklik lain lotu i save kamapim hevi na ol i mas daunim yumi. (Aposel 28:22) Sampela taim yumi inap daunim ol dispela tok giaman. Olsem wanem yumi inap mekim? Long rot bilong bihainim tok bilong aposel Pita, em i tok: “Sapos ol i askim yupela long as bilong dispela gutpela samting yupela i wetim i stap, orait yupela i mas redi oltaim long bekim tok long ol.” (1 Pita 3:15) Na tu, yumi mas “mekim stretpela tok tasol, orait ol man bai i no inap painim rong long en. Na ol birua bai i no inap mekim tok nogut long yumi. Nogat. Ol bai i sem long tingting nogut bilong ol.”—Taitus 2:8.
Taim yumi traim long mekim ol samting bilong stretim bek nem bilong yumi, i no gat as na yumi mas bel hevi o tingting planti taim ol man i sutim tok giaman long yumi. Ol man i sutim tok long Jisas, em i Pikinini Bilong God na em i no gat sin, ol i tok em i toknogutim God, em i birua long gavman, na i mekim wok bilong ol spirit nogut. (Matyu 9:3; Mak 3:22; Jon 19:12) Ol man i tok nogut tru long aposel Pol. (1 Korin 4:13) Jisas na Pol i no wari long ol dispela tok ol man i sutim na ol i bisi long mekim wok bilong ol. (Matyu 15:14) Ol i save olsem ol birua bai i no inap laikim ol, long wanem, “dispela graun olgeta em i stap aninit long strong bilong Satan.” (1 Jon 5:19) Wankain hevi i painim yumi long nau tu. I no gat as na yumi mas pret taim ol birua i sutim kain kain tok giaman long yumi.—Matyu 5:11.
Tingting Bilong Ol i Bikpela Samting
Tingting ol man i gat long yumi i narapela narapela. Astingting bilong ol yet na ol tok ol i harim ol narapela i mekim long yumi i stiaim tingting bilong ol. Sampela i litimapim nem bilong yumi, sampela i toknogutim yumi na ol i nolaik tru long yumi. Tasol sapos yumi bihainim ol stiatok bilong Baibel, i gat as na yumi ken stap amamas na bel isi.
Aposel Pol i tok: “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi na bilong skulim yumi long ol pasin i stret long ai bilong God. Olsem na dispela tok i mekim yumi ol manmeri bilong God i kisim tru olgeta gutpela pasin, na em i mekim yumi i redi long mekim olgeta kain gutpela wok.” (2 Timoti 3:16, 17) Sapos yumi larim Tok Bilong God i stiaim yumi long olgeta samting, orait God Jehova na Pikinini bilong em, Jisas Krais, ol bai laikim yumi. Tingting bilong ol—bilong Jehova na Pikinini bilong em—dispela em i bikpela samting. Tingting bilong ol long yumi i kamapim klia yumi wanem kain man tru. Sapos ol i orait long yumi, long dispela rot tasol yumi inap kisim laip.—Jon 5:27; Jems 1:12.
[Rait long pes 30]
“Mi sem taim ol narapela i litimapim nem bilong mi, long wanem, insait long bel bilong mi, mi gat bikpela laik long ol narapela i mas mekim olsem.”—MAN INDIA I SAVE RAITIM OL STORI, RABINDRANATH TAGORE
[Ol Piksa long pes 31]
Tingting bilong ol wanbilip i bikpela samting
[Piksa Kredit Lain long pes 30]
Culver Pictures