Ol Kristen i Mekim Wanem Taim Ol Man i Bagarapim Nem Bilong Ol?

YU PILIM olsem wanem taim wanpela man i bagarapim nem bilong yu na sutim sampela tok giaman long yu? Yu bel hevi tru, a? Kain samting olsem i save painim ol Witnes Bilong Jehova taim ol man i sutim sampela tok giaman long ol long ol nius. Tasol maski olsem, ol Witnes i ken stap amamas yet, olsem Jisas i tok long Matyu 5:​11, 12.

Wanpela nius Katolik long Jemani i bin tok, “olgeta wan wan Witnes i mas givim 17 i go inap 28 pesen bilong mani bilong ol i go long hetkota bilong lotu bilong ol.” Tasol dispela tok i giaman, long wanem, mani bilong lukautim wok bilong ol Witnes Bilong Jehova i kam long ol kontribusen ol man i givim long laik bilong ol yet. Dispela tok giaman i paulim planti man, na ol Witnes Bilong Jehova i bel hevi long dispela. Tasol ol Kristen tru i mas mekim wanem taim ol man i bagarapim nem bilong ol long ol nius?

Piksa Ol Kristen i Ken Bihainim

Matyu sapta 23 i stori long Jisas i kotim ol bikman bilong lotu i bin birua long em, long wanem, ol i man bilong tupela maus na giaman. Olsem wanem? Dispela i makim pasin ol Kristen long nau i ken bihainim taim ol man i sutim tok long ol? Nogat. Pikinini bilong God i kotim ol dispela man, long wanem, em i gat bikpela namba tru na em i save long tingting na bel bilong ol, na em i kotim ol bilong helpim ol man i harim dispela tok.

Matyu 15:​1-11 i stori long ol man i sutim tok long Jisas, long wanem, ol man i tok ol disaipel bilong em i no bihainim pasin bilong ol Juda. Jisas i mekim wanem taim ol man i sutim dispela tok long em? Em i no surik. Sampela taim, Jisas i kamapim ples klia tingting kranki bilong ol man i sutim tok long em. Olsem na i no gat rong sapos ol Kristen long nau i laik stretim sampela tok giaman long wok o bilip bilong ol, na ol i kamapim klia tok tru bilong dispela samting. Ol i mekim olsem bilong helpim ol man i gat gutpela bel long save olsem, tok ol man i sutim long ol Witnes Bilong Jehova i no gat as bilong en na i giaman.

Tasol liklik taim bihain Jisas i mekim wanem taim ol disaipel i tokim em: “Ating yu save olsem ol Farisi i harim dispela tok bilong yu na ol i bel nogut?” Ol Farisi i “bel nogut”​—⁠ol i no bel hevi tasol, nogat; ol i kamap birua tru bilong Jisas na Jisas i givim baksait olgeta long ol. Olsem na em i tokim ol: “Yupela i no ken wari long ol dispela man. Ol i olsem ol aipas, na ol i laik soim rot long ol arapela.” Em i no laik toktok moa long kain birua olsem, long wanem, dispela i no helpim wanpela man, na em bai kamapim tok pait nating tasol. (Matyu 7:6; 15:​12-14; skelim wantaim 27:​11-14.) Tok Jisas i bekim long ol i soim olsem i gat “taim bilong pasim maus na taim bilong toktok.”​—⁠Saveman 3:⁠7.

Ol Witnes Bilong Jehova i no ting olgeta man bai litimapim nem bilong ol. Ol i tingim tok bilong Jisas olsem: “Sapos olgeta man i litimapim nem bilong yupela, orait yupela lukaut. Bipo ol tumbuna bilong ol i save mekim wankain pasin long ol giaman profet.” (Luk 6:26) Wanpela taim ol man i bin askim namba wan presiden bilong Sosaiti Was Taua bilong wanem em i no bekim tok long ol man i sutim tok long em. Em i bekim tok olsem: “Sapos yu wokabaut long rot na olgeta taim yu sanap na kikim ol dok i save singaut long yu, bai yu no inap kamap long hap yu laik go long en.”

Yumi no ken larim ol tok giaman bilong sampela birua i pulim nabaut tingting bilong yumi long mekim wok bilong God. (Song 119:69) Yumi mas tingim wok bilong ol trupela Kristen, em wok autim tok. Na long dispela rot bai yumi inap bekim sampela askim long wok bilong yumi na tokaut long as tru bilong dispela wok, taim yumi helpim ol man long bihainim stretpela pasin na skulim ol long Tok Bilong God.​—⁠Matyu 24:14; 28:​19, 20.

Bai Yumi Bekim Tok?

Jisas i tokim ol disaipel bilong em: “Yupela i no man bilong dispela graun. . . . Olsem na ol manmeri bilong graun i save birua long yupela.” (Jon 15:19) Dispela em i as na planti nius i save bagarapim nem bilong ol Witnes Bilong Jehova, olsem na mobeta yumi sakim kain tok olsem. Tasol ating sampela taim ol nius i no gat stretpela save long ol Witnes, olsem na ol i kamapim tok i no stret o ol i paulim tok bilong bagarapim nem o wok bilong ol Witnes. Ating sampela niusman i kisim sampela tok long ol man i bel nogut long ol Witnes na raitim sampela stori giaman i sutim ol. Yumi inap sakim ol tok giaman ol nius i kamapim long yumi o yumi ken mekim sampela samting i stret bilong helpim tok i tru, tasol pastaim yumi mas skelim wanem samting i bin kirapim ol long mekim dispela tok, na husat i as bilong dispela tok, na em i gat wanem tingting na em i mekim.

Sampela taim yumi ken stretim kain tok olsem long rot bilong wanpela pas yumi raitim long edita bilong nius, sapos em bai prinim olgeta tok bilong pas. Tasol sampela taim kain pas olsem i no save stretim dispela hevi. Long dispela rot planti man moa inap kamapim tok giaman, na ol birua i gat rot bilong prinim sampela tok giaman moa. Planti taim i gutpela sapos ol elda i skelim​—⁠em i gutpela long raitim wanpela pas long edita o nogat. Sapos wanpela tok long nius i mekim na ol man i bel nogut long ol Witnes, brens-ofis bilong Sosaiti Was Taua inap tokim ol kongrigesen long dispela kantri long as tru bilong hevi, na long dispela rot ol pablisa inap bekim gut ol askim bilong ol man i givim askim long ol.

Olsem wanem? Yumi wan wan i mas insait long bekim kain tok giaman olsem? Taim sampela birua olsem i sutim tok long yumi, yumi ken tingim tok bilong Jisas olsem, “Yupela i no ken wari long ol dispela man.” Tok bilong Baibel i as na ol gutpela Kristen i save klia olgeta long ol man i bikhet na lusim Jehova na long ol tok bilong ol. (1 Korin 5:​11-13; Taitus 3:​10, 11; 1 Jon 2:19; 2 Jon 10, 11) Sapos wanpela man i laik save tru long tok ol i sutim long ol Witnes i tru o nogat, klostu olgeta taim gutpela save bilong yu yet bai inap long helpim yu long bekim tok.​—⁠Lukim Wastaua bilong Disemba 1, 1986, pes 15 na 16.

Sapos yu kaunim sampela tok giaman long nius, tingim tok bilong Sindaun 14:15: “Ol man i gat liklik save tasol, ol i save bilipim olgeta kain tok. Tasol man i gat gutpela tingting, em i save was gut long ol pasin em i mekim.” Long Swiselan planti man i bin bel nogut taim ol i kaunim wanpela ripot long nius i stori long wanpela yangpela meri Witnes i dai, long wanem, famili bilong em i no larim ol dokta na nes i givim blut long em. Olsem wanem? Dispela stori i bin tok tru? Nogat. Yangpela Witnes i sakim blut, long wanem, em i bilip long Baibel, tasol em i orait long kisim sampela narapela marasin i no gat blut. Sapos kwiktaim ol dokta i givim dispela marasin long em ating em i no ken dai. Tasol sori tru, ol dokta i no givim dispela marasin kwiktaim long em, na em i dai. Nius i no bin stori long dispela samting.

Olsem na skelim gut​—⁠kain ripot olsem i kamapim tok tru o nogat. Yumi ken tokim ol man i laik save long dispela samting olsem long gutpela pasin ol elda bilong kongrigesen i save stretim kain hevi olsem na mekim ol samting i stret long tok bilong Baibel. Sapos yumi bihainim tok bilong Baibel taim yumi bekim tok long man, dispela bai helpim yumi na yumi no kamapim tok kranki o mekim longlong pasin.​—⁠Sindaun 18:⁠13.

Kisim Gut Save

Long taim bilong ol aposel ol man i kamapim planti tok giaman long Krais Jisas bilong bagarapim gutnem bilong em, na sampela i tok em i laik daunim gavman. (Luk 7:34; 23:2; skelim wantaim Matyu 22:21.) Bihain, planti pasin birua i painim nupela lain Kristen long rot bilong ol lotu giaman na gavman. “Ol man God i makim, em ol man i gat kranki tingting long ai bilong ol arapela man,” olsem na planti man i ting ol Kristen i olsem man nating tasol. (1 Korin 1:​22-29) Ol trupela Kristen long nau i mas save, wanpela pasin birua ol man bai mekim long ol em long rot bilong bagarapim gutnem bilong ol.​—⁠Jon 15:⁠20.

Tasol ol Witnes Bilong Jehova i amamas sapos ol inap toktok long wanpela man i gat wankain tingting olsem ol man i toktok wantaim aposel Pol long Rom, ol i tok: “Tasol mipela i laik harim yu yet yu autim tingting bilong yu, long wanem, mipela i save, long olgeta ples, ol manmeri i save mekim tok nogut long dispela nupela lain i bin kamap namel long yumi Juda.”​—⁠Aposel 28:⁠22.

Long pasin isi stretim tingting bilong man i gat tingting kranki long yumi. (Rom 12:14; skelim wantaim 2 Timoti 2:25.) Tokim ol long kisim stretpela save long maus bilong ol Witnes Bilong Jehova, na dispela bai helpim ol long save long tok giaman bilong ol man. Na yu ken mekim wok long sampela tok i stap long ol buk Sosaiti Was Taua i wokim na ol i stori long samting bilong oganaisesen, na long wok bilong ol long bipo i kam inap long nau, na long ol bilip bilong ol.a Wanpela taim Filip i bekim tok long Nataniel na em i tokim em, “Yu kam lukim.” (Jon 1:46) Yumi tu ken singautim man long kam lukim yumi ol Witnes. Yumi amamas long man i gat laik long save long ol Witnes i kam long Haus Kingdom na em yet i ken save, ol Witnes Bilong Jehova i wanem kain man na ol i gat wanem kain bilip.

No Ken Pret Long Ol Birua

Mipela i amamas long save, pasin birua i no save pasim sampela man long kamap Witnes! Long wanpela program long televisen long Jemani, sampela man i bikhet na lusim Jehova i sutim planti tok giaman long ol Witnes. Wanpela man i lukim dispela program i save ol dispela tok ol man i mekim i giaman tasol, na em i kirapim gen Baibel-stadi bilong em wantaim ol Witnes. Tru tumas, sampela taim pasin birua i kamapim gutpela samting.​—⁠Skelim wantaim Filipai 1:​12, 13.

Aposel Pol i bin save, sampela man bai amamas long putim yau long “ol kain kain stori nating,” winim tok i tru. Olsem na em i tok: “Tasol yu yet yu mas tingting klia oltaim. Yu mas karim ol hevi na pen. Yu mas mekim wok bilong autim gutnius long ol manmeri. Yu gat wok bilong helpim ol manmeri, na yu mas mekim tru dispela wok.” (2 Timoti 4:​3-5) No ken larim ol samting i pulim nabaut tingting bilong yu, na ‘ol birua i mekim yu i pret.’ (Filipai 1:28) Yu mas i stap isi na bihainim gutpela tingting na amamas long autim gutnius, na bai yu sanap strong long taim ol man i sutim kain kain tok giaman long yu. Tingim promis bilong Jisas: “Sapos ol i lukim yupela i stap long lain bilong mi, na ol i tok nogut long yupela na ol i mekim nogut long yupela na sutim kain kain tok giaman long yupela, orait yupela i ken amamas. Yupela i ken belgut na amamas tru, long wanem, bikpela pe i wetim yupela long heven. Ol man i bin mekim ol wankain pasin nogut long ol profet i bin i go paslain long yupela.”​—⁠Matyu 5:​11, 12.

[Ol Futnot]

[Rait long pes 27]

Taim ol birua i sutim tok long Jisas, em i tokim ol disaipel: “Yupela i no ken wari long ol dispela man.” Bilong wanem em i tok olsem?

[Rait long pes 29]

“Sapos ol i lukim yupela i stap long lain bilong mi, na ol i tok nogut long yupela na ol i mekim nogut long yupela na sutim kain kain tok giaman long yupela, orait yupela i ken amamas.”​—⁠Matyu 5:⁠11