Ol Man i Birua Nating Long Ol

“Ol man i birua nating long mi.”​—⁠JON 15:⁠25.

1, 2. (a) Bilong wanem sampela i paul taim ol man i mekim ol tok i daunim ol Kristen? Bilong wanem yumi no kirap nogut long ol man i mekim kain tok olsem? (b) Wanem mining bilong dispela tok “birua” em dispela stadi bai stori long en? (Lukim sta.)

OL WITNES BILONG JEHOVA i wok strong long bihainim ol stiatok bilong Baibel. Olsem na long planti kantri ol i gat gutnem. Tasol sampela taim ol man i giaman taim ol i stori long ol Witnes i wanem kain lain. Olsem: Wanpela bikman bilong gavman long St. Petersburg, Rasia, i tok: “Ol man i bin mekim olsem ol Witnes Bilong Jehova ol i narakain lain husat i wok hait long ples tudak na kilim i dai ol pikinini na ol yet.” Tasol bihain long em i wok wantaim ol Witnes long wanpela kibung intenesenel, dispela man i tok: “Nau mi lukim lain i wankain olsem ol narapela, ol i lain bilong amamas . . . Ol i stap wanbel na bel isi, na ol i laikim tru ol arapela.” Em i tok moa: “Mi no kliagut long as na ol man i giaman olsem taim ol i stori long ol.”​—⁠1 Pita 3:⁠16.

² Lain bilong God i no amamas long giaman toktok olsem ol i man nogut, tasol ol i no kirap nogut taim ol man i kamapim ol tok i daunim ol. Jisas i bin tokim lain bilong em: “Sapos ol manmeri bilong graun i birua long yupela, orait yupela i no ken lusim tingting, pastaim ol i bin birua long mi tu. . . . Em i kamap bilong inapim wanpela tok i stap long lo bilong ol. Dispela tok em i olsem, ‘Ol man i birua nating long mi.’ ”a (Jon 15:​18-20, 25; Song 35:19; 69:⁠4) Bipo em i bin tokim ol disaipel bilong em: “Ol i bin givim nem Belsebul long papa bilong haus, olsem na yumi save, ol bai i givim ol nem i nogut moa yet long ol lain bilong en.” (Matyu 10:25) Ol Kristen i kliagut olsem hevi ol i karim long ol man i tok nogut long ol em hap wok bilong karim dispela “diwai” ol i kisim long taim ol i kirap bihainim Krais.​—⁠Matyu 16:⁠24.

3. Ol man i bin mekim nogut long ol lain i lotu tru long God o nogat? Stori long dispela.

³ Kirap long bipo yet ol man i bin mekim nogut long ol lain i lotu tru long God, stat long taim bilong ‘stretpela man Abel’ na i kam. (Matyu 23:​34, 35) Na i no bin kamap wan wan taim tasol. Jisas i tok long lain bilong em olsem “olgeta man bai i bel nogut tru long” ol, long wanem, nem bilong em i stap long ol. (Matyu 10:22) Na tu, aposel Pol i bin tok olgeta wokboi bilong God​—⁠em yumi olgeta wan wan​—⁠i mas save olsem ol man bai mekim nogut long yumi. (2 Timoti 3:12) I gat wanem as bilong dispela?

As Bilong Pasin Bilong Birua Nating

4. Olsem wanem Baibel i kamapim klia as bilong olgeta pasin bilong birua nating?

⁴ Baibel i kamapim olsem kirap long bipo yet na i kam wanpela man em yumi no inap lukim i as bilong dispela pasin. Tingim dai bilong namba wan bilipman, Abel. Baibel i tok brata i kilim em i dai, Kein, em i “man bilong Satan.” (1 Jon 3:12) Kein i kisim pasin bilong Satan, na Satan i yusim Kein bilong inapim wok nogut bilong em. Na tu, Baibel i kamapim olsem wanem Satan i helpim wok bilong mekim nogut long Jop na Jisas Krais. (Jop 1:12; 2:​6, 7; Jon 8:​37, 44; 13:27) Buk Kamapim Tok Hait i makim klia as bilong dispela pasin bilong mekim nogut long ol lain i bihainim Jisas, em i tok: ‘Satan bai i kalabusim sampela man namel long yupela, bilong traim yupela.’ (KTH 2:10) Yes, Satan em i as bilong dispela pasin bilong birua nating long ol manmeri bilong God.

5. Bilong wanem Satan i birua long ol man i lotu tru long God?

⁵ Bilong wanem Satan i birua long ol man i lotu tru long God? Long pasin i soim olsem em i hambak tru, Satan i salensim “King bilong olgeta taim,” God Jehova. (1 Timoti 1:17; 3:⁠6) Satan i tok wok bos bilong God i putim planti tambu tumas long ol manmeri, na i no gat wanpela i mekim wok bilong Jehova wantaim stretpela astingting, ol manmeri i tingting tasol long ol samting ol bai kisim. Satan i tok sapos em i ken traim ol man, em inap kirapim olgeta long lusim God. (Stat 3:​1-6; Jop 1:​6-12; 2:​1-7) Satan i mekim olsem Jehova em i hatpela bos, man bilong giaman, na i no mekim gut wok, long dispela rot em i resis wantaim wok king bilong Jehova. Olsem na Satan i belhat long ol wokboi bilong God, long wanem, em i laik tru long ol man i lotu long em.​—⁠Matyu 4:​8, 9.

6. (a) Olsem wanem yumi yet i insait long dispela bikpela tok long nambawan wok bos bilong Jehova? (b) Olsem wanem pasin bilong kliagut long mining bilong dispela tok i helpim yumi long holimpas bilip? (Lukim blok, pes 16.)

⁶ Yu luksave long olsem wanem dispela tok em i bikpela samting long laip bilong yu? Olsem wanpela wokboi bilong Jehova, yu save pinis long man i mas wok strong sapos em i laik bihainim laik bilong God, tasol i gat planti blesing long mekim olsem. Tasol olsem wanem sapos sindaun bilong yu i mekim na yu gat hatwok, o yu kisim pen long bihainim yet ol lo na stiatok bilong Jehova? Na olsem wanem sapos i luk olsem pasin bilong lotuim Jehova i no helpim yu? Bai yu ting i no gutpela long mekim yet wok bilong Jehova? O bai yu bihainim yet olgeta tok bilong Jehova, long wanem, yu laikim em tru na yu pilim tru ol gutpela pasin bilong em? (Lo 10:​12, 13) Jehova i larim Satan long givim sampela hevi long yumi, dispela i givim rot long yumi wan wan long kamapim bekim bilong yumi yet long tok Satan i sutim long em.​—⁠Sindaun 27:⁠11.

Taim Ol i “Tok Nogut Long Yupela”

7. Wanem wanpela pasin Satan i yusim bilong traim kirapim yumi long lusim Jehova?

⁷ Nau yumi laik skelim gut wanpela pasin trik Satan i yusim bilong helpim tok em i kamapim​—⁠giaman na tok nogut bilong daunim man. Jisas i kolim Satan “papa tru bilong pasin bilong tok giaman.” (Jon 8:44) Satan i go pas long sutim tok giaman long God, long gutpela tok bilong em, na long nem holi bilong em. Em i mekim wok long tok i paulim tingting, sutim tok nating, na tok giaman bilong daunim wok king bilong Jehova, na em i yusim wankain samting bilong nogutim nem bilong ol gutpela wokboi bilong God. Long rot bilong kamapim pasin bilong tok nogut long ol dispela Witnes, em i mekim ol bikpela traim i hatwok moa long karim.

8. Olsem wanem Satan i nogutim nem bilong Jop, na dispela i mekim wanem?

⁸ Tingim hevi i painim Jop, mining bilong nem bilong em, “Man Ol i Birua Long Em.” Satan i mekim na wok skin, ol pikinini, na helt bilong Jop i bagarap, na tu, em i mekim olsem Jop em i sinman husat i kisim strafe long God. Pastaim ol man i rispektim Jop, tasol bihain ol man​—⁠ol gutpela pren na ol wanblut tu​—⁠ol i les tru long em. (Jop 19:​13-19; 29:​1, 2, 7-11) Na long rot bilong ol man i giaman long mekim gut bel, Satan i laik “givim bikpela pen” long Jop, pastaim ol i mekim tok olsem Jop i bin mekim bikpela rong na bihain ol i kotim em stret olsem man bilong mekim pasin nogut. (Jop 4:​6-9; 19:2; 22:​5-10) Jop i mas bel hevi tru!

9. Olsem wanem Satan i mekim olsem Jisas em i man bilong mekim sin?

⁹ Pikinini Bilong God i go pas long sambai long wok king bilong Jehova, olsem na em i nambawan man Satan i birua long en. Taim Jisas i kam long graun, Satan i laik mekim em i luk nogut long samting bilong spirit, olsem em i bin mekim long Jop, em i mekim olsem Jisas em i man bilong mekim sin. (Aisaia 53:​2-4; Jon 9:24) Ol man i tok Jisas i man bilong kaikai planti tumas na dring planti tumas, na ol i tok “wanpela spirit nogut” i stap long em. (Matyu 11:​18, 19; Jon 7:20; 8:48; 10:20) Ol i sutim tok giaman long Jisas na tok em i bin tok bilas long God. (Matyu 9:​2, 3; 26:​63-66; Jon 10:​33-36) Jisas i pilim hevi nogut tru long dispela samting, long wanem, em i save olsem dispela i nogutim nem bilong Papa bilong em. (Luk 22:​41-44) Laspela samting, ol i kilim Jisas i dai long pos diwai olsem wanpela man nogut tru. (Matyu 27:​38-44) Bilong holimpas bilip, Jisas i bin sanap strong na karim bikpela hevi long ‘ol man bilong sin i birua nogut long em.’​—⁠Hibru 12:​2, 3.

10. Long taim bilong yumi, olsem wanem Satan i birua long ol Kristen God i makim em ol i stap yet long graun?

¹⁰ Long taim bilong yumi, Satan i birua moa yet long lain bilong Krais em God i makim na ol i stap yet long graun. Baibel i tok Satan em i “dispela man bilong kotim ol brata bilong [Krais], em i bin kotim ol long ai bilong God bilong yumi long san na long nait.” (KTH 12:​9, 10) Kirap long taim em i raus long heven na kalabus hia long graun, Satan i wok strong moa long mekim olsem ol brata bilong Krais i olsem rabis samting i doti tru. (1 Korin 4:13) Long sampela kantri ol man i giaman na tok ol i wanpela lotu nogut, wankain olsem ol man i bin tok long ol Kristen long taim bilong ol aposel. (Aposel 24:​5, 14; 28:22) Olsem kirap bilong stori i kamapim, ol tok giaman i bagarapim gutnem bilong ol. Tasol maski ‘sampela man i save litimapim nem bilong ol na sampela i save daunim nem bilong ol, na sampela i save tok baksait long ol na sampela i save tokim ol arapela man long ol i mekim gutpela pasin,’ ol brata bilong Krais em God i makim, na ol poroman bilong ol bilong ol “arapela sipsip,” ol i bin wok strong long ‘bihainim ol lo bilong God na autim tok bilong Jisas.’​—⁠2 Korin 6:8; Jon 10:16; KTH 12:⁠17.

11, 12. (a) Ating i gat wanem as long sampela tok nogut ol man i mekim long ol Kristen? (b) Olsem wanem bilip bilong wanpela Kristen inap mekim na ol man i birua nating long em?

¹¹ Tasol i gat sampela samting i nogutim nem bilong wan wan wokboi bilong God em “stretpela pasin” i no as bilong en. (Matyu 5:10) Pasin kranki bilong yumi yet i as bilong sampela hevi yumi i karim. I no samting bilong amamas long en sapos yumi ‘mekim pasin nogut na ol i paitim yumi, na yumi karim dispela pen.’ Tasol sapos wanpela Kristen ‘i larim God i stiaim tingting bilong em na em i mekim wok, na ol i givim nating pen long em, na em i karim dispela pen, orait God i laikim dispela pasin.’ (1 Pita 2:​19, 20) Olsem wanem samting olsem inap kamap?

¹² Ol man i mekim nogut long sampela, long wanem, ol i sakim ol pasin bilong planim man i no stret long Baibel. (Lo 14:⁠1) Sampela i no isi long tok bilas long ol yangpela Witnes long ol i bihainim ol stretpela lo bilong Jehova long samting bilong maritpasin. (1 Pita 4:⁠4) Ol i sutim tok long ol papamama Kristen na tok ol i “no lukautim gut” o “ol i nogutim” ol pikinini, long wanem, ol i tokim dokta long no ken yusim blut taim ol i helpim pikinini bilong ol. (Aposel 15:29) Ol wanblut na neiba i givim baksait long sampela Kristen long ol i bin kamap wokboi bilong Jehova. (Matyu 10:​34-37) Olgeta Witnes olsem ol i bihainim pasin em ol profet na Jisas yet i makim, ol i karim hevi long ol man i birua nating long ol.​—⁠Matyu 5:​11, 12; Jems 5:10; 1 Pita 2:⁠21.

Karim Hevi Long Tok Nogut

13. Wanem samting inap helpim yumi long stap strong long spirit long taim ol man i strong tru long tok nogut long yumi?

¹³ Taim bilip i as na ol man i tok nogut long yumi, yumi inap bel hevi, olsem profet Jeremaia, na yumi pilim olsem yumi no inap mekim yet wok bilong God. (Jeremaia 20:​7-9) Wanem samting inap helpim yumi long stap strong long spirit? Traim long bihainim tingting bilong Jehova long dispela samting. Long tingting bilong em ol man i stap gut long em long taim bilong traim, ol i olsem man i win, ol i no olsem man ol narapela i daunim. (Rom 8:37) Piksaim long tingting ol man husat i bin stap gut long wok king bilong Jehova maski Satan i mekim save long ol​—⁠em ol man na meri olsem Abel, Jop, Maria em mama bilong Jisas, na sampela arapela bilipman bilong bipo, wantaim ol wanbilip long taim bilong yumi tu. (Hibru 11:​35-37; 12:⁠1) Skelim long bel pasin bilong ol long holimpas bilip. Dispela bikpela lain i stap gut long God ol i singautim yumi long joinim ol olsem ol man i win, em bilip bilong ol i daunim strong bilong dispela graun.​—⁠1 Jon 5:⁠4.

14. Olsem wanem pasin bilong beten strong i ken helpim yumi long stap gut long God?

¹⁴ Sapos yumi ‘bel hevi na tingting planti,’ yumi inap beten strong long Jehova, na em bai mekim gut bel bilong yumi na strongim yumi. (Song 50:15; 94:19) Em bai givim yumi savetingting i helpim yumi long karim hevi na tingim yet olsem bikpela tok Satan i sutim long wok king bilong Jehova em i as bilong dispela pasin bilong birua nating long ol wokboi bilong em. (Jems 1:⁠5) Na tu, yumi inap kisim “bel isi God i save givim.” (Filipai 4:​6, 7) Dispela bel isi God i save givim i helpim yumi long stap isi na stap strong taim yumi gat bikpela traim, olsem na pasin bilong tingting planti na pret i no winim yumi. Long rot bilong spirit bilong em, Jehova inap helpim yumi long winim wanem wanem traim em i larim i kamap long yumi.​—⁠1 Korin 10:13.

15. Wanem samting inap helpim yumi long abrusim pasin bilong bel nogut long man taim yumi karim pen na hevi?

¹⁵ Wanem samting inap helpim yumi na bai yumi no bel nogut long ol man i birua nating long yumi? Tingim gut, nambawan birua bilong yumi em Satan na ol spirit nogut. (Efesus 6:12) Sampela i bihainim laik bilong ol yet na ol i mekim nogut long yumi, tasol planti man i birua long lain bilong God, long wanem, ol i no save gut long ol samting o ol narapela i trikim ol long mekim. (Daniel 6:​4-16; 1 Timoti 1:​12, 13) Jehova i laik “kisim bek olgeta manmeri,” ol i mas i gat rot long “save long as bilong tok tru.” (1 Timoti 2:⁠4) Yes, sampela man em bipo ol i birua, tasol ol i luksave olsem yumi wokabaut stret na nau ol i kamap brata Kristen bilong yumi. (1 Pita 2:12) Na tu, pasin pikinini bilong Jekop, em Josep, i bihainim inap skulim yumi. Ol brata bilong Josep i mekim na em i karim bikpela pen, tasol em i no bel nogut long ol. Bilong wanem? Long wanem, em i luksave olsem Jehova i stiaim ol samting na bai ol samting Em i tingting pinis long mekim inap kamap. (Stat 45:​4-8) Olsem tasol Jehova inap stiaim ol samting na bai pasin bilong ol man long birua nating long yumi i givim biknem long em.​—⁠1 Pita 4:⁠16.

16, 17. Bilong wanem yumi no ken tingting planti long ol samting ol birua i mekim bilong pasim wok autim tok?

¹⁶ Yumi no ken tingting planti sapos i gat haptaim we i luk olsem ol birua i pasim wok bilong autim gutnius. Jehova i wok nau long seksekim ol lain man long rot bilong wok autim tok long olgeta hap, na ol gutpela samting i wok long kam insait. (Hagai 2:​7, NW ) Krais Jisas, em Gutpela Wasman, em i tok: “Ol sipsip bilong mi i save harim maus bilong mi, na mi save long ol, na ol i bihainim mi. Mi givim laip i stap gut oltaim oltaim long ol, . . . Na bai i no gat man inap rausim ol long han bilong mi.” (Jon 10:​27-29) Ol ensel holi tu i insait long wok bilong bungim kaikai bilong gaden spirit. (Matyu 13:​39, 41; KTH 14:​6, 7) Olsem na tok o sampela pasin ol birua i mekim i no inap pasim rot bilong ol samting God i tingting pinis long mekim.​—⁠Aisaia 54:17; Aposel 5:​38, 39.

¹⁷ Planti taim wok bilong ol birua i no mekim samting ol i ting em bai mekim. Long wanpela hap bilong Afrika i gat planti stori giaman long ol Witnes Bilong Jehova, wanpela i tok ol i save lotuim Satan. Dispela i mekim na taim ol Witnes i kam long autim tok, Grace i ran i go baksait long haus inap long ol i go pinis. Wanpela de pasto bilong sios bilong em i apim wanpela buk bilong yumi na tokim ol man olsem ol i no ken ritim, long wanem, em bai kirapim ol long lusim bilip. Dispela i kirapim tingting bilong Grace. Neks taim ol Witnes i kam autim tok, em i no hait, nogat, em i toktok wantaim ol na kisim dispela buk. Em i kirap stadi long Baibel, na long 1996 em i baptais. Nau Grace i lusim taim bilong em long painim ol arapela husat i bin harim sampela kranki stori ol man i mekim long ol Witnes Bilong Jehova.

Strongim Bilip Bilong Yu Nau

18. Bilong wanem yumi mas strongim bilip bilong yumi paslain long ol bikpela traim i kamap? Bai yumi mekim olsem wanem?

¹⁸ Satan i ken kirapim ol man long birua nating long yumi long wanem wanem taim em i laik mekim, olsem na yumi mas strongim bilip bilong yumi nau. Bai yumi mekim olsem wanem? Ripot i kam long wanpela kantri we ol man i bin mekim nogut long ol lain bilong Jehova i tok: “Wanpela samting i stap ples klia: Ol bratasista i gat pasin bilong mekim ol wok bilong spirit na pilim tru tok i tru bilong Baibel, ol i no hatwok long sanap strong long taim ol traim i kamap. Tasol ol bratasista em ol i save lusim ol miting long ‘gutpela taim,’ na autim tok wan wan taim tasol, na lusim lo bilong God taim liklik traim i painim ol, planti taim ol i pundaun taim traim olsem ‘paia’ i painim ol.” (2 Timoti 4:​2, NW ) Sapos yu lukim sampela samting yu mas stretim, wok long mekim kwiktaim.​—⁠Song 119:⁠60.

19. Wanem samting i kamap klia taim ol wokboi bilong God i holimpas bilip maski ol man i birua nating long ol?

¹⁹ Pasin bilong ol man i lotu tru long God long holimpas bilip maski Satan i bel nogut long ol, dispela i kamapim klia i stret Jehova i stap king na i gat rait long em i stap olsem, na stretpela pasin i as bilong wok king bilong em. Pasin bilong ol long stap gut long em i mekim God i amamas. Maski ol man i tok nogut long ol, dispela Man i gat biknem i winim heven na graun em “i no sem” long ol i tok long em olsem: “Yu God bilong mipela.” Em nau, yumi ken tok long ol dispela gutpela bilipman olsem: “Pasin bilong ol arapela manmeri bilong graun i no inap tru long pasin bilong ol dispela manmeri.”​—⁠Hibru 11:​16, 38.

[Futnot]

Yu Inap Stori Long Dispela?

• I gat wanem as na ol man i birua nating long ol man i lotu tru long God?

• Olsem wanem Satan i bin yusim pasin bilong tok nogut long man bilong traim bagarapim pasin bilong Jop na Jisas long stap gut long God?

• Jehova i strongim yumi olsem wanem na bai yumi inap sanap strong maski Satan i birua long yumi?

[Blok/Piksa long pes 16]

Ol i Kliagut Long As Tru Bilong Hevi

Long Yukren, i bin i gat tambu long autim tok bilong Kingdom moa long 50 yia, wanpela Witnes Bilong Jehova long dispela hap i tok: “No ken ting samting i painim ol Witnes Bilong Jehova i olsem pasin i kamap namel long ol man tasol. . . . Planti ol bikman i mekim wok tasol bilong ol. Taim i gat senis long gavman, ol hetman i senis long husat ol i stap gut long en, tasol mipela i stap wankain. Mipela save olsem as tru bilong ol hevi bilong mipela em Baibel i kamapim pinis.

“Mipela i no ting mipela i olsem wanpela lain i karim hevi tasol long ol man i laik daunim ol. Samting i helpim mipela long sanap strong em mipela i kliagut long bikpela tok i kamap long gaden Iden​—⁠olsem i stret God i stap King o nogat. . . . Mipela i stap strong, long wanem, mipela tingim dispela bikpela tok em ol man na King bilong heven na graun i insait long en. Mipela i kliagut long as tru bilong ol samting i kamap. Dispela i mekim mipela i strong na i helpim mipela long holimpas bilip maski hevi i bikpela tru.”

[Piksa]

Victor Popovych, ol i kalabusim em long 1970

[Piksa long pes 13]

Husat i as na ol man i tok nogut long Jisas?

[Ol Piksa long pes 15]

Jop, Maria, na ol wokboi bilong God long taim bilong yumi, olsem Stanley Jones, ol i bin sambai long wok king bilong Jehova